IFA Shield Tan A Ni Ta, Mizo Tlangval Hmel Hmuh Tur A Tam

¢ Hmingsanga

Khawvela football tournament upa ber pawl IFA Sheild chu khelh tan a ni ta. India ram club tha zawng zawng chu an tel kim deuh vek a, Goa atangin Churchill Brothers chiah an tel thung. Chuti chung chuan India ram club thaho fuankhawm kimna chu a tling tho a, India ram pawn atangin Senegal club AS Doune an tel hian he tournament hi a ti hlu zual ve hrim hrim.

IFA chu kan hriat angin Wast Bengal state football association an ni a, state association pakhatin hetiang tournament pui leh hlun tak a siam thei hrim hrim pawh hi an fak tlak tiin a sawi theih awm e.

He tournament-ah hian Mizo tlangval tel tur an tam hle. Semi final leh final hi ESPN chuan live telecast-in a pe dawn a, TV-ah Mizo tlangvalte inkhel lai hi hmuh theih ngei lo beisei chhin teh ang. Team hrang hrangte hi i'n bihchhiang thuak thuak teh ang.

Group A
KF EAST BENGAL
Season thar atana an inbuatsaih nasa a, player te hi West Bengal state chhunga khaw pakhat Puri-ah an camp pui a ni. An insawi dan chuan kum dang aiin player pawh an fit. Burma-ah zinin frienfly match vawi li an khel a, vawi hnih chakin vawi khat ve ve draw leh chak loh an nei. Burma-ah hian Mizo tlangval Beikhokhei pawhin goal a thun ve nghe nghe.
East Bengal sawi changa mitthlaa lo lang thin chu an coach Subhas Bhowmick hi a ni awm e. Subhas Bhowmick hi harsatna neuh neuh, khelmual pawn lamah a neih avangin a hming a reh hman viau. Goan club Salgoacar-ah technical director hna a thawh hnuah awmzia a neih pui loh hnuin East Bengal-ah bawk a let leh ta. Hei hian East Bengal-ah phurna nasa tak a thlen a, chu mai ni loin, India captain Baichung Bhutia chuan East Bengal tan a khel ve leh tawh dawn bawk nen, an tha a tho hle. Malsawmkima leh Beikhokhei te hian hmun an chang phak ang em?

MIZO PLAYERS : Malsawmkima Chhangte, Beokhokhei
Coach : Subhas Bhowmick

CHIRAG UNITED
Mizo tlangval pathum - Lalmalsawma Hmar, S Malsawmtluanga leh PC Lalawmpuia te khelhna club a ni. Bagan defender tha pahnih Nigerian Peter Odafe leh Brazilian Eduardo Chacon te hian Chirag United defence line phui tha tawk lo hi an tiphui thei a nih chuan beisei an nei thui thei viau mai thei.
Coach Subrata Bhattacharya hian rawlthar lam aiin tawnhriat ngah tawh player a lakhawm nasa. Mahse heng mite hi tlem chuan an upa deuh tawh hlawm a tih theih ang. Chutih rual chuan an tawnhriat ngahna tak hian awmzia a nei thei mai thei ve bawk.
Sum leh pai chu an ngah a, an sum neih ang erawh phurna tham tling khawpin an chetha thin lo hi he club-in sawisel a hlawh fona a ni.
Mama leh Tuaitea te'n he club hi beiseina sang tak nei chungin an zawm a ni. Kuminah hian I-League-ah kher lo, Kolkata League-ah tal an chetha a nih chuan sum tam zawk thawh inhuam an nei nual. He club captain Sawmtea hian eng tak thlenpui ang maw? Kalyani-ah hun rei tak an inkulh hnuah he tournament khel tur hian an rawn chhuak a ni.

MIZO PLAYERS: Lalmalsawma Hmar, S Malsawmtluanga, PC Lalawmpuia
Coach : Subrata Bhattacharya

TATA FOOTBALL ACADEMY
Tata Football Academy chu an chanchin sawi thui ngai loin kan hre deuh vek awm e. Academy naupang hlang an ni a, tun tum IFA Shield-ah hian Pradyut Trophy-ah champion an nih vanga lo tel ve thei an ni. An naupan anga teh ngawt chi an ni lo mai thei. Coach Bijoy Kumar hian eng tak thlen pui ang maw?
MIZO PLAYERS: Awm lo
Coach : Bojoy Kumar

Group B:
MOHAMMEDAN SC
Club ropui leh hmingtha an ni reng thin. Mahse tunhnaiah an tlahniam nasa viau. Season hmasaah khan I-League atanga nekchhuah an ni a, kuminah hian I-league-a let leh tumin tan an la nasa hle. Player pawh an inlei belh nasa viau a, eng tak ang chhunzawm zel ang maw? Player experience nei tawh tak tak Dipendu Biswas, Sashti Dulley, Dipankar Roy leh Neseem Akhtar te an nei a.
MIZO PLAYERS: Awm lo
Coach: Sabbir Ali

CHURCHILL BROTHERS
Season hmasaa I - League champion team an ni. I-League-a player chethate hnena AIFF-in chawimawina a pek zawng zawng hui vektu Churchil Brothers te hian Player Of the I-League (MVP), Best Forward, Golden Boot dawngtu Odafe Onyeka Okolie, Best Goalkeeper - Arindam Bhattacharya, Best Defender - Gouramangi Moirangthem Singh, Best Midfielder - Ogba Kalu Nnanna te an la hum thei.
Team tichak zual turin Brazilian striker Nascimento Silveira chu Dempo SC atangin an lalut a, Mizo tlangval Robert Lalthlamuana a la tel chhunzawm ang. Mizo tlangval pahnih Vanlalrova leh Vanlalfela te'n Churchill Brothers tana khelh phak tumin contract thar an ziak bawk. Assamese tlangval, Oil India striker Durga Boro pawh an lalut fel tawh. Hetih lai hian an coach, I-League-a Best Coach atana thlan Zoran Djordjevic chu a bang thung. A hmunruak luah khat tur hian Brazilian coach Carlos Roberto Pereira da Silva chu ruat thar a ni. He pa hian a champion pui leh thei ang em?
Churchill Brothers te chakna hnar pakhat chu Odafe Okolie hi a ni. Chutih rualin an player tangkai tak Chitra Sen a chhuak ta hian central midfield-ah pawi a thlen thei mai thei. An lei thar Nascimento Silveira hian a ai a awh zo thei mai thei bawk.

