Monday, November 9, 2009

Pafa-a Footballer Lar Ni Theite - II

¢ Hmingsanga

Kar hmasa khan pafaa footbll khawvela hming chherte chanchin kan tarlang tawh a. Tunah han chhunzawm leh ila.

Anthimos & Michalis Kapsis
Kum 1971 khan Anthimos Kapsis chu Greece club Panathinaikos leh Ajax te'n European Cup final an khelh khan Panathinaikos tan khelin anmahni lamah he defender hian a ti goal palh hlauh mai. Greece tan vawi 30 chuang a khel a, Euro 80-ah pawh khan Greece hmingin a la khel a. A fapa Michalis hi Euro 2004-a Greece an champion khan a tel phak ve leh tawh. A pa ang bawkin Michalis pawh hi defender a ni a, ram tan vawi 30 chuang a khel tawh bawk.

Juan Ramon & Juan Sebastien Veron
Ramon leh a fapa Sebastien te hi hming lemah La Bruja (The Witch) tih leh La Brujita (Little Witch) tia sawi thin an ni.

A pa zawk Ramon hi Argentina tan khel phak ni lo mah se bal thiam tia hriat lar a ni thin a. A vanglaiin Argentinian club Estudiantes-ah a khel thin a, Copa Libertadores-ah vawi thum lai champion a nih pui. A fapa Sebastien Veron hi chu a chanchin sawi thui a ngai lo ang. Estudiantes-ah bultanin Boca Juniors-ah a hming a chher a, Lazio leh Inter Milan-ah a hming a thang a. Manchester United leh Chelsea-ah player tha a nihzia a lantir chhunzawm bawk. A bultanna club Estudiantes-ah let lehin team captain a ni a, 2010 World Cup-a Argentina an tlin theihna tura player pawimawh a nih avangin an coach Maradona chuan nakkum World Cup-a Argentina tana khel tur player pali a thlan sa tawh zingah a tel.

Fabio & Carlo Cudicini
Fabio Cudicini chu 50’s, 60’s leh 70’s tir lam thleng khan Italy-a goalkeeper hmingthang ber leh hriat hlawh ber pawl a ni. AC Milan-a a khelh chhungin European Cup-ah champion a nih pui a. A fapa Carlo Cudicini chuan a pa hnung zuiin AC Milan a zawm ve. Milan-a a awm chhungin a veng phak meuh lo. English Club Chelsea a zawm hnuah erawh no I keeper a ni reng thin a. Chelsea-ah kum 10 zet a cham hnu-ah Tottenham-ah second choice keeper a ni mek.

Johan & Jordi Cruyff
Johan Cruyff-a hi football khawvelah tunge a nih inhrilhchawp a ngai lo. Netherland-in footballer a hrinchhuah tawh zinga tha ber, thiam ber nihna vawi duai lo lo hauh tawh a ni. He'ng club- Ajax, Barcelona Feyenord-ah tea a khelh laiin a hming a thang zual. A fapa Jordi pawhin a pa hnung zuiin hun engemaw ti lai khan a lar hman viau. Barcelona leh Man United-ah pawh a khel tawh thin. Tunah hian upa deuh tawh mah se Malta-a club pakhat Valletta-ah khelin assistant manager nihna nen a kawp mek.

Manuel Sanchis Martinez & Hontiyuelo
A vanglai chuan Manuel Sanchis Martinez hi Real Madrid defender hlun leh mite hriat hlawh tak a ni thin. Kum 1966 khan Madrid chu European Cup-ah champion a nihpui. 1966 World Cup pawh khan Spain hmingin a khel phak. A fapa Manuel Sanchis Hontiyuelo pawhin Real Madrid chu Champions League-ah 98 leh 2000-ah te khan champion a nih pui thei a ni.

Wlodzimierz & Ebi Smolarek
Wlodzimierz Smolarek hi Poland striker piang tawh zingah a tha ber tia sawi thin a ni. 1982 World Cup leh 1986 World Cup-ah te khan Poland tan a thawh hlawk hle. A fapa Ebi hi Portuguese great Eusebio hming chawia a hming hi sak a ni a, Dutch club Feyenoord youth system ah a pa coach a nih lai atanga inzirchhuak a ni. Tunah hian national team-a player pawimawh berte zingah a sawi theih awm e.

