Anka nem chu a tawk ta em ni?

'A tha, anka nem chu tawk rawh se...' tiin a zai thin a, 'anka nem chu tawk rawh se' titu chu thinrim insawh nghawng nghawng tur ni awm tak a nih laiin ani erawh a nui vur thin thung.


Tunlai zaithiam lar tak pakhat, mite ngainat em em Isaac Lalmalsawma, 'Anka nem chu tawk rawh se' tih hla larpuitu anka nem chu hriat tur a awm dawn ta lo; November ni 28-ah bike chesual-ah a thi.

November ni 27 tlaiah Electric Veng-ah chaw eiin a kal a, chaw an ei har bakah an inkawm khawm zui bawk nen, zan dar 2 velah a haw a, a haw kawngah chuan taxi nen insuin a thi ta a ni. A thih hun hi zing (zanlai) dar 2:30 vel a ni.

"Electric Veng-ah Isaac-a te nen hian chaw eiah min sawm a, kan zaiho a, Isaac-a pawhin nuam a ti hle. Kan zai tui khawp mai a, a rei pawh kan rei hle. Ka tin darh hnu lawkah a thih thuin min rawn deng ta mai a," tiin an chaw eihonaa tel ve pakhat chuan a sawi.

Electric Veng atang hian Khatla South-a a chenna in panin Isaac-a hi a haw a, Canteen Kual-ah taxi nen an insu ta a ni. Taxi hi wrong side-in a tlan niin ni tin chanchinbute chuan an chhuah.

November ni 28 (Inrinni) chawhma lam dar 10 velah a ruang hi post mortem a ni a, chhun dar 12 velah an khua, Kanghmun lam panin an chhuahpui a, an khuaah hian vuiliam a ni ta a ni.

Isaac-a hi Aizawl College-a III BA zirlai a ni a, PHE Deptt.-ah MR-in a thawk. Amah hi mi hlim thei tak mai, fiamthu duh deuh mai a ni a, mipui hmaa a zai lai pawhin a hmel a hlim thei hle. Chu chu miin an ngainat chhan pakhat pawh a ni.

Mizo Idol 2007 thlannaah Isaac-a hi a tel a, Top-20-ah a lang. A thleng sang ber ni lo mah se mite hriat hlawh ber pakhat a ni a, zai tura sawmtu pawh a ngah thin hle. A mize ngainatawm tak leh a hlim theih em emna chu mite'n amah an sawi fo dan pawh a ni.

Idol chief judge Rammawia chuan Isaac chu a ui thu sawiin, "A mak!" a ti a, "Ka ui thu ka sawi hian ka ti tak zet a ni. Amah kha 'entertainer' a ni. Midanga ka hmuh loh amaha ka hmuh chu zir a duh a, a zir reng thin. Chumi awmzia chu a zir reng peih a, a chapo lo niin ka hria," a ti.

Rammawia chuan, "Zaithiam engemaw zat hi chu induh emaw angin an awm thin a. Chutiang chu Isaac-a khan a nei ve lo," a ti.

"Idol thlan lai vel pawh khan thurawn kan pek thinte tha takin a ngaithla a, aw liam puat lovin a zawm nghal mai thin," a ti bawk.

Idol judge Rebecca Saimawii chuan, "Ka ui khawp mai, ka ngaina a, a ngainatawm bawk a. Kei pawh min ngaina ve hlein ka hria," a ti.

Rebecca chuan, "A bike lei dawn pawh khan dawr-ah a lo kal a, 'hei ka pain bike min lei dawn asin, vawiin-ah ka book dawn' a rawn ti a, kan titi luam a. Mahse, chu bike chu a thihna hmanrua a ni ta mai a," a ti.

"Idol zingah pawh mi lawm hlawh ber niin ka hia, a thinrim thei lo emaw tih mai tur a ni a. A hmel hi a hlim sarh reng a, a pa pawh ka khawngaih khawp mai, a fapa neih chhun tak meuh meuh a ni si a," a ti bawk.

#################################

2008 kum laihawlah Mizo Idol star R Lalhmangaiha (Kaka) chu bike chesual-ah a thi a, ani hi Isaac-a thian ber pakhat a ni. A thianpa a ui thu Isaac-a'n a sawi dan Zozam Weekly Vol IV Issue No 47-ah tiang hian tarlan a ni:

"Mizo Idol thlan laia a kawm nasat, a hnu pawha a thiantha ni zui ta Isaac Lalmalsawma, Leikapui star pawhin a thianpa a thi ta mai chu hriatthiam har a ti a, "A lunglenthlak khawp mai," a ti vawng vawng mai.

"A thianpa dinhmun a tha lo hle tih a hriat tirhah chuan a awih thei lo a, awih lo chungin Durtlang damdawi in a pan a, damdawi in a thlen hnuah a awih ve ta chiah niin a sawi. An vuiliam hnuah pawh awih har a la ti reng niin a sawi bawk.

"Awih har ka ti a, mak ka ti tawp," a ti a, "Thian en paw'n ka en lo a, ka unaupa angin ka ngai," a ti.

"Keimah anga fiamthu duh a ni a, hlim thei tak a ni. Hetia a liam ta mai hi a lunglenthlak dawn khawp mai," tiin Anka nema tia a thenin an koh Isaac-a chuan a thianpa Kaka a hmuh dan a sawi a, "Music lamah pawh kan duh dan a inang a, kan duhzawng a inang thei lutuk," a ti bawk.

Related Posts :