India Ram Football Club Liante Bihchianna

¢ Hmingsanga

India rama club leh club inelna sang ber I-League chu khelh a lo hun leh dawn ta. India rama club thate chuan I-League khel tur hian club hrang hrangte chu a sur a sa hnuaiah, thi leh thau pawlhin theihtawpin an inbuatsaih mek.

Kan tarlan fo tawh thin angin I-League hi Zee Sports chuan match zawng zawng live telcast-a pek an tum. India rama club hrang hrangte dinhmun hi hriat ve a tha a. Mizo zingah pawh Indian football ngainatu leh a thlir peih kan pung ve zel bawk. European Football kan hriat tluk hian Indian football hi hriat ve a tul hle mai. India ram club inkhel hi tunah 'nep' deuh rihah ngai mah ila, heng club hrang hranga khelte hi state level zawnga inkhelah chuan kan hneh loh fo te an ni lawi si. Hei vang hian Indian football hi kan ngainep ngawt thei lo. Indian football hrechiang lehzual turin kan hmalawka I - League khel tur club hrang hrangte chanchin leh he league khelh tura club hrang hrangte dinhmun ni thei awm nia kan hriat te tarlang chungin i'n lo bihchiang ve leh dawn teh ang.


CHURCHILL BROTHERS
Dinkum: 1988
Coach Carlos Pareira
Position 2008-2009: Champion
Location: Goa
Key Players: Odafe, Gouramangi Singh, Ogba Kalu Nnanna
Team Colors: White & Red

India rama chhungkaw pakhatin Football club an din hmasak ber leh chhungkaw club ding zinga tawng sang ber an ni hial awm e. Tunah hian Churchill Alemao, Goa-a politician langsar berte zinga chhiar tel ngamin a enkawl mek a ni. Season hmasaa I- League champion team an ni. I - League-a player mal chetha ber leh AIFF-in player malte chawimawina a siam zawng zawng hui vektu Churchil Brothers te hian Player Of the I-League (MVP), Best Forward, Golden Boot dawngtu Odafe Onyeka Okolie, Best Goalkeeper - Arindam Bhattacharya, Best Defender - Gouramangi Moirangthem Singh, Best Midfielder - Ogba Kalu Nnanna te an la hum thei.

Team tichak zual turin Brazilian striker Nascimento Silveira chu Dempo SC atangin an lalut a, Mizo tlangval Robert Lalthlamuana a la tel chhunzawm ang. Mizo tlangval pahnih Vanlalrova leh Vanlalfela te'n Churchill Brothers tan khelh phak tumin contract thar an ziak tawh bawk. Assamese tlangval, Oil India striker Durga Boro pawh an lalut fel tawh.

Churchill Brothers te chakna hnar pakhat chu Odafe Okolie hi a ni. Chutih rualin an player hman tangkai tak Chitra Sen chhuak hian central midfield-ah pawi a thlen thei mai thei. An lei thar Nascimento Silveira hian a ai a awh zo thei mai thei bawk. .


MOHUN BAGAN
Din kum: 1889
Coach: Karim Bencherifa
Position 2008-2009: 2
Location: Kolkata, West Bengal
Key Players: Jose Barreto, Habibur rehman , Surkumar Singh, Chidi Edeh
Team Colors: Green and Maroon
Nickname: The Mariners

India rama club upa ber leh India ram club zinga IFA Shield-a champion nihna hauh hmasa bertu an nihna ngawt pawh hi chhuan tham a tling ve reng reng. Season hmasa khan I-League-ah champion thei dinhmunah an ding hman tawh a, mahse vanduaithlak takin an match tawp lamah an che chhe hlauh. Champion ni loin pahnihna dinhmun an hauh ta ni.

Season tharah hian foreigner an neih zingah Jose Barreto leh Marcos Pereira te an hum theih bakah Chidi Edeh an nei thar a, Goan star Micky Fernandez, Riston Rodrigues te an neih belh thar bawk. Churchill Brothers atangin Genius Zenith an la bawk.

