Monday, February 8, 2010

COSMETIC VALUE OF NATURAL FOODS

¢ Debbie Chawngthu

Skin tonic atan fanghma hi a tha em em a, sawm taka i ziah hnuin i hmai leh nghawng chiah nan hmang thin ang che. Hei hian arngeng lo awm tur a veng thei a, vun chuar tawh leh vun ro enkawl nan a tha bawk a ni. Purun var hi a rim a na hle a, a duh tan chuan a rim pawh a chhe lem lo. Arngeng i nei anih chuan i arngengah khan purun var hnawih reng la, ser lovin a dam leh thei a ni. Arngeng puiah pawh a tha tho a, hnawih mai bakah ei pawhin a tha a. Purun var hi thisen tifaitu anih avangin ei tam chuan thisen a lo fai a, vun a lo mam ta thin a ni.

Pudina(mint) hi rawt sawm la, a tui chu arngengah hnawih rawh. Arngeng a tih dam mai bakah vun ro mai tur vengtu a ni bawk. Vun ro i neih chuan zantin inhnawih thin ang che. Alu(potato) hi chhungkaw tam zawk tan chuan kan chawhmeh pui ber a ni awm e. Alu-ah hian potassium, sulphur, phosphorus leh chlorine kan tih te hi an awm a, hei vang hian ei mai bakah vuna hnawih atan pawh a tha a ni. I inhnawih duh anih chuan ziat sawm la, minute 20 chhung i hmai chiah nan i hmang dawn nia. Anih loh pawh phel la, i hmai hruk nan hmang ang che. Skin food tha tak anih mai bakah antiseptic atan a hman theih bawk.

Tomato hi bazarah pawh a tui vang nge a man a tla hniam thei lo hle a, a te chi phei chu en aiin a to talh zel. Ei atan a that em em rualin cosmetic tha tak a ni tel a, i vun mam nan tomato chhung ami hi a tam thei ang ber i hmai chiah nan hmang ang che. Besan pawh hi chhang siam nan kan hmang tlangpui a, bawnghnute khar nen chawhpawlh la, i arngengah khan hnawih la, reh mai ang. Badam rawt sawm la, chu chu bawnghnute khar tharlam tak nen chawhpawlh la, taima taka i inhnawih peih chuan i vun a chuar har ang a, i vun a lang tharlam bawk ang. I sam a tla nasa anih chuan badam hriak leh sinhlu tui chawhpawlh la, chu chu i luah thih thin la, i sam tla tur a veng thei ang. Luphut nei tan pawh a tha a, sam tuak tur a veng tel bawk. Dhoi hi khaw lum laia han in te hian min ti dai sawng sawng thei a, in atan a that rualin sertui nen chawhpawlh la, minute 20 chhung i hmai chiah nan hmang la, chumi zawhah lapuain han hru fai leh la, tui lum pep pepin i phihfai leh dawn nia.

Sinhlu (Indian gooseberry) hi thei tui pawl tak a ni a. Sinhlu atang hian hriak an siam a, sam a ti thang chakin a ti tam thei a ni. Sin te tein an chan a, chu chu an pho ro a, a ro that hnuah coconut oil-ah an chhuang so a, heta a hriak hi sama thihin samin a ngeih em em a, sam tuak tur ven nan an hmang bawk. Sinhlu zankhuain chiah la, a tui kha i sam suk tleuh nan hmang la, i sam a hrisel ang. I hmai a mawm lutuk anih chuan nimbu hi phel la, i hmai hruk nan hmang ang che. Arngeng nei ngah tan pawh nimbu-a hmai hruk hi a tha bawk. Sam tih tlet i duh chuan nimbu sawr la, i sam tleuhna tur tiah khan telh ang che. Kiu leh khup dum tlat i nei anih chuan nimbuin hru thin la, a ziaawm ang.

Bawnghnute no khat chhuang so la, chutah chuan sertui pum khat sawr la, glycerine fiante khat telh bawk ang che. Darkar chanve vel i chiah hnuah inhnawih la, hetianga zantin i tih peih chuan i vun a mam mai bakah i lang naupang sawt ang. Ke tlang khi leh kut ro lutukah te han hnawih la, hun reiloteah a no vek mai ang. Thingfanghma hel tui hi vun nanta hnai la chi i nei anih chuan hnawih ang che, inhliam palh pawhin han hnawih nghal la, a pun tur a veng thei ang. Keartui pheikhawk nawhna char tlatah hnawihin a ti nem thei a, singsihlit leh arngeng enkawl nan pawh a tha a ni. Coriander (dhania) tui fiante khat leh turmeric powder sih khat chawhpawlh la, arngeng hawlphum leh vun ro enkawl nan hmang ang che. Zan mut hmain i hmai han phih phawt la, chumi zawhah chuan inhnawihin zankhuain i hmai chiah nan i hmang thin dawn nia.

Related Posts :



No comments:

Post a Comment