Monday, December 14, 2009

Kum Khata Upa Mizoram Sorkar Thlirna

¢ Lalthlamuana Ralte

Beiseina sang nena mipuiin an thlan tlin, Lal Thanhawla kaihhruai sorkar chuan kum khat a pumhlum dawn ta. December 11, 2008-a sorkar thar lakluh tirh te atang khan 'change' thlentir an tiam nghal a, an hmalakna tur atan 'corruption laka ven ngai lo sorkar' tih te, 'eirukna leh hlemhletna a zung chawpa karphawh a phoro' te, 'sorkar langtlang leh chhenfakawm' te, 'Rev Chanchinmawia thih dan enfiah te', 'political transfer tih loh' te, 'Mirethei ngaih pawimawh ber/mi rethei VIP' tih te, 'Ei rawngbawlna gas (LPG) ah VIP an awm loh tur thu te leh a dang tam tak an sawi thin. Mahse, kum khat a vei tak hnuah pawh an thusawi tihlawhtling tura hmalakna lian tham hmuh tur a la awm meuh lo a, sorkar hmasa kihhnawkah an la tang vel mek thung niin an insawi a nih hi.


Tunlai huna India ram chhunga chief minister ropui ber leh chak bera ngaih Gujarat chief minister Narendra Modi hian 2001 October thlaa sorkarna a chelh hlim khan sorkar hmasa kihhnawk mai ni lo, lirnghing rapthlak takin a sawichhiat, hnawk thenfai tur tam tak a nei a, lirnghin hma hian khawkheng leh thlipui (cyclone) an tuar na hle tawh a, ei-bar dinhmun (economy) a tha lo hle a, state chhung hmun tam zawka chengten tui an tlachham a, hmasawnna ruhrel (infrastructure) an nei tha tawk lo hle. Harsatna chi hrang hrangin a bawh mek laia lirnghing rapthlak tak an tuar leh zel avang hian mipui rilru a hnual ngawih ngawih bawk. Hna tul pawimawh tam takin a hmuah nghal avangin theihtawp chhuahin hma a la nghal a, rei lo teah hmasawnna hmel hmuh tur a lang nghal a, a term hmasa chhung khan an state sum thawh chhuah (GDP) chu 10% chuangin a pung hman a ni.

Mizoram sorkar hian kum khat chhungin hmalakna lian tham an neih sawi tur a la awm meuh lo a, inthlan hma atanga an vauchher ber NLUP meuh pawh kumin chhungin a tak hmuh tur a awm hman dawn lo niin a lang. Kum tir lamah kha chuan theihtawp chhuaha hma an lak nghal kha beiseina a awm a, CM leh hotu dangte thusawi thin atang pawhin sorkar danglam tak a lo piang ta ni ngeiin a lang bawk a nih kha. Mahse, chutiang beiseina chu a mit telh telh ta a tih ngam hial ta awm e.

A lehlamah chuan Mizoramah hian sorkar thar a lo din apiangin danglam bik, a ngaihna hre bik leh hmasawnna thlentu tur angin an lo insawi fo tawh a, thuneihna an chan hlimah phei chuan an tawng lian thei viau thin a ni. MNF party-in 1998 tawp lama sorkar a siam tirh pawh khan 'hmasawnna a zuana a zuan tur' thu te, 'kum thum chhunga ei leh bar/buh a intodelh' tih te, 'chakma district council thiah' tih te an sawi nasa. Mahse, kum 10 chhungin a enga mah tihhlawhtlin a ni ta chuang lo a nih kha.

Hetiang vel hi kan ram hruaitute nihphung a ni bawk a, Pu Hawla leh a kaihhruai sorkar pawh hian an thusawi an umpha lo ve tulh tulh dawn niin a lang. Engpawhnise, sorkar thar a lo pian hian a tir te-a CM leh a khawnbawlte thusawi hian ngaihven a hlawh a, sorkar ziarang tur a tarlang ni a ngaih a nih bakah, an ngaihpawimawh ber ber an sawichhuak thin niin a lang a, chhinchhiah pawh a awl bik thin. Dik tak chuan Zoramthanga kaihhruai sorkar pawh kha han ngaihtuah let ila, lalthutthleng an luah tirh te a an thusawi khan a vawlet nasa hle a, an hun tawp thlengin a um zui a nih kha.

Tuna kan hrawn mek Congress ministry pawh hi an manifeso leh an campaign auhla bakah sorkar an siam tirh a an hruaitute thu leh hla khan a vawlet tan mek a, an thusawi leh an thutiamte hi an ngaihsak zui lo a, an tihlawhtling lo a nih phei chuan chirhtheh pawh an tawk nasa zel dawn niin a lang.

