December thla a intan hi chuan boruak chang a danglam lo, mihring rilru pawh a danglam thin. Khua a vawt a, rilru erawh a sa hulh hulh thin niin a lang.
Mipui rilru-ah Krismas leh a chhehvelin hmun a chang a, huau huau leh intihhlimna lam thilte'n hmun pawimawh a chang thin.
Bazar a lun a, Vanapa Hall lah chuti bawk. Sum leh pai mamawhna a lo sang a, nawmsak chakna te pawh a pung thin niin a lang. Mi tin maiin "Aw a va mawi em he ni lawmawm hun tawi te hi" an ti a, khawvel hmun dang chu thu dang ni se, Mizoramah kher chuan thil dang a leng meuh lo, Krismas leh a kaihhnawih thil chauh lo chu.
Krismas leh a kaihhnawih thilte chu a thianghlim leh thianghlim loh te chu thuhran ni se, a that leh that loh te pawh thuhran ni se, rilru zawng a luah hneh chiang a ni.
Chutiang hunah chuan zu market leh thawmhnaw bazar te a len thur thur laiin chanchinbu market erawh a te rawih rawih ta thin a, kan hunpui Krismas meuh pawh chanchinbu tel lovin kan hmang ta thin a nih hi.
December thla tir atang hian chanchinbu hralh a har tan a, thla kip chhuakte pawh a ngelnghet deuh lo chuan an tichhuak lo thin. Kar tin chhuak pawh hralh a har a, thla laihawl thleng bak tihchhuah ngam a ni lo. Mipuiin chhiar tur an mamawh rih lo a ni mai thei.
Tin, a semtute an chawlh a ngai ve bawk. Mizote chuan Krismas hi chhungkaw kima hman kan tum hram hram thin a nih hi. Chanchibu semtute pawhin mahni khuaah, chhungte bula hman an duh ve. December thla tir atang hi chuan an chawl pheuh pheuh tawh a, mahni duh huna haw theih a ni ngawt lo, motor remchan huna haw a ngai. Chutiang chu a ni a, a semtute an haw pheuh pheuh a, December thla laihawl vel thleng bak hi chu chanchinbu tihchhuah theih a ni lo hrim hrim. A buatsaihtute'n tichhuak ngawt se, tuman sem si lo se eng nge sawt ang?
Chutiang chu a nih avangin ni tin chhuakte tan pawh tihchhuah tlang ngaihna a awm lo. Tin, a semtute'n sem peih se, chanchinbu hi chhuak tlang ta se, chhiar tur vak an awm ang em tih pawh ngaihtuah tham a ni. December thla chu kan huau huah lawm thla, bazar kan uar thla a ni a, kan mawl thla pawh a ni mai thei. Kan mawl thla a nih em loh pawhin kan lehkha chhiar tlem thla chu a ni tal ang.
Lal pian hun lawmawm chu mawl phuangin kan hmang ta thin a ni ti ta ila kan sawi sual ang em?
Krismas lai hian chanchinbu chhuak se Krismas vuakvetah tun aiin sual leh thil tha lo a inlar tlem ngei ang. Media chu mipuite kan inkawmkhawmna, kan titi-hona a ni a, mipui hmel lanna pawh a ni. Chief minister pawh hian thingtlang pitar hi media hmang lovin a kawm thei lo mai thei. Chutia mipui kan in-communicate chu a tul a, chutiang tel lovin hmasawnna a thleng thei lo hial mai thei. Mahse, a hmanruaa ber chu Krismas laiin kan paih ta mauh thin si! Mizoramah chuan chanchinbu-in Bethlehem dai a chang pha ve tawk, a hmun laili a chang lo!
Mautam kumah khan kum tluanin tam tuar an awm thu kan sawi a, a vei pawh kan vei tlang. Mahse, Krismas dawnah chanchinbu an han chawl sap sap a, kum a lo thar meuh chuan mautam tam tuar an awm thu kan lo theihnghilh fe hman a nih kha. Halpuah pawh hi, Krismas laiin chanchinbu chhuak se chu tun aiin kan hal nep ngei ang.
Kuminah hian Zozam Weekly hi tihchhuah tlang hram kan han tum a, mahse, kan hlawhchham ta tlat. 2009 thlirna pawh thla tawp lama tih tura kan dah deuh reuh a ni a, tunah issue hnuhnung ber kan ti ta thut si, 2009 kan thlir mumal ta lo. A rem leh kum thar lamah kan la thlir let ang chu.
Kum tluana min hruaitu Pathian chungah kan lawm. Kan chanchinbu tlawm tak chhiartute chungah pawh kan lawm. Kum tharah kan intawng leh ang tih i beisei ang u. Krismas leh Kumthar chibai ule.
No comments:
Post a Comment