Monday, August 24, 2009

Human Rights tana Media hnathawh

¢ Ruatfela Nu

Thu tak hla tak pai, Zozam Weekly kum 5 tlin lawm nana ka thupui ziah tur hi ka phur viau rualin hun erawh ka nei tlem hle. Ni khat em pawh tling lo, darkar rei lo te chhunga ziah chu ka huphurh hle. Tunlai khawvela thupui pawimawh ber pali- Human Rights, Media, Corruption leh Good Governance zinga pahnih, media-in human rights lama nghawng a neih dan ziak tur hian hun thawl hek hawk neiha human rights bawhchhiatna te deuh leh liantham a awm pawha kan khawtlang kalphung vanga dan rorelnain (rule of law) kori a tuk hlei theih loh laia media vanga rorelna dik (justice) lo awm thin te a chinchhuaka phawrh a chakawm hle. Ka hun neihin document kaihpharh vel a remti ngang si lo a le, ka tawnhriat (experience) atanga ka nuai mai a ngai dawn a ni.

Mizoramah hian human rights humhalh leh chawisan thu hla hi Himalaya tlang panga vur zawrh ang maia hralh kal lo a ni thin. Chutih rualin tun kum hnih/thum chhung lek hian Third Generation of Human Rights/Rights to Development erawh tlemin hralh a kal ta deuh. Chumi rual chuan human rights tobul leh a nihphung thuk zawk, mimal dikna leh chanvo (individual rights) aiin, huho/pawl tana dikna leh chanvo (collective/group rights) pawh hralh a nuam sawt hle bawk.

Entir nan- Naupang dikna chanvo (child rights) kan chawilar mek hi collective rights zinga mi a ni. Chutah chuan media-in nghawng lian tak a nei. Naupang pual bil dan chuan naupang harsatna nei chi hniha thenin, naupang dan nena inrem lo (juvenile in conflict with law) leh naupang enkawl leh venhim ngai (children in need of care and protection) te chu a humhalh tlat a. Naupang pawngsual tawk emaw, dan nena inrem lova khawsa (thil tisual) emaw te chanchin, anmahni hriat theihna reng reng, thuthar thehdarhna hmanruaah (print & electronic media) tarlan phal a ni lo. Chu naupang humhalhna dan chu media mite'n pawmin an zawm tha hle. Hei hi media-in human rights-a nghawng a neihlen ber zinga mi a ni awm e.

Media-in human rights lama nghawng a neih pakhat leh chu hmasawnna kawnga khua leh tuite dikna chanvo, keini angin third generation of human rights tia kan sawi deuh kher, mi tam takin rights to development an tih hi a ni. Ram inrelbawlna kawnga a vawnfung chelhtute’n thuneihna zawng zawng (political power, economic power leh judiciary power) thlengin an pumhmawm vek a, ram pum huap hmasawnna tiin, project lian pianpui pui an ruahman a, anmahni (sorkar)-in a siamin a thawk vek thin a, project lian tak tak, cheng vaibelchhe tel senna an siam tawl/thlawn rem rum a, building lianpui pui an sa thleh thluah a. He'ng hi han thlir thuak chuan a duhawm viauin a lang a, ram hmasawnna ruhrel leh ruangam lanna tak pawh a ang a, mahse, ngun taka bihchian chuan development tia an auhla hi mipui bumna mai a ni a, project lianpui pui, chengvaibelchhe tel senna hian mipui mimir, miretheite hnenah eng hmasawnna mah a thlen ngai lo. Thlen a hnekin mirethei leh hausa te inkar tikakzau zual zeltu chauh a ni. Vohbik mi tlem te invulh thauna mai a ni. Chu tianga sorkarin kawng dik lo a zawh mek chu media-in mipui min hrilh thin vangin mipui chuan “Khawnge hmasawnna chu?” tiin kan zawt zui ngam ta thin a ni.

Decmocracy kawra hmanga decmocracy auhla nema “Vantlang hamthatna” tih te, “Mipui vantlang tan” tih te, “Kan ram leh hnam tan” tih te leh “Pathian leh kan ram tan” ti chung zela mipui hmasawnna aia anmahni leh an vua leh vang, an party mi leh sate hamthatna chiah ngaihtuahtu an nihzia hi hmun kilkhawr bera chengte pawhin media kaltlangin kan hre tan tawh. Hmasawnna hi kan ta a ni. Sorkarin kawngpui tha, tui leh eng hnianghnar, zirna chhenfakawm, damdawi hmanga inenkawlna rintlak leh ei leh bar kawnga phang lova kan awm theihna tur min pek hi an bat a ni. MLA, minister leh chief minister te hian an hmalakna an sawi nikhuaa; “Kan ti tha, hmasawnna kan thlen...” tia an iak an iak hi a tul hran lo. An ti tha a ni lo a, an tih tur dik tak, an kova mawhphurhna an nghah an ti mai chauh a ni. He ramah hian media-te vangin 'civil centric society' a la ding tawng tawng a. Decmocracy hmaikawr vuaha 'government centric society' zawk tundin duhtute hi media thiltihtheihnain a nghawng vangin an tawmim leh rih thin a ni.