Barrack Obama ni 100 chhung US president a nih chiah khan an ram chhung leh ram pawna media lian ber berte leh mi thiamten a hmalakna leh a hnathawh te chhui chiang a, beisei a phak leh phak lo chungchangah U.S. mipui ngaihdan te an la a. Sawiseltu tam tak awm mahse ni 100 chhung khan hna a thawk tha thawkhat a ngaitu an tam ber a, a lakah beiseina pawh an la nei sang hle a ni. Kan chief minister leh a thuihhruaite thusawi leh an hmalakna hi han lepse ve ta ila enge kan ngaihdan ni ang? An lakah hian beiseina kan la nei sang zel ang em?

Kihhnawkah an tang rei lua?
Hmanni lawk khan chief minister-in sorkar hmasa kihhnawk thenfainan kum khat dang a la ngaih tur thu a sawi a. He thu tho hi hmun dangah pawh a sawi tawh bawk. Sorkar thar a pian tirh atang khan MNF sorkar kihhnawk thenfai chungchang hi hruaitu lu ber berte ka atangin a chhuak zing ta malh malh hle mai. Thil dik lo chu a ni miah lo ang, sorkar hmasa khan tihsual leh tih dik loh an ngah em avangin mipuiin an hnawl a, beiseina sang tak nen hneh takin congress party an thlang tling ta a ni. He sorkar (thar) hi an hmaa mite kihhnawka kumpui linglet inhaibuai turin tuma'n an beisei lo a, kum hnih chhung em em phei chu a lutuk mah mahin a lang. Kum khat dang 'honeymoon' hman an la tum thu sawina zawk pawh a ni thei tho mai.

Ram hruaitu chak chuan thuneihna a chan tirh atangin hma a la nghal ang a, rei lo teah a thusawi atang ni loin a hnathawh atangin thil danglam hmuh tur a awm tura ngaih a ni. Chutiang ram hruaitu chu India ram chhunga state thenkhat chief minister zingah pawh hian hmuh tur an awm.

A lehlamah chuan sorkar hmasa tih dik loh leh an kihhnawk zawng zawngte ngaihthah tur tihna erawh a ni lo. Rorelna dik kenkawh tum tak tak tan chuan hun kal tawh a thil dik lo chhuichhuah a, a titute leh a inhnamhnawih zawng zawngte chunga dan hmanga hremna lek hi tihmakmawh niin a lang. Chu chu rorelna tha (good governance) kipui pawimawh tak 'rule of law' tihhlawhtlinna tur pawh a ni ang. Dan rorelna hmuh tur awm mang si lo a mipui hmaa inpuh chiam chiam mai hi a tunlai khawvel kalphung a ni chiah tawh lo a ni.

Thalaite hmakhua - eizawnna, etc.
Kar kal ta a cabinet meeting thurel zinga 'Draft Mizoram Overseas Scholarship Rules, 2009 - H & TE' an pawmpui kha thil lawmawm tak a ni. Hi hi Mizo zirlaite tan chona a nih bakah ram danga lehkha zirten tan a la tangkai dawn chauh a ni.

Tun hma atangin congress party hian thalaite hmakhua an ngaihpawimawh thu an sawi chamchi a, an hruaitu thenkhat phei chuan policy an neih that bikzia pawh an sawi thin. Mahse, kum khat chhung hian thalaite hmakhua a eng sawt chuang lo tih chu a lang reng mai a, civil service exam turte tan Youth Commission-in coaching centre pakhat nena tang dun a Aizawla coaching a buatsaih hi thalaite hamthatna tura hmalakna liantham chu a ni mai awm e.

Kan sorkar hrawn mek hian october thla khan full budget an pharh thei chauh a, a hma lamin interim budget (vote on account) tum hnih chu an pharh tawh. Hei vang hian hmalakna tur hrang hrangah an tuan fum ta deuh a ni maithei. A lehlamah chuan state thenkhat, hmarchhak state zinga mite ngei pawhin MP (LS) election hmain state plan an nei hman a, budget pum pawh an pharh theih lai a kum tawp lam hnaihah chauh annual plan peihfel a ni a, budget pawisa kan hmang tan chauh mai hi chu insawifiah ngial tham chu a ni hrim hrim ang.

