¢ Debbie Chawngthu
Kum naupang deuh pawh an inenkawl ngun loh chuan an vun a chuar ve thei tho a, vun chuar hma tur hi inenkawl ngun chuan thui tak a ven theih a ni. Vun tha nei tur chuan ei leh in tha te, hahdam taka awm dan thiam te, boruak tha dawn leh exercise lak that te, nitina reilote tal vun ngun taka enkawl ziah a tul a ni. A hnuaia inenkawl dan hrang hrang te vawn hram hram han tum chhin teh~~
1) Vun lam thiam leh enkawl thin te hian nisa hi vun ti chuar tu lian ber pakhat a ni an ti a, chuvangin pawn i chhuah dawn reng rengin moisturiser emaw sunscreen hmang ziah ang che. Tin, khua a lum viau chuan tui in hnem tulh tulh ang che.
2) Face mask karkhata vawikhat tal hman hian vun kua a ti zimin thisen kal a ti tha thei a, vun a ti mar thei bawk.
3) Exercise lak hi tar harna pakhat a ni a. Hun i nei ngah lo anih pawhin hetiang hian tih tum ang che~~ Mu la, i ke muang takin ti kang chho la, muang takin ti thla leh la, chawl ang che. I chawlh lai hian i taksa hahdam thei ang berin dah la, he exercise hi minute thum chhung nitin i tih peih chuan i taksa a hrisel phah ang.
4) Taksa thau lam an han intih cher thut hian an lang tar duh a, chuvangin intih cher pawhin zawi muanga intih cher tur a ni. Cher duh vanga chaw nghei te hi taksain a haw em em a, tih loh hram tur a ni. Chaw i nghei duh anih pawhin taksain a mamawh ang ei tur dang ngaihtuah ang che.
5) Kum upat tawh hnua a intih cher vak mai hi a tha lova, tlema thau deuh pawh hi a pawi lo zawk a ni. Thau vanga ei leh ina insum ai chuan theih ang tawk tawka exercise lak that hi taksa pawhin a ngaih zawk a. Tin, cigratte hian kan taksa a tichhe chak em em a, i zu lo thei lo anih pawhin a tlem thei ang ber zuk tum ang che.
6) Mizo te hian eye-cream hman nachang te pawh kan hre chho ve zel a, a tha khawp mai. Kan mit vun hian amahin mawm a insiam ve lova, eye-cream hi nitin hman thin tur a ni.
7) Rilru hlimna hi tar harna tha ber pawl a ni a, za tak maia han nuih te hi hriselna min pe thei tu a ni. Lungngaihna tawh chang pawhin kun reng lovin in tih hlim tum hram hram hi a tha ber a, thiante hnena lungngaihna in phawrh chhuah te pawh hi a tha khawp mai.
8) Thei, thlai, bawnghnute leh tui te hi ei tam hram hram tur a ni a, a hela ei chi phei chu taksa tan mai bakah vun tan a tha em em a ni.
9) Tui vawta hmai phih hi vun tan a tha a, vur tlang hi chawhtawlhah dah la, a tui ral velah i hmai phih nan hmang ang che. Ruahtui hlang hian hriselna tam tak a keng tel a, ruah a sur leh velah lo dawhin i hmai phih nan i hmang dawn nia.
Mi thenkhat chuan vun mam tha tak hi enkawl lem loh pawhin an nei a, thenkhat erawh chu enkawl chung pawha mam thei lo te pawh an awm ve tho a. Mahse hmai mam tak neih mai loh pawhin enkawl dan dika enkawl hram hram hi a pawimawh ber chu a ni a, beidawng mai loh a tha. Vun mam tha tak nei tur chuan ‘faina’ hi a pawimawh hmasa a, nitin i vun vawihnih tal tifai ziah thin ang che. Zingah zan lama bal tihfai a ngai a, chutiang bawkin chhun lama bal kha tlai lamah tihfai leh zel a ngai thin a ni.
Q. Chana, dal leh bawnghnute rawtsawm zankhuaa chiah tur kha engtianga zingin nge chiah tur? Almond hi khawiah nge leitur kan hmuh ang?
= I vun a mawm lam anih chuan karkhatah vawikhat chiah a tawk a, i vun a ro anih chuan olive oil emaw glycerine tlem telh belhin karkhatah vawihnih i lo chiah thin dawn nia. Almond hi hmuh tur a tam lem lova, kawngsira thei zuar ho hian a khat tawk chuan leitur an nei fo. Anih loh chuan specially packed in nepnawi dawr lianah hmuh tur a awm bawk.
No comments:
Post a Comment