Monday, August 10, 2009

Rawngbawltute leh sum!

Rev Chanchinmawia (Fam) khan Synod Moderator a nih laiin a thusawinaah "Pastor ka ni a, office ka dawr ngai lo," tiin pastor leh rawngbawltu zingah sum leh pai leh therhlo ilo ngaihtuaha sorkar office dawr thinte sim tura a duh thu a sawi a, kha thuchah khan awmzia nei thui khawp mai.

Kohhran rawngbawltu zingah rau rau pawh Pastor/Minister (Reverend) te ngat hi chuan ngaihsan an hlawh thin viau. Hun puma rawngbawl tura inpe, khawvel ropuina, hausakna leh nawmsakna malmak ngam tura ngaih an ni. Duh sela chuan an zinga thenkhat hi chu officer, sumdawng hausa leh politician tha tak tak ni thei tur pawh an ni. Chutiang thoin Synod office-a thawkte pawh hi hlawh/sum leh pai aia rawngbawlna rilru pu lian zawk tura ngaihna a awm bawk. Kohhran hnuaiah chuan hlawh a tha lo tih hre reng chunga thawk an nih bakah mahni lawina Kohhran theuha rawngbawltu langsar takte an nih bawk avangin zahawmna an kengtel ve hrim hrim a ni.

Mahse, tunlai khawvelah hian sum leh pai hian thil a tih theih tawh em avangin rawngbawltu langsar tak tak te, rawngbawlnaa ngaia pension thlenga thawkte zingah meuh hausak chak an lo awm fur a lo ni. Chiahpuam-ah pawh khan rawngbawltu (Pastor pension thlengin an ti) inhnamhnawih leh pawisa chan ve an tam niin an sawi thin.

Mipui nawlpui leh sum inlaichinna chu thuhranah dah ta ila, sakhaw rawngbawltute zingah meuh pawh a dik a dawk thlu lo a, a thangmawi tur pawh ngaihtuah chang lo a hausak thut tum an lo awm ru teuh a nih chuan kohhran hmabak hi a thim viau dawn a ni.

Chu chuan kohhran hruaitu zawng zawng a nawlpuia lakin sum itna rilru pu vek an ni tihna a ni lo. Chutiang zawnga hming lang chu tlem te zawk an ni. Kohhran dinhmun vei tak takte hian ngawih an chuh rih niin a lang a, mahse heti zel a kan kal chuan engemaw hi a la puakchhuak anga kohhran pumpui hian a tawrh phah ang tih hlauhawm tak a ni.

Related Posts :



No comments:

Post a Comment