I thil tih zawng zawng saw thlir teh, Hunin a liampui saw...

Mizoram sorkarin zu khap burna dan a hlip dawn ni-a ngai an awm a, hlih tha ti leh tha ti lote an inhnial zui nghal.

Mizoram sorkarin Sairang thlenga rel luhtir a tum a, kum tir lamah chief minister chuan a dodaltute a hlawhtling dawn lo tiin a sawi. Rel kawng tha ti leh ti lo an inhnial nasa hle.

Rel kawng chungchanga inhnialna a intham lai vel hian khua a lum huam huam a, ruah a sur bawk si lo, 'kan chenna khawvel a chhe ta hle' tih thawm a lo ri. Chutah Lengpui Airport-ah thlawhna a tum thei lo a, lohal khu vangah mithiamte leh thuthar lakhawmtu lam chuan an ngai. A hun lai chuan he'ng thu hi a ri deuh laih.

Tuikhuahin a chim pil dawn avangin Builum mipuite an insawn a, insawn ve duh lo pawh an awm. Titi a luah ngang mai.

Builum khaw mipui chungchangin chanchinbu leh TV-a hmun pawimawh a luah lai chuan chief minister-in Singapore-ah "chi inthliarna tuartu ka ni" a ti ni awmin sap tawng chanchinbu lamin an chhuah a, Builum aiin Singapore lam mipuiin an thlir nghal. A thenin "a sawi ngei e" an ti a, chutah a thenin "a sawi hlei nem" an ti thul, inhnialna pawh a chawkchhuak viau a nih kha.

Singapore atangin chief minister a lo haw a, mipui paw'n Singapore lam an thlir lo ve nghal. Mahse, rei lo te-ah taxi intlanchhawktir tura sorkar ruahmanna thawm a lo ri a, mipuiin titi thar an nei leh ta.

Aizawla Taxi intlanchhawk chungchang chuan sawi a hlawh hle a, inhnialna pawh a chawkchhuak nasa. Chutiang boruak karah chuan sorkarna changtu party office, Congress Bhavan kawtah bomb a puak ta dur mai! Kum khat em pawh an sorkar hmaa an party office kawta bomb a puak ta mai chu mipui tan sawi zui loh theih a ni lo, a ring em a ni!

Sorkarin Look East Policy a buaipui laiin Zoram mipuite chuan khawthlang lam an thlir thut mai; Singapore an thlirna mit ngei hmangin Vairengte an thlir a ni. Vairengte Police Station thuam thatna tur sum chu sorkarin hmun danga hman a tum a, chumi dodal tum chuan Vairengte lamin tan an khawh. Silai te pawh a puak nghe nghe.

Vairengte boruak a dai ta tihah Zarzokima thih thuin Zoram a thawng a, in a kang, ram a kang, mahse, kha'ng mei kang ai khan mipui thinlung kha a sa zawk awm asin!

Chutah chiahpuam chanchin a lo lang leh; he chiahpuam hi chu mipui chiahpuam ni lovin Synod Chiahpuam a ni. Tute emawin kum khat chhunga 'news lian ber' te thlang ta se, he chiahpuam chanchin hi a hniam lam a ni bik lo ang.

December ni 11, 2008-a lakluh sorkar thar kaihhruaina hnuaiah Mizoram-in kum thar a chuangkai a, bul kan tan dawn chauh emaw tih laiin kum khat chu a lo liam dawn ta reng mai!

CYMA, MHIP leh MZP inthlan kumah hian Mizoramin hruaitu thar a nei a, MP thar leh VC thar chenin a nei. Mizoramin thil thar a nei nual mai.

2009-ah hian Mizoram-in thil hrang hrang a tawng a, chanchin lawmawm loh lam leh inhnial chiam chiamna pawh sawi tur a tam. A chunga tarlan tak inhnialna hrang hrang bakah mahni intihlum an tam thu te, kangmei vanga nunna chan an tam kum a nih thu te leh NLUP chungchangte pawh mipuite titi tui a ni. Chu'ng chu hunin a liampui mek a, Mizoram hian a thil tih zawng zawng saw thlir se, hunin a liampui mek saw, lawm tak maw!

Chu'ng thil zawng zawng ai pawh chuan he thil te hi a lar mai thei. He thil kher hi chu, a lar dan hian a huapzau tlat. Rel kawng chungchang te, taxi intlanchhawk chungchang te, Builum chungchang te leh thil dang kha chu a tuipui deuh bik awmna thil a ni a, he thil erawh pitar, putar leh naupang, nu leh pa leh thalaite'n an tuipui tlat. Icon tlukchhiat thu kha.

2009-ah Mizoram

¢ Lalthlamuana Ralte

Ni leh thla leh kum a liam zel a, kum tawp lam kan lo thleng leh ta reng mai. Kumin chhunga kan hun hman tak te leh kan thil tawn hrang hrangte kha kohkir rual an ni tawh lo a, tam tak phei chu kan theihnghilh hmin der tawh ang. Kum khat chhung hian thil tam tak a thleng hman a, kan hun bi chhiar danah pawh 'kum' hi a pawimawh khawp mai a, mihringte tan hun chhinchhiahna langsar tak a ni reng dawn a ni.

Kum hlui a her liam mek lai hian thla sawmpakhat leh a chanve kal ta chhung kha han chhuikir ila, kan tan kum tha a ni em, tih te; kan hnam tan kum chhinchhiahtlak a ni em, tih te pawh a hriat theih awm e. Kum thar kan chuangkai a, sorkar thar nen beiseina sang tak neiin bul kan tan a nih kha. Kan chief minister leh thuihhruaite thu leh hla ngaihthlakin a thlamuanthlak a, 'Change' thlentir min tiam a, hlemhletna a zung chawpa kar chhuaha phoro a nih tur thu an sawi a, NLUP hmanga mi retheiten lei rem an rah tur thu an sawi chamchi bawk. A tawi zawngin Mizo mipuiin rilru thar nen kum bul kan tan a nih kha.

Chutihlaiin, kum hmasa tawp lama pawisa peipunna mak tak mai 'Chiahpuam' kehchhiain a nghawngte tan erawh kum tir atangin buai-mangannain a hmuak nghal thung. An zinga thenkhat chuan an in leh lo an chan phah a, sum tam tak an hloh a, an inchhungkhurin an tuar a, hmingchhiat an phur bawk. Cheng nuai tam tak chingpenna leh mi tam tak tawrhna thlentu ni mahse sorkar a inrawlh thuk lem lo.

Ram kang leh loneitute
Thal khaw ro lai kan thleng a, kum dang ang bawkin kangmei chhuak a tam leh hle. Thlawhna tumhmun kan neih chhunah pawh ni engemaw zat chu thlawhna a tum theih loh phah nia sawi a ni. Chutihlai vel chuan romei leh chhum tam lutuk chu lo hal khu vangah mi thenkhatin an puh a. Thingtlangpa, loneih bak eizawnna nei lote'n dem an hlawh hman viau a nih kha. Tuthlawh leh chemtum hmanga eizawn hi an duhthlan a ni bik lo a, kawng dang a awm miau loh vangin an kalsan thei lo a ni tih hriatthiampui lo tan chuan dem mai pawh an awl awm e. NLUP hmang hian hnemhnanpui tlak eizawnna siamsak an nih loh phei chuan thingtlang loneitute dinhmun hi ngaihtuah ngam pawh a ni tawh lo ang.

In kang sawi tur a awm fo a, ram kang phei chu a tam lehzual. Mizoramah hian kum tina thil thleng thin, ngaihtuah chian chuan engemaw chen chu pumpelh theih ni si langsar tak mai pakhat chu ram kang leh leimin hi a ni awm e. |hal laiin khua a ro a, kangmei a chhuak awlsam a, inven a ngai bik tih chu kan hre vek. Sorkar pawhin a hria a, a mawhphurtu environment & forest deptt. pawhin hemi atan hian sum tam tak a hmu thin. Khawtlang leh tlawmngai pawlte nena tangdunin hmala thin mah se a kum telin ram kang a nasa tial tial emaw tih mai tur a ni hi chu a mak khawp mai. |hal kan hmabak leh dawn ta a, sorkar pawhin awmze nei zawka hma a lak beisei tawh ila, sum senso leh a hlawhtlinna inphu tawk lo lutuk thin hian ram hruaitute nepzia a tilang thin si a.

Mautam vangin loneitute an hlawhchham a, nikum kha a vur kum tura ngaih a ni a, mahse beisei erawh a pha lo. Mautam zawh hnu kum hnihnaah pawh ruahtui mumal loh vangin loneitute manganna a la reh chuang lo hi a pawi khawp mai. Kan chenna khawvel lum zual zel avang hian sik leh sa a mumal lo tial tial a, kan ramah pawh hian ruahtui tlak dan a mumal hleithei tawh lo. He harsatna hian khawvel pum a nghawng a, a nasa tial tial dawn ni pawhin a lang. Chuvangin, engti kawng zawng mahin kan bang bik dawn lo a, ram rethei apiangin an tuar na a nih si chuan mutmawh hnar mawha neih ve a hun ta hle mai.

Khawtlang nun
Mipui vantlang nunphung lamah kumin chhungin thil inthlak danglam langsar tham a awm loin a lang. Kum dang ang bawkin dan bawhchhiatna leh suahsualna rapthlak thleng erawh a awm fo. Tun hma la rei vak lovah te kha chuan tualthi leh sar thi hi thil rapthlak ber pawla ngaih a ni a, ram pum a dengchhuak thin kha a ni a. Tunah chuan invithlum, insathlum, invawhlum, adt., hi thihna tlanglawn pakhatah kan ngai ta deuh der emaw tih mai tur a ni ta. Sar thi an awm pawhin kan phawklek meuh tawh lo a, kan thin a thawng meuh tawh lo chu a ni. He'ng thihna rapthlak pui puia ngaihte hi naupang pawhin an hlau tawh mang der lo.

Mipui vantlang himna hi sorkar mawhphurhna lian ber pakhat a ni a, dan bawhchhiatna leh pawikhawihna laka mipui venhim bakah misualte dan hmanga hrem hi sorkar tha zia a ni. Chutiang zawnga chhut chuan kan sorkar hian tih tur a la ngah khawp mai. Kumin chhung ngawt pawh hian tualthah, rukruk, pawngsual leh pawikhawihna dang a thleng fo a nih kha. Sorkar thar a din hlim atang khan police-te tha tihchak a nih tur thu te, kut phuar an nih loh tur thu te kan hre thin. An hotu thenkhat phei chu sawn darh an ni. He'ng zawng zawng hian rah tha a chhuah turah ngai phawt ila. Aizawlah phei chuan zan lamah police duty hmuh tur an awm thin a, mipui tan pawh a thlamuanthlak viau a ni.

Tun hnaiah khualzin chuanna lirthei chesual a awm fo mai kha a pawi khawp mai. Khawpui chhung kawng mai ni loin khaw kar kawngte hi a zim hlawm a, lirthei a pung tial tial bawk si a accident thleng thei laka inven nasat a ngai tial tial dawn a ni.

Sum leh pai, eizawnna/economy
Ei-bar zawnna kawng (economy) lamah kumin chhungin thil langsar thleng a awm lo. Sorkar thar hian budget vawi thum a pharh a, a hmasa pahnih chu a lailawk (vote on account) a ni a, thla hmasa lawk khan budget pum chu pharh a ni chauh thung. Ram chhung inthlanpui avangin state annual plan kan nei thei lawk lo a, budget pum kan neih har phah ta a ni.

Budget-ah hian mipui nawlpui nghawng tur thil langsar hmuh tur a vang hle a, NLUP atana cheng vbc 100 dah leh sorkar hnathawk hlawh thar tur chungchang hi a langsar pawl chu a ni mai awm e. Sorkar hnathawkte'n hlawh thar (Fitment Committee rawtna ang) an lak tur thu chu tun hnai lawk khan chief minister-in a puang a, a sawi dan ang a nih chuan Krismas hmaa la hman tur an ni. Mahse, Krismas hma hian an la hman meuh ang em tih erawh sawi a har hle, an la hman ta lo a nih pawhin chief minister hi a tawngvaia ngaihsak chi erawh a ni bik lo mai thei. Politician-te'n an sawi mai mai ang ngawt hian sorkar hna hi a kal zung zung thei miau si lo a.

Sawi leh ta thin ila, kum bul lamah kha chuan sorkar chak tak leh mipui hmaa ngaihdam dila insiamthat tum ram hruaitu kan nei ta bawk a, inthlan campaign laia rawn puitu phai lama an pi leh pute tawngkam pawh khati kha a ni a, chuvangin kumin chhung hian nasa takin hna an thawk nghal ang a, kum tawp lamah phei chuan hmasawnna hmel hmuh tur a awm nual tawh ngei ang tih kha mi tam tak rin dan a ni. Mahse, kan sorkar hian beisei an pha lo hle mai a lo ni, kum khat chhunga an hnathawh lian tham sawi tur a awm mang miah lo. Mipui nghahhhlelh ber NLUP lah chu la nghah ngai tur chi a la ni bawk si.

Ram sum leh pai dinhmun (economy) a that chuan ram hmel a danglam a, mipui mimir dinhmun a that phah thin. Kumin chhung hian mipui mimir dinhmun a tha sawt nge, a ngai reng? Nge a chhe sawt zawk? Engpawhnise, hmasawnna lian tham hmuh tur a awm miau loh avang leh mipui nghawng tham hmalakna pui tham hmuh tur a la awm loh avang hian mipui nawlpui dinhmun a that phah kher loin a rinawm. Loneituten an eizawnna ngai an la chhunzawm a, sum lo luanglut langsar tham khawpa tam a awm lem lo a, thalai hna nei lote tana eizawnna peng thar bul tan a ni lem lo bawk a, kan dinhmun pangngai kan la pel lo chu a nih hi. Chutihlaiin, ni tin mamawh thil man nasa takin a sang a, hmun dang atanga chawkluh man a to rualin tualchhung thil man thlengin a pung bawk. Sorkar hmalakna hmuh tur a vang hle bawk si. Hetiang zel a nih chuan rethei leh hausa kar hi a kakzau tial tial dawn tihna a ni.

Chhungkaw khawsakna mamawh - ei rawngbawlna gas, tui leh power supply (electricity) kan khamkhawp lo kumtluan mai. Hengte hi chhungkaw tin nghawng thil a nih rualin a rethei apiangin an tuar nasa zual. Aizawlah chuan thal laiin tui a harsa a, fur ruahtui tam laiin a zia deuh. Tui harsatna hi vei tak tak a hun ta khawp mai, water supply scheme hi a nih tur ang ni pha hlawm se chu kan ziaawm deuh ngei ang. Eirawngbawlna gas harsatna a kiang hlei thei lo hi a manganthlak ta khawp mai. 'Mi retheite hi kan VIP an ni ang' ti-a gas-ah VIP quota a awm lo ang titu ram hruaitute hian tui, gas leh electricity vanga mipui manganna hi mutmawh hnarmawhah nei se a duhawm khawp ang. Hengte hi chhung tin nghawng thil a nih bakah chhungkaw dinchhuahna tura thil pawimawh tak a ni bawk.

