Swine Flu laka inven dan

Swine Flu-in khawvel a tibuai mek a, India ram pawh hun engemaw chen chu a chiah ta. He hri hian Mizoram pawh a thleng ve tawh a, he thu buatsaih lai thleng hian Mizoramah mi pahnihin an vei tawh tih hriat a ni.

Swine Flu tia hriat lar, H1N1 tia sawi hi thawkna dawt tibuai thei natna a ni a, he natna thlentu ber hi influenza type A niin, a tirah chuan vawk natna chi khatah ngaih a ni. Chi hrang hrang a tam em avangin a inthlakthleng reng thin a, vawk bakah mihring pawhin he hri hi an lo vei thei reng mai. He natna hi awm rengsa a ni a, mahse, mihringin an vei ngai mang lo. Tun hnaiah mihringin a kai atangin ngaihven a hlawh ta a, mi tam takin an thih phah hial vangin khawvel a ralkhel hle a ni. Mithiamte chuan mihring vei chi he natna hi 'novel flu' (hri thar) ti tein an sawi thin.

He natna hi khuh atang te, inthawk khum atangtea kai theih a nih avangin a hlauhawm hle a, mihring leh mihring inkaichhawn theih a nih vangin WHO pawh a ralkhel a, natna hlauhawm, chhiatrupna thlen thei zingah an ngaih phah hial a ni.

WHO lam chuan H1N1 leng mek hi tun hma pawha an hmuh leh hriat ngai reng reng loh natna a nih thu an sawi. Heng natna hi chi hrang hrang a awm a, chi hrang hrangah a insiam theih rualin tuna lar ta hluai ang hi chu an la hre lo nia sawi a ni.

Swine Flu Chu
Hritlang khawsik hi (Influenza, a tawi zawnga Flu an tih mai) natna hi hrik te tak te te, Virus vanga kai thin kan ni. Dan pangngaiah chuan Flu kan kai hian kan taksain a lo dolet vat thin avangin hrisel pangngai tana thihpui tham a ni ngai lem lo. Engemaw chen kan hritlang lik lek a, kan dam leh mai thin a nih hi.

Virus hi chi tam tak awmin, an nihphung a inthlak reng avangin virus chi thar a piang reng bawk. Engemaw chang hian virus hrik thenkhat chu ran leh mihringin an kaiin taksain dolet ngaihna a hriat map loh chang emaw, a dolet hleih theih loh chang emaw a awm ta thin a; chutiang chu Bird Flu (H5N1) leh tuna Swine Flu angte hi a ni.

WHO chuan tuna Swine Flu hri leng mek hi Influenza Type A chi khat, H1N1 an tih chi (strain) thar a nih thu an puang tawh.

Dan pangngaiah chuan N1H1 hrik hi vawk leh mihringa hritlang thlentu hi a ni thin. Mahse tuna Swine Flu hi mithiamte chuan H1N1 hrik chi-ah pawh a chi (strain) thar diai a nih thu sawiin, a hmain an la hmu ngai lo tih an sawi.

An sawi zel danin he H1N1 hrik chi thar hian vawk hritlang hrik piangphung (gene) te, mihring hritlang hrik piangphung te leh, sava hritlang hrik piangphung a nei kawp vek a ni.

A damdawi siamchhuah a la ni lo a, mithiamte chuan kut silfai te, pawna chhuah dawna hnar khuh te leh inkhuh khum te tih loh tur tih vel bak sawi theih an la nei bik chuang lo.

H1N1 hi hritlang khawsik pangngai anga thawkin a langchhuak thin. Khawsik, khuh, hrawkna, taksa kham hrem hrum te a siam thin a ni.

Awlsam tea inkai theih a ni a, khuh atang ringawt pawha inkai theih a nih vangin a darh chak em em. Mi pakhatin a vei tawh chuan a bul vela mite chu awlsam te in a kai tawh mai thin.

