Monday, August 10, 2009

Bus Fare A To Em?

Aizawl khawpuia nitin veivahna atana hman nasat ber chu City Bus hi a ni awm e. Mipui nawlpuite hman a nih vangin mipui bus kan ti thei ang.

Bus chuan man erawh India ram khawpui dangte nena tehkhin chuan a sang lawr lak thung.

Bus chuanman mai a ni lo, taxi chuanman thlengin a sang a, chawmhlawm state-ah heti taka motor chuan man a sang hi mipui tan a pawi thlawt.

Tun hnai lawkah Mizoram State Transport Authority chuan Aizawl City Bus chuan man a tihniam a, City Bus neitute chuan sorkar thu leh hla chu zawm an tum lem lo.

Mahse, anmahni thua hmala lovin anmahni khaihkawmtu Mizoram Road Transports’ Union hnenah thutawp siam turin thu an thlen a ni.

Bus chuan man hi tun hma atang tawha inhnialna a ni thin. Chumai a ni lo, taxi chuan man chungchangah pawh nawrhna hial a thleng tawh thin.

State Transport Authority chuan July ni 31, 2009 atanga hman nghal turin Aizawl khawpuia Bus chuan man a bithliah thar a, he ruahmanna thar ang hian Aizawl City Bus chuan man chu stand 2 thleng Rs.2/-, stand 4 thleng Rs.4/-, stand 7 thleng Rs.6/-, stand 9 thleng Rs.8/-, stand 11 thleng Rs.9/-, stand 13 thleng Rs.10/-, stand 15 thleng Rs.11/-, stand 17 thleng Rs.12/-, stand 19 thleng Rs.13/-, stand 21 thleng Rs.14/- leh stand 22 leh a aia thui Rs.15/- a ni tawh dawn a, hei hi dan angin sorkar Gazette-ah pawh tihchhuah a ni tawh a ni.

Road Transport Union president R Lalhmunpuia chuan, “ADA-in a lak lai kha chuan harsatna kan nei ngai lo. Tun hnuah Municipal-in a lak hnu hian harsatna a awm ta a ni,” a ti.

“Ch. Chhunga Bus Terminal-ah pawh buaina kan nei mek a. Parking Fee man Rs 100/- a ni tawp a, thla khatah phei chuan rs 3000/- vel chawi a lo ngai a,” tia sawiin, “Terminal chhunga thil awmte pawh pawisa tel lo chuan hman theih a ni lo. Vantlang zun in a awm lo a, zun man pawh pawisa ngai vek a ni zel a. Chu mai a ni lo, taxi tak ngial pawh a compun chhunga a luh hlek tawh chuan Rs 5/- an chawi zel tho,” a ti.

Harsatna hrang hrang motor hmanga eizawngtute chuan an tawk nia sawiin R. Lalhmunpuia chuan, “Maxi Cab pawhin harsatna nasa tak kan tawk a ni,” a ti.

“Authorisation certificate a ngai an ti a, a tirah phei chuan authorisation certificate hi Rs 6000/- lai a ni. Mahse, inbiakna te kan neih hnuah Rs 5000/- min tihsak leh a. Authorisation certificate chu a tul nia kan ngaih vangin transport deptt- in ti tura min tih chu kan chawi mai a ni,” tiin R. Lalhmunmawia chuan a sawi.

“Mahse, state dangte kan han zawt chiang a, chutiang an lo chawi hauh si lo. Authorisation chu thuhran, state chhunga service te chuan chawi an lo nei reng reng lo a. Chumi hnuah Rs 4000/- tala min tihsak turin kan ti leh a ni,” a ti.

“Hemi vang hian Court-ah hian kan kal a, High Court-ah kan inkhing a, mahse, chak lo dawn nia an inhriat vang nge kan inbia a, verbal agreement-in kan inrem a ni,” a ti bawk.

“Mahse, mak tak maiin Authorisation Certificate chu an titawp a. Mahse, Plying Permit man chu an rawn tisang lehta duai a,” a ti bawk.

“Kum dangah plying permit atan Rs 100/- kan chawi thin a, tunah Rs 4000/- lawih chawi turin min ti lehta a ni. Hei hi tun hnai lawka State Transport Authority thurel a ni,” a ti.

“STA thurel hi kan hriat veleh kan inkokhawm ta chuk chuk a, naktuk hian hemi chungchang leh motor hmanga eizawngtu tena harsatna kan tawhte sawihona kan nei ang,” tiin a sawi bawk.

City Bus chungchangah, “Tun tuma order thar an siam hi a mak akn ti a ni” a ti a, “Kei ni chuan a tlawm zawnga kal chu kan duh lo hul hual,” a ti.

