Monday, October 5, 2009

Zaithiam TBC-a nun kawng chhuk chho

¢ BCha

2007-a LDF Cable, Lunglei-a mi te'n zaithiam thlanna Youth Idol an buatsaih hma kha chuan Lawngtlai-ah awmin ni tin mi hrang hrang hnenah a inhlawh kual thin. A tul tul a thawk a, in saknaah a inhlawh deuh ber thin. Mahse, Youth Idol-a pakhatna a nih atangin TBC Zaithanpuia nun chu a inthlak ta a ni.


Lawngtlaiah a ni te inah awmin hna tul apiang a thawk mawp mawp thin a, zai a ngaina, kohhran thalai pawl thil tih velnaah pawh Pathian hla sain a zai ve fo. Chutah Youth Idol thlan a ni dawn tih a hriatin vanneih palh pawh awm ve thei a ni, tiin a thiante nen an tel ve ta.

Pathian hla sa thin a ni a, mahse, intihsiaknaah chuan lenglawng hla sa zawk tura fuihna a dawng nasa a, a tirah chuan Pathian hla sak tum a ni zawk mah nghe nghe. Mahse, a chhungte thurawn pawmin hla lenglawng a sa a, 'Damlai Hringnun' sain a tling chho ve ta zel a, amah pawhin a inbeisei phak loh Youth Idol atan thlan a ni ta hial mai.

"TBC-a hi a lar thiam" ti te pawhin an sawi thin. Tunhmaa tuma hriat ngai lem loh, Lawngtlai-a mi hnuaia inhlawh kual ve zak zak thin kha thawklehkhatah a rawn lar thut a ni ber a. Hetianga lar thut zo lo hi Mizo zaithiamte zingah sawi tur tam tak an awm laiin TBC-a erawhin a nun a danglam phah em em lo niin a sawi.

"Chutianga han danglamna em em a awm lo, ka danglamna ber chu hma ka sawn a. Ka hriatna te a zau phah a, mi chi hrang hrang ka tawng tam a, chu chu ka hlawkpui, tawngkam te pawh ka thiam phah," a ti. Hetia han ngaihtuaha nun sual lam kawng kan tih ang hi a zawh lem lo.

A lar tak hnuah hian engvanga talbuai lo nge a nih? "Ka tawngtai tam vang a ni," amah chuan a ti. "Mihring hi kan thil tih than hian min lo kaihruai nasa em em a, ka tawngtai tam hian ka nun a vawng a ni," a ti.

Youth Idol zawhah hla lenglawng a sak chhunzawm zel a, intihsiak tan dawna hla lenglawng sak kha hrehawm a ti a, mahse a rei tak deuh hnuah chuan ngaiah a nei ve ta mai. Kum 2007 April-ah chuan a album hmasa ber hla lenglawng 'Dah Law Maw' tih chu a tlangzarh ve ta.

He album hi a 'hit' hle a, a hunlaia Mizorama album hralh kal ber pawl a ni. A album hralhna leh programme hrang hrang a neihna atanga lawmman a dawngte chu a khawl tha zel a, a rilruah tum lian tak a nei ran a, chu chu tihhlawhtlin ngei a tum.

A pa TBC Lalramkima chu Dilkhan-ah awmin TBC-a chuan an in sak that ngei a tum a, chumi atan chuan a inkhawl tang tang a, kum 2008-ah chuan Dilkhan-a an in chu a sa tha thei ta hial mai.

In a sa thei chu a lawm ngei mai. "Khatia beisei phak loh tawpa Youth Idol atana thlan ka nih atang khan hei hi ka rilru-a awm reng a ni a, ka tihlawhtling thei ta hi ka lawm a, ka thaw deuh huai nghe nghe," a ti.

Hetianga hla lenglawng saa a lar vanglai takin Pathian fakna hla album siam a tum leh thut a, sawi pawh a hlawh viau. TBC-a chuan, "Hla lenglawng hi a sualna ka hre hran lo. Gospel album siam ka tum chhan hi ka pianthar thut vang pawh a ni lo. Piangthar sa reng ka ni tawh zawk," a ti.

