¢ Debbie Chawngthu
Whiteheads an tih mai, arngeng a hmur var chi hi hawlphum ang thovin a buaipuiawm thei a. A rawn landan chu a hmaa a awmna ngai lovah a rawn var thin a, deh awlsam takin a awm thin. A awm duhna lai hi hnar bakah vun nem laiah a ni chawk. A tihreh nan chuan beauty grains hi a tha a, hnuh awlsam tak ni lo mahse mahni pawhin a insiam ve theih tho a ni. Chini dip tak i neih chuan a hman nghal mai theih a. T in, buhkem hi chiah hnip ila, hmai nuai nan hmang ila, a tifai em em tho a ni. Mahse hmai nuai reng rengin a pawng a puia nuai vak vak hi vunin a hua a, dim thei agn bera nuai thin tur a ni. Arngeng hi pawng deh mai tur a ni lova, achhan chu vun a tichhiain a ti hmelhem thei a, ser a awm duh a ni. Tui leh theitui in tam hi arngeng nei nasa tan chuan a tha a, nitin thei leh thlai hnai hring ei a tha em em bawk.
Mitvun val hi tam tak chuan kan buaipui hle a. A lo awmna chhan chu mut tlem lutuk vang te, hah lutuk vangte, rilru hah lutuk vang te leh ei leh in dik loh vangte a ni thei a. Mi han ena mit vun val kiau mai hi chu mut theih loh nei nasa mi an ni ti ila kan sawi sual tam lovang. Mut tam hi taksa hrisel nan a pawimawh em em a, i mu thei thin lo anih chuan rang takin doctor rawn ang che. Mit vun lai vel hi amaha mawmna neilo lai a ni a, enkawl ngun a ngaiin mawm hnawih ziah thin tur a ni. Zantin i mut hmain mawm hnawih ziah la, minute 20 hnu velah lapaw hnawmin hrufai leh la, chumi hnuah under-eye cream hnawih leh ang che. Under-eye cream hi lanolin leh almond inpawlh chi hi a tha hle a, vun rawng a ti eng thei a, vun chawmtu tha tak a ni bawk. Cream hi minute 10 hnu velah lapaw hnawm bawkin hrufai leh ang che. Cream reng reng i mit vunah i hnawih anih chuan rei lutuk chiah lo la, anih loh chuan i mit a lang bui lehzual thei a ni.
Mawm kan vun atanga lo chhuah tum hi kan vuna kaw chek chekah hian chhuak mai lovin a tang ta thin a, hei hian vun kua a tizau zual a, hei vang hian vun ngun a tul a ni. Vun mawmah a ni lehzual bik a, chuvangin vun pawnlang tihfai nan pawh medicated cleanser hman a tha. Cleanser a ginseng tel hi a tha a, vun tifaitu tha tak anih mai bakah vun kaw zau tawhte a ti zim thei a ni. Vun kaw zau tan chuan skin tonic nitina hman a tha a, tonic ah hian rose atanga siam chi hi a tha lehzual. I skin tonic chu fridge-ah dah la, i vun i tihfai zawha lapua va chiah la, chu chuan i hmai hru thin rawh. Nikhatah vawi tam tak hru thin la, i vun mawm lutuk a ziawm ngei ang.
Vun rang hi a nalh lo hle a, a awmna chhan tak chu mi a thau thuta a cher lehin a vun mar thin kha a mar ta lova, a rawn ta thin a ni. Hei vang hian naupai te pawh nau an han hrin zawh meuh chuan dul rang an nei thin. Vun rang venna tur tha ber chu a ran hmaa ngun taka enkawl a ni a, naupai lai phei chuan nitin dul leh hnute velah mawm ngun taka hnawih thin tur a ni. Tin, kut tin hmanga inhiah hian vunah rang a siam awlsam bik a, vun hiahna a awm remchang lo anih pawhin samkhuih hmanga inhiah hian vun rang mai tur a veng thei a ni. Thau inti cher te pawhin vun enkawl lamah taimak an chhuah a ngai a, a tam thei ang ber taksain mawm a mamawh lai a a, olive oil emaw almond oil te hi an hman tlak khawp mai.
Tui leh theitui in tam chu an vun a mam a, a eng a, chuvangin, vun tha nei tur chuan theitui in tam leh tui thianghlim nitin no 8-10 in a tul a, khawlum lai phei chuan hei aia tam in thin tur a ni. Zu, thingpui leh coffee te hi vun tan a thatloh avangin in loh theih a tha ber a, kan in thin anih pawhin in tam lutuk loh a tha ber. Hrisela damrei tur chuan kan ei leh in fimkhur a ngai a, tui tih vanga ei teuh emaw in teuh hi kan taksain a thatpui kher lo tih hriat a tha a, ei leh inah pawh chintawk neih fo a tha. Canned juice ho hi thlum tui viau mahse chini an telh tam avang leh a rawng tih danglamna te an telh avang hian a that tur ang pangngaiin a tha tawh lova, chuvangin, theitui reng reng chu siamsa nilovin nangmahin a theih phawt chuan sawr chawp la, in nghal mai la, taksa pawhin a ngeih ber a ni.
No comments:
Post a Comment