Swine Flu hi 1918-ah khan a leng tawh. Mahse, WHO chief Margaret Chan chuan kum 1918 nena khawvel dinhmun dinhmun danglam dan sawiin, mihringte hian H1N1 ang chi tho hritlang khawsik natna kan tuar fo a, chuvang chuan nasa takin he natna hi kan taksain a do thei dawn niin a sawi. Mahse, he natna hi naupang lamin an huat zual avangin thil danglam tak nia an ngaih thu a sawi thung.

Doctor te chuan he hri hi hlauva chi-ai tur a nih loh thu an sawi a, tihdam theih a nih thu leh inven theih a nih thu an sawi bawk. Mizoramah pawh health services deptt. chuan a do kawngah hma an la a, he natna hi Mizoramah rawn thleng tawh mah se 'control' theih ngei an beisei.

Swine Flu laka i him theih nan he'ng hi chhinchhiah rawh:

A lanchhuah dante
Khawsik A lanchhuah dan dangte
Khuh Taksa na awm na
Hrawk thip Lu na Khawthalo
Hnap tui Chau Luakchhuak

Natna benvawn nei, entirnan zunthlum, hypertension, lung tha lo, thawhah, bronchitis etc., puitling kum 65 chung lam, naupang kum 5 hnuai lam leh hmeichhia naupaite'n he natna hi an kai sam.

Nang leh i lamhnaite an him theih nan tiang hian inveng rawh:
* I khuh leh hahchhiau laiin tissue emaw romol emaw hmangin inhup thin rawh.
* Tui leh sahbon hmangin i kut fai takin sil thin ang che, a bikin i khuh leh hahchhiau zawhah.
* I mit, hnar leh ka te khawih lo hram hram rawh.
* Damlo nen taksa insia awm loh hram tur.
* Mi zawng zawngin hmai tuam kher a tul lo
* Hmai tuam nan hian surgical mask kher a ngai hran lo. Puan them pangngaia inhup pawh a him. Duhthusamah chuan puan them hi thuah a tha.
* Eng tik lai pawha hmai tuam kher a ngai hran lo. He natna veite'n an hahchhiau khum che emaw an khuh khum che emaw a nih chuan, chuta tang chuan i kai thei a, chuvangin dam pangngaite nena awmho laia intuam reng kher a tul lo.
* Mi zawng zawngin infinfiah kher an mamawh lo.
* Mi zawng zawng damdawi ina awm a tul kher lo.

Tih tur
* Khuh lai leh hahchhiau lai te'n romol emaw tissue emawin inhup rawh.
* Hnar, mit leh ka te i khawih zawhah tui leh sabon hmangin fai takin i kut sil zel ang che.
* Puipunnaah kal lo la.
* Tui takin mu la, i taksa duat la, rilru hahna nei suh.
* Chaw tha eiin a tam thei ang ber tui in tur.

Tih loh tur
* Mi nazawng chibai, kuah leh fawh te tih loh tur, inchiauau dan dang hman tur.
* Daktawr rawn lovin damdawi ei ngawt suh.
* Chhuak hnem suh.

Swine Flu Damdawi Hmuchhuak
Swine Flu damdawi chu Europe-ah siam chhuah a ni ta a, mahse, tun atanga thlahnih a ral hnuah zawrhchhuah theih a nih chauh beisei a ni.

Swine Flu damdawi hi Norvatis, Marburg Germany atanga siam chhuah a ni a. Cell culture atanga siam chhuah niin tun hma a artui hmanga hetiang damdawi siam chhuah a ni thin dan aia ranga siam chhuah a ni.

Norvatis Company chuan he damdawi hi siam chhuak tawh mahse la hman mai loh a nih tur thu an sawi thung.

He damdawi hi siam nawn leh tum a ni a, chumi hnuah khawvel pum huapa hralh chhuah theih tura ruahman chauh a ni ang.

Norvatis ho hi US official tena an puihbawm anni a. Damdawi hi artui hmanga siam leh chhawn tur a ni a, hetiang hmang hian tun hma pawhin Flu damdawi hi siam a ni thin.