MIZO PLAYERS: Robert Lalthlamuana, Vanlalrova, Vanlalfela, Khenthang Paite
Coach: Carlos Roberto Pereira da Silva

SHILLONG LAJONG FC
I-League khel tur zingah Mizo player tam berna club an ni. Tunah hian Mizo player sawm tling lo deuh an kawl mek. Heng zingah chuan player pathum emaw tal hi chuan first XI-ah hmun an chang ngei turah beisei a ni. Foreigner pakhat, Chirag United atangin Nigerian Daniel Bidemi an nei. Coach thar tawnhriat ngah tak Stanley Rozario an nei thar bawk. Skill nei tha, thahrui leh tharum ngah tak tlangmi tel tamna a ni. Hei hi an chakna hnar pakhat tur pawh a ni ngei ang le.

MIZO PLAYERS: Samson Ramengmawia, Lalthuamawia, Rohmingthanga, Zohmingliana, Racy K. Lalremmawia, Ronald Zothanzama, Lalruatfela, Laldingliana Khiangte
Coach: Stanley Rozario

Group C
MOHUN BAGAN
Foreigner an neih zingah Jose Barreto leh Marcos Pereira te an hum theih bakah Chidi Edeh an nei thar a, Goan star Micky Fernandez, Riston Rodrigues te an neih thar bawk. Churchill Brothers atangin Genius Zenith an la bawk.
An player neih sa rawlthar rual seng sawngte hi tun season-ah chuan an hmang tangkai hle tura ngaih an ni. An chakna hnar ber tur chu an midfielder-te hi an ni ngei ang le. An coach Karim Bencherifa hian duhthlan tur a ngah khawp mai. Barreto hian goal a thun thei chhunzawm ang em? Lalramluaha hian season hmasa ai khan hmun a chang tam zawk thei ang em le?
MIZO PLAYERS: LALRAMLUAHA
Coach: Karim Bencherife

CAMELLIA GEORGE TELEGRAPH
He club hming hi chu kan hre ve viau tawh mai thei. Mizo Footballer zingah Lalvulluaia khan hming chherna atan a lo hmang tawh a nih kha. Anmahni sponsor-tu Camellia hming chawiin Camellia George Telegraph tiin an hming an thlak tawh.
Mizo tlangval Zodinliana (Didina) chuan season thar atan a zawm ve a. Kolkata khawpui chhungah fans tam tak an nei te thinlung chawk tho thar turin he club-a rawlthar rualte hian an theihna leh thiamna an chhawr thei a ng em aw?

MIZO PLAYERS: Zodinliana
Coach: Raghu Nandi

MAHINDRA UNITED
Season hmasa khan I-League-ah pali na an ni. India national team-a an player thawh Steven Dias leh ND Pradeep te an khel tha thei viau. Hetianga an khel chhunzawm thei zel a nih chuan Mahindra United tan pawh awmze awm khawpin a hlawkna tel tur a awm ngei beisei a ni.
MIZO PLAYERS: Awm lo.
Coach: David Booth

Group D
AS Doune (Senegal)
Africa khawmualpui atangin he tournament khel tur liau liau hian India an pan vang vang a, ram dang atanga kal awm chhun an nih avang hian hriat pawh an hlawh phian. India ram club dangte hi chu an inhre sa deuh thum a, hriat chhian vak loh club khelh hi kawng leh engemaw zawng chuan thil har tak pawh a ni ve thei. An player te hriat an la ni lo.

AIR INDIA
Naupang rual an khawm a, vanneihthlak takin I-League-ah an inham tang hlauh. Kuminah hian hmasawn tumin player thar pawh an nei nual. An coach Bimal Ghosh hian player-te a rem fuh phawt chuan team chhe lo tak an nih ngei beisei a ni.

MIZO PLAYERS: Henry Gangte
Coach: Bimal Ghosh

PUNE FC
Ram dang mi player an la lei rih lo. Player inla thar nasa ber pawl erawh an ni ngei ang. Ram dang mi lak an tum rualin an tum pakhat chu India mi te'n an club-ah hian hmun pawimawh ber chang se tih a ni.
Season hmasaa an defender chhuanvawr leh rinrawl Nigerian Chika Wali an nei chhunzawm ang a, central defender S Venkatesh an lei bawk. A hmatawng lamah tlakchham an nei. An rinrawl Jeje Lalpekhlua hian hma a sawn ve zel. Lalrozama pawh a hmantlak tial tial.
Pune FC hian hmabak eng tak an nei. India ram club zingah hmunhma nei tha leh changtlung ber pawl an ni. An club kalphung pawh India ram club dang te ai chuan a mumalin awmzia an nei hle. Nakin lawkah chuan India ram football club tha ber leh changtlung ber an la nih theih ngei a beiseiawm. India coach zinga rintlak ber pawl, Mahindra United coach thin Derek Pareira hian eng tak thlen pui ang maw?

MIZO PLAYERS: Jeje Lalpekhlua, F Lalrozama
Coach: Derrick Pereira

Related Posts :