Eng dang vang a ni lo, Tuikuk vang a ni...

November ni 13, 2009 chu Zirtawpni a ni a, chumi ni-ah chuan Bungthuam khuaah Mizoram nghawr dawt khawp thil a thleng a nih kha.

Kum 17 mi Zarzokima chu mi tu tih hriat loh te'n an kaphlum a, a kaphlumtute chuan lehkha hnutchhiahin, Bru Re-Unification Union niin an inchhal.

Mizo leh Tuikuk inkarah thil duhawm lo a thleng zui a, sap tawng chanchinbu lamah pawh chu'ng vel chu a lang chuai chuai mai.

Mizoram Police te'n Special Investigation Team dinin Zarzokima thihna chungchang chu an chhui nghal a, thu zawhfiah atan mi pali an man tawh.

January 17, 2010, Pathianni tukah Special Investigation Team te hian Tuikuk hel pahnih, Vanlalfela leh Chusarai te an man a, January 21, 2010 zanah Mizoram Police leh Assam Rifles tangkawp te'n Lalthazuala an man leh a, January ni 23-ah police te chuan R Laldawngliana an man leh bawk.

He'ng Tuikuk palite hi police te'n thu an zawtfiah mek a, midang pawh an man belh zel a rinawm. Thu an la hrual mum lo a, amaherawhchu, Zarzokima thihna chungchangah hian thil awmzia a lang ruak tawhah mi thenkhat chuan an ngai.

Vanlalfela leh Chusarai te hian Tripura refugee camp-a awm, Tuikuk-ho Mizorama lalet tura ruahmanna tih tlawlh nan Zarzokima hi an that tih an sawi a, Lalthazuala pawhin chutiang bawk chuan a sawi.

Vanlalfela hi BNLF leh BLFM-ah te a tel thin a, Tuikuk tana beitu langsar tak chu ni mah se thu leh hla tak tak erawh nei pha lo, midang rorel bawhzui thin a ni. Zarzokima thihna pawh hi tute emaw rorel, Vanlalfela te'n an bawhzui nia ngaih a ni a, a phenah hian mi pawimawh an awm ngei rin a ni.

"A roreltu an awm a, chu mite rorel bawhzuitu chu an awm leh niin a lang," thudawn chuan a ti.

Tuikuk hruaitute hian Mizorama let an duh tak tak lo a, refugee camp-a an awm hian sorkar chawmhlawm an nih avangin chu chu an thlahlel tih chu mi tam tak ngaihdan a ni. An hruaitute chuan sum pawh an nei viau reng a ni. Chutiang chu ni mah se refugee camp-a an hruaitu pawh ni ve lo, ramhnuaia chhuak daih, Vanlalfela hian a hlawkna a tel ve awm si lo a, eng vangin nge Mizorama an letna tura ruahmanna tikhawlhkham tura tha a thawh ang tih chu zawhna awm thei a ni.

"Refugee camp atang hian hel pawlte hian pawisa an dawng thin ve a ni thei. Tin, tun tumah chuan an hruaitute'n Fela te hi an 'hire' a ni thei," tiin thudawn pakhat chuan a sawi. Chu'ng vel chu midang inrawlh an awm ngeia rin chhan pakhat pawh a ni nghe nghe.

Tuikuk chungchang ngaihventute chuan hetia Vanlalfela te pahnih man an nih hnu hian refugee camp-a Tuikuk hruaitute an ringhlel hle.

Mizoram state chheh velah Tuikuk hel pawl an awm nual a, pawl 30 vel zet nia hriat an ni. Amaherawhchu, a mihring zawng chuan an tam lo a, pawl 1-ah hian 10 vel lek te an awm thin a ni. He'ng pawl hrang hrangte hian inzawmkhawm an tum a, Vanlalfela te kut atanga police te'n 'receipt' an dawnah Bru Re-Unification Union tih leh United Liberation Army tih a inziak a, hei hi an inzawmkhawmna pawl hming turah mi thenkhat chuan an ngai.

Tun hnaiah Manipur-a hel pawl pakhat hnuaiah Tuikuk 13 velin training an nei a, refugee camp velah hel pawla tel 9 vel an awm bawk. Mizoram chhehvela midangte nen he'ngho hian inzawmkhawm an tum a ni.

Vanlalfela leh Chasurai te an man hnu-ah police te chuan Lalthazuala an man leh a, thudawn danin, Lalthazuala inpuannaah Vanlalfela leh Chusarai te inpuanna nena inmil lo leh inkalh a awm rih lo; 'Tripura-a tlan thla Tuikuk-te, Mizorama an let lehna tura ruahmanna tihthuanawp nana Zarzokima kha that an nih thu a insawi ve tho' tiin thudawn chuan a sawi.

