Nipui a lo thaw a, sun burn i nei palh mai thei. I vun a thu sawt mai thei a, a nih loh leh i bawl mai thei. I sam a ro mai thei bawk. Veuwy Beauty Concept neitu Veuwy chuan tiang hian thurawn a pe che.
Sun screen hmang taima rawh. Chu chuan sun burn leh ni zung natna hrang hrang lakah a veng ang che. "Ni zung natna laka kan inven theih nan sun screen hi hman uar tur a ni a, chhuah dawn te hian hman hram hram tur. Kan tunlai boruakah hian hetiang hman hi a tha a ni tih hriat reng tur a ni," Veuwy chuan a ti.
Sun screen chu a chak chi leh chak vak lo chi a awm a, hetiang hian hman tur a ni bawk:
(i) Kum 20 hnuai lam tan SPF 10-15 inkar.
(ii) Kum 20 chung lam tan SPF 20-30 inkar.
(iii) Upa deuh tan chuan SPF 30-50 inkar.
SPF-ah hian vun mawm (oily skin) tana hman chi gel a awm a, vun mawm chuan chutiang chu hman tur a ti. Chutih laiin gel-ah hian vun ro tana hman tur pawh a awm tho tih erawh hre reng turin a duh che. Company hrang hrangin an siam dan a inang lo a, mahni hman tur chi hre lo tan chuan a thiamte rawn mai tur a ni.
"Facial tih a tha a, chutiang bawkin tui in hnem a tha bawk. Nipui lai hian hei hi vun tan a tha em em a ni," a ti. Tui leh lime water in hnem a fak a, chhuah dawna in phei chuan vun tana a that bakah mi a vawng dai thei niin a sawi.
Khua a lum hian vun a thu thei tih a sawi a, vun tih-enna lam ngaihtuah a ngai niin a sawi bawk. Carrot a fak a, a tak ei peih loh paw'n her dipa, a tui in tur a ti. Vawi khata in tawk tur a ni lova, regular taka in tur a nih thu a sawi. Vun bakah taksain hei hi a ngeih hrim hrim tih pawh a sawi.
Aieng a fak hle. Aiengah pawh a hring a fak a, "Her dipa in a tha a, vun a hnawih a tha bawk," a ti. Chu chuan vun a ti-eng thei tih a sawi a ni.
Pum a that lohvin vun a thu thin tih pawh a sawi. Mahni pum that leh that loh hriat a ngai a, i
Nipui lai hian mawm leh thau laka inven a ngai tih a sawi. "Hei hi nipui lai lo pawhin hriat a tha a, khaw lum lai hian a pawimawh lehzual. Kan taksain a mamawh aia tam oil a dawn hian bawl a siam thin a, thlai ei tam a tha zawk," a ti.
Make up chhe chi hman a remti lo; "Vun chhunga kua a hnawh a, dum neuh neuh te a awm phah thin. A bawl chhuak lo a nih pawhin thak neuh neuh te a siam a, chuvangin make up hi company rintlak siam chauh hman tur a ni. Herbal hi hman hram hram a tha," tiin hemi chungchang hi a sawi.
Veuwy chuan hetiang hian khaw lum laia vun natna tlanglawn, Mizo hmeichhia te'n an vei mai theihte a sawi:
* Boruak hi a chhe tawh khawp a, ni atang kher lo pawhin sun burn hi a kai theih. Pawna chhuak kher lo pawhin hetiang vun natna hi an vei thei a, hmai sen sa leh thak neuh neuh te a awm thei. Tun hmaa ni in-em tir loh tih ringawt ang kha a ni tawh lo.
* Vun mawm chi chu nipui lai hian an bawl an bawl thin. Chutih rual chuan vun ro chi pawh an bawl thei tho. Nipui lai hi chuan kan vun hi a mawm hrim hrim a, nipui laia vun ro chu a awm theih loh tluk a ni. Vun ro emaw kan tih te pawh hi combination skin, a then lai ro, a then lai mawm an lo ni thin.
* Thak neuh neuh a awm hma.
* Vun a thu hulh thei.
