Mipuite hnena eitur thianghlim chhawp chu sorkar tih tur a ni a, Mizoram sorkar erawhin chutiang a la hlat hle. Heti lama hma la tura dinte pawhin hma an la thei tak tak lo.
Ei leh in tur thianghlim lo leh him lo laka mipui an him theihna turin India sorkar chuan Prevention of Food Adulteration Act 1954 a siam a, he dan hmang tur hian Mizoram sorkar pawhin 1991 khan Mizoram PFA Rules a siam a, a buaipui zui turin food inspector/field officer pawh pahnih chu a ruat. Anni an han pension a, kum 10 chuang mah chu mipui ei leh in tur a him leh him loh buaipuitu tur Mizoram chuan a nei lo a nih chu!
2004 khan thawktu pahnih chu an han la ve leh a, mahse, dan a lo khirh em avangin an mi lakte chuan 2006 khan an hna chu an zawm tak tak chauh thung. Tichuan, Mizoram puma mipuite ei tur him leh him loh chu mi pahnih kutah a awm deuh rawt a ni. PFA dan chungchanga buaipuitu tur nodal officer pakhat bakah a khaikhawm tak tak turin health services director chu state food health authority-in a awm bawk.
Tuna Mizoram dinhmun ni ta chu - PFA Cell hi nodal officer pakhatin enkawlna hnuaiah health services deptt. hnuaiah a awm a, nodal officer hnuaiah chuan food inpector pahnih an awm. Chu'ng food inspector pahnihte tan chuan Mizoram puma eitur zawrh hrang hrangte endik theih ngaihna a awm lo. Endik pawh ni se a finfiahna a awm lo a, a finfiahna tur laboratory chu Mizoram hian a nei lo mai a ni lo, mi ta pawh a hmang pha lo!
India ramin Food Adultery Prevention Act a neih chu ram dangin an lo hrethiam lo nasa mai a; chuvangin FPA Act 1954 thlakna turin Food Safety and Standard Act 2006 chu a siamchhuak ta a ni. Mizoram sorkar pawh chumi hmang tur chuan a inbuatsaih mek a, kum tawp lamah chuan hman theih a ni mai thei.
Dan thar hman a nih tak tak hunah chuan commissioner-in a ho ang a, a hnuaiah hian ei tur him leh him loh buaipui turin officer an awm ang. Aizawlah pahnih chauh awm lovin district-tinah an inzarpharh ang.
Hetiang dinhmuna Mizoram a din lai hian 13th Finance Commission khan ei leh in tur him leh thianghlim chu a rawn ngai pawimawh a, state sorkar hrang hrangte chu an hmalak dan tur ruahmanna thehluta siam tura tih an ni. Mizoram sorkar pawhin health department hnuaia PFA chu roadmap siam turin a ti a, anni lamin department mal tih theih a nih lo tiin, department hrang hrang inrawnkhawm leh tanghovin, trade and commerce deptt, industries deptt. etc te nena tih tur a ni tiin rawtna thar an siam a. Chu rawtna a puitlin chuan 13th Finance Commission duh dan tipuitling turin Mizoram chuan ke a pen tan dawn a ni. Roadmap-ah hian Andhra Pradesh siam chuan fak a hlawh hle a, anni chuan zirna in leh mithiam chi hrang hrang te nena tanghoin an siam nghe nghe.
Monday, August 17, 2009
Mipuite tan eitur thianghlim
Subscribe to:
Post Comments (Atom)
No comments:
Post a Comment