Chanchin Maksak 67

Zirchhuak zo lo
Mahatma Gandhi kha, kum sarih mi lek a nih laiin Porbandar atangin Rajkot-ah an pem a, chutah chuan sikul te lutin nun bul a tan chho ta a ni. Sikul a'n lut ve chu, lehkha zir a taima em em mai a, amah a zakzum chi a lo ni bawk nen, thenrual a pawl ngam lo a, lehkha a chhiar tlat tlat mai a ni awm e. "Lehkhabu leh ka zirlaite chu ka thian neihchhun an ni mai," tiin a sawi thin.

He khuaa lehkha a zir lai hian a ni a chanchin an sawi apianga an telh ve thin pakhat a thlen ni.

Vawi khat chu, high school an kal laiin a nia, an sikul chu Educational Inspector Pu Giles-a'n a rawn tlawh a, Pu Giles-a chuan spelling an thiam leh thiam loh ennan sap tawng thumal pali sipel a zawt hlawm a ni awm e.

Gandhi-a chuan thumal pakhat, Mizoina ketli kan tih, 'kettle' sipel chu a hre ta tlat lo. An zirtirtupa tang lutuk chuan Gandhi-a chu a thiante ta entawn tur hian a mitmei ta ringawt mai. Gandhi-a lah chuan a lo duh ikhaw si lo. An han inmitmei sateh na a, an intur hlawhtling ta lo a ni ang, Gandhi-a'n "The Story of my experiments with truth"-a a sawi dan chuan, amah chauh chuan a tidik ta lo a, an zirtirtute pawh a chungah an lawm lo hle a ni awm e. Mahse, Gandhi-a chuan, "Zirtirtute chu mi ta kan entawn tur pawh min veng turah ka ngai," a ti tlat.

A hnua a sawi leh pawhin, "Mi ta entawn ruk hi chu ka zirchhuak zo ngang lo," a la ti cheu.



Tehna dik lo thei lo?
Vawi khat chu mi pakhat hian Munich Technical Institute-ah luh tumin dilna a thehlut ve a, mahse, a tling lo. A tlin loh chhan pawh, chutiang zirna in thaa han lut ve tur em chuan amahah beisei an neih loh vang a ni.

Chu zirna ina lut pha lo chu mi engemaw zat an awm ang, chu chu thil mak pawh a ni lo. Mahse, he mi hi chu khawvel scientist ropui Albert Einstein-a a ni miau a, vawiin thlengin khawvel hian mak tiin a la sawi ta zel a nih hi. He zirna Ina luh a dil kum hi 1898 a ni a, chumi hnu lawk 1905-ah science khawvela thil ropui- theory of relativity a hmuchhuak leh si. Mak thei ngei.

Related Posts :