Monday, June 22, 2009

Chanchin maksak 32


Pa zaidam
Thuziakmi Leo Tolstoy-a hi pa zaidam zet mai, dam duai mai a ni a, chu chu a chanchin sawi nikhuaah pawh an sawi chawk.

Vawi khat chu thu a sawi a, dawhtheihna leh ngilneihna hlutzia sawiin a tui hle. A sawi zawhah chuan ngaithlatu pakhat hian zawhna a rawn zawt a, "Ramhnuaiah sakeiin min rawn bei thut se engtia tih tur nge? Beihlet ve a thiang em?" tiin.

Tolstoy-a chuan thil dangin a chhang lo; "Chutiang chu a thleng khat khawp," tih zawng chu a chhanna a ni.


Ha aiah ha, mit aiah mit
Italian artist hmingthang, architect ropui ni bawk Raphael-a kha, vawi khat chu, Vatican-a hna a thawh laiin amah sawiseltute lakah a insum hman lo pek a ni awm e.

Vatican biak in a chei a, milem te a ziak bawk. Chutianga a thawh lai chuan cardinal pahnih hian an lo thutchilh a, an sawisel reng mai. Pakhat chuan, "Apostle Paul-a hmai kha a sen mah mah lo maw?" a lo ti a, Raphael-a chu a insum zo ta lo; "Kohhran enkawltute a'n ngaihtuah hian a lunghnur a ni ang chu!" a ti ta bauh a!


Pa haihawt
German thuziakmi, Lessing (1729-1781) kha a upat hnu khan a haihawt khawp a, tum khat pawh, a zan leng haw, ziak zawh theih mai tawh tura a thawnthu ziak lai chhunzawm tum ranin a haw a, a thawnthu ziak lai chuan a rilru a luah hle.

Kawtkai a thleng a, kawngkapui lo inkalh a hmuh chuan chahbi a lo ak hauh lo tih a hrechhuak ta tlat mai. Chutih lai chuan a pu thawm hriain chhiahhlawh pakhat hi inchhawng chung tukverah a rawn dak ha mai.

A pu a ni tih pawh hre chuang lovin chhiahhlawh chuan, "Eng nge i duh? Pu a lengchhuak a..." tiin a rawn au a, Lessing-a pek chuan, "A pawi loh chu. Remchang dangah ka la rawn leng leh ang tih lo hrilh mai rawh," a ti a, a kal ta nul nul a!

Related Posts :



No comments:

Post a Comment