¢ Vanlalremruata Tonson
Mizorama zu khap burna dan chuan sawi a hlawh ta zauh zauh a, he dan sawi apianga sir lehlam atanga lang tel ve ziah chu Hnahlan khuaa grape chingtute hi an ni. Zu khapna dan hi hlih ni ta se grape chingtu chhungkaw 500 dawnte hian an tuar ang em tih hi.
Mi thenkhat tan chuan grape wine chu antui ang, chaw ei paha hawp tur a ni a, a then tan chuan ruih tur pawh ni lovin inkawm paha in ve mai chi a ni. Thil danglam vak a ni lo, thil tui in chi (beverage) chi khat a ni ve mai. Chutih laiin thenkhat tan chuan lu tihhaina a ni a, grape wine lei nasa bertu an ni tih pawh rinhlelh tur a awm lo.
Grape wine thianghlim tak aia thil dang pawlh zauh, chak tak leh lu tihai thei chu hralh a kal zawk emaw tih mai tur a ni thin. Aizawla Hnahlan grape wine zuartu pakhat chuan a hnen atanga an lakchhawn, man tlawm zawk chuang lova hralhchhuak thin, ani aia hralh thei zawk leh hlawk zawkte pawh an awm niin a sawi nghe nghe.
Grape wine zuar chhawngtu hian eng tin nge a tih chu a va hriatpui tawh lem lo niin grep zuartu chuan a sawi. Mahse, thalai thenkhat chuan khawchhak lam atanga lo lut grape wine tho chu an duh zawk mah thin nia a hriat thu a sawi a, grape wine leitu tam tak chuan ruih tur an duh nia a hriat thu a sawi bawk.
Zu anga thinhrik a ni ve lo a, zu tak tak la in ngam chiah lo tan chuan a remchang hle. Sorkar lamin MLTP Act tidanglamin a khap tel tawh lo bawk a.
Khap a nih lai pawhin Aizawlah chuan lei tur a awm reng a, a khaptute lam pawhin an hmu lo der mai thin. Hnahlan khuaa tharchhuah ngei, grape rah hmin leh chini um pawlh tui chauh ni lovin damdawi ang deuh, a dip chi, tui nena chawhpawlhte pawh a awm thin. A thawk chak zawk nghe nghe.
Mahse, sorkar chuan kuthnathawktute hmakhaw ngaihna avangin grape leh kawlthei atanga siam wine te chu MLTP Act a huamtir ta lo a, Aizawl leh hmun dangah pawh ualau zawka Hnahlan grape zawrh hmuh tur a awm ta a ni.
Millenium Centre-ah pawh pakhat chauh ni lovin panga/paruk vel lai grape zuar hmuh tur an awm ta a, Krismas vuakvetah chauh ni loin kumtluana Aizawla awmpui tham a ni ve tawh. Dawr hmunpui thleng lem lo, mahni awmna veng chhunga zuarte erawh chuan MLTP Act-in a khap hma an pha ta lo deuh emaw ni tih theih a ni thung. Urlawk zan leh Kumhlui thlah zanah pawh khap a nih lai ang em hi chuan an lut hut hut ta lo deuh.
"Khap a nih laia darkar khata ka lei ang lei tur chuan hun a duh ve viau tawh," tiin kumhlui thlah zana grep zuartu nu pakhat chuan a sawi.
Hemi avang hian Hnahlan grape chu hralh a kal ta lo tihna erawh a ni lo. In 500 khuaah grape ching an la pung reng a, chhungkaw tlemtê chauhin thingtlang lo hi an la nei duh a nih kha. Chu thingtlang khua, Mizoram khawchhak lam ramri hrula awm chu a khua leh a awmna hmun ngaihtuaha RCC building hmuh tur tamna pawl tak a ni ang a, chutiang bawkin lirthei hmuh tur tamna pawh a ni. Chung chu grep wine hralhna suma an thawhchhuah a ni.
Grape vangin Hnahlan chu a hmingthang a, hriat a hlawh a, sorkar ngaihchan pawh a hlawh. Sorkar liam ta pawhin he khua a ngaih pawimawh avang hian MLTP Act a siamtha tawp mai a nih kha. MLTP Act siamtu sorkar khan thil dang vang ni lovin Kohhran nawrna avang liau liauin dan a siam a nih kha. Chu sorkar thlaktu sorkar chuan grape leh kawlthei atanga siam wine chu khap zinga tel lo turin dan a siam danglam pawp a, The Mizoram Excise & Narcotics (Wine) Rules, 2008 a pass bawk. Sawiselna a awm lo. Dan siam danglam hnu kum khat dawn a liam leh hnuah MLTP Act nawrchhuaktu kohhran hruaitute chuan dan tihdanglam chu zirchian deuh an tum a ni.
Dan tihdanglama grapw leh kawlthei wine chauh ni lo, beer te pawh khap bur zingah hian telh tawh loh ni se tih ngaihdan Mizoram sorkar thar chuan a nei a. Hei erawh zawng Mizo intelkhawmna pawl pawimawh ber pahnih Kohhran leh YMA-in a duh ta lo a ni.
Mizoram sorkar a kaltlang ngam dawn nge kaltlang ngam dawn lo tih chu MLTP Act hman zel duhte leh tihdanglam chauh pawh ni lo, a hliha hlih duhten an thlir mek a ni. Sorkar hian MLTP Act hi a tidanglam a nih chuan Mizo thalaite chuan plastic barrel chhunga grape rah hmin leh chini tui um pawlh ni lo lu tihai thei an nei dawn tihna a ni a, tichuan, grape chingtute pawhin ngaihtuahna thar an hman ngei a ngai ang.
Grape chingtu thenkhat ngaihdanah chuan plastic barrel-a um a, tum thum vel a tui thlitchhuah atanga Kg khata Rs 200 vel lei chu winery-a hralh ai chuan a hlawk zawk fe tih a ni thin. Chuvangin Hnahlana grape winery siam chu he thei chingtu tam zawk chuan an tuipui lo a, grape society pahnih a awm a, winery din tura hmalatu society chu member nei tlem zawk an ni nghe nghe. Mahse, tlak (chhum han) tui bak antui atana hawp ngai lo Mizo zingah hian in chi ruih tur, chu pawh chak lutuk lo leh zu pangngaia ngaih pawh ni lo hi awm ta ngat se grape market chu a danglam hmel zawng a nih hi.
No comments:
Post a Comment