Politics
Kumin chhungin politics boruak a dai khawp mai. Kum hmasa lamah te, a hmasa leh lamah te kha chuan politics leh a behbawm thilah mipui kan ri luih luih thin kha a ni a. Nikum phei kha chu MLA inthlan kum a ni bawk a, politics thli tlehin min hrut kum tluan a nih ber kha. MLA inthlan boruak sosang tak kan tawng chho a, kan zo fel hlim a ni bawk a, kum thar tir atangin politics boruak a dai duk mai a. MP election, VC election leh District Council inthlan boruak pawh a dai hle a ni.

MLA inthlan hlim chhawn pawh ni se MP inthlan te kha chu party inhruipawhna a nasa viau tura ngaih a ni a, an inbeih nasat hle pawh a rinawm viau a ni. Mahse, mipuiin politics leh inthlan boruak hrim hrim kha an chhangkham rih a ni ber a, party lam pawh tum dang angin an za meuh lo. Opposition party phei chuan candidate tur an nei thei lawk lo a, inthlana hai ta daih pawh an awm a nih kha.

Sorkar tan kum a ni bawk a, eptu lamte pawh an thawm a zawi raih mai a, mipuiin an ngaihven rih miau loh avangin engmah tak tak a tih theih loh. Thu hrawmhraw pui puia han inbeih leh zauh zauh changte chu nei mah se a zuzi leh thuai thin. Dik tak chuan rorel lai lam hian sorkar hmasa kihhnawk chungchang te, MNF-in zalenna an sual leh sual loh chungchang te leh thil dang dangte an han sawichhuak thin a. Eptu lam pawhin NLUP chu beisei ang a nih lohzia te, sorkar chak lohzia te an han sawi bawk thin a. An boruak hi mipuiah a tla na thei meuh lo, anmahni leh anmahni an inbauh vel mai mai rih ni berin a lang.

Hetiang vel hi kumin chhunga politics boruak chu a ni a, thil inlumlet hmuh tur vak a awm lo ti ila a dik ber awm e. A chhan lian ber chu mipuiin politics boruak sosang leh lum tak laka chawlh rih an duh a, sorkar thar hi a that leh that loh hriatna turin hmalakna liantham an la nei bawk si lo a. Kum thar lamah chuan boruak a dang tawh ngeiin a rinawm.

A thil tih zawng zawng a thlir a...

December ni 12 a ni a, Red Ribbon Youth Icon thlannaah thlirtute'n an rin loh deuh mai thil an hmu; MS-i.


Dawhsanah chuan dingin tiang hian thu a sawi a; "A nih tur ang a ni zo vek tawh a. Mahse, in mi hriatthiamna ka rawn dil a, in mi ngaihdamna pawh ka mamawh a ni," tiin.

"In rilru ka lo hliam tawhnaah in mi ngaihdamna ka rawn dil e," a'n ti nawn leh a, a biangah mittui a luang hial.

"Hmanah chuan, hmanah chuan, vai lal nupuiah ka awm. Tunah chuan, tunah chuan, ka pu saza-a nau ka awi..." tih ang mai kha a ni, a dinhmun chu. Youth Icon atana thlan a ni a, a hmel leh a aw chu Zofate lung tileng chi a ni bawk a, kar lovah a zunah Zoram a uai a ni ber.

Mizoram state chang a ni lo, state pawna Zofate pawh he tleirawl zunah hian an uai a, mi fate'n ba thinna an dawn mawlh mawlh laiin ani chuan zai tura sawmna a dawng ta mawlh mawlh mai.

A thenin an be ve hrim hrim chak a, inthlahrung tak chung te'n phone-ah an lo bia. A thenin thla lakpui an chak a, ngam leh ngam lo te'n an lo lakpui thul. Amah thla lakpui pha lote pawhin a thlalak chu eng tin tin emaw an lo kawl a, Central Jail bang thlengin MS-i thlalak chuan a luah ta.

Chanchinbu market-ah pawh a thlalak leh a chanchin chu hralh tham a awm. A vanglai chuan hmun hrang hrangah 'Khuanu ruat loh di' tih hla a ri chuah chuah mai a nih kha. Mahse, minute hnih/khat lek chhungin a tlachhe ta.

Shakespeare-a 'tragic hero'-te ang mai a ni, dinhmun sang taka ding, mite ngaihsan rawn kha khutah a awm ta. Zofate zingah 2009 chhungin ani tluka tlachhe chiang sawi tur an awm bik lo mai thei.

A reh vang vang a, chutah rin loh deuh maiin mipui hmaah a rawn lang ta thut mai.

"Ka huphurh lutuk. Khatia ka hmingchhiat hnua mipui ka hmachhawn leh hmasak berna tur a ni a, ka huphurh dan chu ka sawi thiam lo. 'Miin min lo pawm ang em?' tih te ka ngaihtuah a, 'mi hian min ngei ang' tih te ka ngaihtuah a, ka zam tawp. Huphurh chung chungin ka dingchhuak ve ta rawih mai a ni," tiin Youth Icon 2008 Malsawmtluangi Fanai chuan Zozam Weekly a hrilh.
"Mi khan zaktheilo te min lo ti ang tih ka hlau a, min lo deu ang tih te ka hlau a, zam tak ka ni," a ti bawk.

MS-i hian mualphona leh hmingchhiatna hi a hai lo a, hrehawm pawh a ti. Tin, mipui a zah a, a zai lo ngaithla thinte a zah hle.

"Hrehawm ka ti a ni tawp mai. Mahse, thiamthu sawi tur pawh ka nei lo. Ka tuar tawp mai a ni," tiin a chanchin a tlangthan laia a rilru put dan a sawi.

"Ka beisei sang a ni mai thei a, ka thiante khan min rawn hnem te ka beisei a, mahse, phone ka kawl loh bakah biak theihin ka awm lo a, ka thiante nen pawh a hun lai khan kan inbe vak lo. Ka ngai thin a, mahse, keiin tih theih ka nei lo. Ka thiante lakah ka vui lo a, hnem tlak pawh ka ni lo. Tin, hnem theih kha ka ni lo bawk a. Keimahin ka tuar tawp mai a ni ber," a ti bawk.

Amaherawhchu, hmaichhana diriamtu a tawng lo nia sawiin, vannei a inti hle. "A mak lutuk, hmaichhana min diriamtu ka tawng miah lo. Khati khawpa ka mualpho lai pawha miin min lo khawngaih thei te kha ka lawm a, mak ka ti lutuk," a ti.

Icon mualphona chungchangah hian minister te meuh pawh an ngawi mai mai lo. Amah MS-i pawhin hei hi a hria, mak a ti a, a lawm bawk.

"Pu Zira leh Pu Sawta te an lo tawng te kha mak ka ti lutuk a, ka lawm tawp tih bak ka sawi thiam lo. Khatiang kha ka beisei lo reng reng. Mi pawh an lo mualpho tawh thin a, minister te'n an chhan ka hre ngai lo. Kei chu min lo khawngaih a, ka thlavang an lo hauh a, an chunga ka lawmzia hi ka sawi thiam lo," tiin hemi chungchang hi a sawi.

"Pu Zira leh Pu Sawta te thil tih kha ka hre reng a, ral khat atang pawhin tun thleng hian ka ngainat phah. Hmaichhana lawmthu hrilh hial ka duh a, mahse, chutiang tihna remchang a awm lo a, tin, ka be ngam lo a," a ti bawk.

A thil tawn kha a'n ngaihtuah let thin a, mumang ang riauva hriat chang te pawh a nei.

"A mak ka ti a, khatianga hmingchhiat kha ka inring ngai lo. Kan tum ang hian thil a lo kal lo khawp mai a, kan beisei miah loh hi kan lo tawng thei dawn khawp mai. Ka ngaihtuah hian mak ka ti a, mumang a ang ka ti thin. Mahse, a tak a ni tlat bawk si," a ti.

A tlakchhiat hnu-ah a tawmbo a, mipui hmaah a inlan ngai lo. A thiante zai lai vel te chu TV lamah a lo thlir a, a lung a leng thin hle. Chutianga khawhar taka a awm lai chuan Red Ribbon Youth Icon thlanna huaihawttute'n Youth Icon thlannaa zai turin an sawm a, lawm tak chungin, huphurh em em siin mipui hmaah chuan a inlan leh ta a ni.

"Zai tura min rawn sawm hi mak ka ti a, Pu Sawma'n (LPS) min rawn bia a, mak ka ti tawp. Heti khawp hian ka hmingchhia a, keimah mai ka hmingchhia a ni lo a, Youth Icon thlanna ka tihmingchhia a, chuti chunga min hre reng hi mak ka ti. Min kalsan lo a, min diriam lo hi mak ka ti a, Pathian hnathawh a nih loh chuan mihring tih theih pawh niin ka hre lo hial. Nu-Mali te'n min khawngaih a, LPS chhungkuain min hrethiam a, min khawngaih a, ka chungah an tha em em a ni," MS-i chuan a ti.

"A zakzum chi ka ni a, a ze zawi chi ka ni. Mahnia awm ve tawp tawp mai ka ni a, chutiang mi tan chuan ka chunga thil thleng hi a rit lutuk," tiin a dinhmun a sawi.

A thil tih zawng zawngte a'n thlir a, mak a ti. Hrehawm a ti a, mahse, hunin a liampui mek tih a hria. "Thil chu a nih tur ang ang a ni tawh a, a thleng fel tawh. Tunah chuan a liam tawh," a ti.

"A hrehawm lutuk. Mahse, hrehawm pawh ni se tih ngaihna a awm lo a, eng tiang paw'n hrehawm se chhel taka tawrh a ngai. Chu bak tih theih a awm lo. Tunah chuan a liam tawh a, tumruh tak leh huaisen taka ka tawn tlang a ni," tiin hmalam hun a thlir ta.

"A hrehawm a, mahse, huaisen taka tawrh a ngai," tiin a sawi nawn a, "Thil thleng tawh chu thil thleng tawh a ni. A thara nun ka duh a, chumi tur chuan ka rilru ka siam," a ti.

MS-i hian rimawi khawvela let leh a tum a, chumi atan chuan mipuite pawmna pawh a ngen.

"Ka mualpho lai pawha diriam lova min khawngaihtute hian min hre reng ang tih ka beisei a, an hriatthiamna hi ka ngen bawk a ni. Zai hi nuam ka ti a, ka tuina a ni. Zai leh ka duh a, mipuiin min pawm leh thei a nih chuan ka lawm ngawt ang," a ti.

"Min duhsaka zai tura min sawm te a nih chuan chutianga penchhuak tur chuan ka rilru ka siam a, ka hrehawmna hi huaisen taka hmachhawna bul tan that leh ka tum," a ti bawk.

Bethlehem daiah chanchinbu

December thla a intan hi chuan boruak chang a danglam lo, mihring rilru pawh a danglam thin. Khua a vawt a, rilru erawh a sa hulh hulh thin niin a lang.

Mipui rilru-ah Krismas leh a chhehvelin hmun a chang a, huau huau leh intihhlimna lam thilte'n hmun pawimawh a chang thin.

Bazar a lun a, Vanapa Hall lah chuti bawk. Sum leh pai mamawhna a lo sang a, nawmsak chakna te pawh a pung thin niin a lang. Mi tin maiin "Aw a va mawi em he ni lawmawm hun tawi te hi" an ti a, khawvel hmun dang chu thu dang ni se, Mizoramah kher chuan thil dang a leng meuh lo, Krismas leh a kaihhnawih thil chauh lo chu.

Krismas leh a kaihhnawih thilte chu a thianghlim leh thianghlim loh te chu thuhran ni se, a that leh that loh te pawh thuhran ni se, rilru zawng a luah hneh chiang a ni.

Chutiang hunah chuan zu market leh thawmhnaw bazar te a len thur thur laiin chanchinbu market erawh a te rawih rawih ta thin a, kan hunpui Krismas meuh pawh chanchinbu tel lovin kan hmang ta thin a nih hi.

December thla tir atang hian chanchinbu hralh a har tan a, thla kip chhuakte pawh a ngelnghet deuh lo chuan an tichhuak lo thin. Kar tin chhuak pawh hralh a har a, thla laihawl thleng bak tihchhuah ngam a ni lo. Mipuiin chhiar tur an mamawh rih lo a ni mai thei.

Tin, a semtute an chawlh a ngai ve bawk. Mizote chuan Krismas hi chhungkaw kima hman kan tum hram hram thin a nih hi. Chanchibu semtute pawhin mahni khuaah, chhungte bula hman an duh ve. December thla tir atang hi chuan an chawl pheuh pheuh tawh a, mahni duh huna haw theih a ni ngawt lo, motor remchan huna haw a ngai. Chutiang chu a ni a, a semtute an haw pheuh pheuh a, December thla laihawl vel thleng bak hi chu chanchinbu tihchhuah theih a ni lo hrim hrim. A buatsaihtute'n tichhuak ngawt se, tuman sem si lo se eng nge sawt ang?

Chutiang chu a nih avangin ni tin chhuakte tan pawh tihchhuah tlang ngaihna a awm lo. Tin, a semtute'n sem peih se, chanchinbu hi chhuak tlang ta se, chhiar tur vak an awm ang em tih pawh ngaihtuah tham a ni. December thla chu kan huau huah lawm thla, bazar kan uar thla a ni a, kan mawl thla pawh a ni mai thei. Kan mawl thla a nih em loh pawhin kan lehkha chhiar tlem thla chu a ni tal ang.

Lal pian hun lawmawm chu mawl phuangin kan hmang ta thin a ni ti ta ila kan sawi sual ang em?

Krismas lai hian chanchinbu chhuak se Krismas vuakvetah tun aiin sual leh thil tha lo a inlar tlem ngei ang. Media chu mipuite kan inkawmkhawmna, kan titi-hona a ni a, mipui hmel lanna pawh a ni. Chief minister pawh hian thingtlang pitar hi media hmang lovin a kawm thei lo mai thei. Chutia mipui kan in-communicate chu a tul a, chutiang tel lovin hmasawnna a thleng thei lo hial mai thei. Mahse, a hmanruaa ber chu Krismas laiin kan paih ta mauh thin si! Mizoramah chuan chanchinbu-in Bethlehem dai a chang pha ve tawk, a hmun laili a chang lo!

Mautam kumah khan kum tluanin tam tuar an awm thu kan sawi a, a vei pawh kan vei tlang. Mahse, Krismas dawnah chanchinbu an han chawl sap sap a, kum a lo thar meuh chuan mautam tam tuar an awm thu kan lo theihnghilh fe hman a nih kha. Halpuah pawh hi, Krismas laiin chanchinbu chhuak se chu tun aiin kan hal nep ngei ang.

Kuminah hian Zozam Weekly hi tihchhuah tlang hram kan han tum a, mahse, kan hlawhchham ta tlat. 2009 thlirna pawh thla tawp lama tih tura kan dah deuh reuh a ni a, tunah issue hnuhnung ber kan ti ta thut si, 2009 kan thlir mumal ta lo. A rem leh kum thar lamah kan la thlir let ang chu.

Kum tluana min hruaitu Pathian chungah kan lawm. Kan chanchinbu tlawm tak chhiartute chungah pawh kan lawm. Kum tharah kan intawng leh ang tih i beisei ang u. Krismas leh Kumthar chibai ule.

Kan Nghah Krismas

¢ Lalremruata Renthlei

Kum khat chhunga kan nghahhlelh ber leh kan hunpui pawimawh ber chu Krismas a ni awm e.

Krismas hi khawvel ram hrang hrangte pawhin an nghakhlel a, a hman pawh an hmang nasa hle. Khawvel ram hrang hrangin tih dan phung an nei a, Krismas hman dan leh an ngaih pawimawh pawh a inang lo nuai mai.