An player neih sa rawlthar rual seng sawngte hi tun season-ah chuan an hmang tangkai hle turah ngaih a ni. An chakna hnar ber tur chu an midfielder-te hi an ni ngei ang le. An coach Karim Bencherifa hian duhthlan tur a ngah khawp mai. Barreto hian goal a thun thei chhunzawm ang em? Lalramluaha hian season hmasa ai khan hmun a chang tam zawk thei ang em le?


SPORTING CLUB De GOA
Din kum: 1999
Coach: Ray Barreto
Position 2008-2009: 3
Location: Panjim, Goa
Key Players: Joseph Pereira, Elijah Junior, Bibiano Fernandes
Team Colors: Orange & White
Nickname: Flaming Oranje

Sporting Clube de Goan hi sumdawng hausa, football ngaisang em emtu Peter Vaz leh Edgar Afonso te'n kum 1999-a an din a ni. An dinna a la rei loh ang aiin tournament lian-ah an chetha thin viau. Season hmasa tan tirh lam khan a mawngphah lamah an awm deuh ngar ngar a. Division hniam lamah an awm mai dawn emaw tih laiin beisei phak baka rawn chethain, pathumna dinhmunah an inrawn inhlang kai thei ta hial a nih kha.

Kuminah hian Indian chhulchhuak, Portugal-a seilian Roy Barreto chuan a enkawl a, beiseina an nei sang leh hle. He club-a player khelte hi club dangah an insawnchhuak vak lo. hei tak hi Sporting ho chakna hnar pakhat a ni a, an player-te khelhho tamna hian team-ah chakna a siam nia sawi thin a ni.

Season tharah hian player pawimawh Joseph Pereira, Elijah Junior, Bibiano Fernandes te hi an pawimawh lehzual mai thei. Tualchhung player thahnem tak an nei a, an tangkai pui leh viau thei. An coach thar hi India national coach Bob Houghton lak a nih tuma dil vetu Ray Barreto kha a ni. India rama a kal hmain South African club Orlando Pirates, Manning Rangers te lo enkawl tawhtu kha a ni.


DEMPO SPORTS CLUB
Din Kum: 1967
Coach: Armando Colaco
Position 2008-2009: 4
Location: Panjim, Goa
Key Players: Climax Lawrence, Mahesh Gawli, Ranti Martins, Sunil Chetri.
Team Colors: Blue & white

Dempo Sports club hi din a nih tirh lamah chuan Bicholim Sports Club tih a ni. A hnu kum ngaah tuna a hming Dempo Sports Club tih a ni ta a ni. Naupang zawkte talent haichhuahna kawnga thawhhlawk tak nia sawi thin an ni.

Season tharah hian Ranty Martins leh Climax Lawrence te an la chhawr zui leh thei dawn a, tunlaia Indian striker zinga tha ber tia sawi theih Sunil Chhetri an nei thei hi phurna tham a ni ngei ang. Defender senior pahnih Abhijit Mondal leh Satish Kumar te hun hi a liam tawh ti pawhin a sawi theih ang a, anni pahnih thlak tur hian tlar hnung lamah tawnhriat ngah pahnih Anwar Ali leh Covan Lawrence an nei thar bawk.

Dharamjit Singh chu loan-in kum tluanin an hawhchhuak thei dawn a, hei hian awmzia an nei viau thei. Jerry Zirsanga hi inhliam tawh lo se, mumal takin khel ve thei tawh se kan va ti em!


MAHINDRA UNITED
Din Kum: 1952
Coach: David Booth
Position 2008-2009: 5
Location: Mumbai, Maharastra
Key Players: Subhashish Roy Chowdhury, NP Pradeep, Steven Dias,
Team Colors: Red & Black
Nickname: The Jeepman

Bengal leh Goa club ni lo zingah chuan a tawng sang ber dinhmunah pawh lo ding fo tawh an ni. Kum 2005 khan National Football League-ah champion an ni. Kum 2003, 2005 ah khan Federation Cup-ah champion an ni. Nikum khan IFA Shield-ah champion an ni bawk.

