Sunday, June 7, 2009

Minister, Nula

Nula tihah pawh nula senior pawh la ni lo, la naupang ve tak a ni. Aizawl nula pawh ni ta se tleirawlte pawhina an 'Ehermm" ngam tur rual lek a ni. Mahse, khawvela democracy ram lian berah minister a ni ta luah mai.


India ram inthlanpui, kan hnung lawka neihah khan MP atan thlantlin a ni a, Meghalaya-a Tura bial atangin Nationalist Congress Party (NCP) ticket-in thlantlin a ni.

May ni 28-ah khan minister atan lakluh a ni a, minister of state for rural development a ni. MP zinga naupang ber a nih bakah minister naupang ber a nih tak thu chuan India ram chanchinbu hrang hrang a luah hneh hle.

He nula hi Agatha K Sangma a ni a, India ram politician langsar Purno A Sangma-a fanu a ni. July ni 24, 1980-ah a piang a, a kum 29-na a hmang mek. Mahse, July ni 24-ah kum 29 a pumhlum dawn a, mi hnam hian kum an pumhlum hmaa kum an belh ngai loh avangin kum 28 tiin Agatha kum zat pawh hi an sawi rih. Kum 28 a nih laiin India sorkarah minister a ni tihna a nih chu.

Lok Sabha speaker hlui PA Sangma fanu Agatha K Sangma hi term liam taah khan Lok Sabha MP a lo ni tawh a, MP naupang ber niin, a chanchinin ngaihven a hlawh thin hle.

Amah hi ukil a ni a, photographer pawh a ni. Environmentalist a ni bawk. Lehkha a zir mi phian a ni ang, MA (Environmental Management) a ni a, Diploma in Cyber Laws, Diploma in Corporate Laws, Diploma in Human Rights Laws, Diploma in Securities & Investment Laws tih vel a zo duah tawh bawk. Hmeichhe lu zo tak, thil chi hrang hrang tui kual duah chi a ni awm e.

LLB hi Pune University hnuaia LS Law College atangin a zo a, MA hi chu UK-a Nottingham University atangin a zo. Delhi High Court-ah, law firm pakhat - Fox Mandal Little & Co hnuaiah ukil hna a thawk thin.

Purno Agitok Sangma leh Soradini K Sangma te fa pali zinga a naupang ber Agatha K Sangma hi kum 27 a nihin Lok Sabha MP a ni a, chu chu vawiin thlengin India ram record a ni.

Tura bial hi a pa bial him a ni a, a pa - PA Sangma hian Meghalaya assembly inthlanah a tlin avangin vawi kua a lo tlin tawhna bial chu 2008-ah khan a chhuahsan a, a fanu hi dingin, a tling zui ta a ni. Chu chu MP naupang ber nihna record a siam dan a ni.

An chhungkua hi politics chhungkua tia sawi an ni a, a India ram huap pawhin heti zawng hian an lar khawp mai. A nutate pahnih - James leh Conrad te chu Meghalaya-ah politician langsar an ni a, a pa hovin an cheho a ni. A laizawn Christie hi an chhungah chuan politician ni lo a ni mai!

Agatha lakah hian a hnampui Garo-ho chuan beisei an nei sang hle. An chhuang a, an ni tin mamawh pe theitu turah hial an ngai nghe nghe.

Garo-ho hian thil pahnih, buaipui em em an nei a, chu chu kawngpui tha leh tui in tur thianghlim a ni. Tun tum MP thlanah pawh khan Agatha-i hian mipuite chu kawngpui tha pek a tiam reng a ni.

A thutiam tihlawhtling tur hian Agatha hi a inringtawk hle niin chanchinbu lam chuan an tarlang a, Garo mipui chauh ni lovin, hmarchhak mipuite'n an lakah beiseina sang tak an nei niin an tarlang bawk.

Related Posts :



No comments:

Post a Comment