Belgium
December ni 6-ah Sinterklaas or Saint-Nicholas lawmna hun an hmang thin a, hmun dang zawng aiin an lawm dan hi a danglam bik a ni.

Krismas putar hi Belgiun-ho chuan de Kerstman emaw le Père Noël tiin an ko a, Krismas ni-ah naupangte thil pek pe turin a lokal ni-ah an ngai.

Krismas thil pek an uar hle a, chhungkua an inpe tawn a, mahse, zing thawha hmuh mai theih lohna hmunah an thil inpek tawnte zawn ngei turin an thukru thin. Krismas breakfast an ngai pawimawh hle a, Krismas apiangin chhang tui tak 'cougnou' an tih mai chu an ei ngei thin a, he chhang hi Isua lem angin an siam thin.

Brazil
Brazil chuan Krismas Pa an nei thin a, chu chu Papai Noel an ti. Krismas an hman dan hi UK leh USA-a an hman dan nen a inang hle. Krismas tukthuan an ngai pawimawh a, chawhmeh tui tha tha an ei thin. Krismas tree an uar hle a, rethei leh hausa, tute pawhin Krismas tree chu neih ngei an tum thin a, Brazil ramah chuan vur a awm ve loh avangin Krismas tree cheinan cotton an hmang tlangpui thin.

Finland
Finland pawhin Krismas Pa an nei a, Santa Claus chu Finland hmar lam Artic Circle-a Korvatunturi a cheng niin an hria a, khawvel hmun hrang hrang atangin Santa Claus chu lehkha an thawn thin a ni (Greenland-ho chuan Krismas pa chu an rama cheng ni-ah an ngai thung). Finland-ah chuan tourist-ho tlawh duh tak 'Christmas Land' an siam hial a, chu hmun chu Santa Claus chenna hmun nia sawi a ni.

Krismas pualin ni thum holiday an nei a, ei leh in an uar hle. 'Christmas peace declaration' chu TV leh radio hmangte in Turku khua Mayor in a tichhuak thin.

Finnish-ho chuan Krismas hi an ngaihlu hle a, lawm pawh an lawm nasa thin khawp. Krismas thilpek an uar hle a, a nuam leh ropui thei ang berin an lawm thin a ni.

Thilpek an uar hle a, chhung tin hi thil an inpe tawn thin. Chhungkaw zinga a upa lam chu Krismas putar anga incheiin naupangte thilpek a pe kual bawk thin.

France
France-ah chuan Krismas hi Noel tiin an sawi thin. In tinin Krismas tree an nei vek a, chu chu ribbon sen leh mombati ang chi in an chei thin. Hei mai bakah huan leh in leh a chhehvela thingte chu zana eng thei turin an chei nasa thin hle.

Krismas pa chu Pere Noel an ti a, Krismas ruai chhung tinin an theh ziah a, chu chu an ngai pawimawh thin hle.

Germany
German ho chuan in chei an atchilh hle a, Krismas apiangin in chei ngei turah an ngai. In tin deuhthawin bawm chhungah bulb dahin an cheimawi thin a, chu chu pawn lama hmuh theih turin an tarchhuak thin. In tam tak chuan Krismas lai apiangin ran in ang tak siamin chutah chuan Isua, a nu leh a pa bakah ran lem te an dah thin.

Krismas Pa chu 'Der Weihnachtsmann' an ti a, December ni 24 tlai lamah biak in-a inkhawm neih zawhah thilpek a pe kual thin. In tinin Krismas pualin ruai an theh ziah a, chhungkaw zinga tu emaw berin dar a vua a chumi hnuah an awmna hmun theuh atangin chaw ei dawhkan an pan kual thin.

Hungary
Krismas putar chu Mikulas an ti a, December ni 6-ah kal thin angin an ngai. Naupangte chuan in kawngkhar pawn lamah an pheikhawk te phela dahin khum an pan chauh thin a. A tukah chuan an pheikhawk chhungah chuan thilpek chi hrang hrang a lo awm thin.

December ni 24-ah naupangte chuan an chhungte in emaw movie enin emaw an in an kalsan thin. An awm loh hlanin Isua chuan an inah Krismas tree a lo dah dawn ni-ah an ngai a, Krismas tree-ah chuan ei tur te a lo inkhai thin a ni.

Tlai lamah Krismas pualin chhungkua in ruai an theh thin a, chaw eikham hnu-ah chauh Krismas tree chu naupang te'n an en thin a, chutih pah chuan Krismas hla sa rualin chumi hnuah Krismas tree a ei tur awm te chu an changho thin a ni.

Latvia
Latvia-ho chuan Krismas an hmang rei bik hle. Krismas pa chuan Krimas eve atanga chhiara ni 12 chhung ni tin thilpek a pe ziah angah an ngai a ni. Latvia ram hi Krismas tree hmuhchhuahna hmun a ni bawk a, a hnu zelah pawh Krismas tree an uar hle. Krismas apiangin chhung tinin ruai an theh ziah bawk.

New Zealand
New Zealand-ah chuan Krismas tukah thilpek an dawng thin a, chhunah eitur tuihnai tak Krismas pualin an ei leh thin. Chawhnu lamah thianzahovin Krismas pualin hun hman an uar hle a, tlai lamah pawh chaw leh sa tui hnai tak tak eiin hun an hmang thin.

Portugal
Portugal-ah chuan Krismas Pa-in thilpek a pe ngei turah naupang ten an ngai nghet bur a. Krismas Pa chuan thilpek a pekte chu Krismas tree-ah emaw pheikhawk chhungah emaw a dah thin. Krismas pualin chhung tin in ruai an theh thin a, Urlawk zan hman pawh an uar hle.

Romania
Urlawk zan hman an ngai pawimawh hle a, Krismas ni tak chuan chawchhun tuihnai tak an ei thin. Inkhawm an ngai pawimawh hle a, inkhawm ngai lote pawhin inkhawm an ngai pawimawh a, chhungtin in biak in an pan ruih ruih thin.

Russia
Communist ram an nih chhungin Krismas an hmang thei vak lo. Kum thar an hmang nasa em em thung. Communist a tlukchhiat hnuah Krismas hman an uar thar leh a, December ni 25-ah emaw January ni 7-ah emaw an hmang thin. January 7 hian an hmang nasa zawk mah mah a, a chhan pawh Russian Orthodox chuan Julian Calendar an hman tlat vang a ni.

Sweden
Sweden ramah chuan Krismas ni tak aiin Krismas 'eve' an ngai pawimawh zawk. Krismas pual ruai chu Krismas eve-ah an nei thin. Krismas thilpek pawh hemi ni hian an nei zawk thin. Krismas ni-ah erawh chhung tinin zing lamah biak in-ah inkhawmin hun an hmang thin.

Khualbuk Vengtu Kha

¢ Upa C. Hmingthanga
Mission Vengthlang

Zozam December 2-8 issue-a Lalmuanpuia Punte ziak, “KHUALBUK VENGTU KA LAINAT” tih kha ka lo chhiar a, am’n a sawi ang khan han tarlan ve tulin ka hria a, amah kha ka chhang a ni lova ka sawifiah duh mai zawk a ni.

He hla ‘Bawng in runpui a bel’ tih hi Upa Rokunga phuah a ni a, Upa Rokunga phuahtirh a sa hmasatu zingah pawh ka tel ve. A kum chiah ka chiang ta lo, 1957 emaw 1958 a ni.

Venghnuai Biak In sakna atana thalai ten krismas Carol-ah hian Mission venga thalaite ‘Rokunga leh a pawlte’ tia All India Radio a ama hova zai thinte kan tel vek hlawm a.

Kan Carol tum hian zan thum kan tlaivar thak a, he hla hi kan tlaivar pui a ni ber mai. Kan Carol tan tirh zan chuan Aizawl hmar lam atangin kan tan a, kan hotu chu Upa Rokunga hi a ni. Kan zaina hmasa ber chu Pu Sangliana (RIP) Bungalow hmunah hian a ni a, Upa Rokunga khan a in kan luh dawnin, ‘Kalna tur kan ngah si a, thu muang lovin kan kal nghal dawn nia’ a ti lawk nghe nghe a.

Pu Sangliana bathlarah khan, ‘Bawng In runpui a bel’ tih ngei kha kan han sa a, kan sa zo chiah chu amah Pu Sangliana kha a lo ding a, ‘Thingpui ka lo buatsaih vek tawh a, in kal mai thei lo, zawhna zawh tur pawh ka nei a, min chhan fel phawt a tul ang. Chuvangin, min palzut mai thiang lo’ a lo ti tlat mai a.

Kan thumuang a, thingpui an rawn sem nghal mai bawk a. Pu Sangliana chu a lo ding chhuak a, ‘Pu Rokung, i hla thu hi ka hrethiam lo, heti em em a khualbuk vengtu i rawn dem hi a dik dawn em ni? A hre lo a lawm, van lal fa piang tur paitu a ni tih hria se, a hnar lovang. Sualin bawm reng ringawta i puh phei hi chu a lutuk deuh a ni. A sualna Bible-ah a in ziak tel em ni? Khualbuk a khat tawh a ni mai a, dawt a sawi hleinem, i sawi fiah thei em?’ a ti a.

He zawhna Upa Rokunga’n a chhanna hi ka thinlungah a cham reng mai a, chu chu Lalmuanpuia Punte leh chhiartu en an hriat atan ka tarlang duh a ni.

Upa Rokunga chuan, “A ni ngawt mai, he lai thu hi hriat sual theih tak a ni reng a, kei chuan khualbuk vengtu hi a sual ka ti reng reng lo, tehkhinnan ka hmang mai chauh a ni. Khualbuk vengtu hi mikhualin an bawm luih luih ang hian kei hi sualin min bawm reng e ka tihna a ni a. Tehkhin nan ka hmang zawk a ni e” tiin a chhang a. Keini ho pawh khan, ‘A ni dawn tak!’ kan ti he haw hlawm a. Pu Sangliana zawhna ang kha kan rilruah a lo awm ve hlawm viau nghe nghe a ni.

Kan hla phuahtu te hian awmze nei takin thu an phuahchhuak thin a. A phuahtu rilru hre chiang lova kan ngaihdana kan hrilhfiah chuan a dik duh lo viau reng a nia. ‘Bawng In’ thuah chuan ka hre phak ve lova, mahse, Mizo chauhin Bawng In kan tih ka ring love, Lal Isua pianghlim an muttirna kha ‘Ran chaw pekna thleng’ an ti a. He ran chaw pekna thleng hi sap tawng chuan ‘manger’ an ti a. Sap tawng veka an hrilhfiahnaah chuan beram chu a huam tel lovin ka hria.

‘Khawvel sual tung ding leh tura’ tih leh ‘I lal thutthleng leh lal lukhum i rawn kalsan’ tih hla sawiselna hi chu Pu Muanpuia Punte hian a hre chiang vek a, a sawisel fiam mai maiah ka ngai a, ka sawi zui lo mai e, ka thiam bawk hek lova.

Ka sawi duh ber zawk chu Pu Muanpuia hian khualbuk vengtu hi lo lainat lutuk lo se a thain ka hria e, tih mai a ni e.

Mi tin urlawk Krismas

¢ Vanlalremruata Tonson

Varanda-ah ka va chhuak a, ka harhchhuak hlawl ni deuh berin ka hria. Krismas a hnai tawh tih ka hrechhuak a ni. Ka bula thingkung ding ka en a, hnim dangte pawh ka hmu. Ni dang angin an tang ut lo a, a dam deuh thlupin ni te hian ka hria. An thla a muang ti ila ka hmuh dan a phawk mai thei. Min tuam veltu boruak pawh ni dang ai chuan a dam zawk. Boruak hrim hrim pawh Krismas hmachhawn turin a inpuahchah a, a urlawk tan ni berin ka hria a, keia tan erawh chuan Krismas lo thleng tur hi urlawk ngaihna a awm der lo thung.

Khua a lo thim a, hun leh ni uluk taka chhiar chang chuan khaw thimin min tham dan a dang fo thin. Biak in dar a rawn ri val val a, ka mitthlaah chuan mi tam tak an lo lang. Kan biak in, ka naupan lai leh tleirawl ve laia ka inkhawm thinna kha ka mitthlaah a lo lang a, khawvel ngaihah biak in tlawmtê a ni ang, mahse, ka tan chuan a lo hlu hle ni ngei tur a ni, sakhaw thil tih ka suangtuahnaa a lo lan chang apiangin chu biak in chu a lo lang hmasa ber thin. Ka hriat phak chinah vawi hnih sak a ni tawh a, a sak laite chu chiang lo ruaiin ka mitthlaah chuan a lo lang thin a ni.

Thalai te'n biak in an pan ang a, Krismas lo thleng tur atan chuan an inpuahchah dawn a ni tih ka hre reng. A huhova mi zawng zawng hriatpuia Krismas an hman dan tur an buaipui a ni. A mal theuhin eng tin tak inpuahchah hlawm ang maw, tih te ka ngaihtuah mai mai a. An zai ri pawh ka hria. Engatinge hetia mi an han zaiho hi a mawi em em thin aw ka ti a. An zai ri atang chuan nula-tlangval hmeltha ber ber leh rilru tha leh thianghlim ber ber pu ni awmin ka suangtuah a, ka ngaisang fo thin. Biak in atanga lo chhuak thawm leh a hmaa Krismas boruak pawna ka va hmuh zawk chuan ka ngaihtuahna a hruai zui deuh hlek a, min tuamtu boruak chu tunhma aiin zang mah se keima chhungril boruak erawh chu a rit zual niin hian ka hre nghe nghe.

Zai chu ka lo zawm ve mai a, thui erawh ka zawm thei lo. Keimahin hmui phun lo hian ka zai rut rut a, ka khua a har hle a, hnemtu ka ngai ngawih ngawih. Min hnemtu lo kal pawh ni se, ka lo "nia" liam vel mai mai chuan ka ring tho mai. Pindan lehlamah ka kal a, ka tawngtai a, ka chhuak chu ka zai zawm leh mai. Hla pakhat mah a tluana sak theih ka nei lo a, ka sak duhna lai pawh a thui hlawm lovin ka sak dan pawh a mumal lo. Engemaw chen hnuah chuan keimaha 'tension' awm chu a kiang ta deuh a. Ka tawngtai vang nge, ka zai rut rut khan 'tension' a 'release' ni ang aw ka ti mai mai. Ka ngaihtuahna delh rittu sutkianna tur thil ka ngaihtuah chhuak pawh a ni si lo a. |awngtai hrim hrim hian ngaihtuahna a sawrbing avangin taksa tang utte a tihahdam a, lungphu te a tidam dap a, zai pawh hian keimahnia thil inup teuh awma hi a chhuak a, hriselna atan a tangkai ti ang deuha eng chanchinbu emaw nia inziak hi ka chhiar fuh tawh a. Pathian chhanna nge maw ni, khawvel thil deuh pawha hrilhfiah theih chi ni ang tihte thlengin ka ngaihtuahnaah chuan a rawn awm.

