SAFF Cup Champion Team-ah Mizo Tlangval 2

¢ Hmingsanga

India team-a tel, Robert Lalthlamuana chuan, "Player thlanchhuahte an tha tlang a, champion ngei kan inbeisei," tiin Zozam Weekly alo hrilh lawk tawh a, a sawi ang ngeiin India chu SAFF Championship 2009-ah champion a ni ta. Champion team te hian $ 50,000 an hlawh a ni.


South Asia-a ram hrang hrang pariatte inchuh thin SAFF Cup chu khelh zawh a ni ta a, champion ngun ber India chu a vawi nga atan champion a ni leh. India chuan final-a an khingpui, champion lai Maldives chu hun pangngai leh hun pek belhah goal awm lova an draw hnu-ah tie breaker hmangin an hneh a ni.

Tarlan tawh angin India hian he tournament-ah hian U-23 team a tir a, Mizo tlangval pahnih Robert Lalthlamuana leh Jeje Lalpekhlua te chu champion team-ah hian an tel.

He tournament-ah hian South Asia ram pariatte chu football-a chungnung ber nih tumin an inkhel a, India chu 1993, 1997, 1999, 2005-ah te khan champion ni tawhin, kuminah hian champion ni lehin champion ngun ber a ni ta a ni.

SAFF Championship 2009 hi Bangladesh khawpui Dhaka-ah khelh a ni a, India chuan U-23 team a tir. India hi Group A-ah defending champion Maldives, Nepal leh Afghanistan te nen an awmho. India hi group league vawi thum khelah vawi hnih chakin, vawi khat an chak lo a, an khingpuite lamah goal 2 thunin, an lamah goal 2 a lut a, Group A-ah point 6 hmuin pahnihna niin semi final an lut a ni.

India-in champion a nih theihna tura match nga a khelhah Robert Lalthlamuana chu a khel kim deuh thaw; semi final an lut tawh tih a chian tawh hnuah, group league-a match hnuhnung ber Maldives nen an inkhelh tumin player tha thenkhat chawlhtir an nih khan a khel lo. Kha match loh kha chu a khel vek. Jeje-a hian Afghanistan an khelh tumin a khel a, chakna goal a thun a, semi final-ah a khel leh a, a khel tha hle a, Mizo tlangval pahnihte hi commentator lam pawhin an hming an lam zing mawlh mawlh hle. An khelh that thu leh nakin lawka India senior team tan pawh a player beiseiawm an nih thu an sawi ngun hle a ni. Afghanistan nen an inkhelh tumin goal lut awm chhun hi Jeje Lalpekhlua thun a ni.

SAFF Championship 2009-a champion team-a tel Mizo tlangval pahnih Robert Lalthlamuana leh Jeje Lalpekhlua te chu Zozam Weekly chuan a kawm thei hlauh a, tiang hian zawhna an chhang:

In champion chiah khan i rilru-ah eng nge lo lang hmasa ber?
Robert: Kan inkhelh chhung zawnga min hruaitu Pathian min hruaina zawng zawngah lawmthu sawi tur ka lo ngahzia a lo lang a, Pathian hnenah lawmthu ka sawi nghal mawlh mawlh mai.
Jeje: A hmasa berah Pathian a lo lang hmasa ber a, kan tawngtaina tlawm tak leh min lo tawngtai puitute tawngtaina chhana a awm kha ka lawm lutuk a, Pathian hnenah lawmthu ka sawi nghal.

In team chakna pawimawh ber nia i hriat?
Robert: Pathian vang kei chuan ka ti lo thei lo a. Chumi dawtah chuan sawi tur tam tak a awm thei ang. Player tam zawk te hi I-League-a khel deuh vek kan ni a. Hei vang hian mahni inrintawkna pawh kan nei ve hlawm viauin ka hria a. Player te kan inkawmngeih tlang a. Tin, kan coach pawh hi player han fuih phur dan a thiam a, a game plan-ah a chiang a, chutiang tur chuan player-te chhawr dan pawh a thiam a. Kan fighting spirit kha a ropui ka ti bawk
Jeje: Players te kan inpawh tlangin, kan inkawmngeih vek a. Chu chuan team work tha a siam a. Chu chu kan chakna hnar ber niin ka hria.

