Monday, December 7, 2009

Tanpuitu Lawmman

¢ Lalthlamuana Ralte

Tum khat chu Pathian thu hriltu ropui Sadhu Sundar Singh leh a thianpa hi Himalaya tlang sang lai kawng tum pakhata an kal dun laiin mi pakhat vurin a lo hmeh khawng vek tawh hi an hmu a. An han en chian chuan a lo la thi em lo a, mahse a dinhmun a chau hle tawh a.

Chu khualzin khawngaihthlak tak mai chu Sundar Singh chuan a bawihsawm a han tum a, mahse a thianpa chuan, "Ani hi kan bawihsawm leh chuan keini pawh hian kan thih phah zawk ang," tiin kalsan mai a rawt a. Sundar Singh chuan chutia tanpui ngai han kalsan mai chu a duh si lo a, a thianpa chuan a kalsan ta a. Sundar Singh chuan khaw vawtin a hmeh zawi vek tawh, ni khaw hre lo a let reng khualzin pa chu a pua a, muang changin tlangah chuan a lawnpui ta a. Vur tla kara a han puak takah chuan a thaw a lo sa a, a taksa lum chuan a puak pa pawh chu a tilum ve ta tial tial a. Rei lo teah chuan a lo harh chhuak a, amahin a kal thei ta a, inkuah chungin muang changin an kal dun a, an taksa lum chu an inring tawn a, harsa lutuk loin an kal dun ta zel a.

Thui vak lo an kal hnuah chuan vurin a hmeh khawng vek tawh mitthi ruang an hmu ta nawlh mai a. Chu mitthi ruang chu an han en chian a, a hmaa Sundar Singh-a kalpui pa kha a lo ni reng a.

Related Posts :



No comments:

Post a Comment