Monday, August 24, 2009

BEAUTY-QUERIES 'N ANSWERS

¢ Debbie Chawngthu

Q.1 Kum 18 ka ni a, ka vun hi a mawmin arngeng ka ngah em em mai a, engtinnge ka enkawl ang?

= Tleirawl chhuah hun lai hi kan taksaa mawm siamtuin mawm a siam tam lai a ni a, chuvangin arngeng te pawh hi a tam duh hle a ni. Tleirawl lai hi chuan sahbawn rimtui tak tak hman ai chuan medicated soap hman a tha zawk a, sipai canteen hrang hrangah sandalwood soap te pawh hmuh tur a awm a, heng te hi hman a tha. Karkhatah vawithum vel i hmai steam thin la, tui lumin fai taka i phih leh hnuah arngeng damdawi hnawih thin ang che. Hmai hnawihah pawh a mawm lam hmang lovin vun mawm tana siam chauh hmang la, tui pangngai mai bakah sertui in tamin ei tur thak leh mawm lakah insum ang che.

Q.2 Thlai hring thar lam takah hian vitamin C a tam an tih hi a dik em?
= A dik khawp mai. Thlai hring chhum tawh hi chuan chakna a pai tlem a, chuvangin thlai hring a hela ei chi hi a tha em em a ni. Hriselna tur chuan puitling leh naupang pawhin vitamin C hi kan mamawh vek a, naupangin nitin 30mg an mamawh laiin puitling chuan 20mg kan mamawh thung.

Q.3 Vun ro tana astringent hman dan tur min hrilh thei em?
= Astringent hian vun a tih ro avangin vun ro tan chuan astringent hman pawhin alcohol tel lo a ni tur a ni. Thlasik lai emaw ruahtui tam lai chuan astringent hmang lovin baby soap leh tui pangngai hmang thin ang che. Cleansing milk hian vun chuar tur a veng a, vun ro a tinep bawk.

Q.4 Kum 28 mi ka ni a, ka nghawng chuar hi engtinnge ka tihreh ang? Tin, sam bung nasa hi engnge a chhan?
= I nghawng chu zantin i mut hmain nourishing cream-in massage la, i nghawng i massage reng rengin a chho/chhuak zawng chauhin ti thin ang che. I hmai i enkawl ang bawkin i nghawng enkawl la, thlahdah suh ang che. Sam huh laia hruk vak vak hi sam ti bung tu pakhat chu a ni a, a huh lai chuan hru nasa lo hram ang che. Sam huh laia i khuih duh anih pawhin samkhuih hraw chauh hmang ang che. Sam i suk zawhah pawh hru lovin towel-in a nemin nem thin la, i sam bung tur i veng thei ang.

Q.5 Lipstick hnawih vangin hmui a duk thei em? Ka ha hni hi a dum zeuh zeuh bawk a,e ngnge a chhan? Kum 15 mi chah ka la ni si a.
= I ha hni dum chu ei leh in i uluk loh mai bakah i pum that loh vang te pawh a ni thei a, dentist rawn teh. Inthlahchhawn thil pawh a ni thei e. Carrot leh apple ei tam ang che. Kum 15 chauh i la ni bawk a, lipstick hman ai chuan lip gloss chauh la hmang la, i mawipui zawk ang. Lip gloss ah pawh rawng nei a awm tho a, i kum te a la tam loh avangin rawng dal lam hmang la i mawipui zawk ang. Lipstick i hmang duh anih pawhin man tlawm lutuk hman vangin hmui hi a duk awlsam em em a ni tih hria la, i hmang anih pawhin quality tha chauh hmang thin ang che.

BEAUTY TIPS
Aieng hi chawhmeh atan chauh ni lovin vun enkawl nan pawh a hman theih a. Arngeng nei thin tan chuan aieng leh kawlthei zik rawt pawlh a, arngeng laia hnawihin arngeng a tih reh theih mai bakah arngeng hnu hma pawh a ti reh thei a ni. Antiseptic ang pawhin a hman theih bawk a, hliam, inzai palh, thak, khawihli, vungah te pawh hnawihin damdawi tha tak a ni bawk. Neem hnah nena rawt pawlhin biangbohah hnawih la, a ziaawm ang.

Neem hnah tam tawk tak coconut oil-ah chhuang la, a hnah a ro thlengin chhuang ang che. Hetah hian aieng tlem telh la, a hnuah a hriak chauh thli chhuak la, dah tha rawh. Vun thak, pan dam thei lo, kang ah te hnawih la, damdawi tha tak a ni mai. Tin, a hnah kha paih mai lovin rawt sawm la, natna kan sawi takah te khian a hriak ang thoin damdawi angah a hman leh zel theih a ni. Bawnghnute no khat chhuang la, chutah chuan aieng fiante khat telh la, tui no khat telh bawk la, mei hniam takah chhuang so rawh. Tui pangngai kha a kang ang a, bawnghnute chin chauh kha a awm ang a, kha kha ni 7-15 chhung zan i mut hmain inhnawih ziah la, khuh damdawi tha tak a ni mai.

HOT OIL TREATMENT
Sam ro, sam tla, sam hmawr kak leh luphut nei tan chuan hot oil treatment hi sam enkawl nan a tha ber a tih theih a. Olive oil chhung lum la, lapuain i luleiah ngun takin hnawih chhuak rawh. Olive oil aiah coconut pawh a hman theih. I hnawih chhuah vek hnuah i kutzungtang hmawrin i lulei kha minute 5-10 nuai la, towel tuisaa chiah sawrfuin tuam ang che. I towel hman a daih velah tuisaah chiah nawn leh la, i lu tuam nan hmang leh ang che. Vawi 4/5 i tuam nawn hnuah oil chhuan sat thoin i lulei chu nuai chhuak leh la, towel sa bawkin vawi hnih khat tuam leh ang che. A tukah su chauh la, sam ro leh luphut a reh mai bakah i sam a tle sawt bawk ang. Hot oil treatment hi karkhatah vawikhat i tih ziah peih chuan sam nalh leh mawi tak i nei reng thei ang.

Related Posts :



No comments:

Post a Comment