Vaivakawn biak in suasamtu kha a piangthar

¢ Vanlalremruata Tonson

Kalvari Hospital tih leh B Lalremtluangi rawngbawlna tih vel chu engah vak a ngai lo. Lalremtluangi zawk erawh chuan Mizoramah Setana thawm a lian ta lutuk nia a hriat avangin hmuh a chak hle. Pathianni khan Vaivakawn biak inah chuan an inhmu a, an inpawmchilh ta a ni. Chuta tang chuan Setana hnena inthawina lo hlan hial tawh tleirawl pawh chu a phurritin a kiansan ta a, nun kawng thar chu a zawh ve tan mek a ni.

Vaivakawnah hian B Lalremtluangi'n rawng a bawl dawn tih a pi te hnen atangin a hria a, kal ve turin an ti deuh bawk. Pawi tihna em em a nei lo a, a kal ve mai. Mahse, kal ve tak vekah chuan intawngtai tir loh chu a duh leh miah lo. Mahse, damloah pawh a na zual chauh tawngtaiin tihdam rawngbawlna hun a hmang kha a ni a. Biak in chhungah mi an leng lo a, pawn lamah 'big screen'-in an en bawk. Tum deuh hlek loh chuan tihdam rawngbawlna va chan ve phak pawh chu thil harsa a ni. Mi tam tak biak in chhunga an len loh laiin a chhung chu a chang ve mai a, intawngtai tir ngei a duh chuan rawngbawltu chu hriattir a ngai a ni.

Usher-ho chu a hrilh a. Inkhawm ban dawn, chairman pawh a din tawh hnuah biak in suasamtu chuan tawngtai ve a duh thu an puang ta tlat mai. Tichuan, rawngbawltu pawh pulpit atang chuan pheikhawk phelh lawk meuha inringsain a chhuk thla ta bawk. Lamtual a pel vel tawh tihah, lecturn bulah rawngbawltu chuan a va pawmchilh a, an inbuan ta a ni. Rawngbawltu nuin a khawih vel chuan a taksa chu chemtêa vih ang mai hian a na zawk zawk mai niin a hria a, a bula awmte chuan a meng var leh pawp pawp a, a rak thawt thawt bawk niin an hria.

"Thil rit deuh kan nghat ta a… a ka sawi thiam lo," tiin a phurrit tlak tak dan chu a sawi. "Setana chu hnehin a awm ta a, Lalpa chu fakin awm rawh se, Setana ta ka ni tawh lo," tiin a auchhuak nghe nghe.

Chutia Setana ta a ni tawh lo tih a puang chu biak ina inkhawm zawng zawng an lungchhe deuh vek mai niin inkhawm laia awmte chuan an sawi.

Setana ta a nih tawh loh thu a puanna leh a phurrit a tlakna hmun chu July ni 9-a Mizoram thawng dawt khawp thil a lo tihna hmun ngei kha a ni. July ni 6 dar 2 vel khan a chhuak a, chuta tang chuan haw loin, khawiah mah mu hahchawl loin a tei kual vel a ni. July ni 8 zan dar 2 vel khan biak in thlang velah a awm a, a tukah pawh biak in bul lawkah chuan ni lum aiin a awm. Biak in inhawng sa a hmuh khan luh a chak a, a va luh chuan amaha chakna lo awm chuan thil a ti ta a ni. A rilrua rawn awmte chu a ziak ta bawk a.

"Tih chak deuh kan tih a, kan awm ang hi a ni," a ti. Vaivakawn biak ina a chet hnuah hian thil danglam engmah a tawng zui ta lem lo. A pum erawh chu rei deuh a na zui a, ultrasound leh endoscope-ahte pawh an en ngial nain engmah an hmuchhuak lo a, pum na avanga thi-a luak chang erawh a nei. Setana hnenah chuan inthawina an hlan thin a, biak in a suasam chu titha tihna thu emaw tu hnen atang mahin a dawng lo. A thil tihah chuan inchhirna a nei hran lo a, mahse, khatiang thil han tih meuh kha chu eng emaw chang chuan zahthlak han tih ve deuh chang chu a nei.

Police-in an man ta daih kha a ni a, Remand Home-ah a awm a, chuta tang chuan a chhuak leh thin. Tun tumah erawh chuan a nungchangin a zir ta deuh a ni ang, 'probation'-in a chhuak ve thei. Chutianga 'probation'-a chhuak thei khawpa a nungchang a insiam lai chuan B Lalremtluangi nen chuan an intawng ta a ni.

Vaivakawn biak ina a thil tih chuan thin chu a thawng teh meuh mai. Mahse, kha thil lo kha chu vantlang leh midangte tana hnawksakin a awm hran lo. "Chutia sual em em pawh ka ni lo," a ti nghe nghe. Amaherawhchu, midang kianga awm aiin mahni-a awm chet chet nuam a ti a, a duh ang anga awm a, a duh ang tih mai chu a duh dan leh nuam tih dan ber a ni.

Zan rehah pawh a chhuak fo reng a, a chhuah chuan ni 5/6 laite haw lovin a awm a, engmah a eiin a in pawh a ni lo, a mu chuang hek lo. Mipathmeichhiatna thilah a tlan pawh a ni lo a, khawlaiah rui bawrawin a awm pawh a ni chuang lo.