Media-in human rights lama nghawng an neih lenna ber pakhat chu dan rorelna aia tlangchil (mob rule) dik lohzia thu-ah hian a ni awm e. Ruihlo do vanglai khan, ruihhlo do bawhzuina vanga human rights bawhchhiatna nasatzia, mihring nunna pawh zah lova misuala puhte court hmaa thiamthu sawina chance pe lova, mahni thuneihna inpe chawpa rawng taka nghaisa thintute chu dan kengkawhtu leh dan hmanga roreltute pawhin an tha en mai mai a. Danin kori a tu lo a ni. Khatihlai khan media mi pakhat chuan “Heng mi (misuala puhte sawisa a, chenna in atang hnawtchhuak a, tangka chawitir a, thih thlenga nghaisa thintu) te hremna pe tur hian an chungah khawtlang kalphung vangin danin ro a rel thei/ngam si lo. An thil tih dik lohzia, chanchinbua tarlan reng hi hremna awmchhun a ni mai,” tiin a sawi a.

He ngaihdan vang ni kher loin, thil thleng a nih vanga media-in human rights bawhchhiatna thleng thin an tarlan thin chu bawhchhetute chuan an duh lo thin hle. Media mi leh media hmang tangkaitu tam tak hi a hretu kan ni. Ruihhlo do pass hlimchhawnah khan office lian tak pakhatah lenga sawm ka ni a. Lenga min sawmtute chuan kan khawtlang nun tichhetu, ruihhlo do a tulzia leh do an tum dan kalh zawnga chanchinbua thuziak tawh lo turin min ngen a. Kei chuan, "Chanchinbu hmang lo chuan ka thu ken, human rights humhalh leh chawisan pawimawhzia eng tin nge ka thehdarh theih ang?" tiin ka hnial a. Chutah hotu pakhat chuan, “Keini pawhin mihring tan thil tha tam tak kan ti a, chanchinbuah kan intlangzarh chuai chuai kher lo,” a ti a. "E, chanchinbu tel lo chuan ruihhlo kan do thei hauh lo ang. Lo ngai reng mah rawh u, chanchinbu chu in la mamawh ve khawp ang," ka ti leh a. Hun a lo kal zel a, a tir lamah chuan chanchinbu chu mamawh an inti lo ta ngei reng a. Mahse ka sawi lawk ang chiahin hun rei lo teah chanchinbu pawimawhzia leh an mahmawhna a lo lang thuai a, a khat tawk aia zing daihin an thil tihthat an rawn tarlang ta chamchi leh lawi si.

He mi hnu daih hian inleng ka nei ve leh a. Patling hlir pakua (9) zetin min thuthual thup a, an rawn len chhan chu human rights chungchang chanchinbua ziak tawh lo tura min ngen duh vang a ni ber. A tuk lawkah dan rorelna (rule of law) pawimawhna ka ziak leh tho a! Heng hi a chhan ber chu media-in human rights tana a thawh that vang a ni.

Ruihhlo do bawhzui vanglai - 2005-2007 chhung khan media kaltlanga mi hrang hrangin ruihhlo do bawhzui chungchanga an ngaihdan an ziak (article) leh media miin a mimal ngaihdan a tarlanna (editorial) chanchinbu lianzual panga-a mi ka khawl vek a, tunhnu hian ka bihnawn fo thin a. Dik tak chuan human rights bawhchhiatna titawp tur emaw, dodal tur emawin human rights activist inti, mi tlemte ten tih theih kan nei tlem hle kha a ni a. Media kaltlanga mi hrang hrangin an ngaihdan an tarlan leh thuthar a nih anga chanchinbua chhuah thin a ni khan nghawng tha tak neiin, tumah dan chunga leng kan awm lo ti chung zela dan chunga leng tho si te kha zawi zawiin a hneh tial tial zawk a ni.

Khawvel chanchin kal tawh zawng zawng kan thlir chuan media zalenna rahbehna ram apiangah human rights bawhchhiatna a hluar vek. Dan rorelnain kori a tuk lohna ram apiangah mipui an zalen lo bawk. Keini ram chu ram danpui hnuaiah media-in zalen zau tak a neih vangin, human rights bawhchhiatna thleng thinte media-ah tarlan a ni thin a, chu chuan a tha zawngin nghawng a nei zel a ni.

Related Posts :



No comments:

Post a Comment