AIFF Club Din Thar Turah Mizo Pali?

¢ Hmingsanga

India rama football-a thuneitu sang ber All India Football Federation chuan tunhnai khan thuchhuah siamin season thar atangin anmahni buatsaih leh enkawl mek, India ram chhunga state hrang hrang football club te inelna sang ber I-League-ah club pakhat neih ve a tul thu sawiin, hemi tihlawhtling tur hian chak taka hmalak mek a ni an ti.

AIFF chuan India ramin World Cup khelh phak ve ngei tumin theitawpin tan a la chho mek zel. Chumi tihhlawhtlinna atan India ram chhunga footballer tha U-21 leh U-23-a khel te lakhawmin, I-League club pakhat din ve a tum nia sawi a ni.

2018-ah India chuan World Cup khel phak ram nih ve ngei tumin theihtawpin hma a la mek zel. Chumi tihlawhtling tur chuan corporate house lian zingah sum leh pai tam tham tak thap ngam engemaw zat an awm. Heng mite inpekna leh insen huamna hi lawm taka dawngin AIFF chuan season thar atangin I-League club pakhat anga enkawlin, India U-21 & U-23 team player thate khungkhawmin enkawl a tum.

AIFF-in a enkawl tur club hian ruahman dan chuan Delhi khawpuiah awmhmun an khuar ang a, he club-a khel player-te chu a tlem berah kum 4 daih contract an ziahpui vek ang. Sum leh pai tam tawk pek an ni ang a, training facilities an dawn tur pawh a changkang thei ang ber a ni ang.

Tuna I-league club hrang hranga player junior deuh, an khelhna club-a first XI hmun chang pha meuh lo, a la junior footballer beiseiawmte fuankhawmtir chu an thil tum pakhat a nih rualin, AIFF club-a player-te hi World Cup 2018-a qualifier khelh tan hun tura ruat 2014-ah chuan India tan player pawimawh an nih theih an beisei a, team tha tak din theih an inbeisei a ni.

AIFF chuan hetianga ruahmanna an siam avang hian company lian tak takte pawh an phur hle niin an sawi. AIFF-in club a din thar turah hian player he club-a khel thei tura riruat chhinah Mizo tlangval pali lai an tel ve a, chungte chu- F Lalrozama leh Jeje Lalpekhlua (Pune FC), Lalrindika Ralte (Churchill Brothers) Malsawmfela (Salgoacar) te an ni.

Engtin nge AIFF hian a kalpui zel dan tur i lo thklir phawt teh ang.

Hetih lai hian AIFF chuan 2011-a Asian Cup khelh tur inbuatsaihna atan Rs 250 million hman a nih tur thu leh India U-23 team Asian Games khel turte inbuatsaihna atan Rs 100 million chu India sorkar laipuia Sports ministry pawhin a pek tawh thu an sawi tel bawk.

Related Posts :