Zan a lo rei a, a reh tan tawh. Thlasikah chuan mi an mu hma deuh thin a, zan pawh a reh hma deuh thin. Carol an rawn zai tuar tuar a. Khawvar dawn thlengin an zai a, an inkawm ang a, hlimin an râk chul ang. Ka tel lovin Krismas an lo hmuak a, tuma'n ka awm ve tih reng reng an hre lo a… ka awm tih hria pawh ni se kei chuan Krismas lam ka hawi lo a, inpuahchahna chhe tê pawh ka nei lo. Ka urlawk lo a ni. "Krismas te chu ni dang nen danglamna a awm hlei nem, kan serh avangin chhinchhiahna kan pe a, chu chuan a cheimawi mai a ni. Kum tin a lo thleng ziah, thil danglam em em a ni lo," ka lo tih ve thin ang ngawt chu a ni ta lo. Kei chu tumahin engmahin min mamawh lo.

Ngaihtuahna chuan hun kal tawh bawk chu a dap a. Fate Krismas thawmhnaw lei turin chhungkaw pa ber kumpui lingleta an pawisa khawl leh an thil thar chhuah hralh tur an neih ang angte nen khawpuiah an zin thin kha a ni a. Tleirawl mahnia zin thei tana khawpui hmuhna remchang a ni thin bawk. A rual a rual hian an zin thin a, a zin thei lote pawhin a theih hram chuan a zin theite an chah thin. Khualzin pawh chu Krismas hun chhinchhiahna chu a ni. Zin lo haw a hun tawh chuan a hmuaktute thawm nen zinkawng a hulum thei hle. Khawpui dawrkaiho zingah thingtlangpa lo bum duh tawk chu an awm ngei awm si a, eng tin tak khawpuiah chuan zu che thin hlawm ang maw? Kan nghahhlelh ber chu Krismas thawmhnaw tur nena pate lo haw hun kha a ni. Thingtlang leh khawpuiah pawh thawmhnaw thar chu Krismas chhinchhiahna a ni thlawt.

Mahse, khawpui leh thingtlangah thawmhnawin Krismas chhinchhiahna a nih dan chu a inang lem lo. Khawpuiah chuan 'fashion' a nih loh pawhin thawmhnaw neih belhna a ni ang a, thingtlangah chuan kan retheihzia lan chhuahna a nih ka ring. Krismas thawmhnaw thar chu kan thawmhnaw chhe tawh tak belhchhahtu tur a ni a, bel thut tawh thlakna tur a ni bawk. Thlasik lai a ni a, thawmhnaw thar chu a lum a nih chuan nipui lai pawha kan hak tho tur a ni. A tlangpui thuin kan thawmhnaw thar chuan Krismas thlasik a ngam lo deuh a ni ang chu, urlawk zan atang chuan naupang chuan 'shawl' kan sin chhuak a, lu kan khuh a, kawrtawng hak ang deuh hian tukhumah kan suih thin. Tichuan, enghelh dang nei miah lovin kan hmaa thil awm apiang phur taka hmachhawn tur leh Krismas hlimpui (enjoy) tur chuan kan tei chhuak ve thin a nih kha. Tlaivar ngei tur thawkin kan thaw ham ham a, Krismas thlen in kawta thingpui lumna bulah chuan kan innek deuh talh talh a.

Krismas thawmhnaw ka ngaihtuah chang chuan retheihna awmze nei lo (abject poverty) a ni ber em tih ka ngaihtuah rauh rauh thin. A ni e zawng ka ti dawt ngam lo. Khatih lai hun, a ram puma communication-ah pawh kan hnufual em em lai, khawpui nunin kar lova thingtlang a thlen ve zung zung hma a ni a, thingtlangpa pawhin chuti takin kumtluana er tur a ngah tehchiam lo. Buh khamkhawp a tharchhuak tur a ni a, kamding hnenah a kham tur bak a neih a hralh then ang a, a nih loh leh thlai dang hralh tur a neihte khawpuiah kengin a hralh ang. Tichuan, a fate Krismas thawmhnaw tur a leisak dawn a ni. Kumtluana saruak lova an awm chuan a tawk viau mai. Neinung deuh a nih chuan naupang zirlaibu turte pawh a lei thei ang. Chu erawh chu thil pawimawh hmasa a ni ber lo, sikulah chuan a thiante ta tawm tur pawh a awm tho alawm. Dik tak chuan lehkha zirah pawh hian tlema chhungkaw khawsa thei deuh emaw khawhawi sang ve ve hrim hrim lo chuan beiseina tak tak kan nei ngai lo. Kan ngaihtuahnaah chuan tleirawl aw lai hi a han reh fel ang a, kum hnih khat kan nula-tlangval ve ang a, nupui-pasal kan nei ve mai ang. A tam ber chuan khawsakna changkang zawk emaw hmasawnna emaw han ngaihtuah chhinna rilru reng reng kan neih ka hre lo. Kan eizawnna pui ber thingtlang loneihah hian kum za fe chhungin thil danglam tehchiam a awm lo mai ni lovin a technology leh method thlengin a hniam hret hret zawk mah niin a lang. Paho pawhin an duh ber chu thlawhma zim zawk neiha hahdam hi a ni mai. Dik tak chuan thingtlang loneih that lohzia an sawi a, min tihnual sauh sauh a, 'alternative' rintlak min pe turin engah mah tlinna reng an nei leh si lo a nih hi. Thingtlangpa tan chuan sorkarin pawisa a rawn sem emaw inhlawhna tur a awm emaw a nih chuan tunhmaa an erpui ber Krismas 'expenditure' tur a awm a, a tawk khat viau tawh a ni. Mahse, kan nun leh khawsak erawh a dang hret hret ta si a.

Khawpuiah erawh chuan khatia ka ngaihtuahna a kal chiam ni khan va chhuak ni ila, mi thawmhnawah Krismas incheina tur bik liau liauva siamte ka la hmu kher lo na a, incheina atang pawhin Krismas a hnai tawh tih chu hairual a ni tawh lo ang. Nulaho chuan an vun aiin thawmhnaw chu inchei nan an hmang tawh ang a, an vun leh pian hmanga mi thinlung va thawn an tumna chu an thawmhnaw rawnga vun rawng va kap eng tura incheiin an thlak tawh ang. Thawmhnaw chuan nula pian nalh lo tam tak chu a thup mawi zawk mah ni hian ka hre thin. Khawhawi pawh a hahdam zawk emaw ni chu aw te ka ti a. Ni danga an chawn, mal no leh awmbawr velin mi ngaihtuahna a chhun theih ber dan tura ngaihtuah rana an inchei nen khan ka mitah chuan a 'sexy' dan a inang reng ni maiin ka hria a. An vun lah chu khawvawtin make up a vawngtha a ni ang chu, a nung zawkin a eng zawk mah niin ka hre bawk. Mipa pawh ka mitah chuan an thawmhnaw chuan nipui lai ai chuan a chei zawk ngei a. Mahse, mawi kan tih leh kan ngaihtuahna khawih zawngte hi a inang lem lo a.

Vahchhuah sawi takah chuan Aizawl khawpuia Krismas chhinchhiahna langsar dang chu 'traffic jam' hi a ni. November thla tawp atangin business area chu a 'paralyse' tan ni maiin ka hre thin. 'Paralyse' han tih êm chu kan uar deuh a nih pawh a 'handicapped' a ni ber lo'm ni? Kuminah hian a zia viau zawk emaw ni te ka ti zawk a. Chanmari leh Treasury Square inkarah hian kea ka kalin bus aiin ka thleng hma zawk thin. Bazar-ah mi an innek nulh nulh a, in chhawng chung atang hian lo thlir ila, bazar kal theuh theuh kan ngaihtuahna hman dan a inang lo hlawm âwm khawp mai. Hun hian awmze a nei hlei thei lo, hlut pawh a hlu thei lo a, a uihawm ve tawp. Thil dang zawng aia hlauhawm nia ka hriat chu chhûnlai takah hian kangmei a chhuak emaw accident lian deuh hlek dang a thleng ang tih emaw hi a ni.

Chu'ng zawng zawng chu Krismas hmang tura kan inpuahchahna a ni. Hunpui hmang tura thingtlang tlangvalte inpuahchah thin dan kha. Inhlawhna awmah an han inhlawh a, Krismas ruaitheh zawha nulate nena kuhva ei vena tur leh nulate nena Krismas chhang kan nana tel leina tur leh ar kanna turte hi an buaipui hmasa a nih hmel. Khawpuia awm, Krismas hmang tura lo hawte chuan Re 1-a kuhva khawr nga leina tur lek chu an harsat lo thei hle. Krismas chhang kan pawh kan ti tak nâ a, tlangvalho hian nula 'bem' nan ai mah hian hunpui, kum tluana kan ei phak loh hmuihmer haw vanglaia han mawm lehzual kha a nih dan turah an ngai a nih ka ring. Dik tak chuan 'under-nutrition' han tih tur chu a ni lo na a, a tui tui ni lovin taksa mamawh pawh thingtlangah chuan hmuh a har thin a, kan ei pha lo, ruai chu hlu tak a ni. Chawhmeh kan tak ngial pawh induhsak hun lai ka hre pha a… Tunah zawng le, a ni tawh lo a. Nun hi a lo danglam chak awm hle mai. Naupang leh tleirawlte pawh Krismas pawisa tuakin an inhlawh thin kha a ni a, naupang tan pawh pawisa nei lo bik ni chunga Krismas hlim taka hmang tur chuan chhungkua hi a lo pawimawh ber ta awm e te ka ti leh hnuhnawh a.

Hunpui hmang tura kan er tlan ber chu "Zu" bawk hi zuk nia. Khawpui leh thingtlangah tlangvalte lungkham ber a ni a, tunah pawh tunhma pawhin a ni. Dik tak chuan hunpui reng reng chu zu tel lo chuan a kimlo a ni ber mai.

Zu hi buaina bul leh do tlat tur a nih tak zet chuan hlimna leh buaina pawh hi thil inhnaivai tak an lo ni ang e. A tel lo erawh chuan hlimhlawp leh hunpui chu khawiah mah a famkim ngai lo. Chu chu mihring nuna bet thlak hleihtheih tawh loh a ni tlat si a. Zu in lo mi tam berin an lo tem tawhna chu Krismas leh Kumthar hi a ni a, a in tam tak pawhin an in hmasak ber tum a ni ang. Aizawl khawpui pawhin kumin Krismas leh Kumthar-a mi tur a chhekkhawl tan vel ta ve ang. Krismas leh Kumthar chu thenhran theih a ni lo.

Krismas hla chuai lo, Zan Thiang Reh...

¢ F Lalramdinliana

Chu puithiam la naupang tak chu a lungngai hle a, a chhan chu a tuk zan maiah Krismas urlawk inkhawm a kaihruai dawn a, an rimawi tumna ber an Organ chu a hmantlak tlat lo. Organ tel lova hla han rem tur an nei mai si lo, rimawi tel lova Krismas han urlawk lah chu ngaihtuah ngam pawh a ni lo!

Father Josef Mohr chu Austria ram thingtlang khaw pakhat, Obendorf khuaa an puithiam a ni a, kum 26 mi chauh la niin Obendorf khuaa kohhran pawh hi kum khat erh awrh bak a la enkawl lo.

December 24, 1818 a ni a, Father Joseph Mohr chuan tihdan tur a ngaihtuah chhuak ta. Tingtang nena rem theih hla thar siam mai chu thain a hria a, a hma kum hnih vela Poem a lo phuah tawh chu hlaa siam mai a tum ta a. An Kohhran organ tumtu ber leh a thianpa ni bawk Franz Gruber hnenah chuan a poem chu tingtang nena rem theih tura a thluk siam turin a va ngen ta chawt mai a ni. Gruber-a pawh chuan hla thluk chu a buaipui nghal ta char char a, darkar hnihkhat chhung lekin zaipawl ho zir theih turin a peih ve ta mai bawk a. He hla an siam lai hian Father Joseph Mohr leh Franz Gruber hian a hnu-ah heti em em hian he hla hi a lar ang tih reng an ring pha kher bik lo ang.

Chumi zan Krismas urlawk inkhawmah chuan Gruber chu zaipawl hruaiin maicham hmaah chuan a ding vang a, a bulah Father Mohr pawhin tingtang a lo kuah ve ran bawk. A vawikhatna atan zaipawl chuan "Stille Nacht! Heilige Nacht!" (Zan thiang reh, lai takin) tiin hla chu an rem ta a ni.

Kum 1825 khan Father Mohr-a te Organ tha lo chu Carl Mauracher chuan a rawn siam sak a. Hemi tum hian Carl Mauracher hian he hla copy hi a chhar hlauh mai a, ani hian an khaw lamah a hawpui ta a ni.

Mauracher awmna khua hi Europe vel fanga zin thin folk singer tam takin an rawn paltlang reng reng thin a, ani pawh hian he hla hi a tum ve nasa thin hle. Folk Singers zinkual thin chhungkaw pahnih hian lo hre chhawngin Europe rama an concert-na hmun hrang hrangah an sa lar tan ta a. Kum 1832 vel khan tuna kan hriat ang hian a thluk hi siam danglam nia sawi a ni. Kum 1834-a The Strasser Family-in Prussia ram lal hma-a an sak tum phei chuan an lal chuan a lo duh hle mai a, Cathedral Choir te chu Krismas urlawk nana sa ziah turin thupek a chhuah ta nghe nghe.

Kum 1839-ah Rainer Family te chuan he hla hi America ramah an chhukthlak pui a, kum 1850 velah chuan khawvel pumah a lar viau tawh. He hla-in Europe khawmualpui a fan chhuah viau laiin a phuahtu tak hian hriat a hlawh ngai meuh lo, a phuahtu tak Father Joseph Mohr hi kum 1848 khan a boral nghe nghe.

He hla hi chuti takin a lar a ni tih chu Austria rama thingtlang khaw te tak te hian a hre har ve hle. Kum 1854-ah khan Franz Gruber-a chuan Berlin-a rimawi lama thuneitute lehkha thawnin a thluk leh music hi a phuah ngei a ni tih lehkha-in a va hrilh a, mahse mi tam tak chuan Haydn / Mozart / Beethoven kutchhuak emaw-ah an ngai tlat thung.

A lar tantirh laiin chanchin puanzarna tha a awm lo, mahse he hla hi khawvela hla lar ber pawl a ni thei tlat. He hla vawrh lartute hi celebrities te an ni kher lo a, a thuchah ken a ropui em vang zawk pawh a ni ang, khawvel a hrut chhuak hneh em mai! A tirah chuan German tawnga phuah a ni a, tunah hian tawng 300 chuang zeta lehlin a ni tawh; engtik lai pawha khawvela Krismas hla lar ber ti pawhin a sawi theih hial ang chu.

A phuahtu chungchangah hian titi leh thu vuvuk a leng tam hle. Kum 1995 khan a phuahtu Joseph mohr-a kutziak ngeia he hla inziakna hi hmuhchhuah a ni ta hlauh a, chutah chuan a phuah kum leh a thluk siamtu Franz Gruber hming pawh a lo inziak nghe nghe a ni.

A hun hnuhnung lamah Gruber hi Hallein-ah an chhungkua-in an pem a, tunah hian hemi hmunah hian Franz Xaver Gruber Museum din a ni tawh nghe nghe. He Museum-ah hian Gruber-a khaw hlui leh "Silent Night" chanchin tam tak tarlanna pho chhuah a ni a, Joseph Mohr-a'n a pek tingtang pawh dah a ni bawk. He in bulah hian Gruber-a thlan a awm bawk a, December thla hian Christmas Tree-a chei thin a ni.

