Guinness World Records Chu eng nge?

Guinness World Records hi 2000 thleng kha chuan The Guinness Book of Records tih a ni thin. Kum tin lehkhabu tihchhuah a ni a, chutah chuan khawvel puma thil chhinchhiah tlak bikte tarlan niin, mihring thil tih leh khawvela thil thleng chhinchhiah tlak bikte tarlan thin a ni.

He lehkhabu hi khawvel record bu anga ngaih a ni a, eng tik lai pawhin lehkhabu hralh kal ber a ni deuh reng a, US-ah chuan vantlang library atanga ruk hlawh ber a ni!

May ni 4, 1951 khan Sir Hugh Beaver, khatih laia Guinness Breweries managing director chu Ireland-a County Wexford an tiha River Slaney kam North Slob-a ramvak (shhoting party) zingah a tel a, chuta kalte chu Europe-a sava tlan chak ber chungchangah an inhnial a ni. A thenin koshin golden plover chu chak berah an ngai a, a thenin grouse chu chak berah an ngai thung. Sir Beaver pawh chu inhnialnaah chuan a tel ve a ni. Chumi tlai chuan Castlebridge House-a inhnialnaah chuan sava chanchin ziakna lehkhabu rawn kual vel ringawt atang chuan golden plover hi sava chak ber a nih leh nih loh a finfiah theih loh tih a hrechhuak ta a, ngaihtuahna thar a neih phah ta a ni.

Sava tlan chak ber chungchangah chauh ni lovin thil dang dangah pawh inhnialna a tam thei hle dawn a ni tih Beaver chuan a ngaihtuah chhunzawm zel a; chu'ng inhnialnate han thelh theihna tur thil record-na lehkhabu a awm lo tih pawh a hrechhuak bawk. Chutiang inhnialnate thelh theihna tur lehkhabu siam chu thil tih chi tak a nih pawh a ring.

Tichuan, Guinness hna thawk pakhat Christopher Chataway chuan London-a thil a nihna dik tak chhui thin, phir unau- Norris leh Ross McWhirter an awm thu Beaver chu a hrilh a, rawih a rawt nghe nghe.

August 1954 khan Guinness Book of Records siam turin phir unaute chu rawih an ni zui ta reng a ni. A tirah chuan copy sang khat chauh siam a ni a, sem ral mai mai a ni nghe nghe.

Mahse, 107 Fleet Street-ah Guinness Book of Records office din a ni zui a; August ni 27, 1955 khan phek 197-a chhah Guinness Book of Records chu tihchhuah a ni a, an hralh tha ta hle. Beaver phei chuan sum beiseia lehkhabu kha siam an nih loh thu a sawi. A kum lehah US-ah an tichhuak ve leh a, copy 70,000 lai an hralh ta mai.

Lehkhabu kha mipuiin an duh viau takah chuan edition dang an siam belh zel a, kum tin vawi khat an ennawn (revise) ta ziah a ni.

October thlaah an tihchhuak thin a, chu chu Krismas laia hralh turin a tawk vel chiah, chumi 'hisap'-a ti chu an ni awm e.

McWhirter te unau chuan Guinness Book of Records chu buaipuiin an tichhuak zui zel a, hetiang lam chi lehkhabu dangte pawh an tichhuak bawk. TV lamah Record Breakers series an kalpui bawk a, an lehkhabu behchhanin naupangte'n khawvel record an zawhna hrang hrangte chu an chhang thin a ni.

Mahse, 1975 khan Ross McWhirter chu Provisional Irish Republican Army te'n an that a, chumi hnuah chuan TV show pawh chu "Norris on the Spot" tiin a hming vuah a ni.

Guinness Book of Records chu Guinness Brewery ta a ni a, 1970 chhovah kha chuan a chhunga thu chuangte chu Sterling Publishing thuneihna hnuaiah a awm a ni. Gullane Entertainment hian 2001 khan Guinness Book of Records neitu nihna an lei chhawng a, chu chu 2002 khan HiT Entertainment-in an leichhawng leh a ni.

Anni pawhin 2006 khan Apax Partners hnenah an hralh leh a, chuta tang chuan Jim Pattison Group hian 2008 kum tir lam khan an lei chhawng ve leh a ni.

Jim Pattison Group hi Guinness World Records' Attractions ti thintu Ripley Entertainment company lo chhuahna bulpui ber a ni.

Guinness World Records headquarters ber chuLondon-ah a awm a, New York leh Tokyo-ah office an nei. Museum erawh chu Orlando, Florida, US-ah a awm thung.

Tunlaia Guinness World Records chhuak tharte hi record awmsa midangin an elna a ni ber tawh a; thil chi tinreng a leng a, record siam tumin an bei thin. Minute 10 chhunga hot dog ei tam thei ber record nih te an tum a, mahse, eng tik emaw lai atang khan thil ei, zu leh beer inahte chuan record siam tum an awm pawhin an pawm tawh lo.

Norris McWhirter chu 1995 khan record buaitute zingah telh a ni tawh lo a; Gullane Entertainment hnuaia Guinness World Records enkawltu Diageo Plc-in hralh an tum zui bawk hnuah chuan lehkhabu tihchhuah lam chu ngaih pawimawh ber a ni ta lo a ni.

World record-te chu lehkhabu leh website lamah tarlan an ni ta vak lo a, record siam duh an awm chuan Guinness-ah lehkha an va thawn a, chawlhkar 4-6 chhung velin Guinness lam chuan lo chhangin record siam tur chu an buaipui zuita thin. Hemi atan hian pound 300 pek a ngai.

Record thenkhat chu him lo leh tha lovah ngaiin paih a ni a; zawhte record rit ber pawh kha zawhte vulhtuten an zawhte rih ber tir tum vanga an pawng hrai vak vak thin avangin tih tawp a ni. Ngunhnam dawlh, lehkha inthawn chhawn (e-mail leh dak) leh mei zukahte pawh record awmsa paih a ni.

Related Posts :