Pathian-in hla lenglawng hmangin a chawimawi niin a inhria a, amah chawimawitu chu chawimawi let ve a tum mai zawk a ni.

Thlarau lam nunah chuan a lar hma daiha piangthar tawh a ni a, mite chuan a 'rau riau' ti te pawhin an sawi thin ang, biak in-a lam te a peih a, lenkhawm te pawh nuam a ti thei viau.

Mi thenkhat chuan, "Zaithiamte hi an chuai tawh lamah an piangthar a, an vanglai pelh tawh hnuah intih lar that leh nan 'Gospel chauh ka sa tawh dawn' te an ti mai mai a, an chuai tawh lamah Pathian an fak ve chauh thin," ti te pawhin an sawi thin. TBC-a erawhin chutiang rilru a pu lo, "Mahni tawka ka lar ve lai leh ka vanglai taka min chawimawitu chawimawi let ve ka duh a ni," a ti.

Tichuan, a gospel album hmasa ber 'Rinna Mit-in' tih chu 2008 April khan a tlangzarh leh ta. Album title 'Rinna Mit-in' tih hla hi ama phuah a ni nghe nghe.

He album pawh hi hralh a kal leh viau a, Mizoramah album chart te kan nei ve lo nain a tlangzarh hlim kha chuan chart No.1 a kai ngei ang.

Gospel album a siam hnuah pawh hla lenglawng a la sa chhunzawm ta zel tho a, Pathian hla aiin a sa tam zawk fê nghe nghe. Hmanah Pathian faka lam thin kha, hla lenglawng a han sak tak tak takah chuan Pathian fakin a lam ngai ta lo!

"Lenglawng han sak takah chuan kan zin kual nasa ve em em a, thatchhiatna te a lo awm a, ka nun pawh a chau tan tih ka hria. Pathian tan ka thahnem lo sawt hle tih pawh ka hria," a ti.

Chuti chung chuan lenglawng sak chu a sualna a hriat loh thu a la sawi ta fan a, "Ka eizawnna a ni a, mihring hian eizawnna kan nei theuh a, chutiang chiah chuan lenglawng pawh zaimi ka nihna anga ka eizawnna pakhat ni maiah ka ngai a, a sual em em ka hre lo," a ti.

Tichuan kumin April khan a lenglawng album pahnihna 'Nunhlui Liam Hnu' tih chu a tlangzarh ve leh ta. He album title track hi ama phuah bawk a ni a, nun hlui ngaihna hla a ni.

TBC-a hi mi lungleng thei tak mai a ni a, hla pawh a phuah ve nual tawh a, a hlate hi lunglenna lam hla a ni deuh vek nghe nghe. Amah pawh a inzêp lem lo, "Ka rualpuite zingah chuan a lungleng thei pawl tak chu ka ni ve ang, lunglen vanga mittui tla zawih zawiha zai chang te pawh ka nei ve a nia," a ti nghe nghe.

Hetianga lenglawng a sak zel lai hian September thla tir khan a dam lo ta a, a na viau mai. Kar hnih vel zet pawn chhuak peih lovin inah a awm nghe nghe. Hetia a dam loh lai hian siamtharlehna a chang ta a ni.

"Pathianin min hmangaih vangin kan tawrh leh hrehawm pawh a phal tih ka hria. Pathian ka lo tlansan rei tawh lutuk. Lenglawng hi a sualna ka hre lo ti mah ila, nun a lo tlabal thei khawp mai," tiin TBC-a chuan a sawi.

"Ka dam loh chhung hian ka inngaihtuah nasa a, Pathian pawlna pawh ka dawng. Tah chuan ka theih tawpa Pathian fak turin ka insiamthar ta a ni. 'Lenglawng ka sa tawh dawn lo' ka tihna a ni lo a, a hun leh hmun chu a awm a, mahse, a tam thei ang ber Pathian fakna hla ka sa tawh ang," a ti.