Engpawhnise, budget pum pharh a nih khan beiseina sang tak nen kan lo thlir a, kum hmasa lam anga a ngai pet pet a kal tawh loin 'change' hmu turah kan lo ngai kha a ni a. Mahse, thil thar thlentir hi a har viau ni tur a ni, thil danglam langsar hmuh tur a bar a awm ta lo a, thalaite hamthatna tur pawh a lang ta hek lo. Thalai - lehkha thiam leh thiam lo - eizawnna chhenfakawm mamawh tak takte tan eizawnna thar ruahman a ni lo a (NLUP hian a huam a ni maithei), hna thar eng zat nge kum khat chhung hian siam a nih ang tih pawh hriat theih a la ni ta chuang lo.

Sorkar hna ruak hnawhkhah tur puanzar awm fo mahse hna nei lo thalai tam berte thawh ve tur erawh ruahmansak an la ni ta lo cheu. Thalaite khawvel thar an tih fi mumang ramah a thamral mai ang tih pawh a hlauhawm tan leh ta a nih hi. Kum tin lehkhathiam hna nei lo an pung zel a, lehkhathiam thawh tur nei lo an tam tial tial bawk. Hengho tana ei bar zawnna siamsak hi ram hruaitute mawhphurhna liau liau a ni tih hi mipui leh thuneitute hian kan hriat nawn fo a tha awm e.

Thalaite eizawnna chungchangah lehkhathiam chin chu ram pawn lama chhuak tura fuihna a tam hle a, tuna kan ram dinhmun hen en hi chuan thil tha tak ni pawhin a lang. Mahse, ngaihtuah chian erawh a ngai khawp mai. A thiam thiamte an vah chhuak zel a nih chuan an uihawm khawp ang. Khawvel ram retheiho buaipui lian tak pakhat chu an lehkhathiam apiangin an pemsan zel hi a ni a, chutiang chu kan ngaihtuah pha lo nge ram pawn lama hnathawk turin keini chu kan infuih mek thung a ni.

Kan ramah hian sorkar kalphung fuhin rorelna tha awm tak tak se la chuan thing leh mau/leilung hausakna tangkai taka hmangin eizawnna tam tak a siam belh theih a ni. Sorkar tha lo kan neih leh thin avangin thalaiten an tuar a, tih tur hre loin an tei mai mai a, eizawnna hlawk siamsaktu an hmuh loh avangin sorkar hna hi hna tha ber a ngaih a nih phah bawk. Kum 4 dang lo awm turah hian hna thar eng zat nge sorkar hian a siam hman ang tih hi thalaite hian an thlir reng dawn a ni.

Thil man to
Nikum lam atang khan India ramin inflation (thil man to) a buaipui a, theihtawp chhuah a sorkar laipuiin a buaipui avangin tunhnaiah chuan a ziaawm ta a ni. Mizoramah pawh congress party kaihhruai sorkar a lo din tirh atanga tun thleng hian nitin mamawh, chawhmeh leh eichawp thil chi hrang hrang man toin mipui a nghawng na hle a. Nuho titi-in 'chawei apianga dal kan hmeh thei chu khawsa thei tak an ni tawh' an tih ang deuhin kum hmasa lam aia thil man a to tak em avang hian rethei leh hausa kar pawh a zau sawt tihna a ni.

Phai lam atanga buhfai leh mamawh thil dang lakluh man nasa taka a san mek laiin tualchhung thar chhuah thlai leh sa man pawh a to sawt hle a, tunhnaia sorkar hnathawkten hlawhbi thar an hman tur thu chief minister zahawm takin a puan atang mai pawh khan thil man a to leh tan a ni. Heti a nih chuan khawsak a harsa zual sawt dawn tihna a ni a, rethei leh hausa kar a zau tial tial bawk ang.

Thil man to chungchanga pawi em em mai chu sorkar hmalakna hmuh tur mumal awm lo hi a ni. Assembly session-ah eptu lam leh rorel lai MLA te hemi chungchangah hian an inhnial buai viau tura lo beisei lawk awm thin mahse an chhungkua a nghawng ve lem loh avangin ram hruaitute hian vei thamah an ngai lo a ni maithei.

Inflation hian sumdawnna chauh a nghawng lo tih hi hriat a tha khawp mai, mi zawng zawng a nghawng a, chung zingah chuan a rethei apiangin an tuar na thin. Sorkar hnathawk hlawh pung tur a intam mek lai hian nitin mamawh thil hrang hrang man to lutuk tur hi ven nachang hriat a hun khawp mai. Chuti a nih loh chuan retheite khaichhuaha leirem rahtir an tum mek lai hian an rin loh daihin an khaichhuah tumte dinhmun hi a chhe telh telh mai ang tih a hlauhawm.