"Zan thiang reh, lai takin" tih phuahtu Fr. Joseph Mohr hi kum 1792 khan Salzburg-ah a piang a, he hla hi kum 1816-a Mariapfar-a kohhran pakhat a enkawl laia a phuah a ni. Mirethei tak chhungkua atanga lo chawr chhuak niin kum 1848 khan Wagrain-a Pastor hna a thawh laiin a thi a, a boral pawh hian rosum hnutchhiah tur engmah a nei chuang lo. A thlan bul lawkah hian Joseph Mohr School din a ni a, chu chu a khaw miten amah hriatrengna an neih chu a ni mai. Rawng a bawl laia a sum lakluh ve te chu tar enkawlna atan leh naupang lehkha zirna atan a thawh vek thin. St. Johann-a an overseer chuan Mohr-a chungchang tihian Bishop hnenah a sawi, "Mihringpuite tana thian rintlak, miretheite khawngaih em emtu leh pa nih tling" tiin.

Engemaw chang chuan kohhran te ber te pawh hi a thawh hlawk ber an ni ve tlat thin. Krismas hla chuai lo 'Zan Thiang Reh Lai Takin' tih pawh hi kohhran te tak te atanga rawn chhuak a ni, chu kohhran chu St. Nicholas Church of Oberndorf an tih thin kha a ni.

Mittui Nen Krismas

Krismas thlen nan ni li chauh a awm tawh a. Chu hunpui lo thleng tur avang chuan mi tin mai chu an phili buai tawh a, kei lah chuan chutiang vel chu eng hehuah ka ngai ve hran lo thung. Kan khuaa dawr pakhat, a man tlawmna thil an zawrhna kawt ka thlen pawh chuan car an lo hung khat vek a. Dawr chhung ka han luh phei chuan mi an lo tam kher mai, nawrlirh (thil lei tur dahna - shopping cart) leh thil lei tur veivak vel intawklawi avang chuan inkalpawhna velte chu kal hleihtheih loh khawpin a tawt a. Innek nul nul a ngai a ni.

Vawiin ber khera ka lo bazar ve le? ka ti rilru a. Ka ke a kham thum a, ka lu a na hle bawk si a. Tu tute emaw thil leisak tur ka nei nual a, anmahni chuan engmah tihsak a ngaih loh thu min hrilh tho mahse engemaw tal ka leisak loh chuan chuan an vui dawn tih ka hre reng si a.

Hmanhmawh takin ka thil lei tur chu ka thlang a, nawrlirhah chuan ka dah zel a, ka duh zawng ka lakkhawm kim hnu chuan a man pekna hmun lamah chuan ka innawr phei a. Chutah pawh chuan an lo intlar dul mai a, a tlar tawi ber pawh chu minute 20 vel lai nghah a ngai dawn tih a lang reng.

Ka hma chiahah chuan naupang te pahnih - mipa naupang kum 5 mi vel leh a nau ni ngei tur hmeichhe naupang hi an ding a. Mipa naupang chuan coat pawr chhe hrip hrep, a pawp bel thluah tawh hi a ha a. Tennis khelhna pheikhawk lawk bur, hlui zet mai leh pawr phuai fuap mai, a thler lai bel thluah tawh hi a bun a, jeans kekawr bul chhing fahran mai a ha bawk a. A kut bal, chat ang reng takah chuan pawisa zawr zet mai hi a hum ran a.

Hmeichhe naupang kawr hak pawh chu a u thawmhnaw inbel ang tho a tawp leh bal chu a ni a, a sam bit ang reng tak chu a kir chiat nghe nghe a. In chhunga bun mai mai chi rangkachak rawng slipper hi a hum ran a. Dawr chhung kil khat atanga Krismas hla an play chu mil lo em em hian, a thiam dan danin a lo zawm ve a, a hlim hmel phian lehnghal a.

Rei tawk tak kan nghah hnu chuan dawr nghaktu bul chu kan thleng ve ta hram a, hmeichhe naupang zawk chuan dawhkanah chuan a slipper ken chu dim tein dawhkanah chuan a han dah a. A han tih danah chuan thil hlu tak niin a ngai emaw tih mai tur a ni.

Dawr nghaktu chuan a man a han chhut a, ziahluh pahin, "Cheng 60 man a nih kha," a ti nghal a.

Mipa naupang zawk chuan a pawisa ken lai chu dawhkanah chuan a dah te te a, a ipte chu a han indap zui chiam a, a pawisa neih zawng zawng chu Cheng 30 chiah a lo ni a. Tihngaihna hre lo takin, "Kan nei daih si lo a, kan dah let leh mai ang e. Naktukah emaw ni dang remchangah emaw kan lo kal leh zawk mai ang," a ti a.

A u thusawi a han hriat chuan hmeichhe naupang chu men ta puai puai a, lungchhe em em maiin a tap chhuak ta hawm hawm mai a. Tap chung chuan, "A-u, he pheikhawk hi Isua duhzawng tur asin," a ti mawlh mawlh a.

A u chu a mangangin, tihngaihna a hre lo tih a hmelah chuan a lang chiang hle. "Mate, tap suh haw phawt ila, chuan kan inhlawh leh ang a, pawisa kan neih daih veleh kan lei mai dawn alawm". A nau chu a kuah a, a thiam dan danin a han hnem ve a.

Chutih chhung zawng chuan kan tlar chu kan ding reng a, naupang pahnih chu kan thlir thap a. Chutah inngaihtuah lawk chuang loin ka pawisa ka phawrh a, kan tlar min tibuai rei bakah Krismas thilpek atan tiin Cheng 30 chu dawr nghaktu hnenah chuan ka peksak ta a.

Thawklehkhatah an unau chuan min rawn kuah thut mai a, "Ka pi, kan lawm lutuk," an ti mawlh mawlh a.

Kei chuan, "Engati nge he pheikhawk hi Isua duhzawng a ni in tih ve rikngawt a?" tiin ka zawt a.

Chu mipa naupang chuan, "Ka nu hi a damlo a, van ramah a kal tep tawh a. A-pa'n Krismas hmain Isua hnenah a awm hman dawn tih min hrilh a," tiin min chhang a.

Hmeichhe naupang zawk chu a lo inrawlh ve var a, "Sande sikula kan zirtirtuin van ramah chuan khawlaite hi rangkachaka luan vek a ni a, he slipper rawng ang chiah hian. A-nu pawhin rangkachak rawng pheikhawk hi a bun anga, a inhmeh dawn asin tiro? Isua pawhin mawi a ti ve ngawt ang tiro?" a lo ti reuh a.

An thusawi ka han hriat a, a mittui luanna hnu a hmai bal niu niau ka han hmuh chiah chuan kei pawh chu ka insum thei lo, ka hnuk a ulh a, ka mittui a hnam ta tiam tiam mai a. "Ni e. I nu chuan a inhmeh khawp ang," ka ti sap a.

Ngawi rengin ka tawngtai zui a, heng naupangte hmanga mi dangte tana thil tha tih leh a mamawhte tana thilpek hlutzia min hriatchhuahtir tak avangin Pathian hnenah lawmthu ka sawi nghal mawlh mawlh a.

(CHRISTMAS TEARS tih lehlin a ni a, a ziaktu hriat loh - Lalthlamuana Ralte)

Lei ranthleng leh thing anchhe dawng Kraws vana lallukhum a inzawm, lei Eden leh Salem thar nen

¢ Laldinpuii

Kan hma lawkah hian Kristian-te hunpui pawimawh berte zinga mi Krismas kan lo thleng hnai leh dawn ta reng mai. Mizote tan phei chuan kan hnam leh ram pum puiin kan nghahhlelh em em leh ngaih pawimawh ber a ni hial awm e; mi neinung leh harsa zawkte tan pawh mahni theih ang anga tisa lamah pawh kan inpuahchah nasat ber \hin hun leh chhungkaw kim ngeia he hun pawimawh tak hi hman kan duh thin a ni. Pathianin min hmangaihna avanga a fapa mal neihchhun Lal Isua Krista chu kan sual tlan nan rawn tirin hnuaihnung takah lei hmun tlawm ber chu rawn thlangin ranthlengah a lo piang hi, chatuana nunna kan lo neih theihna tur atan a ni. I sualna, natna leh harsat lungngaihna zawng zawngte phurhsak tur chein Mawhphur ngam Hmangaihna nen a ni khawvel tan a lo kal ni. Eng angin nge i lo hmuah ve dawn?

Lal Isua Krista lo pian dawn khan hmun a chang lo tih kan hriat \heuh kha. Heti hian ka ngaihtuah \hin- khatih lai khan Bethlehem bawng in chu a ngai tein a awm reng a, mihring tan han thlenna tlak a nih loh avangin khualbuk vengtuin a lo hnar mai zawk a ni a, mikhual tur khan a ropuina nena a rawn luah thianghlim theihzia a hre rih lo a ni, a thleng tur kha chu a inpeihsa reng a, hmun thianghlim zawk a chan si loh avangin bawng in, mihring tan thlenna tlak loh, a chung, a bang leh chhuat te pawh a tlabal tawh hle a ni ngei ang, han bihchian phei chuan a chhunga ranchaw pekna thleng a lo let bal a, chutah chuan ran ek leh zun, thosi, \awp chi tin rengte nen a rimchhiain a zawn an thlen pawhin mite'n tlan chungin an pel fo \hin a ni mai thei. Chutiang khawpa lo thianghlim lo \hin, tenawm leh rimchhiaah midangte tan pawha hmuh tlak loh leh chenna tlak lohah chuan lei leh van lalber, khawvel sual tlantu tur chu a lo piang ta tlat si!

A chung zawnah pawh arsi lo ding ta hialin van angel zaipawl te'n zaiin Remna thuchah an rawn puang ta a ni. Hmun \awp ber kha Lal Isua thlenna atana khualbuk vengtuin a lo pek chuan Lal Isuan rawn thianfaiin hmun thianghlim ber a lo chang ta. A chhungah Lal Isua a awm tlat tawh avangin, miropui khawchhak mifingte pawhin an neih rohlu ber berte nen \hing\hiin Lal Isua chibai an bukna hmun alo chang ta. Haleluiah! Lalpa chu fakin awm rawh se!

Hetiang hian a ni, nang leh kei misual midangte tana kan nun hmuhsitawm leh kan ngaihtuahna te pawh \ha lo tak \hin hi Pathian chuan min hrechiang em a, ranchaw pekna thleng ai maha thianghlim lo \hin kan thinlung leh kan taksa pawh bawng in aia \awp mek reng a ni chung pawh hian Lal Isua hi tunah hian a thleng nghal duh a ni. Misual kan nih avang taka lo kal a ni si a, drug addict i ni emaw, zu ngawlvei, tualthat, rukru, mite chunga rilru thianghlimlo tak pu \hin, harsatna chi hrang hrang avanga sualin i thinlung leh taksa a hliam mek, lungngaia beidawng kal ngaihna hre lova mittui nen i awm lai mek pawh khan Isuan a hmangaih reng che.

Mite hriatpui loh phurrit tak nei reng chung i ni emaw, mahni tan pawha \ha lo natna lo insenglut tawh emaw pawh i lo ni mai thei. I nun a beidawng \hinin i lungngai fo \hin maw? Harsatna i tawh mekte leh i lo tawh zawng zawngte hian hmalam beiseiseina zawng zawngte beidawnnaah a hnuklut \hin che em? Mahse, thil pakhat hi han ngaihtuah chiang leh teh, beiseina thar pe tur chein i tan Lal Isua a lo piang a ni tih hi.

“Thlamuanna ka pe a che u, khawvelin a pek angin ka pek loh che u hi...” titu kha i lungngaihna zawng zawng laka tlanchhuak tur chein a lo kal a ni. I thinlung ranchaw pekna thlengah khan tunge piang tura i duh? Sualna tinreng siamsak chea hremhmuna hnuklut tur nge i thlen tir dawn? Mawhphur ngam, Hmangaihtu Lal Isua pianna turin i thinlung kha i lo hlan mai zawk dawn? Ti mai khan a ni i hnenah lo thlen a duh ni, sawmna hnar ngai lo Lal Isua chu i hnena cheng turin lo sawm ta che, eng anga sual inbawmtir lai mek pawh ni mah la i hnenah a awm reng asin! I hnen lo chu thlenna tur dang a nei chuang lo. I thinlung ranchaw pekna thleng kha Lal Isua tan lo pe phawt mai rawh le.

Tichuan, i hnenah alo lut ang a, amahin a rawn tithianghlim zel ang che. Lal Isua ta i ni tawh ang. Lal Isua nen engkim a ropui, Pathian hmangaihna leh enkawlna chauh lo chu thil dang chakna engmah kan neih loh hi. Pathianin kan sual min tlanna tura a rawn inbuatsaihna kawng hi engmah hian a man zo lo, kan lawmthu sawi ve theihna chu kan lo pawm ve mai leh a duhzawnga kan awma kan hmangaih let ve ngei hi kan bat a ni. Kan sualna mawh zawng zawng phura a tuarnate leh thihna hneh theih lohva a thawhlehna te, chatuana nunna kan lo neih theihna, vana lallukhum kan chan ve theihna tur leh he leiah ngei pawh hian lei Eden leh Salem thar kan lo chang thei reng mai a lo ni, Haleluiah! Lalpa chu Fakin awm rawh se!

Krismas lo thleng turah hian i tan lungawina leh beisei tur engmah i nei lo a nih pawhin nangmah Hmangaih vanga mawhphur ngam Hmangaihtu Lal Isua Krista hi nang Bethlehem bawng in ang leh i thinlung ranchaw pekna thleng anga ruak, thil \ha lo hrang hrang awmnaah khan Lal Isua lo pian ve ngeina turin lo inbuatsaih zawk ngei ang che. Inbuatsaih turin chakna reng i nei lo a nih pawhin lei ranthleng leh Kraws kawng a lo zawhsakna che zawng zawng avang hian lawmthu sawi la, amah pan mai rawh.

He khawvelah hian nangmah chauhin lo piang ta ang pawh ni la Lal Isua hi nangmah chhandam tur hian Pathianin he khawvelah hian a fapa mal neihchhun hi a hmangaihna che avang hian a rawn tir tho ang. Mihring lo pian tam vang ni lovin a duh taka a siam, a hmangaih hringfa chatuana boral turte tlan nan a ni, van ropuina thlahlel thei lovin leiah tlawm taka lo piangin, a lungngaihna pawh a thlan thisen anga far khawp hiala Kraws-ah kan sual zawng zawng phura lungawi taka min tawrhsakna hi nang leh kei vang a ni. Harsatnate tawk mek chung pawh hian kan nunah Pathian-in hnehna lo chang zel zawk se, mimal, chhungkua, khawtlang leh Kohhran tinah Lal Isua lo pian \heuh theihna tur hian nasa takin thlarau lamah pawh lo inbuatsaih hi chatuana nunna kan neihna tura kan mawhphurhna a ni e.

I hnenah khan Lal Isua a thleng duh a, a nghak reng che a, a lo thlen theih ngeina turin theih tawpin lo inbuatsaih rawh. He khawvelah hian hmangaihtu reng nei ve lo leh ngaihsaktu che awm lo, rethei taka i inhriat chang ni a awm \hin maw? Rilru natna, nun beidawng tak leh lungngaih mittui tla mek chung pawh khan hmangaihna tawp chin nei lova hmangaih em em rengtu che, Lal Isua i tan a awm reng a ni. Tunah khan i hnenah a awm a, a kalsan ve ngai lo che. Nangmah zawkin i kal bosan \hin mai zawk a ni, a hnenah kir leh rawh, a hmangaih che.