Tualchhung player chherhriamna kawngah an thawhhlawk hle. Sum leh paiah an club hian thlamuanpui tham an nei. Season hmasa lamah beisei angin chetha lo mah se season tharah hian an coach hlui David Booth chu a lo kir leh a, tunhnaia he team hmingthatna tam tak kha David Booth-a kutchhuak a ni ti ila kan sawi sual awm lo e. Season tharah hian beiseina sang tak nen lo thlir turte zinga mi an ni ngei ang.


EAST BENGAL
Din Kum: 1920
Coach: Subhash Bhowmick
Position 2008-2009: 6
Location: Kolkata, West Bengal.
Key Players: Yusif Yakubu, Baichung Bhutia, Govin Singh, Nirmal Chettri
Nickname: Red & Gold Brigade
Team Colour : Red & Gold

Kum 1920 July Ni 28 a ni a, Mohun Bagan chu Jorabagan nen Cooch Behar Cup-ah inkhel tur an ni. Jorabagan-ho chuan an star player half back Sailesh Bose chu first eleven-ah an teltir lo. Chutih lai chuan Mohun Bagan vice president, industrialist ni bawk Suresh Chandra Chaudhuri chuan Sailesh Bose chu an club-a tel turin hotu dangte rawn hmasa lovin a sawm ve ngawt a. Chutiang ngawt chuan thiltih a lo awlsam si lo. Suresh Chandra Chaudhuri chuan chu thil chu ngaithiam lovin Mohun Bagan-a a nihna zawng zawng chu bansanin Sailesh Bose, Ramesh Chandra Sen leh Aurobindo Ghosh te nen August ni 1, 1920 khan anmahni chawrchhuahna Kolkata khawchhak lam hming chawiin East Bengal Football Club chu an lo din ta a ni.

An club dinthar hming chuan chak takin hma an la nghal a. Thupui leh innghah nan tumruhna chu thlangin an emblem-a meichher chuan ‘Thil tha ti tura inbuatsaihna a entir a ni’ an ti.

An din tan lai vela an Club Chief Patron chu Maharaja of Santosh a ni. Ani hi ‘Santosh Trophy’ tia kan hriat lar em em hming chawitu hi a ni. An club hminga lawmman an lak hmasak ber chu kum 1920 khan Hercules Cup, players pasarih hmanga khelh chi Football (seven-a-side)-ah khan a ni. Chumi hnuah IFA hnuaiah Second Division-ah an inziak lut a, pathumna an ni a, chak zawkin hma an la chho zel a. Anmahni puala ground neih dan tur an dap a, Mohun Bagan-ho practice pui ber thin Natioanal AC te an zuihral lai a lo ni a, East Bengal hotute chuan thuneitute hnen lamah Mohun Bagan-ho training ground bul chu training nan an lo dil ve mek a. Chu thu chu Mohun Bagan-ho chuan an duh loh thu nasa takin an auchhuahpui a. Mahse East Begal-ho chuan chu ground chu hman phalna an hmu miau si. Tichuan an field chu a lai takah kawng kaltlang tirin an insem ta ringawt a.

British-hoin India an awp chhung khan IFA league-ah India Club pahnih Mohun Bagan leh Aryans chauh Super Division-ah khelh phalsak an ni a. East Bengal chuan an hnuhma enin khelh ve theih an duh em em a. Super Division-ah an khelh theih nan dilna an siam leh a, chutah Mohun Bagan leh Aryans ho chuan an dilna chu phalsak lo turin an lo tang ve leh fan fan a. Mahse awmzia tehchiam a nei lo, a chhan chu Super Division-a khel mek British club pakuate chuan East Bengal tel ve chu an lo phalsak nasa mai si a. Chu mai ni lovin East Bengal-ho thawhrimna zar zovin Kumartuli leh Town Club te chuan Super Division-ah khelh theihna hun remchang an neih phah ta zawk a ni.

Subhas Bhowmick chu harsatna neuh neuh, khelmual pawn lamah a neih avangin a hming a reh hman viau. Goan club Salgoacar-ah technical director hna a thawh hnu-ah awmzia a neihpui loh hnuin East Bengal-ah bawk a rawn let leh ta. Hei hian East Bengal-ah phurna nasa tak a thlen a, chu mai ni loin, India captain Baichung Bhutia chuan East Bengal tan a khel ve leh tawh dawn bawk nen, an tha a tho hle.

