India rama mawngkawhurte hremna dan chu Delhi High Court chuan a pawm lo a, mawngkawhurna chu sualah a ngai lo.
India ram hian mawngkawhurte (homosexual) hi a pawm lo a, Indian Penal Code (IPC) section 377-ah chuan mawngkawhurte hrem dan tur a chuang nghe nghe. He dan hmang hian mipat hmeichhiatna hman dan phung pangngai ni lova mipat hmeichhiatna hmangte chu kum 10 atanga damchhung lung in tantir thlenga hrem theih an ni a, pawisa chawitira hrem theih an ni bawk. Mipa leh mipa emaw hmeichhia leh hmeichhia mipat hmeichhiatna hmante leh ran hmanpuite thlengin he dan hian a huam.
Naz Foundation te chuan Delhi High Court-ah he dan hi thiah phutin thu an thehlut a, tuai leh patilte chuan Naz Foundation hi an tan hle. Kum 8 zet hemi chungchang hi an chai hnuah July ni 2-ah khan Delhi High Court chuan thutlukna a siam ta a, a ngaihtuahtu chief justice Ajit Prakash Shah leh justice S Muralidhar te chuan IPC section 377 hian India constitution a kalh a ni, an ti ta a ni.
IPC section 377 hian India constitution a kalh tih chu High Court ngaihdan a ni a, heta India constitution a kalh an tih hi Article 21-na a ni. India contistitution Article 21-na hi mimal zalenna leh nunphung chungchanga zalenna (Protection Of Life And Personal Liberty) a ni.
Article 21-na hian India khua leh tuite chu mahni duh dana zalen taka khawsak theihna chanvo a pe a (dan phal chinah), dan hmaa mi zawng zawng intluktlan thu a sawi bawk. Delhi High Court thutlukna chuan mawngkawhurte chu midang ang bawkin mahni duh dana nung/khawsa turin chanvo an nei tia sawiin, IPC section 377 hian chu chu a kalh a ni, a ti.
IPC Section 377 hian tun hnaiah sawi a hlawh hle a, inhnialna pawh a chawkchhuak nasa hle. Mawngkawhurte chuan he dan hi thaichhiat an duh a, an tlangaupui fo a ni.
Tunlai hian India ram hmun hrang hrangah tuai leh mawngkawhurte thawm a ring thin hle a, June ni 28-ah khan khawpui thenkhat thenkhatah chuan kawng an zawh nghe nghe. National AIDS Control Organisation (NACO) chhut dan chuan India ramah mawngkawhur maktaduai 2.5 an awm.
Tuai, patil leh mawngkawhurte chuan Delhi High Court thutlukna hi an lawm hle a, political party hrang hrangte pawhin an chai zui ve nghal. Samajwadi Party erawhin court thutlukna hi an pawm lo a, Congress, BJP leh CPI-M te erawhin an ngaihdan an puangzar rih lo, zirchian phawt an tum.
Delhi High Court thutlukna hian sawi leh chai zui a hlawh hle a, ngaihdan a inkhuangrual lo hle.
National Commission for Women (NCW) chuan hemi chungchangah hian India ram pum huapa sawihona hun huaihawt an tum thu an puang.
"He thil hi thil mai mai a ni lo a, uluk taka zirchian a ngai a ni," tiin NCW chairperson Girija Vyas chuan thuthar lakhawmtute a hrilh.
"Hemi chungchanga ngaihdan siam tur hian a ram pum huapa sawiho phawt tul kan ti a ni. Sorkar pawhin ram pum huapa debate neih tumna hi a thlawp," tiin a sawi.
"He thilin khawtlang leh chhungkua a nghawng dan tur hi a nasa khawp mai. Chuvang chuan zirchiana ngaihtuahho phawt a tul a ni," a ti bawk.
UPA sorkara cabinet minister pathum - home minister P Chidambaram, law minister M Veerappa Moily leh health minister Ghulam Nabi Azad te chuan July ni 3-ah khan High Court thutlukna hi an sawiho nghal a, eng tin nge an sawi tih erawh an puangzar rih lo. An rorel hi prime minister hnena thlen an tum a ni.
India ram politician langsar Lalu Prasad Yadav chuan High Court thutlukna hi a duh loh thu a sawi tawh a, he thutlukna hi thil hlauhawm tawp khawkah a ngai tih a sawi.
"Hetia Delhi High Court-in mawngkawhur hi sual a ni lo tia thutlukna an siam leh a hremna dan hi siamthat a ngai an ti ta mai hi thil hlauhawm tawp khawk a ni. Parliament-ah hemi chungchang hi ka pulut ang a, mawngkawhurte hremna dan hi siamthat a ni lo ang," tiin Lalu-a chuan thuthar lakhawmtute a hrilh.
Mawngkawhurte hi India hian a pawm ngai lo ang, tia sawiin, "Mi thenkhat chuan he thutlukna hi an pawm mai thei a, mahse, hetiang thil hi kan khawtlang nunah hian han pawm chi rual a ni lo, he thil hi thil chhe tawp a ni a, kan duh lo hulhual," tiin a sawi a ni.
"Dan zirlai ka lo ni tawh a, ukil pawh ka lo ni tawh thin. Khawtlang tichhetu hetiang thil hi pawm chi a ni lo. Hetiang hi mawlna a ni a, thil chhe tawp a ni," a ti bawk.
Lucknow khawpuia City Montessori School (CMS) chuan Delhi High Court thutlukna ennawn turin Supreme Court an phut. He sikul hi naupang ngah zawnga chhuta khawvele sikul lian ber a ni a, July ni 4-ah khan Supreme Court hnenah hian an thu an thlen a ni.
CMS founder manager Jagdish Gandhi chuan: "Kan zirlai mi 37,000 leh zirtirtu 100 rualte chuan Justice KG Balakrishnan hnenah he thutlukna hi a rang thei ang bera ennawn turin kan ngen a ni," tiin an hmalakna a sawi.
Delhi High Court thutlukna an duh loh thu sawiin, he thutlukna hian India ram thalaite a hruaisual ngei an rin thu leh chhungkua leh khawtlang nunah harsatna nasa tak a thlen an rin thu a sawi bawk.
Court thutlukna
* Mawngkawhur, puitlingin duh leh duh kara 'mipat mipatna' (?) an hman khapna hian fundamental rights a kalh.
* 'Puitling' tih hi kum 18 chin sawina a ni a, kum 18 hnuai lam chuan mahni duh thu pawhin hetiang hi an ti thiang lo.
* IPC section 377 hian mawngkawhurte chu mihringah a pawm lo.
* Mipat hmeichhiatna hman danphung zawnga inthliarna hian mi zawng zawng intluktlanna a kalh.
No comments:
Post a Comment