Friday, April 3, 2009

Puteho hi an tawng huai mah mah!

Kar hmasaa zawh fel tak budget session-ah khan bill pawimawh tak pahnih putluh a ni a, he'ng bill pahnihte hi sorkar thar ziarang tur thui tak a hril thei tur a ni nghe nghe.

Lalsawta, minister putluh - 'The Mizoram Salaries and Allowances of the Speaker, Deputy Speaker, Minister, MLA (Third Amendment) Bill, 2009' leh Lal Thanhawla, chief minister putluh - 'The Mizoram Parliamentary Secretaries (Appointment, Salaries. Allowances and Miscellaneous Provisions) Bill, 2009' hi House-in a pawmpui tak avangin Governor pawmpui hnu atangin dan a ni tawh dawn a ni.

Heng bill pahnihte pawimawhna hi mi tam tak chuan an ngaihtuah kher lo ang a, tunhmaa an thusawite nen a inkalh leh kalh loh pawh an hre tawh kher lo mai thei. Tunhma, opposition lama an awm lai leh MLA an nih loh lai kha chuan huai tak takin thu an sawi thin kha a ni a, hetia thuneihna an chan tak hnu hian an thusawi thinte khan a um zui zel ang em tih chu mipuite thu a ni ang chu!

Bill lut pakhatah hian Parliamentary Secretary-te'n hlawh leh hamthatna hrang hrang an dawn turte siam a ni. Congress sorkarah hian MLA parukte chu parliamentary secretary-ah dah an ni a, an vai hian minister of state tlukpuiah awmin, minister-te an pui thin a ni. Anmahni kaltlanga file pawh kaltir a nih tur thu an sawi a nih kha. Mahse, parliamentary secretary hi sorkar thar khan dan tlawhchhan tur awm lova a ruat ngawt an ni a, an hlawh siam vel pawh a buaithlak thin viau nia sawi a ni. Hamthatna dang an dawn te pawh phuahchawp nawk nawk a ni tia sawi a ni bawk.

Politician-te hian a chang chuan tawngkam an duhtui lo viau thin a, thu tiam mai mai pawh an sam viau bawk. Duh duh sawi theia an inngaih vang pawh a ni mai thei, huai tak taka thusawi an ching hle a, an thusawi hi an umpha lo fo a, pawi an tih hmel loh viau thin lehnghal!

Parliamentary Affairs minister Lalsawta pawh hian January 6, 2009 khan a department chan pakhat school education department-a officer-te chu a office-ah a kawm a, parliamentary secretary Chawngtinthanga pawhin a tawiawm a nih kha. Chumi tum chuan minister chuan parliamentary secretary-te dinhmun a sawifiah a, sorkar duty pawimawh khawih tur an nih thu leh sorkar hmasaa Adviser-te ang loin sorkar sum sen belh tam lo zawngin 'MLA HLAWH' an rin tur thu a sawi a ni.

Thla hnih a liam awrh a, chief minister-in parliamentary secretary-te hlawh leh hamthatna dawn tur bill chu House-ah a pulut ta. Mahse, a hma lawka a thusawi nena inperhsan daihin parliamentary secretary te hlawh (salaries & allowances) chu minister of state hlawh (salaries & allowances) ang tho a nih tur thu bill-ah hian a inziak ta kuau mai!

MLA hlawh nen an lak kawp theih loh tur thu pawh a inziak. "A parliamentary secretary shall be entitled to such salary and allowances as are admissible to a minister of state under the Mizoram Salaries and Allowances of Ministers Act, 1999 (Act. No 7 of 1999) as amended from time to time," tiin.

Minister-te tana dan awm sa hi an hna chungchangah pawh hman nghal tur a nih thu a inziak bawk. Dan thar hi hman a nih chuan kum khata parliamentary secretary-te hlawh leh a behbawma senso tur zat belhkhawm chu cheng nuai 36 a ni dawn a ni.
Parliamentary secretary hi sorkar hmasaa minister of state nen khan danglamna tehchiam a awm lo tihna a ni. A hming chiah hi an danglamna langsar chu a ni mai awm e.

Hman atang tawhin ram hruaitute hian an thu lo sawi tawh e hian a umzui zel tih an ngaihtuah lo fo thin hi thil pawi tak chu a ni.

He dan thar hi kum kal ta December 29,2008 atanga hman tan tura tih a la ni deuh deuh bawk.

Related Posts :



No comments:

Post a Comment