“A hmain mithiam te’n motor hmanga eizawngtu tena hamthatna kan chan ve theihnan te leh mipui phurrit a nih loh theihnan ruahmanna fel tak an siam a. A tirah pawh pawl tin te’n kan duhthusam ang a ni mai ang chu, rate kan thehlut vek a. Chumi atang chuan expert committee in rualkhai takin a rate min siamsak leh a ni,” a ti.

“Expert Committee te kha an thiam kan ti a, kan duhthusam chu a ni hauh lo, mahse, mipui tan pawha phurrit ni lo leh motor neitu te tan pawha channa ni lutuk lo in min siamsak thiam kan ti a ni,” a ti.

“City Bus chuan man pawh a hniam zawnga kal leh hi chu kan remti thei lo. Hetianga thil a awm hi a pawi kan ti a, keini pawhin theihtawp chhuahin hma lak kan tum ve ang,” a ti bawk.

Hetihlai hian Mizoram Univeristy-a Economics Professor Tlanglawma chuan City Bus chuanman chu to a ti thung.

Proff. Tlanglawma chuan, “Town Bus te chu mimal ta a ni a, a neitute chuan a hlawk thei ang ber tur an duh ang chu,” tiin a ngaihdan Zozam Weekly a hrilh.

“Bus chuan man reng reng hi tun hma atangin a to lawr lak a, India ram hmun dang nena thekhin chi pawh a ni lo. Mipui hamthatna kan ngaihtuah a nih phawt chuan City Bus chuanman hi tihhniam ngei ngei turah ka ngai,” a ti.

“Bus Stand tinah Rs 2/- vel a ni zel a. Hei hi chu a to lutuk deuh chu a ni. Kan Bus stand te lah inhnaih te te a ni a, tihhniam hi awm ka ti thlawt mai,” a ti.

“Mizoramin harsatna kan neih chu pawl angin kan ding thleh thluah a, pawl chu sorkar berin a ngam leh thin si lo hi a ni” a ti a, “Tunah pawh chhuanlamah chuan Diesel/ Petrol man sang kan sawi a ni thei. Mahse, engmah tham a ni lo, tihsan phahna tham a ni lo,” a ti.

Hetih lai hian mipui leh zirlaite hamthatna ngaihtuahtu tlawmngai pawl hrang hrang kalkhawmte chuan Mizoram sorkarin State Transport Authority rawtna anga City Bus chuan man thar, sorkar Gazette-a a chhuah chu khawng taka kal tlangpui thuai turin sorkar an ngen. Resolution an siam nghal a, he resolution hi Mizoram Consumers’ Union, Mizo Zirlai Pawl, Mizo Students Union, Mizoram Labour and Cultivator Union (MICLUN) leh National Trade Union of Mizoram (NTUM) hruaitute’n inlungrualin an siam a ni.

An resolution-ah chuan STA rawtna anga sorkarin tun hnaia bus chuan man thar a siam, sorkar Gazette-a tih chhuah tak chu India ram state hrang hranga bus chuan man nena khaikhin chuan la sang filawr hle mah se, sorkarin hriattirna Gazette-a chhuaha a puan zar tawh a nih avangin hman zui tha an tih thu an sawi a, hei aia rate sang reng reng chu engti kawng maha pawm theih chi ni lovin an sawi bawk.

Heng tlawmngai pawl hrang hrangte hian Mizorama motor chuan man leh thil phurh man sang lutuk tihhniam dan tur ngaihtuahin inhmuhkhawm leh thuai an remti bawk a ni.

Hetih lai hian Aizawl City Bus Owners Association chuan bus chuan man thar hi vawiin thleng khan an la hmang lova, an hman lohna chhanchu, Aizawl City Bus Owners Association Treasurer, R.Zahlira chuan sorkarin bus chuan man, tun thla atanga a tihhniam chu Mizoram Road Transports’ Union-ah ngaihtuah a la nih loh vang niin a sawi.

City Bus neitute chuan bus chuan man tihhniam emaw, tihsan emaw a nihin a hman dan tur chungchang sawihovin conductor-te pawh zirtir hmasak phawt an ni thin a, hemi bakah hian he order copy hi Aizawl City Bus Owners’ Association chuan a la hmu lo a, chuvangin tun thlengin a ngaiin a la kal rih niin a sawi a ni.

He bus chuan man ennawn a nih lai hian central sorkar chuan diesel man chu tun hma rate angin a tisang leh a, hemi hnu hian bus neitute chuan bus chuan man tihhniam tum mek chu sut leh turin sorkarah ngenna an thlen ve bawk. Chu chu chhanna hmuh a la ni lo niin a Zahlira chuan a sawi.

Hetih lai hian sorkar lam chuan bus chuan man bithliah thar zawm duh lote chungah dan lek a ni ang tih a lo sawi tawh bawk a ni.

Related Posts :



No comments:

Post a Comment