BEAUTY CARE - BREASTS

¢ Debbie Chawngthu

Tun tum chu hnute lam i han sawi daih teh ang. Mizo nu hi a tlangpuii hnute bu lian nalh tak nei hi kan tam lova, a te leh vuai buaipui hi kan tam zawk mah awm e. Chuvangin, tuna nula leh tleirawl nu la ni ve lo ten enkawl an thiam nan a enkawl dan tlem a zawng i han phochhuak teh ang...

Hnute bu lian nalh tak mai hi chu hmeichhia hian kan mawipuiin min ti hmeichhia lehzualtu pakhat a ni a. Chuvangin, upat hnu pawha a nalh rei theih nan hma taka enkawl ngun a tul a ni. Hnute hian hmelma a ngah hle a, upat tawh vang te, ei leh in that tawk loh vangte, exercise lak tlem lutuk vangte leh nau hnute pek vangtein a vuai thin a ni. A vuai hma lutuk ven dan leh hnute enkawl dan tur han thai lang ila...Hnute hi a rang duh hle a, tleirawl chhuah tirh te, rai vang te, cher thut leh thau thuh vangtein a rang thin a. A rang hi a nalh lo hle a, vawikhat a ran tawh chuan a reh thei tawh lova, chuvangin a ran hmaa enkawl a pawimawh hle a ni. Vun mar tha reng tur chuan kan thil eiah vitamin A leh E a tel tam a tul a. Hnute hi nitin vitamin E oil hnawihin a a rang tur a veng a, nuaiin a kual zawnga nuai tur a ni. Amaherawhchu, vitamin E hman hma hian doctor rawn hmasak erawh a tha. Hnute vuai har tur chuan nitin tui vawta inbuala massage thin tur a ni a. Massage hian pawng nuai ngawt lovin a kual zawng awmze neia nuai tur a ni. Kuta nuai loh pawhin nawhfea nuai a tha tho a, tin, vura dehkual hi a tha khawp mai.

Exercise hi a pawimawh hle a, hetiang hian la thin ang che ~~ Kak lutuk lovin ding la, i kut i hma lamah nghet takin suih la, kun la, dingchhuak leh la, heitang hian nitin vawi sawm ti ang che. Zan mut hmaa massage hi a tha bik a, vitamin cream in massage la, a vuai har ang a, a mam bawk ang.

Bra hren hi thenkhat chuan an peihlo viau a, a engthawla a, nalhpuiin an inhre thin. Bra hman loh hi nuam mahse tih loh a tha zawk a. A chhan chu bra hian hnute hah loh leh tang si lovin a dawm chho reng a, nakin hnua a vuai tur a veng a ni. Exercise la a tlan thin tan phei chuan bra hman ngei ngei tur a ni. Bra lei dawn chuan a mawi leh nalh vanga lei a tha lova, hnute nena inmil chiah, hak hahdam tur thlan thin tur a ni.

A hnuaia exercise te hi lak peih chuan hnute a nalh duhin a vuai hma tur a veng a, awma tihrawl (breast muscles) tan a tha bawk.

1.) I ke inchipin dah la, ngil takin ding rawh. I hmalamah i ban ngil takin dahchhuak la, i kutphah chhuat lam hawiin dah rawh. Dingdihlip la, i ban ti chho rawh. I dingdihlip lai hian thawk la vak la, vawi sawm ti ang che.

2.) I ke kakin ding la, i ban thlak thla rawh. I ban zawi muangin ti chho riai riai la, thaw chhuak rawh. Dah thla leh la, a ngaiin vawi sawm ti leh ang che.

3.) I ke tlema kakin dah la, i ban i hma lamah phar chhuakin i kutphah chhuat lam hawiin dah rawh. I ban i phar chhuah hnuah a kawkalhin dah la, i kut second 10 chhung hum ruh la, hetiang hian vawi sawm ti ang che.

4.) I ke dah chip la, i ban thlak thla rawh. ChutahiI ban vai kual la, i theih anga sang vai kual la, i hmalam leh hnunglamah te vai kual rawh. I ban lehlam vawi sawm vai kual la, a lehlam vawi sawm bawk vai kual leh ang che.

Cream emaw lotion i leiin hnute massage nan tha tur a ni em tih zawt la, hmang chauh ang che. Lemon cream hi a tha a, inbual hmaa massage nan hman thin tur a ni. Tuihleuh leh inhruizuan hian hnute vuai mai tur a veng bawk.

Q&A

Q.Arngeng var chi (whiteheads) ka ngah riau mai a, a tihreh dan ka hre si lova, min hrilh thei lo maw?

= Heng arngeng lo awm nachhan hi chu mawm lo chhuak tur vuna a chhuah tlang theih loh vang a ni a. A lo chhuah theih loh avang khan a var ta pep thin a, a then chu massage leh steam hnua reh ve mai a awm a. A thente erawh chu hmur awm silo, reh chuang silo te pawh a awm thin. Hetiang chi hi chu khei a ngai a, a kheina tur chuan hriau zum tak, tih thianghlim hman a ngai a. A chhuah hnuah a pun lohna turin arngeng damdawi hnawih nghal tur a ni. Mahni tih chu tihpun sual a hlauhawm a, a thiamte pan maia tha zawk. Hmai leh vun mawm nei ten an nei nasa bik a, karkhatah face srcub hmangin i hmai chu vawi li tal lo scrub thin la, toner leh astringent hmang tel bawk ang che. Scrub i hmanin nuai vak vak lo la, dim thei ang berin whiteheads i neihna lai te chu nuai ang che. Nimbu sawr la, a tui chu i hmai chiah nan lo hmang bawk ang che. Karkhatah vawikhat minute 10 chhung chiah a tawk khawp mai.

Related Posts :