In khingpui zingah khawi kha nge khelh har in tih ber?
Robert: Maldives kha khelh an har khawp mai. Champion lai an nih bakah, final-ah phei kha chuan pressure kha a awm ve deuh reuh a. An player-ho kha experience an nei tha hlawm bawk nen, khelh an har khawpin ka hria. Final phei kha chu keimah rau rauah khel chhia ka inti khawp mai a.
Jeje: Maldives kha khelh an har khawp mai, an tha ang reng bawk sia, experience an ngah tawh tih a hriat reng mai a. Khelhpui an hrehawm khawp mai. Final-a kan hneh kha kan vannei asin.

Penalty kha in pet ve kan lo ring a...
Robert: 2005-a Mizorama U - 19 National Football Championship nghah a nih khan, Jharkand hmingin kan lo khel ve a nih kha. Khami tum khan semi final-a Mizoram nen kan inkhelh khan, penalty hmangin chak zawk zawn a ngai a. Khami tum khan ka pet ve a, ka pet goal lo hlauh a, khata tang khan a tul tawpah pet tur an awm tawh lo te a nih ngawt loh chuan penalty hi pet ka tum tawh lo ve ringawt a. Pet tura min tih paw'n ka duh ngai lo.
Jeje: Penalty pet tur panga an thlan zingah kha chuan ka tel ve a, a tawp berah pet turin min dah a. Mahse ka pet ve ngai lovin kan chak ta hram a nih kha.

India ram pawna champion nih chu a danglam deuh bik em?
Robert: Danglam tehreng mai. A lawmawm dan a dang riau. A chhan chu semi final-ah a thlengtu ram senior team kan hneh phawt a. Final-ah kum hmasaa India senior team-in final-a an hneh lo kha a junior team zawkin kan hneh hlauh a. A lawmawm dan ka sawi thiam lo, kan lawm a ni tawp mai.
Jeje: A lawmawm dan hi ka sawifiah thiam mai lo a ni. Hetiang hi ka beisei phak reng reng lo a ni a, champion team zinga ka tel ve ringawt hi ka lawm ve em em a ni ringawt mai.

U-23 team atang hian India senior team-ah luh theih i inbeisei em?
Robert: Ngaihdan sawi thiam a har ang reng khawp mai. Frank takin sawi ta ila, beiseina chu ka nei ve deuh, a ruk tak chuan, tunah phei hi chuan India senior team-a lef back-ho an inhliam deuh fur a. A kohte pawh min ko ve mahna engtikah emaw chuan... Ka tel ngei ang tih chu ka sawi ngam lo a, mahse engtikah emaw chuan tel ve thei ngei turin ka tang chho zel ang chu.
Jeje: Tun maiah chuan beiseina pawh ka la nei ngam rih lo, a chhan chu kan la junior deuh bawk a, mahse engtikah emaw chuan India senior team-a tel ve theih chu ka inring khawp mai, tan han la sauh sauh ila.

India ram in lo let leh hunah hmachhawp i nei em?
Robert: Nei ve deuh nual mai. December ni 21 atang hian Federation Cup khel turin Silchar-ah kan lokal dawn a. Mizo mipui min tawiawm thei an awm chuan ka lawm ngawt ang. Min tawiawm tur pawhin ka sawm nghal bawk che u a. Tin, kum tharah lamah kan club hian AFC champions league play off kan khel ve leh dawn bawk a, a chakawm tawh khawp mai.
Jeje: Federation Cup khelh a ni rih deuh mai. Kan club Pune FC tan hian tum season-ah match hnih chiah ka la khel a, a chhan chu India U - 19 camp-ah hun rei tak ka awm a, chumi hnuah U -23 team-ah min ko leh bawk sia. Theihtawp chhuaha club tana khelh a ngai dawn a. |an a ngaih hmel khawp mai.