Norvatis ho chuan hetia a damdawi an siam theih hnuah hi chuan virus chi atanga a thahna siam leh chu anhna thar a nih tur thu an sawi a. Tun dinhmunah chuan he damdawi hi an siam thu sawi mahse a virus awlsam taka thah a nih theihnan tih tur a la tam hle thung a. Mahse, technically chuan H1N1 thahna damdawi siam hmasa ber anni ta a ni.

Norvatis ho chuan khawvel ramhrang hrang 35 lai atangin order anhmuh nghal thu an sawi a. Hetihlai hian UK erawh chuan Norvatis atanghian order a siam ve lo thung a.

UK sorkar chuan firm pahnih nen contract siaminH1N1 damdawi siam a nih theihnan sum pawh a seng nasa hle tawh a. Tun atanga hun reiloteah UK mi zawng zawng tana hman tur ansiam chhuah theih ngei an beisei thung a ni.

Hmai tuamna a him em?
Swine Flu a lar a, hmai tuamna hralh a ni nghal chur chur a. He natna tihbaiawm tak mai hi khawvel ram tinah a darhta nei nuai mai. Aizawl khawpuiah ngei pawh mi tam tak chuan hmai tuamna an lei a, man to tak takin man tlawm tak tak an lei.

Hmai tuamna hian Swine Flu lakah min veng tak tak em? Engtiang chiaha him nge a nih?

Professor John Oxford, The Barts and the London a Virologist chuan, “Hmai tuamna hian he natna laka a venna hi a tam lo khawp mai. A nihna takah chuan Mexico a mipui nawlpui tana invenna atana hmai tuamna pek vak khan mipui inrintawkna a ti chiai zo mai mai zawk” a ti.

Mexico chu Swine Flu bul tanna a ni a, chu ramah chuan hmai tuamna hi an pe chhuak hmasa ber a. Mipui nawlpuiin anhman atan an pe chhuak a ni. Mahse, ram dangah chuan Mexico tih dan ang chuan an ti ve kher chuang lo. UK ah te chuan hmai tuamna hi health staff te bakin an hmang lo.

Belgium ram chuan tlem a zawng chu an hmang ve nia sawi a ni a. Spain chuan thlawhna a zin veivakte hman atan a pe ve chauh thung a. Chutihrual erawh chuan hmai tuamna chu a duh tan chuan hman a tha an ti tho bawk.

Damdawi lama hnathawkte tan erawh hman ngei tura ngaih a ni thung a. A chhan pawh he natna veitu te nena inhnim hnai tak annih vang a ni a, hmai tuamna mai a ni lo, kut kawr thlenga hmang tura tih anni.

Dr Ronald Cutler, University of London, Professor Oxford chuan, “Damdawi in lama hnathawkte hi chu an fimkhur a ngai a, he virus kawltu te nena inhnim hnai annih vangin anmahni kaltlangin an kai thei a ni” a ti.

Khawthlang lam ramah chuan he virus kai theihlohna tura a bik tak siam a awm thung a. Tuna Mizoram vela kan hman hi chu Construcion Worker tena thil khu luih luih laka anhimna atana an hman ang mai chauh a ni. Mahse, khawthlang ramin anhman ang pawh chuan 100% in himna a pe chuang lova, mahse, a dang ai chuan tha zawka ngaih a ni thung.

Dr Ronald Cutler, deputy director of biomedical science, University of London chuan, “Hmai tuamna i hmanga i khuh a nih chuan i hmai tuamna khan tam tak a dang dawn a, mi zawng zawngin hmai tuamna an vuah vek chuan inkai chhawn chu a tihar deuh ang chu” a ti a.

“A inven dan tha ber chu i khuhin i ka hup la, i kut fai takin sil bawk rawh”a ti.

Gail Lusardi, infection control specialist, Glamorgan University chuan, “Hmai khuhna ringawt hi chuan he natna hi a dang dawn lo. A pawimawh ber chu kut fai taka sil te, kan ei leh in tur tih thianghlim te leh kan chhehvel vawnfaite hi a pawimawh a ni” a ti a.

“Hmai tuamna te chu dar kar 10 thleng pawhin i hmang a ni thei a. I hmantawh loh chuan a tharin i hlak ngei tur a ni” a ti bawk.

Related Posts :