Khawvelah hian hmangaihtu tam tak leh ngaihsaktu \ha tak neiin harsatna nei reng reng lo pawh lo ni ta la, Lal Isua i neih chuan si loh chuan lo pian chhan i nei lo a ni, mahse harsatna tinreng tuar reng chung pawha Lal Isua i neih tlat chuan mittui tla chung pawhin chatuana nunna i neih chu a ropui em em zawk si a, engmah hian i thleng phal tawh tur a ni lo, i taksa nungdama a la awm lai reng khan chatuana nung tur i thlarau tan zawk theihtawpa Lalpa i auh chu i mawhphurhna a ni. A kalsan ve ngai reng reng lo che, sual kawng i zawh mek chung pawh khan a nghak che. Amah chu pan mai rawh.

Krismas te hi retheih vang te'n i lo huphurh hle \hin a ni mai thei, mi neinung zawkte pawh hi Pathianin mi harsate tan a lo dah an ni \hin asin. Kan hausakna chu Lalpa a ni si a, Lal pian hun lo thleng tur hi mimal leh chhungkaw tinin kan hmuah dan tur a inang lo hle ang, a \hente chuan thihna hlim kawrruam zawh mek chungin, mi tam tak te tan kim ve ta lo chatuan ram pan tate ngaihzualtirna hun leh lunglen mittui titlatu, \henkhatin hlim taka hmang tura ruahmanna chi hrang hrang nen an inbuatsaih lai hian sualin a hliam vanga lungngaihna tuar rum mek nun khawhar ngawih ngawih mal tak nia inhria te, a \hen tan rualawt tak, damchhung khawsak ngaihtuah buai phah nan te. Tisa lama kan lo inpuahchahna leh lo huphurhna zawng zawngte hi chu eng pawh lo ni se, Krismas hmang tura kan inpuahchahna \heuhah hian Lal Isua hi kan telh ve em? Kan thinlungah hian a takin lo piang thei se a va han lawmawm dawn em! Kan lungngai a ni emaw kan hlim tlang a ni emaw kan nunah Lal Isua lo lal \heuh rawh se.

Thingtlang lama kan unaute pawh, mautam \am tla sawi tur a awm tawh lovin a hun a herliam ta a, harsatna em em awm lova Pathianin tun hun min hruai thleng leh ta mai te, mautam \am sawi tur awm tawh miah lova Krismas kan han hmuak leh hmang thei tur te hi lawmna chang hriain rilru dam tak nen Lal Isua thleng ngei turin theihtawpin lo inpuahchah tawh zawk ila. Zoram mipuite hi mautam kan hmuh tawh aia nasa mah hian hmuh theih loh piah lamah hian kan thlarau nun hi a lo tam nasa zawk fe ang tih a va'n hlauhawm em! Mautam a lo thlen meuh kha chuan mangang takin kan tisa chaw tur atan eitur neih loh hlau reng reng khan mimal, khawtlang, sorkar, tlawmngai pawl leh Kohhran te'n hma an lak meuh kha chuan lungrual taka kan thawhhonate Pathianin mal a sawmin a lo hlawhtling ta em em ang khan kan thlarau nun chhanhimna tur leh kan khawtlang nun siam\hatna tur hian Zoram mipuite'n theihtawpin \an i han la thar leh \heuh teh ang u. Dam chhunga kan hriatreng tlak, midangte tan thil \ha tih nan leh mahni \heuhah kan thlarau nun, la inpeih lote tan pawh kan inpeihna hun atan hmang thei ngei ila 'Krismas tak' a lo ni ngei ang.

Ei leh in, thuam thar inbel hian hlimna leh lawmna tluantling a thlen zo lo a, Krismas kawr mawi dik tak chu kan thinlungah Remna Lal Isua Krista thlentir hi a ni. Chhiartu zawng zawng te, in thinlung ranchaw pekna thlengah khan Lal Isua ngei thleng turin duhsakna hlan chungin Krismas Chibai ka buk a che u.

“ Pathianin khawvel a hmangaih em em a, chutichuan a fapa mal neihchhun a pe a, Amah chu tupawh a ring apiang an boral loha chatuana nunna an neih zawk nan.” (Johana 3:16)

KUTPUI HUN

¢ HC Vanlalruata

Kan naupan lai atang tawh khan Krismas leh Kumthar hun lai hi chuan naupang deuh pawh zu in tan tum tlat pawl kan awm a. Tlangval zingah phei chuan zu in ngei ngei hun nia ngai an tam hle a. Chutih laiin zaikhawm/lenkhawm ngei ngei huna ngaite chu an lung a leng em em bawk a. Chutih rual chuan khuang nena Krismas hla sak duh tawklo, solfa ngata Krismas hla sak duh thalai zinga an tam avangin Krismas lenkhawmna in ni lo, in danga khurbinga thalai zai ta thuai thuai pawh an awm deuh ziah thin. Kutpui kan thlenga, mahni duhdanin kan hmang duh theuh a ni ber a. Kan naupan lai phei chuan Krismas hnu thla 9-ah nau an piang sup sup (sawn a ni ber) turah ngaihna lian tak pawh a awm thin a sin!

Tunah chuan a nih phung a dang deuh thei a, mahse, hman deuhva kan hman dan leh tuna kan hman dan, kan duhdan inmillo-te hi a la hrang lutuk lo mai thei. Sapho lokal hma chuan kan hunpui leh kut ni vangthla chu Chapchar Kut hunlai, Mim Kut leh Pawl Kut te an ni ber a. Chubakah chuan mihausa-in emaw lal-in emaw Khuangchawi leh khawtlang huap ruai an siam kha a ni leh mai a. Vailen hnu, sap nun leh sakhua-in min chiah tak hnu atang chuan Krismas leh Kumthar hi kan kutni vang thla chu a ni ta ber a nih hi. Chuvangin kan hun pui neih chhun kalkawp chho bawk si hman danah hian kan thiam hle a tul a ni.

Ti ve khanglang i la, kan naupan leh tlema len tawh hnu pawh khan tlang thing phurh, tlang tui chawi leh mipa naupang tan phei chuan hnah lak kha kumpui lingleta kan nghah hlelh, Krismas leh kumthar tinuama ti nghahhlelhawmtu a ni ve a. ‘Little Drummer Boy’ tih hla an phuah tih hre chuang lova khuang tlir kan chin laia kan han carol-a in pakhata thingfak pahnih/khat kan hlawh pawhin nuam ve tak a ni. Tunah chuan hetiang thil hi a awm ta meuh lova, Aizawl khawpui-ah phei chuan ruai hi kan theh tawk a ni tawh zawk.

Chutiang chu kan dinhmun a nih tawh si avang hian duhdan insaikalh pui pui awmkhawm hian engtinnge indip dallo leh hlim tak, harsatna insiam tawn lovin, a saptawng takin ‘civilize’ takin he kan kutpui hi kan hman ang tih hi a hnam puma ngaihtuah chi a ni. Kan duh fir lutukna lamah hian mi tana harsatna emaw buaina emaw siam pawh nilo hlim tum a, an thiam dan anga thil ti vete kha Krismas leh Kumthar hlimlo takin kan hman tir thei a. Zu in mite, phur leh phunglung hrim hrimte pawhin mi lungleng taka Krismas hla nena hun hmang duhte tan bengchheng kan siam thei bawk.

Sawi tak ang khan kan hun kal zelah hian kan thalai leh naupangte hi an chep a ni ngawt lova, khawvel inher danglamah tihtur, taksa ‘activity’ awm tam tak thin kha a awm ta meuh lova. Mizote lah hi mahni fate leh naupang zawkte ‘chumi chu ti rawh’ tih tur nei si lova, ‘ti suh’ ti ringawta kaihruai hnam, khap ngah hnam kan ni a. Chu chuan kan thangthar tha za leh ngaihtuahna chak tak takte hi bawm tawta khung ang deuhvah a inchantir thei a ni. Kan eizawnna kawng a lo danglam tak avangin khawtlang huau huau pawh a tlem a, nula-tlangval tan hlimhlawpna leh inhmuhkhawm ang kha a awm ta hek lo.

Hetiang hi a nih avang hian zalenna inrahbeh sak lutuk lo. Buaina siam leh midangte tana harsatna siamtute chu dan hmanga hrem hmak hmak chung si hian kal ta i la. Mi nuam tih dan leh nuam chen an tum dante kha dan bawhchhiatna leh midang harsatna siam zawng a nih loh chuan dawh theihna nen thlir ta i la. Kan hun pui hi a hlimawm zawk ang. Kan tam zawk tih vanga Urlawk zana mi kawngkal tha mai mai leia tiang vaw chunga an kalna lo zawh ngawtte hi chu ching tawhlo teh ang u.

Hetiang hun pui-ah chuan tapchhakah emaw leikapui-ah emaw lo zai ring deuh pawh inhre thiam i la, keini pawhin aurinna nen hunpui lovah pawh Biak In atangin kan au khuma ring tak tak thlengin mi mu duh tawhte kan au khum a, pawnah te kan pathian biak a beng a chhet ta maw tih tur khawpa ringin kan tawngtai ve thin kha tih ngaihtuah let i la. Mi fel ber nih chuha midang hmuh sual lutuk simin hlim taka Krismas leh kum thar lo thleng tur kan hman theihna’n thliarkar rilru paihin rilru zau leh mi hriatthiamna, dawhtheihna nen i lo hmuak teh ang u.

Vankhama’n ‘Kan ei kan in Krismas se’ a lo tih kha hre rengin Krismas leh Kumthar hlim taka hmang turin duhsakna ka hlan a che u.

Hlawh Thar Pawm Lo MCS Rual

Mizoram Civil Service Association chuan Fitment Committee rawtna Mizoram sorkarin a pawm tak chu an pawm loh thu an sawi.

MCS te chuan hlawh pung an beisei laiin an chawi zawk hial dawn nia sawiin, chu chu tha an tih loh thu leh an member-te chu hlawh thar pawm rih lo turin an inhriattir tih an sawi a ni.

6th Central Pay Commission rawtna zulzuia Mizoram sorkar hnathawkte'n hlawh an lak ve theihna turin Mizoram sorkar Council of Ministers chuan 2.12.2009-ah thutlukna a lo siam fel tawh. 6th Pay Revision atan hian Fitment Committee Report anga hman tura thutlukna siam a ni.

Fitment Committee-in an report sorkar-a a thehluh hnu-ah Mizoram Civil Service Association (MCSA) chuan he report hi tha an tih loh thu leh pawm tlak a nih lohna sorkar hotute hnenah a thlen thin niin MCSA hruaitute chuan an sawi.

MCSA hruaitute hian December ni 15-ah thuthar lakhawmtute kawmin, an thu thlente chuan ngai pawimawh hlawh lovin Mizoram sorkar chuan Fitment Committee recommendation te hi a ngai ngaiin hman turin a pawm ta a ni, an ti.

MCSA-in 6th Pay Revision atana Fitment Committee rawtna an pawm theih loh chhan an sawi nual. Fitment hrim hrim hian pawm lo phawt tih an sawi a, Fitment Committee hna pui ber tur chu 6th Pay Revision atana sorkar hnathawkte thut luhna tur ruahman (fitment) a ni a, amaherawhchu Fitment Committee hian fitment tak aiin anomaly siamremna lam a buai pui nasa zawk a, Pay Anomaly Committee tih mai zawk awm a ni, an ti hial.

Sorkar hnathawk te hlawh chu 3rd Pay Revision, 1973 (kum 36 liam ta) ah chhut letin an kalpui ta a. Organised Service, MCS, MF&AS, MFS, MPS etc. te chu UT laia an hlawh ang kha an phu tawk angah Fitment Committee hian a ngai ta a ni. Mizoram Sorkar hnathawk te chu step 1/2/3 tea pawh hniam an ni ta a ni. MCS Officer te pawh step 1/2 a pawhhniam vek an ni a. MCS Junior Grade (BDO/Asst. Director etc.) te leh Senior Grade (Deputy Director/Under Secretary/SDO (C)) te chu Central 6' Pay Revision-a Group 'B' ah an awm dawn ta a ni, tiin chanchinthar lakhawm tute an hrilh a.

Mizoram sorkar hnathawk thenkhat, central hnuaia thawkte nena tehkhin pawha lo sang zawkte an lo awm a nih chuan siamrem hret chu a tul mai thei a, chutianga ti lova sorkar hnathawk zawng zawng mai a hnuk hniam leh state dangte nena tehkhin pawha pay scale/band hniam lutuk mai min siamsak hi chu Fitment Committee hian Mizoram sorkar hnathawkte hi a tham lo lutuk deuhah MCSA chuan a ngai a ni, tiin an sawi.

Pay Fixation chungchang pawh tha an tih loh thu sawiin, Pay Revision reng rengah te, pay change-ah te reng reng sorkar hnathawkte hian an hlawh lak lai mek atangin an luhna tur pay scale/pay band ah an chhut lut thin a. Hei hi fundamental principles of pay fixation anga ngaih a ni. Chutiang bawkin mi thenkhat, pay scale sang zawk atanga a hniam zawka an tlak thlak dawnin hetiang principle hi hman a ni. Chuvangin, MCS/MPS/MFS te pawh state service-a senior tak, pay scale sang zawk leh hlawh sang tak an lo lak tawh atanga lAS/IPS/IFS-a pay scale hniam zawka an luh dawnin chu principle hmang chuan pay fixation tih sak thin a ni. Chu chauh ni lovin hremna avanga pay scale sang zawk atanga a hniam zawka an tlak pawhin an hlawh lak mek (last pay drawn hi chhawm tir an ni. Chutiang chu MCSA hruaitute sawi dan a ni.

“Fitment Committee erawh hi chuan he principle hi zawm lovin sorkar hnathawk te'n 01.01.2006 chiaha an hlawh lak atanga pay fixation tih a remti lo a. Chumi aia hniam daih zawk 'Notional Pay' siam chawpin chumi atanga pay fixation tih turin a rawt chhuak a. Hemi a nih chuan sorkar hnathawkte hian pay fixation avangin basic pay an hloh nasa hle dawn a. Fitment Committee hian fundamental principles of pay fixation kalhin pay fixation ti turin rawtna a siam a ni. Fitment Committee hian 01.01.2006 atanga arrear pek tur angin recommend mahse, a takah chuan arrear neih chu sawi loh, chawi zawk an awm nual thei dawn a ni. He thil hi hrechiangin leh hlawkna tih tham a awm dawn lo a ni tih hria in Fitment Committee hian arrear pek turin a recommend ta ni zawkin a lang. MCS Junior Grade Officer thenkhat chuan 6th Pay Revision hman veleh cheng sangthum chuang thlatin an chawi dawn,” an ti.

Fitment Committee thil kalpui dan dik lo chu a dik lo hrim hrim nia sawiin, “Pay Revision chungchangah sorkar hnathawkte sawipuina neih a ni lo hi a dik lo,” an ti.

“MCSA chuan Mizoram sorkar-in Fitment Committee a din lai khan an report te hman tak tak tuma din a ni lo tih hi kan hmuh dan a ni a. Khatih laia sorkar hnathawkte hlawh chungchanga buai neuh neuh thelhna atan sorkar-in a din niin a lang. Amaherawhchu, Fitment Committee hian Pay Commission puitling ang maiin pay structure awm dan te leh a kaihhnawih thil chi tin mai a en telin Mizoram sorkar hnathawkte pay structure zawng zawngte a khawih danglam a. Hetiang taka sorkar hnathawkte pay structure pum pui mai tidanglam tur ni siin Fitment Committee hian sorkar hnathawk aiawhte tumah sawipuina a nei hauh lo a ni,” an ti bawk.

