Thursday, April 9, 2009

Bangalore-ah Mizopa

¢ Sangzuala Hmar

"Nitin Lalpa, I hnena awm ka duh, ka tih ka sawi, ngaihtuahna leh..." tiin a caller tune chu a zai rat rat a, he hla hi ama phuah, nitina a inhlan tharna hla a ni. Hla thu ropui leh khunkhan chiam, ril hmel em ema Kalvari thisen luangchhuak tih lam a ni lo, nitina Lalpa tanpuina kan mamawh zia phuahchhuahna hla a ni. Kanada tawng leh Duhlian tawng inkarah Nitin Lalpa tia a tawngtai reng a ngai, chu chu amah pawhin Bangalore Central bial atanga a tlin theihna tur kawng niin a hria.

A inringtawk a, mahse pawngtawng ngaihthat chi ngawt a ni lo tih a hria, a chak loh theihna lai tur kawng awm ang ang a hmu a, chu chu a hneh a ngai a, chumi hneh theihna tur chuan amah pui thintu Pathian hnenah "Nitin Lalpa" tiin a dil mek a, Mizoram mipuite pawh tawngtainaa hre reng turin a ngen a ni.

US nuclear deal vanga Parliament-a sorkar buk a nih khan ama party lo lam UPA lamah vote a thlak daih a, sorkar laipuiah Congress kaihhruai UPA chuan sorkarna a chan zui phah a nih kha. Mahse HT Sangliana chuan MP atana thlantlin a nihna party BJP a chhuahsan a ngai ta a, India ram tana tha zawk tura a ngaih avanga vote a thlakna party Congress chu a zawm ta a ni.

"Ka lamah Lalpa a tan chuan ka ti thei ang, Parliament-ah hian a vawi hnihna atan thlantlin ka nih ngei pawh ka inring, ka mamawh chu chunglam atanga min pui thintu thiltihtheihna a ni," HT Sangliana chuan a ti.

A hun chep tak karah HT Sangliana hian Mizoram atanga phone call chu a hmaih duh lo lek chauh a ni. "Mizoram atanga call chu ni lo sela lak hman ngaihna a awm lo, hei tunah pawh chanchinbumiin min bawr buai ve nasa khawp mai," a ti a, a phone hi a secretary ni awm takin a lo chhang hmasa a, Kanada tawng rang taka ri nawk nawk karah Zozam Weekly hian a interview thei a ni.

"Union Railways minister hlui CK Jaffer Sharief chuan ka bial din tumnaah hian din a tum ve a, mahse Congres party tana ka inpekna Delhi lamin min hriatpui a, Bangalore Central hi ka chang thei a ni," HT Sangliana chuan a ti.

2004 MP inthlan khan Bangalore North bial atangin Sangliana hi thlantlin a ni a, hemi tum hian CK Jaffer Sharief hi a hneh a nih kha.

"Delimitation Commission-in constituency a rin that hnuah ka bial chhunga khaw tam zawk kha Bangalore Central-ah hian an lut a, hei vanga he biala din tum hi ka ni, ka bial thar turah hian vote nuai 18 vel zet a awm a, JD (S) pa lar tak, Muslim mi Ahmad Khan nen kan inkhing dawn," HT Sangliana chuan a ti.

Bangalore Central bialah hian MLA bial pariat a awm a, chu'ng zinga bial li chu Congress bial a ni a, HT Sangliana hian a tisual hle a nih loh chuan he bial atang hian a tlin ngei a rinawm. Mahse, HT Sangliana, IPS officer hlui, ama puala film pathum ngawt an lo siamsak tawh hian MLA bial Congress-in an ngah zawk avang ngawta tlin a tum hauh lo.

"Karnataka mipuite tan hian ka theihtawp ka chhuah ve thin a, anni pawhin min ngaina a, ka lakah beiseina pawh sang tak an nei a, keimahah beiseina an neih hi ka tih thlawn a thiang lo, chumi ti thei tur chuan Pathian tanpuina ka mamawh tak zet a ni," HT Sangliana chuan a ti.

Related Posts :



No comments:

Post a Comment