Carles & Sergio Busquets
Carles Busquets hi 90’s vela Barcelona keeper thin kha a ni. Kha tih lai khan Spain keeper tha bera ngaih Andoni Zubizrreta tha chhang dawltu ber a ni thin. Kum 1991 Cup Winners Cup final Man United nen an khelh tum khan a khel a, mahse a vanduai zawkah an tang. European Cup 92-ah erawh Barca chu champion a nih pui. A fapa Sergio hi Barcelona academy atanga inzirchhuak a ni a, tunah hian senior team-ah khel tawhin a pa anga goal vengtua tang lovin defensive midfielder a ni. Busquets hian kum 2013 thleng Barca-ah contract a nei a, leichhuak duh an awm a nih pawhin a man hi € 80 million vel a nih ngei rin a ni.

Pablo and Diego Forlan
Pablo Forlan hi Uruguayan international a ni thin. Peñarol, São Paulo FC, Cruzeiro EC Nacional de Montevideo,Defensor Sporting-ah te a khel tawh thin. Hetih chhung hian Uruguayan league, Copa Libertadores, Intercontinental Cup leh São Paulo state championship ah te champion no mawi lo chawi tawh thintu a ni. An ram aiawhin 1966 leh 1974-ah te khan World Cup a khel tawh bawk.

A fapa, Atletico Madrid striker Diego Forlan hi Manchester United-in an lei khan a chetha tehchiam lo. Spain-ah a kir leh a, a hming a chher thar hle a, La Liga-ah Top scorer nihna Pichichi pawh vawi hnih dawng tawhin Europe-a league hrang hranga top scorer-te zingah pawh goal a thun hnem ber avangin European Golden Shoe pawh vawi hnih a dawng tawh bawk.

Jean & Youri Djorkaeff
Jean Djorkaeff French international thin a ni a. A inkhelh tan tir lamah striker a ni thin a, mahse a hming a chherna tak erawh chu defender a a inleh hnuah a ni. French League-ah game 500 vel a khel a, 1966 World Cup khan France hmingin a khel ve. Inkhelh a chawlhsan hnuah French club leh Armenian national team enkawl hna a thawk tawh thin.

A fapa Youri Djorkaeff hian a pa ai chuan club leh ramah hlawtlinna a nei hnem zawk. Cup Winners Cup-ah Paris Saint Germain-a a khelh laiin champion an ni a, 1996 & 98-ah Inter Milan-a a khelh laiin UEFA Cup-ah an champion. 1998 World Cup leh Euro 2000-ah te khan France chu a champion pui bawk.

Miguel and Pepe Reina
Miguel Reina chu Barcelona leh Atletico Madrid goalkeeper lo ni tawh thin a ni a, Spain aiawh pawhin a lo khel fo tawh. Chu'ng chu 1980 hma lam thil a ni. Tunah hian fapa hun a thleng ve mek. A fapa Pepe Reina chu Liverpool keeper rinawm hi a ni. Liverpool a zawm hma chuan a pa khelh thinna Barcelona-ah a khel ve thin. Mahse chance a nei mumal lo.

Chumi hnuah Villarreal lamah insawnin a hming a chher hle. Hei vang hian Liverpool chuan an keeper mamawh lai takin Reina hi an mamawh chhanna ni turin an lei thei ta hlauh. Tunah chuan Premier League-a keeper tha pawl a ni.

Harry and Jamie Redknapp
Harry Redknapp chu West Ham United leh Bournemouth midfielder chhuanvawr leh innghahna a ni, a vanglai chuan. Tunah hian Tottenham boss a ni mek. English football-a manager experince nei tha pawl a ni ngei ang. Kum 2008 khan rin loh deuhin FA Cup ah a enkawl Portsmouth chu champion a nihpui a. A fapa Jamie Redknapp pawh midfielder a ni. A pa enkawlna hnuaiah Bournemouth leh Southampton ah te a khel tawh a. Livepool a khelh lai kha a hmingthat ber lai a ni awm e. England tan U-21 ah leh senior team-ah pawh a khel tawh thin.

Related Posts :



2 comments:

  1. Biakchungnunga leh a fapa Joseph Lalsangzuala.
    He PWD Defender Mizoram dung leh vanga lar em em, Biakcungnunga Laldenga Gold Cup an champion tuma Buldozer tia afans ten an koh hi a sulhnu a fapa Joseph Lalsangzuala chuan rawn chhui in Mizoram police tan Striker tha tak ah arawn in vawrh chhuak a ni.

    ReplyDelete