September thlaah Beihrual te an hmang a, a hlawkpui hle mai, thilpek lamah a harhthar a, sawma pahnih pek a tum tawh nghe nghe. Sawma pakhat pek hlawkzia a hre tawh a, kum 2008 khan hnuchham enkawlnaah a zai hlawh atangin sawma pakhat Rs 20,000 a pe a, hlawk a inti hle. Mahse, tunah chuan sawma pakhat mai a duhtawk tawh lo a, sawma pahnih pek a tum ta.

"Sawma pakhat hi chu Pathian ta a ni hrim hrim a, chuvangin kan ta chu sawma pakua chiah kha a ni. Kan ta ve sa hrim hrim atanga pakhat dang leh hi ka rilru-ah a awm tlat a, chutianga ti turin ka rilru ka siam ta a ni a ni," tiin hemi chungchang hi TBC-a chuan a sawi.

Sawma pahnih pe tura rilru a siam ringawt pawh a hlawkna a tel nghal pang! July thla vel atang khan programme a nei vak lo a, amah pawh a âwl angreng viau. Mahse hetia sawma pahnih pek tumna rilru a neih chiah atangin programme a nei leh nghal char char a, a awl leh hman ta mang lo thung. "A hlawkna ka tel nghal der tawh," a ti.

Tunah hian Mission Vengthlangah, hranghlui zaithiam Peter C Lalrinmawia te inah a awm a, a chenna hi nuam a ti hle a, anni nena an intawn dan pawh hi Pathian ruat ni ngeia a hriat thu a sawi.

"Thisenah inzawmna engmah kan nei lo, mahse, Youth Idol kan tih lai khan min lo khawngaih a, zai dan tur te min rawn hrilhin min rawn phone thin. 'Pakhatna i ni emaw ni lo emaw, eng dinhmunah pawh ding la, Aizawl i rawn kal hunah chuan kan inah i rawn innghat dawn nia' min ti a," tiin an intawn dan a sawi.

"An in ka thlen ni pawh kha ka theihnghilh thei lo, chawhlui nen min lo hmuak. Khatih lai khan fapa tlanbo a ina haw leh kha ka intehkhin ber. An fapa ang tak takin min en a, an thinlung tak takin min hmangaih a, engkimah min buaipui thin. Ka tan nu leh pa nih an tling tak zet a ni," tiin Peter C Lalrinmawia leh a nupui Rodingi te chungchang a sawi.

"Malsawmna an dawn hi mahni chauha eiral a thiang lo, tih hi an chhungkaw thupui a ni a, mite tana malsawmna nih hi kan tih tur leh Pathian thu a ni, an ti a. Chu chu a takin an nupui a ni," a ti.

TBC-a hian IGNOU-ah thla 6 course BPP a zir mek a, "Chawlh mawl tawp ai chuan zir neih te hi a Pathian thu ve alawm. Hmalam pana hma sawn zel tur kan ni a. Engemaw tihnaah pawh 'eng nge i qualification?' tih hi inzawhna a ni fo a, chuvangin hetia awm mawl tawp ai chuan ka zir chhunzawm ta mai a ni," tiin lehkha a zir leh chhan a sawi.

TBC-a hian nupui neih hma chu mipat hmeichhiatna hman a tum loh thu a sawi a, chutiang tur chuan a invawng thliangtlim. A music video pakhat 'Rinawm Thianghlim' tih pawh hetiang lam hla hi a ni nghe nghe.

Hetianga nupui neih hmaa mipat hmeichhiatna hmang lo tur hian a intiam tawh a, "Vanneihthlak takin intiam thei dinhmunah ka la ding alawm," a ti nghe nghe.

Related Posts :



1 comment:

  1. kan milar ho hi ei hmu zo lo an tam ltk pawi ka van ti teh lul em... they r jus only 4 fun, they all are a living toys....

    ReplyDelete