Rawngbawltute nen pawh inhmelhriat tur khawp chuan an lo intawng ve tawh bawk. TNT-ah pawh khan hun engemaw chen awmin a awm chhung chuan vawi nga ngawt a chhuak ru nghe nghe. Police lamin an lo hmelhriat viauna chhan pawh kha sorkar dan bawhchhiatna lam aiin home-a a awm changin chhuah ruk a ching a, an zawn nasat thin vang a ni zawk. TNT atanga a tlanchhuah thin lai khan tum khat phei chu khawiah nge a awm pawh a hre lo a, a harh chuan Thingsulthliah damdawi inah a lo awm reng! Tin, TNT-ah hian saul vang hrim hrima lut pawh a ni chuang lo. Chanmari biak in bulah a kal a, chutih lai chuan TNT team hian chu biak inah chuan rawng an lo bawl a, ani chu a pum a na ta tlat mai a, a kal thei ta lo a ni. TNT chuan an buaipui a, an hnena awm a duh leh duh loh an zawt a, a duh ve mai. Tichuan a awm chu a ni ta der mai.

Dariela, Lunglei-ah pawh a awm tawh a, mahse, rei awm lovin a chhuak leh mai. Gospel Thunders Team leh Healing Touch Ministry te pawhin an lo buaipui tawh a, awmzia a nei em em lo. Gospel Thunders Team buatsaih camp-a a luh tum phei chuan a awm dan chiah a hre lo a, mahse, a che na thawkhat a ni ang, thutthlengte kha a tlawhchhe vek ni awm tak a ni. A awm dan a dik chiah lo a, Class X a zir lai chuan a awm dan a lo mak thei deuh a ni ang, middle school leh primary school naupangte hian an hlau deuh hial a ni awm e, school neitute chuan kal zel pawh an phal ta lo a, a duh chuan Inrinniah sikul-ah va kalin a thiam lohte a va zawt thin. Class X pawh maths-ah a 'compartmental' ta reng a, a exam nain a tling ta lo bawk a, a zir zel duh ta lo a ni. |henkhat chuan Setana an biak hian lehkha zirnaa thiam theihna te pawh an dil a, ani chuan chutiang lam chu a beisei ve ngai lo.

Setana biaknaah hian kum 13 mi a nih laiin a tel ve tan. An sikul chuan summer camp an nei a, chutah chuan a duh ve leh duh ve loh an zawt a, duhin a tel ve ta mai a ni. "A tirah chuan engah mah ka ngai lo, tel veah pawh ka inngai bawk lo," a ti. Khami tuma a thiante chu nupui fanau nei tawhte pawh an awm, a bak erawh a hre zui vak lo.

Chutia Setana biak dan a hriat hnuah chuan zawi zawiin a tel thuk ta tial tial a, thla tin ni 12-naah thlanmualah an kalkhawm ta thin a ni. Chhunah. Syringe-in emaw an thisen 30ml vel an 'draw' chhuak a, dispo-cup-ah dahin Bible-a Rom bung 6-na thu hal vap chu an thisenah chu zuk pawlhin an in thin. Thisen an in chuan an duh zawngte an dil thin a, ani chuan ruihhlo a dil ber. A hlawhtling niin a inhre bawk.

"Damdawi tih te kan lo duh ve a, pawisa te kan nei reng bik si lo," a ti. Eng damdawi emaw tih bik a nei lo a, a rem rem a ni mai. Mahse, chhungte'n an hriatchhuah tur khawpin a awm ngai lo. A nun hi a chhungte hian an hria a nih pawhin a rukin an hria ang a, a hnenah chuan an sawi ngai lo a ni ngei ang.

"Pathian pawh a hring a hranin kan hmu a ni ngai chuang lo a, chutiang chu a ni mai," tiin Setana hnena inthawina hlan chungchang chu a sawi. Kohhran ang thoin inrelbawl dan a awm ve deuh niin a sawi bawk.

Thli siamte chu a thiam ve a, thawnga lei vir te pawh a tichhuak thei. Electric bulb a en keh pawp pawp thei niin a sawi bawk. Midangin an lo hmu ve thei nge thei lo chu a hre lo a, mahse, anni chuan chutiang chu niin an hria. An hriat dan chuan electric bulb an en keh pap pap thei a, tual laiah thawnga leivir an awm tir niin an hre thin bawk.

Thla tin ni 12-naah chuan inhrilh lawk pawh awm lovin, a hmun tur sawi lawk pawh awm hek lovin an inhmukhawm leh mai thin. A ngai inhmukhawm pawh an ni lo. LSD (Lucifer's Daughter), The Big Shooter, Anarchy, Wings leh C-22 te chu a tel ve thinna a ni.

LSD-ah hian mipa pawh an awm tho a, mi 100-160 vel an ni. Mahse, hmun khata inthawina hlan hi mi 8-12 vel bak an ni ngai lo. Aizawl thlanmualah chuan an ti vek tawhin a ring a, thisen draw-na chu band-aid-tein an belhnan leh mai a, midang tana rinhlelh leh hriat ngawtna tur chhan pawh a awm lo.

Rom bung 6-naah chuan baptisma chungchangte, sual thihsana Krista-a nunna chungchangte ziak a ni a, chuvangin chulai thu chu halin an inthin. Mahse, chutiang hun chu nikum June thla hnu lamah chuan a ti tawh ngai lo.

Chutianga a tal vel hnu-ah chuan November ni 8, Pathianni-ah a suasam hnu, an biak inah chuan a inkhawm a, a piangthar ta a ni.

(Juvenile (kum la tling lo) a nih avangin a hming leh a nihna dik tak hriat theihna tur thil tarlan loh hram hram tum a ni e, hei hian a thu hi a ti rinhlelhawm chuang lo ang chu maw).

Related Posts :