Monday, March 8, 2010

Zawlkhawpui senmei chan ni kha

February ni 26, 1966-ah Laldenga inah MNF hruaitute an inhmukhawm a, zalenna suala beih hun leh zalenna puan hun an ti fel.


"February ni 28, 1966 (Thawhtanni) zanlai dar 12 CHET HUN TUR (Zero Hour) atan an pawm fel a, chumi zanlai pelh chiah, March ni 1, 1966 (Thawhlehni) chu Mizoram Independence puan ni atan ruat a ni.

Hemi tuma telte chu- Laldenga, Sainghaka, R Zamawia, Lalhmingthanga, C Lalkhawliana, H Thangkima, Malsawma Colney, Rev Sakhawliana, Bualhranga, Lalhmuaka, Lallianzuala Sailo, Vanmawia, Lalchhawna leh JF Manliana te an ni.

Mizorama India sipaite beih an tum a, Aizawl, Lunglei leh Champhai-a Assam Rifles te chu beih hmasak tur an ni.

India sipaite chu an bei ta a, India sorkar leh MNF te chu an indo ta. He indona avang hian March ni 5, 1966-ah jet fighter hmangin Mizoram chu beih a ni. Jet fighter hian Aizawl, Khawzawl, Hnahlan, Sangau leh Tlabung te a bei.

Aizawlah chuan MNF sipaite'n Lammual rama Assam Rifles te an hual bet a, chumi chhanchhuak tur chuan indo thlawhna chi hnih- toofani leh hunter hmangin Indian Airforce an rawn thawkchhuak a ni.

Mizo literature-ah rambuai chungchang hi hmuh tur a tam lo; Jet fighter hmanga Zoram beih a nih thu phei chu a tam lo lehzual. Zikpuii Pa novel- "Nunna kawng thuam puiah" tih kha rambuai laia Mizo nula leh tlangval inhmangaihte chanchin tarlanna a ni a, India sipaite chet dan pawh a lang hnem hle. Jet fighter hmanga Zoram beih a nih dan pawh he novel-ah hian a lang.

"Sorkar pui nge nge chuan, thapui a han chhuah takah chuan hma an sawn chho zel a, Aizawl khawpui pawh chu an han la let leh thuai a. A khawpui laili Bara Bazar phei chu an hal fai pak a, Aizawl dawrkai milian hausa pui puite pawh chu in leh lo nei lovin an chavai ta," tiin India sipaite chet dan he novel-ah hian tarlan a ni.

Novel dang, "Nukawki" tihah pawh rambuai lai chanchin leh jet fighter hmanga Zoram beih a nih dan tarlan a ni a, amaherawhchu, sawi tawh angin, he'ng hun rapthlak chanchin hi Mizo literature-ah hmuh tur a tam lo khawp mai.

Rambuai laia mipuite him nana theihtawp chhuahtu Rev Lalngurauva Ralte lehkhabu- "Mizoram buai leh Kohhran" tihah chuan tiang hian jet fighter-in Aizawl a beih avanga mipui manganna tiang hian chungchang tarlan a ni:

"Chhungkua inzawngkhawmin insasenga a rang thei ang bera Aizawl chhuahsan a ngai ta. Puak theih, kaih theih, phurh theih leh ah theih zawng zawng nen bungbawr theihtawpin mahni kawtchhuah lam lam atangin mipui chuan Aizawl an chhuahsan ta nguai nguai mai a ni. Eng chen nge kan kal dawn? Eng tikah nge kan haw leh ang? Engmah a sawi theih tawh loh!" tiin.

"Mihring nunna tih chauh lo chu hetih hun lai hi chuan ui hleih theih a ni tawh meuh lo a ni," a ti bawk.

Related Posts :



No comments:

Post a Comment