Monday, August 17, 2009

Anthurium vul lohna Anthurium Festival

Reiek-a Tourist Resort-ah chuan mi an phu mur mur a, a kalkawng velah chuan lirthei a inpel sung sung bawk. Ruahsur grape wine rim a len bo zo lo a ni ang, a rim a nam rum rum mai.


Tourist Resort thlen hma atang chuan grape wine zuarte chuan mipui an lo chang tawh a, thingpui dawra coffee inna no - disposable cup khat lek chu Rs 20-in an hralh chur chur hlawm. A um emaw a sarang emawa khai te chu an inpel suau suau a, naupang pawhin an khai ve far hlawm.

Chu hmunah chuan sumdawngte an inpho a, an lun hlawm mam mam hle. Tualtah puan zuarte leh thangchhuah diar zuarte an lun hle a, mau atanga siam thil zuarte an lun hle bawk. Sapthei tui zuarte leh aieng zuarte pawh an inhralh thei hle a, khiangkawi ipte zuarte pawh an lun viau mai. Vaimim chhum zuarte hlei hlei kha an inhralh thei emaw tih tur a ni. Chu hmun chu August ni 7 leh ni 8-ah kha chuan bazar lun tak a ni ber mai e.

Chu'ng thil vel zawrhna piahah chuan mipui engemaw zatin intihhlimna hun an hmang a, anni pawh an tui tlang hle. Mizo mipui pungkhawm tih takah zai leh rimawi ngaihthlak tur a awm reng a, zaithiamte chuan ngaihsan an hlawh ngang mai. A zai zo apiang mai chu mipui lam chuan thlalakpui an lo tum a, ruahsur hnuaiah pawh thingbuk hnuaiah te, bathlar bul velah te chuan thla an lakpui sup sup mai. Zaithiamte kha an huh phung reng a ni.

Chu hmunah chuan 'Mizo Khua' pawh a awm a, chu 'khua'-ah chuan mi an tam hle. Zawlbuk leh lal in mai ni lo, in ve hrim hrim te pawh a khat deuh thap reng. Tin, pipu thlengin.

Chutiang chu a ni a, chu hmun chu intihhlimna hmun mai a ni lo, Inrinni bazar tiat zeta lian a ni. Khumbeu atanga kuhva thlengin lei tur a awm a, mi te chu an inpel suau suau mai.

Sir kil khatah chuan lehkhakhawng bawmah anthurium par a inhung ve a, mahse, mi mit a la lo nge, tu khaw khain an ngaihven lo. Anthurium par chuan leitu a tawng ve zeuh zeuh chauh. Anthurium zuartute chuan buhban chhum leh chhawhchhi chawhpawlh hi changel hnaha funin an zuar a, chu erawh hralh a kal ngang mai. A lei duhte chu an intlar a, a zuartute tan pawha hnaa neih tham khawpin buhban chhum chuan hralh a tla.

Buhban chhum bula anthurium erawh Samari mitha thlen hmaa mikhual hliam tuar hmutute ang khan a hmute pawhin an enliam mai mai a, a leitu awmchhunte pawhin muangmarin duhtawkin duh an thlang thei. Chu hmuna an punkhawm chhan a nih vei nen!

Chutiang chu a nih vangin Mizo tawng thiam lo tan chuan chu hmunah chuan Anthurium Festival an hmang mek tih pawh a hai theih hial ang!

Thingkung kakpuiah te, hrui thlunah te, stage vel leh khuallian lukhumah te leh hmun hrang hrangah chuan anthurium chu a inkhawiin a inthiat ve far a, mahse, chu chuan Anthurium Festival a nihzia a phochhuak lo. Chapchar Kut-ah te, Bial K|P khawmpuiah te leh football tournament-ah te pawh anthurium par te chu hmuh tur a tlep tiar tuar fo a, tuma'n Anthurium Festival emaw an tih phah ngai hlei nem. Anthurium par te chu an khawi fo a, sorkar programme huaihawtah phei chuan an leklam hle. Tun tumah pawh hian a cheimawinan anthurium an hmang uar ve a ni mai a, tiin a ngaih theih a, puanzar fe loh chuan mipuite chuan Anthurium Festival an hmang mek tih a hriat ngawt loh.

He hmuna anthurium zuartu awm chhunte pawh chuan a par mawi ber ber, an chhuan ber ber an thawhchhuahpui lo a, ram pawna thawnchhuah tlak loh, a hmel hem deuh te an thawhchhuahpui a nih kha! Mahse, an hun hman erawh Anthurium Festival a ni!

Mizoram hruaitute'n anthurium chu tha pui thawha beih tlakah ngaiin, heti lamah hian kawng hrang hrangin hma an la a, mi engemaw zatin anthurium chu hna berah an neih tawh nghe nghe. Anthurium Festival pawh hi chumi kawnga hmalakna peng pakhat a ni a, mahse, a anthurium-a ber chuan ngaihsan a hlawh si lo!

Mit la ta ber-a chu 'pathlawi lungleng' kha a ni awm e, ruah sur hnuaia lungleng em ema zai kha.

Ruah vangin mipuite chu an tum ang paw'n an awm thei lo a, khuallian meuh pawh a tawm hul ta mai mai a, mahse, tawm hulna tur zawnga midang zawng an bikbo hnuah pawh tlangval sawm rual vel erawh ruah sur hnuaiah chuan an lam ngat ngat mai. A huaihawttu lamin khawl hmangin Mizo zai an lo 'play' a, chumi rema ruah sur hnuaia tlangvalho an han chheih hep hep mai chu, vaiho pawhin hmuhnawm an ti!

Ruah sur bur bur hnuaiah chuan men pawh meng phal lovin an lam a, an va han tui tak em!

Mahse, darkar chanve vel hnuah chuan pakhat zelin an kalbo a, hmuh tur an awm ta lo, 'pathlawi lungleng' chauh lo chu.

Ruah sur hnuaia lam, chu 'pathlawi lungleng' chu a engkim a huh tawh, a hmai huh hliam chu ruah nge mittui tih erawh hriat a har. Chawl thei a ni lo, tin, a chawl phal hek lo. A su darh darh a, a'n intheh leh darh darh thin. A chang leh muvanlai thlawh dan ni awm tak te hian a ban pharin a'n intheh vel a, mite chuan hmuhnawm an ti em em mai. Tih tak zeta khatia 'pathlawi lungleng' darkar 2 chuang zet mai ruah sur hnuaia a'n lam vel kha tuman an nuihzat lo niin a lang.

Syrian chhungkaw pakhat, Holland-a cheng te'n he hun hi an rawn hmang ve a, anni chhungkua pawh chuan "a laia lam te kha tunge ni?" an ti ve sep sep mai! A thla an la mawlh mawlh a, hmuhnawm ti takin an thlir dauh dauh mai. Mizoram an sawi chang chuan he 'pathlawi lungleng' hi an sawi tel thin ngei ang.

"A dam lo ang tih a hlauhawm viau na a, khap chi a ni lo, a lungleng a nih hi. Pathlawi a nia, lungleng thei em em mai a ni a, a lunglen theihzia hi kan titi ve ber alawm," tiin an khaw tlangval pakhat chuan a sawi.

Related Posts :



No comments:

Post a Comment