Nipui laia make up hman dan tur tlangpui hetiang hian a sawi:
"Hmuiah hian glossy (mawm) lam hnawih tur a ni a, hei hian mi a tilang fresh. Mit hnawih pawh light colour lam zel a tha, kan lan fresh theih nan. Chutiang kan hman chuan hmuh kan nuam sawt ang. Bakah, Mascara leh eye shadow te hi hmang ila, a tle deuh hlap a, hmuh a nuam.
"Foundation hman chuan mahni vun rawng ang hman a tha. Hei hi chu nipuiah pawh, nipuiah lo pawh a tha hrim hrim. Mahse, foundation leh cream chhe chi hman miah loh tur.
"Zan mut hmain hmai phih ngei ngei tur. Tin, compact leh powder te hnawih tlawrh tlawrh hian vun kuaah a lut a, hmai a bal duh. Hmai a bawl duh bawk.
"Hmai phih lova make up mutpui hi a tha lo khawp mai. Vun a tho thei lo a, a nung sarh thei lo. Phih fai lova make up mutpui chuan hmai a duk thei a, a bawl thei a, vun a tithu a, lan upat a awl. Mut dawnah hmai kan phih peih lo a nih paw'n tunlaiah chuan make up remover leh cleansing milk te a awm a, hetiang hi hman mai tur a ni.
"Zingah hmai phih zawhah moisturiser emaw, sun screan emaw inhnawih tur. Foundation kan hmang a nih chuan chumi dawtah chuan inhnawih tur a ni a, chumi zawhah make up inhnawih chauh tur. Make up hi inhnawih ngun lutuk chuan a beh tlurh duh tih hriat bawk tur.
"Thlan a tlakin rumol-a inhruk tawk tawk loh tur. Tissue paper hman tur a ni a, deh hlek hlek tur a ni. Chumi hnuah compact emaw, loose powder emaw te a hnawih leh theih," tiin.
"A lum tih vanga inhruk tawk tawk loh tur. Ice cube vela hmai deh te hi a tha khawp mai. Tin, night cream te pawh mut dawnah inhnawih thin tur.
Sam enkawl dan pawh tlem azawng a sawi. "Sam colour dawn hian sam a fai ngei ngei tur a ni. Hena kan ti thin a nih chuan hena atanga thla hnih vel tal nghah tur. Hena hian colour kha a lo dang a, sam a nalh thei lo," tih chu a sawi hmasak ber a ni.
"Sam colour nan hian a tlawm vanga khawchhak lam siam hman ngawt tur a ni lo. A thu inziak kan chhiar thiam ngei hman tur a ni a, professional colour ngei hman a tha," a ti bawk.
Spa chungchang sawiin Veuwy chuan, "Deep conditioning an tia, chu chu spa kan tih hi a ni. Hetiang hian sam put a tinuam a, sam a tichak a, a tinem a, sam ro lutuk tur a veng bawk," a ti.
Hair spa hi sam tan a tha bakah lu tan a tha a, mi a ti thawveng a, lu na a tidam tiin Veuwy chuan a sawi.
"Conditioner tha tak tak hmangin massage kan ti tihna a ni a, hei hi a tha em em. Spa kan tih loh paw'n oil massage a awm a, chu chuan sam ro lutuk tur a veng thei a ni," tia sawiin, "Spa tih zawha steam tih leh hian lu vun kua a hawng a, chu chu sam tan a tha. Spa hi chu lu faiah chauh tih tur a ni a, oil massage chu duh duhin a ni mai," a ti bawk. Lu na nei tan Spa hi a fak hle.
"Nipui lai chuan sam a ro a, ni sa vangin a ro duh tih hriat reng tur," a ti a, conditioner regular taka hman a fak a ni.
Veuwy Beauty Concept hi Schwarzkopf dealer an ni a, Schwarzkopf hi German company niin, cosmetic lam siamchhuktuah khawvelah pahnihnaa ngaih an ni.
Veuwy Beauty Concept neitu Veuwy hi Bangalore-ah VLCC leh L'oreal-ah te pawh a lo thawk tawh thin a, tunlaia Mizoram beautician lar leh rin hlawh a ni.
No comments:
Post a Comment