Lalthazuala @ Orno J. Yakcho hi Tuikuk hel, Bru Liberation Front of Mizoram (BLFM) hotu zinga mi a ni a, November ni 20, 2001-a BLFM din a nih khan Army Chief niin, 2002 khan general secretary hna a chelh a, 2003-ah Tuikuk hel pawl dang BNF te nen an inchhunfin atangin information & communication secretary-ah ruat a ni.

January ni 23-ah police te chuan R Laldawngliana an man a, ani hi hel pawl-a tel ngai lo, thisen chhuahna leh inrikrapna lama tel ngai lo a ni. Mizoram Bru Displaced People's Forum-ah (MBDPF) vice president a ni a, Bru Co-ordination Committee-ah organisation secretary a ni bawk. Ni 22-ah Mizoram sorkar aiawhte leh Bru Co-ordination Committee te'n inbiaknaah a tel a, an inbe zo Aizawl atanga an haw lam, Kanhmun-ah Kanhmun police te'n an lo man a ni.

Ni 23 tukah Aizawl an chhuahsan a, tlai dar 3 velah Kanhmun-ah hian man a ni. Aizawla an cham laia man lova an haw kawnga man a ni hi, police te'n an thil chhuinaah hriat thar pawimawh tak an nei ta thut a ni ang tih a rin theih.

Kanhmun police te' hian Aizawl an pan pui nghal a, Aizawlah Bawngkawn police te kutah an hlan a, Pathianni ni mah se ni 25-ah khan 'remand' a ngaih avangin court-ah hruai a ni. Zarzokima thih thu-a police te kawl sa mi pathum- Vanlelfela, Chusarai leh Lalthazuala te nena inbe phak lo turin police te chuan Dawnga hi an dah.

Laldawngliana hi Meidum (Pangbalkawn bul, Kolasib District) khawchhuak a ni a, a nupui fanaute nen Tripura-a Naisingpara refugee camp-ah an khawsa a ni. BNLF-ah emaw BLFM-ah emaw a tel ngai lo a, ralthuam lek pawlah a tel ve ngai lo, Mizoram Police te pawhin an la man ngai lo.

Sawi tawh angin Zarzokima thihnaah khan silai lektute phenah midang an awm ngei ang tih ngaihdan a awm a, Tuikuk hruaitute hian Mizorama let leh hi an duh tak tak lo a, refugee camp-ah hnathawh ngai lova awm hi nuam an ti tih chu anmahni hrechiangtute ngaihdan a ni. Tichuan, hel pawla tel thin, ralthuam lek thin mi pathum leh ralthuam lek ngai lo pakhat chu police te kutah an awm ta a, hei hian ngaihtuah a tithui thei mai thei.

Police te hian ngawrh takin an chhui zui zel a, midang an man belh leh ngei a rinawm. Zarzokima thihnaah hian thuk taka inrawlh mi 10 vel an awm a rinawm. Tuna man tawhte zinga mi Lalthazuala hi Zarzokima ruang bula an lehkha hnutchhiah ziaktu nia hriat a ni a, "Kap tura thu petu pawh nia hriat a ni," thudawn chuan a ti. Ani leh Vanlalfela leh Chasurai te hi ralthuam lek chi an ni a, mahse, anni pathum hi Zarzokima kaptu an ni lo niin thudawn chuan a sawi. Thil a kal tluan chuan a kaptu tak nia rin hi police te'n an man har vak tawh lo ang tih a rinawm.

Police te'n Vanlalfela leh Chasurai te an man khan Lalthazuala hian 'bail' dan tur a ngaihtuah a, Tuikuk hruaitute hnenah cheng sing nga vel a dil a, mahse, thil an tihfel hmain amah chu police te'n an man ta nia hriat a ni. Tuikuk hruaitu lawkte hnena pawisa (bail-na tur) a dil chat danah he thilah hian a phen lam atanga hmalatu an awm ngei ang tih rinna a sawhnghet hle nia thu dawn a ni.

Tuna a lan dan chuan, Tuikuk hruaitute'n Mizorama let leh an duh loh avangin Zarzokima an that a, an hruaitu lawkte'n ro an rel a, an naute'n chu chu an bawhzui a ni. Chu chu tun thlenga a lan dan chu a ni a, amaherawhchu, thil chhui lai a nih avangin thu thar dang a awm thut thei tho thung.

Related Posts :