Foreigner Yusif Yakubu, Edmilson, Sebastian Omar Monesterolo (Argentina), Jan Berger (Czech) leh Dayoub (Lebanon) te an nei thar. Air India atangin Subhash Singh leh Harmanjot Singh Khabra, Sporting Club de Goa atangin an lei thar bawk. Heng mite hian East Bengal-ah hian 'danglamna' an thlen lo a nih chuan kuminah hian beisei tur dang a tlem ngawt ang.Hetih lai hian an player chhuanvawr Subrata Paul leh striker Sunil Chhetri, defender Surkumar Singh te hmun ruak hi an luah khat zo ang em tih chu ngaihtuah tham tak a tling bawk. Malsawmkima leh Beikhokhei te hian hmun an chang phak ang em?


MUMBAI FOOTBALL CLUB
Dinkum: 2007
Coach: Khalid Jamil
Position 2008-2009: 7th
Location: Mumbai, Maharastra
Team Colors: Yellow
Key Players: Noel Wilson, Anes Edathodika, Subhas Chakraborty, Alex Ambrose.

Zee Sports-in I-League kum sawm chhung tihchhuah theihna 'contract'AIFF atanga an neih chiah khan Essel Group te chuan an company tihlarnan leh footballl tihhmasawnna a nih beiseiin community based football club ni turin club thar an din ve nghal a. A bikin Mumbai khawpui chhunga thalia football-a talent nei thate chherchhuahna kawngah nasa zawka tanlak a nih theihna tur tein din a ni. Din a nih tan tirh atangin an chetha nghal viau. Kum 2007-ah Mumbai Football League (Elite Division - 2007)-ah pahnihna dinhmun an hauh thei nghal. An kawng a tluang hle a, hemi kum vek hian I-League Second Division-ah champion an ni leh thei nghal mai. Kum 2008-09-ah chuan firtst divison-ah hlan kai an ni zui ta. An chanchin tha avang hian Essel group te pawh an phur thar viau. Mahse, tunhnai deuh khan he club hian harsatna a tawk nasa ang reng hle. Mahindra United chet thatpui em emtu David Booth chu ruaiin rawlthar leh senior players thenkhatte nen season hmasa khan I-League-ah 7-na an ni. Season hmasa kha inham tanna hun atana hmangin season tharah hian eng tak ang maw?


CHIRAG UNITED
Din kum: 1927
Coach: Subrata Bhattacharya
Position 2008-2009 : 8
Location: Kolkata, West Bengal.
Key Players: Denson Devadas, Sandip Nandy,Du, S. Malsawmtluanga
Team Colour: Violet & white

Ever-Ready, United Sports Club ti tea hriat thin kha an ni. Kum 1927-a din ni tawh mah se kum 1993 thleng kha chuan division sangah an khel phak ngai lo. 1994-1995 season atangin division sangah inhlang kai chhoin Kolkata premier division-ah an inhlang thei ta zel a ni.

I-League khel phak club nih tumin theihtawp an chhuah a. Kum thum chhung chu a zawnin teuh deuh deuhin an awm. Kum 2007-ah chuan I-League khel phak club-ah an inhlang kai ve ta a ni. Sawi tak ang khan Ever-Ready tih chu 2006-07 United Sports Club tiin a hming an vuah a. Hemi kum vek hian he club hi IT company pakhat “RP Infosystems Ltd” chuan sponsore-in “CHIRAG” (Computers) hming chawiin Chirag United tih an lo ni ta a ni.

Season tharah IFA Shield-ah beisei phak baka chethain semi final an thleng a. Bagan defender tha pahnih Nigerian Peter Odafe leh Brazilian Eduardo Chacon te hian Chirag United defence line phui tha tawk lo hi an tiphui thei a nih chuan beisei an nei thui thei viau mai thei. Coach Subrata Bhattacharya hian rawlthar lam aiin tawnhriat ngah tawh player a lakhawm nasa. Mahse heng mite hi tlem chuan an upa deuh tawh hlawm a tih theih ang. Chutih rual chuan an tawnhriat ngahna tak hian awmzia a nei thei mai thei ve bawk.Kuminah hian I-League-ah kher lo, Kolkata League-ah tal an chetha a nih chuan sum tam zawk thawh inhuam an nei nual. He club captain Sawmtea hian eng tak thlenpui ang maw?