Manifesto
Tunhma lam kha chuan inthlan dawna party manifesto hian ngaihpawimawh a hlawh zui lo viau thin a, mipuiin an theihnghilh thuai a, sorkarna chelhtuten an vei zui hek lo. Mahse, tunah chuan thil a danglam tawh a, election manifesto hi sorkar tha leh tha lo tehna atan kan hmang tan tawh a ni.

Congress party election manifesto-ah khan sorkar an siam huna an hmalakna tur chi hrang hrang, tha tak tak hmuh tur a tam hle a. Khatiang tak khan hma la nghal se la chuan kan ram hmelhmang pawh hi langthamin a danglam tawh ngei ang. Engpawhnise, manifesto tihhlawhtlinna atan chuan kum 4 chhung hun an la nei tho a, a la tlai lo turah pawh ngai ta ila.

Mahse, an manifesto kha ngun taka han zir chian chuan an sorkar kum khatna atanga hmalak nghal ngai a awm nualin a lang. Inthlang tura kan intintuah tirh lai khan ram tana mi thahnemngai thenkhatte thuken ber ram inrelbawlna/rorelna tha (good governance) kha congress party pawhin an tuipui hle a, election manifesto-ah pawh hemi atana an hmalakna tur chiang takin an ziak nghe nghe.

"Kan sorkar hunah chuan minister leh MLA ten a bul tanin, mipui rintlak sorkar kan siam ang a. Khawvel ram dang, inawpna tha nei entirnan, England (UK) leh Singapore, etc. te tih dan leh kalphung tha lai, kan state-a kan hman ve theih tur ang chi te ngun taka zir chiangin hman ve a ni ang," ti a an ziah te hi kum khat a vei hmaa hmalak nghalna tur chi niin a lang. Ram hmasawnna thlen tum tak tak leh 'change' thlentir tum tak tak tan chuan thuneihna chan veleh a bul tanna atan sorkar inrelbawlna/kalphung siamthat hi tihmakmawh niin a lang. Chu chu sorkar hnathawk kohkhawm a vau chiam chiam lam a ni lo a, sorkar hnathawk sawn darh chum chum pawh a ni hek lo.

Manifesto a an tarlan anga Administrative Reforms Commission din a, chumi hmang a hmalak chu a kawng hmang tur tak a nih zawk hmel. Tuna a lan dan hi chuan good governance tih hi a thuah ngawt hian kan chiang tlang a, a awmzia tak tak leh hmalak dan tur lai hi kan la chiang tawk lo niin a lang. Sorkar pisa zawng zawnga hemi lam hawi Bible chang tar velah hian kan duhtawk mai ang tih pawh a hlauhawm ta riau mai. Sorkar inrelbawlna tha hi hmasawnna peng hrang hrang tobul a nihzia te, good governance kan tih fo pawh hi an banphak maiah a awm reng tih pawh hi ngaihtuah nawn fo se a duhawm khawp ang.

Kum khat chhunga thil langsar tak mai chu chief minister, minister leh parliamentary secretary rualten car thar an lei thu te, NLUP ah an hmanhmawh vut vut loh thu te, CM bungalow cheina senso sang tak mai te, sorkar hnathawk sawn darh tamzia te, development hnathawh hmuh tur a la awm loh thu te, tunhma aia minister te mizia a danglam tak thu te hi a ni mai awm e. Chutihlaiin, tunhma lama minister-te mipuiin an chimbuai nasa lutuk thin kha tha lo tiin in lama interview an tihtawp tak te, hmasawnna ruhrel lian tham thenkhat din tura hma an lakna te, chief minister-in thil dik lo titu thenkhat a ngaihtheih loh dan te, state annual plan nasa taka a pun tak dan te han ngaihtuaha tunhma sorkar kan hrawn tawhte nena khaikhin chuan kan sorkar hi sorkar chhe tak chu a ni lo a tih theih ang.

Related Posts :



2 comments:

  1. Sorkar hmasa kih hnawka tun Congress Thanhawla Sorkar a tal buai rei ta lutuk hi —chhanchhuahna beihpui thlak a ngai letling ta viau mai!

    Promise tihhlawhtlin awm mang bar si lo.

    ReplyDelete
  2. Promise tih hlawhtlin awmlo tih hi khawi atanga chhuttur nge ni ang? Kum khat chhungin nupa pawhin an vanneih cuan fa pkhat an hring thei hram a ni law'm ni?

    ReplyDelete