Mittui Nen Krismas

Krismas thlen nan ni li chauh a awm tawh a. Chu hunpui lo thleng tur avang chuan mi tin mai chu an phili buai tawh a, kei lah chuan chutiang vel chu eng hehuah ka ngai ve hran lo thung. Kan khuaa dawr pakhat, a man tlawmna thil an zawrhna kawt ka thlen pawh chuan car an lo hung khat vek a. Dawr chhung ka han luh phei chuan mi an lo tam kher mai, nawrlirh (thil lei tur dahna - shopping cart) leh thil lei tur veivak vel intawklawi avang chuan inkalpawhna velte chu kal hleihtheih loh khawpin a tawt a. Innek nul nul a ngai a ni.

Vawiin ber khera ka lo bazar ve le? ka ti rilru a. Ka ke a kham thum a, ka lu a na hle bawk si a. Tu tute emaw thil leisak tur ka nei nual a, anmahni chuan engmah tihsak a ngaih loh thu min hrilh tho mahse engemaw tal ka leisak loh chuan chuan an vui dawn tih ka hre reng si a.

Hmanhmawh takin ka thil lei tur chu ka thlang a, nawrlirhah chuan ka dah zel a, ka duh zawng ka lakkhawm kim hnu chuan a man pekna hmun lamah chuan ka innawr phei a. Chutah pawh chuan an lo intlar dul mai a, a tlar tawi ber pawh chu minute 20 vel lai nghah a ngai dawn tih a lang reng.

Ka hma chiahah chuan naupang te pahnih - mipa naupang kum 5 mi vel leh a nau ni ngei tur hmeichhe naupang hi an ding a. Mipa naupang chuan coat pawr chhe hrip hrep, a pawp bel thluah tawh hi a ha a. Tennis khelhna pheikhawk lawk bur, hlui zet mai leh pawr phuai fuap mai, a thler lai bel thluah tawh hi a bun a, jeans kekawr bul chhing fahran mai a ha bawk a. A kut bal, chat ang reng takah chuan pawisa zawr zet mai hi a hum ran a.

Hmeichhe naupang kawr hak pawh chu a u thawmhnaw inbel ang tho a tawp leh bal chu a ni a, a sam bit ang reng tak chu a kir chiat nghe nghe a. In chhunga bun mai mai chi rangkachak rawng slipper hi a hum ran a. Dawr chhung kil khat atanga Krismas hla an play chu mil lo em em hian, a thiam dan danin a lo zawm ve a, a hlim hmel phian lehnghal a.

Rei tawk tak kan nghah hnu chuan dawr nghaktu bul chu kan thleng ve ta hram a, hmeichhe naupang zawk chuan dawhkanah chuan a slipper ken chu dim tein dawhkanah chuan a han dah a. A han tih danah chuan thil hlu tak niin a ngai emaw tih mai tur a ni.

Dawr nghaktu chuan a man a han chhut a, ziahluh pahin, "Cheng 60 man a nih kha," a ti nghal a.

Mipa naupang zawk chuan a pawisa ken lai chu dawhkanah chuan a dah te te a, a ipte chu a han indap zui chiam a, a pawisa neih zawng zawng chu Cheng 30 chiah a lo ni a. Tihngaihna hre lo takin, "Kan nei daih si lo a, kan dah let leh mai ang e. Naktukah emaw ni dang remchangah emaw kan lo kal leh zawk mai ang," a ti a.

A u thusawi a han hriat chuan hmeichhe naupang chu men ta puai puai a, lungchhe em em maiin a tap chhuak ta hawm hawm mai a. Tap chung chuan, "A-u, he pheikhawk hi Isua duhzawng tur asin," a ti mawlh mawlh a.

A u chu a mangangin, tihngaihna a hre lo tih a hmelah chuan a lang chiang hle. "Mate, tap suh haw phawt ila, chuan kan inhlawh leh ang a, pawisa kan neih daih veleh kan lei mai dawn alawm". A nau chu a kuah a, a thiam dan danin a han hnem ve a.

Chutih chhung zawng chuan kan tlar chu kan ding reng a, naupang pahnih chu kan thlir thap a. Chutah inngaihtuah lawk chuang loin ka pawisa ka phawrh a, kan tlar min tibuai rei bakah Krismas thilpek atan tiin Cheng 30 chu dawr nghaktu hnenah chuan ka peksak ta a.

Thawklehkhatah an unau chuan min rawn kuah thut mai a, "Ka pi, kan lawm lutuk," an ti mawlh mawlh a.

Kei chuan, "Engati nge he pheikhawk hi Isua duhzawng a ni in tih ve rikngawt a?" tiin ka zawt a.

Chu mipa naupang chuan, "Ka nu hi a damlo a, van ramah a kal tep tawh a. A-pa'n Krismas hmain Isua hnenah a awm hman dawn tih min hrilh a," tiin min chhang a.

Hmeichhe naupang zawk chu a lo inrawlh ve var a, "Sande sikula kan zirtirtuin van ramah chuan khawlaite hi rangkachaka luan vek a ni a, he slipper rawng ang chiah hian. A-nu pawhin rangkachak rawng pheikhawk hi a bun anga, a inhmeh dawn asin tiro? Isua pawhin mawi a ti ve ngawt ang tiro?" a lo ti reuh a.

An thusawi ka han hriat a, a mittui luanna hnu a hmai bal niu niau ka han hmuh chiah chuan kei pawh chu ka insum thei lo, ka hnuk a ulh a, ka mittui a hnam ta tiam tiam mai a. "Ni e. I nu chuan a inhmeh khawp ang," ka ti sap a.

Ngawi rengin ka tawngtai zui a, heng naupangte hmanga mi dangte tana thil tha tih leh a mamawhte tana thilpek hlutzia min hriatchhuahtir tak avangin Pathian hnenah lawmthu ka sawi nghal mawlh mawlh a.

(CHRISTMAS TEARS tih lehlin a ni a, a ziaktu hriat loh - Lalthlamuana Ralte)

Related Posts :