JCT MILLS F/C
Dinkum: 1971
Coach: Sukhvinder Singh
Position 2008-2009: 9th
Location: Phagwara, Punjab
Key Players: Karanjit Singh, Jagpreet Singh, Baldeep Singh
Team Colors: Red & White
Key Players: Karanjit Singh, Jagpreet Singh, Baldeep Singh

JCT Mills Football Club, Phagwara hi India hmar lam Football club lian ber pakhat a ni. JCT Mills-a Chairman & Managing Director MM Thapar kaihhruaina hnuaiah kum 1971 khan din a ni a, din a nih tan tirh lamah chuan Punjabi vek an khel a. Kum 1974 khan north India atanga footballer lar S. Inder Singh leh a thiante chuan Leaders Club, Jalandhar atangin JCT hi hun rei lo te chhung an zawmin kar loah he club hi a hmingtha chho ta hle.

Kum 1980-1990 khan JCT player S Parminder Singh phei chu Asian All Star Football Team-ah te hial a tel ve phak a. Kum 1996-a khelh tan National Football League (I-League)-ah khelh tan a nih kumin I.M.Vijayan, Bhaichung Bhutia, Joe Paul Anchery, Stephen Abarowei, Tejinder Kumar te chu JCT hminga khelin champion hmasa ber an ni. Hemi kum hian India ram tournament lian zawng zawngah champion an ni fai deuh vek.

Season hmasa khan beisei an phak lo. Kuminah tualchhung player tam zawk senglutin Nigerian midfielder Pen chu an lalut thar. An academy atanga chhuak naupangte chhawr tangkai an tum hle. Mizo tlangval Chhuantea pawhin JCT senior team hi a zawm tawh. Mahlima chuan season hmasa khan a zawm tawh nachungin, inhliam vangin a khel tam thei lo a nih kha. Kuminah hian he'ng Mizo tlangval pahnihte hian JCT-ah hmun an chang phak ngei turah ngai teh ang.


AIR INDIA
Dinkum: 1956
Coach: Bimal Ghosh:
Position 2008-2009: 10th
Location : Mumbai, Mahrastra
Key Players: K. Singh, Soccor Velho, Henry Gangte
Team Colors: Red

Kum 1952-a din Air India Football Club hi India ram club tha zingah a chhiar tel theih awm e. Hun harsa leh dinhmun kirhkhan tak tak tawk thin mah se, he club hi sang takah invawrh hluai lo mah se dinhmun chhe takah erawh a ding ngai lem lo.

National Football Lague tih thin I-League tia a hming vuah khelh a nih hmasak ber tumin Air India hian sum seng tam leh player nei tha Mohun Bagan a hneh hnuah phei kha chuan club lian te'n an 'huphurh' te zingah sawi an ni ve deuh ta zel a. Tuna an coach Bimal Ghosh hi Air India team khaidingtu a ni deuh ber tawh awm e.

Player tha leh langsar an nei ngai lem lo a, Bimal Ghosh hian player erawh a chherchhuak hnem tawh viau thung si. Kuminah hian kum dang ang bawkin beiseina sang tak neih tur chi an ni leh lo mai thei. Mahse a mawngphah berah erawh an awm leh miah lo ang.


