Tuikuk Inkhawmpui

December ni 6 a ni a, Bungthuama thil thleng chuan nghawng lian tak a nei chho zel a, hemi ni ngei pawh hian khami tuma thil thleng nena hmehbel theih takin Assam leh Mizoram inrina Hailakandi district chhungah chuan Tuikukte chuan khawmpui an nei a nih kha.

He khawmpui hi a tum khatna a ni. Assam, Tripura leh Mizoram atangin khawmpui palai an pungkhawm a, an hliapzar khuha leng lo mipui an pungkhawm a ni. Venhimna tha tak hnuaiah an pungkhawm a, tualchhuak hnam, a ram leilung luahtute-ah an inchhal a, an chanvo, 'indigenous rights' an chan theih dan tur an sawi a ni.

Tuikuk zirlaite huaihawt he khawmpuiah hian zirlai chauh ni lo, nu leh pa thahnem tawk tak hmuh tur an awm a, tribal hnam dangte pawhin an tawiawm nghe nghe.

"Mizoram chungchang kan sawi dawn lo, lo lungngai suh u," tiin hemi hmuna an hruaitu hmeichhe pakhat chuan he hmuna kal Mizoram chanchinbumi thenkhat hnenah a sawi a, amaherawhchu, helai hmuna mi thenkhatte chuan Mizoram issue an sawi ngei an ring a, Mizorama thil thleng vangin inkhawmpui pawh hi nei ni-ah an ngai nghe nghe.

Indigenous rights chungchang hi United Nations lamin tun hnaia thu leh hla an neihna a ni a, hemi dikna chanvo hnuaiah hian ram luahtu hmasate chu humhalh theih an ni a, ram neitu nihna mai piah lamah mahnia inrorel hranna (self determination) thlengin nei thei tura ngaih an ni.

Hailakandi bial, Mizoram depa Tuikuk khawmpui pawh hian he rights hi an sawi a, indigenous rights hian ram bung khat chauh ni lo, ram hrang hranga cheng hnam khatte tana intawhkhawmna siamte pawh an huam a, Assam, Tripura leh Mizorama Tuikuk awmte pawhin he dikna chanvo hi an sawi ta a ni.

Tuikuk-te hian he dikna chanvo hi a hmain an sawi ngai lo. Mizoramah pawh ZORO-te chuan indigenous rights hi an sawi thin a, an buaipui hle. Mizoram leilung hausakna lakchhuah kawngah pawh a ram leilung fate phalna leh lungawina tel lo chuan he dan behchhan hian lakchhuah theih a ni lo tihte sawiin oil laihchhuah kawngah pawh thutlukna mumal tak an nei. He dikna chanvo hi ram leilung luah hmasatute tan hian behchhan tha tak a ni a, Tuikukte pawh hian he dan hi an behchhan dawn nite pawhin a lang.