“Hetianga a khawih turte (stakeholders) rawn hauh lova an ngaihdan anga thil an kalpui tawp mai hi India democracy leh good governance kalphung nen chuan a inpersan hle a; principles of natural justice in 'lehlam thu ngaithla ve phawt rawh (hear the other party) ' a tih te hi a kalh nasa hle a ni,” an ti nghe nghe.

MCSA hruaitute chuan pay structure tehna atan UT hun lai hman chu a dik tawk lo an ti. Fitment Committee-in a tehkhawng atana a hman hi Mizoram UT nih lai 3rd Pay Revision (1973) daih kha a ni a, UT nih lai leh a hnu lama administrative structure danglam dan khaikhin leh en tel lova hetianga rawtna an siam mai hi MCSA chuan dik a ti lo, an ti.

India rama UT Civil Service te reng reng chu Group 'B'-ah an tan vek a, state puitlinga State Civil Service te erawh chu Central Service Group 'A' level-ah an tan deuh vek thung a ni, an ti.

MCS te pawh hi Mizoram state puitling a lo nih ve leha Mizoram Civil Service Rules, 1988 angin Junior Grade te chu Group 'A'-ah dah nghal an ni. Tin, hemi hnua direct recruitment-a lak te reng reng pawh Group 'A' level ah lak vek an ni. Chuvangin, Fitment Committee-in UT laia pay atanga ten khawng a duang chhuak hi a dik kan ti lo a ni, an ti.

“Tin, khatih laia post la awm reng reng lo te an pay scale te phuahchawpa an siam vak mai hi MCSA chuan thil dikah a ngai lo a ni. Pay structure tehna atan chuan state puitling kan nih hnua MCS Rules siamthar a lo nih chiah dinhmun hi teh dan tur dik berah kan ngai a ni,” an ti bawk.

Fitment Committee-in 1st Janurary, 2006 anga pay scale a tarlang lo hi a dik lo, an ti bawk.

Fitment Committee hian 1st January, 2006 dinhmuna sorkar hnathawkte hlawh thar (6th Pay Revision) tur ruahman si hian an report khawiah mah hian 01.01.2006 dinhmuna Mizoram sorkar hnathawk te hlawh a tarlang lo, an ti.

“Hei hi thil mak tawp khawk a ni. Mizoram sorkar-ah Group 'A' Officer te'n Engineering Officer te nena parity neih an dilna chu sorkar-in a remtih pui avangin temporary arrangement angin Group 'A' officer bakah a hniam lamte pawh an pay scale tihsan hret hret an ni a. Mahse hei hi Next Pay Revision ah chhawm luh tur a ni lo tih pawh sorkar-in a tichiang nghal sa a, sorkar hnathawk te pawhin an beisei lo. Hemi avanga pay scale sang hret an lo hman chu chang chawiin Fitment Committee hian Mizoram sorkar hnathawkte hlawh sang hle anga tarlangin leh a leiko thei ang bera tarlangin pay scale tihhniam hle a ngaih thu a uar ta vak mai a ni,” tiin hemi chungchang hi an sawi zawm.

“1st January, 2006 dinhmun atangin Mizoram sorkar hnathawkte hlawh hi tarlang sela chuan pay scale sang zawk kan hman anga an tarlan hi pheh thlak a ni dawn a ni. Fitment Committee thil kalpui dan hi sorkar hotute hruai sual tum hrim hrimah kan ngai a ni,” an ti hial.

Organised Service chungchang kalpui dan pawh a dik lo niin an sawi. Fitment Committee hian Organised Service chung chang a rawn chawivawngin pay structure siamna atana tanfung berah a rawn hmang hi MCSA chuan a dik a ti lo a, nakin zelah nghawng pawi thui tak nei thei a ni dawn a ni, an ti.

Sorkar hnathawk Service Rules khawiah mah hian 'Organised Service' tih hi a ziakin emaw, hrilhfiah a ni lo, an ti bawk.

Department leh Organisation hrang hranga kal thinte sawi hranna atana Organised Service tih hi hman satliah mai thin a ni. Chuti chung chuan Fitment Committee hian Officer thenkhat anmahni puala 'Service Rules' nei apiang chu Organised Service anga ngaiin Organised Service te common structure a din chhuak ta a. Chuvang chuan Departmental Officer thenkhat te chu Service Rules hrang nei an lo nih vang maiin dinhmun tha bikah a hlang chho ta a, an ti.

“Horticulture leh AH&Vety te chu Service Rules an neih avangin department dang aia dah sangin an director, joint director, deputy director leh asstistant director te chu department danga director, joint director, deputy director leh assistant director te aiin step khatin an sang bik a ni. Agriculture department pawh hi Service Rules an neih hun hunah hetiang ang dinhmun hi an nei ve ang tiin report-ah hian a dah bawk a. MCS Officer te director, joint director, deputy director leh assistant director te aiin khing department-a officer te khi an sang bik dawn a ni. Chu bakah he thil hian department tha bik a siamchhuak dawn a. Department tin hian Organised Service nih ve duhin Service Rules neih tumin hma an la chum chum tawh dawn a ni. Chu'ng department-te chuan Service Rules an neih veleh Horticulture/AH&Vety/Agriculture te ang dinhmun chu an phut ve theuh dawn ang a, principle thuhmun theuh si chu sorkar tan dan theih a ni dawn lo a ni. He thil hi pawm a nih hmain ngun taka ngaihtuah lawk ngai chi a ni a, mahse a nghawngchhuah tur hi Fitment Committee member te hian sorkar thuneitute an hrilhchiang lo niin a lang,” an ti.

“ He an thil ruahman anga Director/Joint Director/Deputy Director/Asst. Director theuh theuh hlawh sang hlei zung siam hian anmahni Fitment Committee-in an 'Report Para 4.7 a pay structure atana pawimawh chu job-content leh responsibility attached to the post etc.' te a ni tia an tarlan ngei hi an bawh chhia a ni,” an ti bawk.

Sorkar hnathawkte zingah 6th pay hman vanga pawisa chawi tur an awm zawk dawn niin an sawi.

“Fitment Committee-in 6th Pay Revision atana a ruahmanna hi a hniam em avangin sorkar hnathawk mi engemaw zat chuan 6th Pay Revision hman a nih atangin an chawi char char dawn a. Arrear-a an chawi dawn bakah thla tina an hlawh chu a tlem zawk char char dawn a ni. Heng an chawi tur tling khawmte chinfel dan tur tarlan a nih loh avangin an rulh a ngai ngei dawn niin a lang a. Chu bakah ACP avanga hlawh sang lo la-te phei chuan an chawi nasa hle dawn a. Heta an lo lak chuanna hi ACP thar atanga siamrem (adjust) a, a bak chu hlawh atanga rulh tur a tih a ni. Hetiang a nih chuan sorkar hnathawk thenkhatte chuan sorkarin a remtih ang ngeia hlawh an lo lak tawh te avangin an chawiin an rulh leh char char a ngai dawn a ni. Hei hi sorkar kal dan tur niin a lang lo a, MCSA chuan tha a ti lo a ni,” an ti.

Hei mai bakah 6th Pay Revision-ah hlawkna tih tham a awm dawn lo niin an sawi bawk.

Pay Revision dangah kan hlawk nasat leh nasat loh dan chhuta buai thin Mizoram sorkar hnathawkte chuan tunah chuan an chawi dawn leh chawi dawn loh an buaipui ber a ni ta zawk dawn niin an sawi bawk. Central leh state danga sorkar hnathawk te'n an hlawk pui laiin Mizoram sorkar hnathawk zingah erawh chawi, ngaiawh leh tlem te hlawk pui an tam hle dawn niin an sawi. Kum 10 dana Pay Revision ve lema hetiang lutuka kalpui hi MCSA chuan tha a ti lo, an ti.

6th Pay Revision-a hlawkna anga lang hi DA pung inpek loh vang mai mai a ni an ti bawk.

Sorkar hnathawk te'n an hlawkna ni ve awma lang hi Pay Revision vanga hlawkna tak tak ni lo, Mizoram sorkar-in a hnathawkte Dearness Allowance (DA) pung vawi 3 lai a pek loh (hren sak) vang a ni zawk, an ti.

01.01.2008 ah DA 47% a nih hnu baka DA pung a la pe leh miah lo a, hemi hnuah hian DA pun dan chu- 01.07.2008-7%, 01.01.2009-10% leh 01.07.2009-9% niin a pumpuiin 26% laiin a inthlau a ni, an ti. He'ng DA te hi pek zelin 01.07.2009 ah 73% ang hi lo la se chu Mizoram sorkar hnathawk zingah Pay Revision avanga hlawkna nei mang an awmin a rinawm loh a ni, an ti bawk.

Sorkar hnathawk hrang hrangte an lungawi lo niin an sawi bawk a, pay band system hman tur a nih tawh vangin an la hrethiam lo mai mai zawk niin an sawi a ni.

“Fitment Committee Report anga 6th Pay Revision neih tur tih hriat a nih hian sorkar hnathawk pawl hrang hrang, he Committee-in step 1/2/3 tea a pawh hniamte chu an lungawi lo hle tih hriat a ni a. 6th Pay Revision kalphung hi sorkar hnathawkte la hriat than loh Pay Band System a nih avangin sorkar hnathawk tam takin an la chhut thiam loh avangin leh pay revision reng rengah chuan hlawk ve tura inngaihna an nei ve tawp ni maiin a lang a, hlawkna nei mang lo an tam hle dawn tih hi an la hre chiang lo zawk a ni,” an ti.

MCSA chuan, “Sixth Pay Revision atana MCS te tana ruahmanna hi pawm theih chiah kan ngai lo,” an ti a, “Sorkar-in a siam that phawt kan phut a ni,” an ti bawk.

“Chutiang a nih loha Fitment Committee rawtna ang ang hi hmang tur kan nih chuan 5th Pay Revision anga kal rih a, Fitment Committee thil tih dik loh te tihdik a nih theih dan tur zawngin MCSA chu a kal zel dawn a ni,” an ti bawk.

Sorkar hnathawk dangte chuan an la hrethiam tawk lo nia sawiin, “Lungawi tur leh tur loh an la hrethiam lo,” an ti.

Fitment Committee thu tihtluk dan leh kalpui dan hrim hrim chu hleih nei rilru hle nia an hriat thu sawi bawkin, chief minister press conference-a finance commissioner C Lalsawta’n MCS te IAS te aia hlawh sang zawk la anga a sawi phei chu an lak nat thu an sawi a, hei hi thu belhchian dawl lo niin an sawi bawk.

Zofate hmai tibaltute'n ngaihdam dil

Asian Centre for Human Rights (ACHR) te hian Mizoram chu hnam tenaute tiduhdah thinah an puh fo a, Mizoram hmai tibal zawngin tum engemaw zat thu an lo thehdarh tawh. November ni 13-a Zarzokima thihna chungchangah pawh Mizoram an dem leh hle a, Mizoram mipui bakah Mizoram sorkar meuh pawh hnem tenaute laka rawng taka che-ah an puh. Chu'ng thu chu sap tawng chanchinbu hrang hrangah pawh a lang chuai chuai a nih kha. Mahse, Mizoramah an rawn zin a, an thil tihdik lohvah ngaihdam an dil.

December ni 14-ah ACHR Fact Finding Team te chuan Mizoram chief minister an kawm a, ACHR director Suhas Chakma chuan Tuikuk chungchanga thil chiang tawk lo thuchhuah an lo siam avangin chief minister hnenah hian ngaihdam a dil a ni. Mizoram sorkarin Tuikuk-te a venhim dan leh a enkawl zui dan pawh tha tawka an hriat thu a hrilh.

Zarzokima thih hnu-a Tuikuk chungchang buainaa sawia home minister R Lalzirliana'n thuthar lakhawmtute a kawm tumin ACHR te'n a hmun ngei thil awmzia rawn hmu se a duh thu a sawi a, ACHR lam chuan chu chu chhangin Mizoram an rawn tlawh ta a ni.

ACHR director Suhas Chakma chuan phungbawmah mi pali a sawm a, Nava Thakuria (Guwahati chanchinbumi), Mongol Bebaarma (advocate) leh Bamang Tago (Arunachal Citizen's Rights chairman) te an ni. December ni 11-ah khan CYMA, MZP leh Zoram Research Foundation hruaitute an kawm a, a tukah khawthlang lamah chhukin, Mamit leh Damdiai te tlawhin Tuikuk-ho an kawm a, a tuk Pathianni-ah Tumpanglui leh New Eden-te an tlawh bawk. Thawhtanni, December ni 14-ah chief minister an kawm a, chumi hnu-ah Mizoram an chhuahsan a ni.

MZP hruaitute nena an inkawm tum hian MZP hruaitute chuan ACHR-in Tuikuk chungchanga thu an lo thehdarh tawh, dik lo an tihte sawiin, tan lam nei rana ngaihdan siam thin leh Tuikuk sawi dan chauh la-a Mizote be ve ngai lo tiin an sawi a, ACHR director hian MZP te thusawi hi a hnial lo. Siamthat ngai siamthat a inhuam thu a sawi a, Mizo biakpawh tur an hre lo thin ni te'n a sawi bawk.

MZP hruaitute hian Mizoram chhuahsantute chu tlanchhia an ni lo tih sawiin, Mizoramah autonomous district council an ngiat avangin Bru National Union thupekin an chhuak tih an sawi a, 'tlanchhia' tih tawngkam hmang tawh lo turin ACHR chu an ngen a, tlanchhe zat pawh a uar thei ang berin an sawi thin tiin an hrilh bawk.

Mizorama cheng thin Tuikuk-te lo let chu Mizoram mipuiin an remti reng tih an sawi a, mahse, 'bonafide citizen' tih tawngkam hman an duh loh thu leh 'Mizorama cheng thin' ti-a sawi chauh an duh thu sawiin, 'their original places' tih tawngkam pawh a dik lo tih hrilhin '1998-a Mizoram an chhuahsan hmaa an chenna' tia sawi tur a nih thu an sawi bawk.

Tripura-a refugee camp-a khawsa Tuikuk mipuite'n Mizorama let an duh a nih pawhin an hruaitu thenkhatin an duh lo tiin MZP hruaitute chuan an sawi a, an rawn let theihna tura ruahmanna siam a nihin harsatna an siam zel tia sawiin, Mizoram chuan Mizorama cheng thinte chu rawn let turin an welcome reng tiin an sawi bawk.

MZP te hian Tuikuk-in Mizo an puh hmingchhiatna hrang hrang sawiin, National Human Rights Commission thlenga dawt an sawi thu Fact Finding Team te hi an hrilh a, Mizo an puhna hrang hrang leh dawt a nihzia te a finfiahna nen an hlan a ni. 1997-a Mizoram an chhuahsan pawh an duh thu ngeia ti an nihzia finfiahna 'document' an pe bawk.

Zoram Research Foundation (ZORF) hruaitute chuan ACHR te chu Tuikuk chungchangah thu dik leh rintlak ziak thin turin an hrilh.

Mizote leh Tuikukte inkara harsatna awm thin chu khawvel hmun danga buaina leh harsatna thleng mekte nena khaikhin chuan a la ziawm viau zawk a, chuvangin, buaina a punlun zel lohna turin ZORF chuan hemi chungchangah hian fimkhur tak leh rinawm taka thu ziak thin turin ACHR te chu an hrilh a ni.

