¢ HC Vanlalruata
Mizoram hi chawmhlawm state chu kan ni bik lo. A chhan chu kawrkilh pakhat kan lei pawhin chhiah kan chawi a. Chutianga kan chhiah chawi chi hrang hrang tlingkhawm atang chuan sorkar laipuiin kan sum tur min pe thin. A mipui kan tlem avang erawh chuan kan chhiah chawi tlingkhawm hi India state dangte ngaihtuah chuan a tlem tih mai chauh a ni. Chuti chung chuan state rethei kan ni tih hi chu kan pawm a ngai a, kan sorkar hotute’n sum an renchemlo lutuk hi chu mirethei kawrchung ha kan anna lai tak a ni.
MNF Ministry hunlai khan kan Minister leh MLA te hlawh namen lovin an tipung a. Mipui pawh kan phun a. Keini aia state hausa zawkte aia kan thlan tlin theuh theuh hlawh a tam uchuak em avangin mi hmuhsit pawh kan hlawh phah a ni. Chubakah in sakna tur leh motor tha tak leina tur loan thami an lak theihna tur dan an insiam a. Hun engemawti chhung phei kha chu kan Minister-te kha an awm mai mai a an zin hauh loh pawhin Daily Allowance tam tham tak niitin an insiam a nih kha.
Tunah hian thiltha tih tuma kan beisei sorkar thar a lo piang a. Mahse, zunte-i nu ka siam ang che tih ang maiin sum renna neilo ang maiin an che leh ta tho mai. Minister/MLA te’n car leina tur loan tam tham an puk thei chungin kan Minister leh Parliamentary Secretary te chuanna tur car man to tak 17 ngawt an lei a. A thla veng tur Gypsy leh Bolero 17 lai lei tum leh mek a nih thu kan hria a. Chief Minister car tur phei chu cheng nuai 13 man lai niin an sawi.
Inthlan dawna ‘hnathawh kawr min haktir rawh u’ tia kan vote rawn zawng thinte inthuamna hi chu a hnathawh thawmhnaw lo deuh zawng a ni! Mizoram hi ram lum tak a ni lova. Air conditioned car mamawhna hi chuti takin a lian lo. Mahse, tuna kan kal dan hi chu nuamchen kan ang a. Rethei zawkte’n a thim a var thlu lova, a sur a sa hnuaia hna an thawh laiin kan aiawha kan thlan, ‘hnathawh kawr ha’ tura inzuarte an nuamsa ta lutuk thin hi chu a fel thlawt lo.
Sorkar hnathawk hlawh a sang em em a. Pay Commission rawtna angin a la sang zual zel dawn bawk a. Chutiang khawpa sum kan hrawm a nat laia kan aiawha kan thlante nuamchen ang maia an awm thin hi kan ngaihtuah chian a ngai ta khawp mai. Sorkar hmasa hun laia Minister te chuanna tura car man to tak tak an lei pawh a la tha em em a, chuti chunga car thar man to uchuak tak kan han lei leh ngawt mai hi fello tak chu a ni.
Kan ram hruaitute hi saptawng chuan ‘public servant’ an ni a, chu chu Mizo tawng chuan mipui tana thawktu emaw mipui chhiahhlawh emaw tihna a ni a. Chutiang ni si chu mipui sum an ei tam thin deuh zawng a ni.
Ni e, kan aiawha kan thlan, mipui rawngbawltu leh ram hruaitu an nih miau avangin tha taka enghelh dang nei lova an hna, mipui rawngbawl hna an thawh theihna’n ‘facilities’ chu an nei ngei tur a ni. Chu chu mipui pawhin kan pawm thlap. An office kalna tur leh an zinna turte hna an thawhna turin car an neih a ngai a. In lamah an hun puma mipui tana an thawh theihna’m chhiahhlawh an neih a tul tih pawh kan hria. Mahse, an mawhphurhna lam hre mang si lova chutianga thuam an nihna chu nawmchenna atana an hman chuan a dik thei lo.
Minister-te leh an tlukpuite hi mimir aia pawimawhna sang zawk nei. Mipui tana thawktu an ni a. An mawhphurhna hlen chhuaka an hna tluang taka an thawh theihna’n ruahmanna pawh siam a ni. Chuti chung chuan uchuak taka inhai vur a, a nuam thei ang ber ringawta khawsak a, mipui sum hman teuh teuh hi chu kalsan a hun tawh tak zet a ni.
Ram hmangaihtu kan tih thin, kan ram hruaitute hian an ngaih pawimawh ber tur chu mipui tana hnathawh, tanpui ngaite tanpui, rethei khai chhuah leh ram hmasawnna hna thawh a ni tih an hre reng tur a ni a. Chu chu mipuiin kan beiseina pawh a ni. Chutih laia an nihna leh dinhmun chu mahni nawmsakna atan ngawta an hmang a nih chuan mipuiin an pawm hauh lovang.
Aiawha kan thlan kan ram hruaitute hi an mawina pawh mipuiin kan duh pui a. Bakberh lutuka an awm pawh kan remti bik lo. Ama’rawhchu chin tawk an neih a tul a. Mipui sum hmanga inchhek arbawm mai tur an nilo tih an inhriat reng a tul tak meuh meuh a ni.
No comments:
Post a Comment