SALGOACAR SC
Dinkum: 1956
Coach: Tim Hankinson
Position 2008-2009: Newly Promoted
Location: Goa
Key Players: Rocus Lamare, Francis Fernandes, Bevan D'Mello,
Team Colors: Green

Salgaocar Group of Companies neitupa sumdawng hausa mual liam ta Vasudev M Salgaocar chuan Goa state chunga football tih hmasawnna atan tiin kum 1956 khan Vimson Club tiin a din a. A hnu hnih lekah a club hming chu Salgaocar Sports Club tiin a thlak leh a. Goa state chhung chauha hming chher tum khan India ram pumah hming cher tumin hma a la chhunzawm a. Mahse a hnu rei lo teah Vasudev M. Salgaocar chu vanduai thlak takin a boral hlauh a. A tu leh fate he a club din hi chawm nun chhoh zel a, a duhthu sam ang ngeia India ram a club tha pawlah dinchuah ngei tumin theitawhtawp an chhuah a. Kum 1998 - 99 a lo her chhuah chuan National Football League a Goan club champion na hmasa ber atan Salgoacar SC chu champion an ni.

Season tharah hian kai thar zingah beiseina sang tak nen a lo thlir tur an ni mai thei. Player thar an inlakhawm nasa a. Kum 2007 -08 season khan I - Legaue First division-ah an khel tawh a, mahse hemi tum hian division hniamah an tla thla a. Season hmasa khan II Div-ah champion an nih vangin an hmel kan hmu leh dawn a ni.


SHILLONG-LAJONG FC
Dinkum: 1983
Coach: Stanley Rosario
Position 2008-2009: Newly Promoted
Location: Shillong, Meghalaya
Key Players: Aibor Khonjee, Gumpe Rime,Marlangki Suiting.
Team Colors: Green

1983-a din a ni a, I-League khel tur zingah chuan Mizo player fuankhawm tamna ber club a ni. Tunah hian Mizo player sawm tling lo deuh an kawl khawm mek. Heng zingah chuan player pathum emaw tal hi chuan first XI-ah hmun an chang ngei turah beisei a ni.

Foreigner pakhat, Chirag United atangin Nigerian Daniel Bidemi an nei. Coach thar tawnhriat ngah tak Stanley Rozario an nei thar bawk. Skill nei tha, thahrui leh tharum ngah tak tlangmi tel tamna tur a ni. Hei hi an chakna hnar pakhat tur pawh a ni ngei ang le.


PUNE FC
Dinkum: 2007
Coach: Derrick Pereira
Position 2008-2009: Newly promoted
Location :Pune, Maharastra
Key Players: Shanmugam Venkatesh, Arata Izum, Subrata Paul
Team Colors: Red

Khawvel hmun danga an tih dan zulzuiin khaw hming chu club hming atan an hmang a, India ram club thanduang ber pakhat a ni. Player inla thar nasa ber pawl pawh an ni ngei ang.

An coach thar Derrick Pareira hi India football coach zingah AFC A license coaching certificate nei tlem zinga pakhat a ni. II Div league-a an chethat avangin tun dinhmunah hian an hmel kan hmu thei dawn. Season hmasaa an defender chhuanvawr leh rinrawl Nigerian Chika Wali an nei chhunzawm ang a, central defender S Venkatesh an lei tho bawk. A hmatawng lamah tlakchham an nei. An rinrawl Jeje Lalpekhlua hian hma a sawn ve zel bawk. Lalrozama pawh a hman tlak tial tial.

Pune FC hian hmabak eng tak an nei. India ram club zingah hmunhma nei tha leh changtlung ber pawl an ni. An club kalphung pawh India ram club dangte ai chuan a mumalin awmzia an nei hle. Nakin lawkah chuan India ram football club tha ber leh changtlung ber an la nih theih ngei a beiseiawm.


VIVA KERELA
Dinkum: 2004
Coach: A.M.Sreedharan
Position 2008-2009: Newly promoted
Location: Kerela
Key Players: C. Jain P. Raj, Sabeeth C. S., Nidhil
Team Colors: White & Blue

Kerala state chhunga football ngaisangtu sumdawng hausa te'n an din a ni a. An din chhan ber pakhat chu Kerala state chhunga football-a talent nei tha te'n Kerala hming an chawimawi theihna atana kawng zawnsak a ni. Kum 2007 season khan I-League-ah an hmel kan hmu tawh a, mahse an relagate leh nghal. Kuminah hian I-League-ah bawk rawn kir lehin beiseina erawh a sang tehchiam chuang lo.

Related Posts :