Human Right Group an nih angin thudik ziktluak leh thuchiang an hriat hmaa an ngaihdan puangzar mai mai lo tur leh awn lam neia thuchhuah lo turin an ngen bawk. An website-a thuziak thenkhat chu siamtha turin ACHR te hi an hrilh nghe nghe.

CYMA hruaitute pawhin ACHR chu Tuikuk-ho hnen atang chauhva thu la lova kil hrang hrang atanga thu la tawh turin an hrilh a, Zarzokima thihna chungchanga YMA hmalakna te an hrilhfiah bawk.

Chief minister an kawm tum hian chief minister Lal Thanhawla chuan Tuikuk-in Mizote kut an thlak pawhin Mizote chuan engtinmah an tih let ve thin loh thute a lo hrilh.

Chief minister hian Tripura Sakhan tlangdunga Mizote chuan Tuikuk-ho vangin an ram an chan tih sawiin, Mizote'n nasa taka Tuikuk laka an tawrh thu a sawi a; tun hnaia buaina avang pawhin Tripura-a Mizo thenkhatin vau an tawh thu te sawiin, a hman hmasak berah an thlavang hauh tura Zampui tlangdunga kal a tum thu Fact Finding Team te hi a hrilh a ni.

ACHR lam hian Mizoram sorkar chunga lawmthu sawiin, inhawng tak leh engmah thup nei lova an hmuh duh ang ang hmuh tira an kal duhna hmunte tlawh tir an ni chu lawmawm an tih thu an sawi. Tuikuk nunau leh pawisawilo-te tawrhna ti zangkhai tur zawnga sorkar-in chhawmdawlna, tanpuina leh humhimna a pek te pawh tha tawka an ngaih thu te an sawi bawk.

Tuikuk Inkhawmpui

December ni 6 a ni a, Bungthuama thil thleng chuan nghawng lian tak a nei chho zel a, hemi ni ngei pawh hian khami tuma thil thleng nena hmehbel theih takin Assam leh Mizoram inrina Hailakandi district chhungah chuan Tuikukte chuan khawmpui an nei a nih kha.

He khawmpui hi a tum khatna a ni. Assam, Tripura leh Mizoram atangin khawmpui palai an pungkhawm a, an hliapzar khuha leng lo mipui an pungkhawm a ni. Venhimna tha tak hnuaiah an pungkhawm a, tualchhuak hnam, a ram leilung luahtute-ah an inchhal a, an chanvo, 'indigenous rights' an chan theih dan tur an sawi a ni.

Tuikuk zirlaite huaihawt he khawmpuiah hian zirlai chauh ni lo, nu leh pa thahnem tawk tak hmuh tur an awm a, tribal hnam dangte pawhin an tawiawm nghe nghe.

"Mizoram chungchang kan sawi dawn lo, lo lungngai suh u," tiin hemi hmuna an hruaitu hmeichhe pakhat chuan he hmuna kal Mizoram chanchinbumi thenkhat hnenah a sawi a, amaherawhchu, helai hmuna mi thenkhatte chuan Mizoram issue an sawi ngei an ring a, Mizorama thil thleng vangin inkhawmpui pawh hi nei ni-ah an ngai nghe nghe.

Indigenous rights chungchang hi United Nations lamin tun hnaia thu leh hla an neihna a ni a, hemi dikna chanvo hnuaiah hian ram luahtu hmasate chu humhalh theih an ni a, ram neitu nihna mai piah lamah mahnia inrorel hranna (self determination) thlengin nei thei tura ngaih an ni.

Hailakandi bial, Mizoram depa Tuikuk khawmpui pawh hian he rights hi an sawi a, indigenous rights hian ram bung khat chauh ni lo, ram hrang hranga cheng hnam khatte tana intawhkhawmna siamte pawh an huam a, Assam, Tripura leh Mizorama Tuikuk awmte pawhin he dikna chanvo hi an sawi ta a ni.

Tuikuk-te hian he dikna chanvo hi a hmain an sawi ngai lo. Mizoramah pawh ZORO-te chuan indigenous rights hi an sawi thin a, an buaipui hle. Mizoram leilung hausakna lakchhuah kawngah pawh a ram leilung fate phalna leh lungawina tel lo chuan he dan behchhan hian lakchhuah theih a ni lo tihte sawiin oil laihchhuah kawngah pawh thutlukna mumal tak an nei. He dikna chanvo hi ram leilung luah hmasatute tan hian behchhan tha tak a ni a, Tuikukte pawh hian he dan hi an behchhan dawn nite pawhin a lang.

Kan khuallian zahawm tak...

Mizoram sorkara thi beh chinte chu nikum December ni 11 atanga kumin December ni 11 thlengin khuallian leh khualzahawm-ah vawi 348 an tang.

PRISM chuan kum khat chhunga ram hruaitute thil tih hrang hrang sorkar (DIPR) thuchhuah hmangin an chhut a, chuta a lan dan chuan larsap, chief minister, speaker leh deputy speaker, cabinet minister-te, minister of state-te leh parliamentary secretary-te hi khuallian/khualzahawm-ahvawi 348 an tang a ni.

December ni 11, 2008 leh December ni 11, 2009 chhungin chief minister Lal Thanhawla chu khuallian/khualzahawm-ah vawi 64 a tang a, ani hi khuallian/khualzahawm-a tang ngun ber a ni.

PRISM te chhut dan chuan, chief minister hi Mizoram sorkar official-te vawi 4 a kawm a, NGO leh mimal vawi 7 kawmin, project lungphum phum/tlawh vawi 4 a nei. A bial vawi 4 a fang a, vawi 6 midang chaw eipuiin, lehkhabu vawi 1 a tlangzarh a, concert-ah vawi 1 a tel.

Minister zingah PC Zoram Sangliana chu khuallian/khualzahawm-ah hian tang hnem berin, vawi 32 a tang.


Larsap MM Lakhera chu vawi 28 khuallian-ah a tang a, NGO leh mimal vawi 5 kawmin, zin tur vawi 3 a vailiam a, naupang huikhawmnaah vawi 1 telin, concert leh zai intihsiakna lamah vawi 3 a tel a, film vawi khat a tlangzarh bawk.

Speaker JH Rothuama chu khuallian/khualzahawm-ah vawi 7 a tang a, deputy speaker John Rotluangliana chu vawi 5 a tang. Speaker aiin deputy speaker hian thil tih a ngah zawk; speaker-in thil tih 10 a neih laiin deputy speaker chuan thil tih 14 a nei.

Parliamentary secretary zingah Lal Thanzara leh S Laldingliana te chu khuallianah vawi 12 ve ve an tang a, KS Thanga chu vawi 11 atang. Cabinet minister te'n vawi 1 theuh chief minister zin haw an hmuak a, parliamentary secretary KS Thanga chuan vawi 4 a hmuak.

Minister-te leh parliamentary secretary-te zingah Lalrinliana Sailo chauh "Sorkar thila ram danga zin" a awm a, vawi khat a zin. Chief minister pawh "sorkar thila ram danga zin" lo anga tarlan a ni. Chief minister leh PHE minister S Hiato te hi Singapore-ah an zin dun a, mahse, sorkar thila zin an ni lo tihna a ni thei ang.

Larsap hi khuallian/khualzahawm-ah vawi 28 a tang a, chumi paihin chief minister leh a khawnbawlte chu khuallian/khualzahawm-ah vawi 320 an tang a ni. Chutih laiin, sorkar (DIPR) thuchhuaha a lan dan chuan vawi 31 bial an fang.

SAFF Cup Champion Team-ah Mizo Tlangval 2

¢ Hmingsanga

India team-a tel, Robert Lalthlamuana chuan, "Player thlanchhuahte an tha tlang a, champion ngei kan inbeisei," tiin Zozam Weekly alo hrilh lawk tawh a, a sawi ang ngeiin India chu SAFF Championship 2009-ah champion a ni ta. Champion team te hian $ 50,000 an hlawh a ni.


South Asia-a ram hrang hrang pariatte inchuh thin SAFF Cup chu khelh zawh a ni ta a, champion ngun ber India chu a vawi nga atan champion a ni leh. India chuan final-a an khingpui, champion lai Maldives chu hun pangngai leh hun pek belhah goal awm lova an draw hnu-ah tie breaker hmangin an hneh a ni.

Tarlan tawh angin India hian he tournament-ah hian U-23 team a tir a, Mizo tlangval pahnih Robert Lalthlamuana leh Jeje Lalpekhlua te chu champion team-ah hian an tel.

He tournament-ah hian South Asia ram pariatte chu football-a chungnung ber nih tumin an inkhel a, India chu 1993, 1997, 1999, 2005-ah te khan champion ni tawhin, kuminah hian champion ni lehin champion ngun ber a ni ta a ni.

SAFF Championship 2009 hi Bangladesh khawpui Dhaka-ah khelh a ni a, India chuan U-23 team a tir. India hi Group A-ah defending champion Maldives, Nepal leh Afghanistan te nen an awmho. India hi group league vawi thum khelah vawi hnih chakin, vawi khat an chak lo a, an khingpuite lamah goal 2 thunin, an lamah goal 2 a lut a, Group A-ah point 6 hmuin pahnihna niin semi final an lut a ni.

India-in champion a nih theihna tura match nga a khelhah Robert Lalthlamuana chu a khel kim deuh thaw; semi final an lut tawh tih a chian tawh hnuah, group league-a match hnuhnung ber Maldives nen an inkhelh tumin player tha thenkhat chawlhtir an nih khan a khel lo. Kha match loh kha chu a khel vek. Jeje-a hian Afghanistan an khelh tumin a khel a, chakna goal a thun a, semi final-ah a khel leh a, a khel tha hle a, Mizo tlangval pahnihte hi commentator lam pawhin an hming an lam zing mawlh mawlh hle. An khelh that thu leh nakin lawka India senior team tan pawh a player beiseiawm an nih thu an sawi ngun hle a ni. Afghanistan nen an inkhelh tumin goal lut awm chhun hi Jeje Lalpekhlua thun a ni.

SAFF Championship 2009-a champion team-a tel Mizo tlangval pahnih Robert Lalthlamuana leh Jeje Lalpekhlua te chu Zozam Weekly chuan a kawm thei hlauh a, tiang hian zawhna an chhang:

In champion chiah khan i rilru-ah eng nge lo lang hmasa ber?
Robert: Kan inkhelh chhung zawnga min hruaitu Pathian min hruaina zawng zawngah lawmthu sawi tur ka lo ngahzia a lo lang a, Pathian hnenah lawmthu ka sawi nghal mawlh mawlh mai.
Jeje: A hmasa berah Pathian a lo lang hmasa ber a, kan tawngtaina tlawm tak leh min lo tawngtai puitute tawngtaina chhana a awm kha ka lawm lutuk a, Pathian hnenah lawmthu ka sawi nghal.

In team chakna pawimawh ber nia i hriat?
Robert: Pathian vang kei chuan ka ti lo thei lo a. Chumi dawtah chuan sawi tur tam tak a awm thei ang. Player tam zawk te hi I-League-a khel deuh vek kan ni a. Hei vang hian mahni inrintawkna pawh kan nei ve hlawm viauin ka hria a. Player te kan inkawmngeih tlang a. Tin, kan coach pawh hi player han fuih phur dan a thiam a, a game plan-ah a chiang a, chutiang tur chuan player-te chhawr dan pawh a thiam a. Kan fighting spirit kha a ropui ka ti bawk
Jeje: Players te kan inpawh tlangin, kan inkawmngeih vek a. Chu chuan team work tha a siam a. Chu chu kan chakna hnar ber niin ka hria.

In khingpui zingah khawi kha nge khelh har in tih ber?
Robert: Maldives kha khelh an har khawp mai. Champion lai an nih bakah, final-ah phei kha chuan pressure kha a awm ve deuh reuh a. An player-ho kha experience an nei tha hlawm bawk nen, khelh an har khawpin ka hria. Final phei kha chu keimah rau rauah khel chhia ka inti khawp mai a.
Jeje: Maldives kha khelh an har khawp mai, an tha ang reng bawk sia, experience an ngah tawh tih a hriat reng mai a. Khelhpui an hrehawm khawp mai. Final-a kan hneh kha kan vannei asin.

Penalty kha in pet ve kan lo ring a...
Robert: 2005-a Mizorama U - 19 National Football Championship nghah a nih khan, Jharkand hmingin kan lo khel ve a nih kha. Khami tum khan semi final-a Mizoram nen kan inkhelh khan, penalty hmangin chak zawk zawn a ngai a. Khami tum khan ka pet ve a, ka pet goal lo hlauh a, khata tang khan a tul tawpah pet tur an awm tawh lo te a nih ngawt loh chuan penalty hi pet ka tum tawh lo ve ringawt a. Pet tura min tih paw'n ka duh ngai lo.
Jeje: Penalty pet tur panga an thlan zingah kha chuan ka tel ve a, a tawp berah pet turin min dah a. Mahse ka pet ve ngai lovin kan chak ta hram a nih kha.

India ram pawna champion nih chu a danglam deuh bik em?
Robert: Danglam tehreng mai. A lawmawm dan a dang riau. A chhan chu semi final-ah a thlengtu ram senior team kan hneh phawt a. Final-ah kum hmasaa India senior team-in final-a an hneh lo kha a junior team zawkin kan hneh hlauh a. A lawmawm dan ka sawi thiam lo, kan lawm a ni tawp mai.
Jeje: A lawmawm dan hi ka sawifiah thiam mai lo a ni. Hetiang hi ka beisei phak reng reng lo a ni a, champion team zinga ka tel ve ringawt hi ka lawm ve em em a ni ringawt mai.

U-23 team atang hian India senior team-ah luh theih i inbeisei em?
Robert: Ngaihdan sawi thiam a har ang reng khawp mai. Frank takin sawi ta ila, beiseina chu ka nei ve deuh, a ruk tak chuan, tunah phei hi chuan India senior team-a lef back-ho an inhliam deuh fur a. A kohte pawh min ko ve mahna engtikah emaw chuan... Ka tel ngei ang tih chu ka sawi ngam lo a, mahse engtikah emaw chuan tel ve thei ngei turin ka tang chho zel ang chu.
Jeje: Tun maiah chuan beiseina pawh ka la nei ngam rih lo, a chhan chu kan la junior deuh bawk a, mahse engtikah emaw chuan India senior team-a tel ve theih chu ka inring khawp mai, tan han la sauh sauh ila.

India ram in lo let leh hunah hmachhawp i nei em?
Robert: Nei ve deuh nual mai. December ni 21 atang hian Federation Cup khel turin Silchar-ah kan lokal dawn a. Mizo mipui min tawiawm thei an awm chuan ka lawm ngawt ang. Min tawiawm tur pawhin ka sawm nghal bawk che u a. Tin, kum tharah lamah kan club hian AFC champions league play off kan khel ve leh dawn bawk a, a chakawm tawh khawp mai.
Jeje: Federation Cup khelh a ni rih deuh mai. Kan club Pune FC tan hian tum season-ah match hnih chiah ka la khel a, a chhan chu India U - 19 camp-ah hun rei tak ka awm a, chumi hnuah U -23 team-ah min ko leh bawk sia. Theihtawp chhuaha club tana khelh a ngai dawn a. |an a ngaih hmel khawp mai.