Goa Mizo nulate him zel

Goa Police te'n Goa-a hmarchhak nula 30 vel an man avanga pawn chhuak lova ni 4/5 vel an tawmin hnu-ah Goa Mizo nula thenkhat chuan an hna an thawk leh tawh a, an him zel tih thu dawn a ni.

"Kar khat vel kan chawlh hnuah July ni 11 atang khan kan hna kan thawk leh. Kan hotute'n 'a him tawh' an ti a, an thu kan awih mai. Keini aiin kan hotute hian an hlau zawk a, a tirah pawh keini chuan hlauh vak nachang kan lo hre lo a, 'kan inzuar ve hlei nem' kan ti mai a. Mahse, kan hotute chuan 'Goa Police te corrupt zia in hre nange? Tuna an mante hi an inzawrh vanga man an ni hlei nem' tiin min hau a, kan hna pawh chawl rih turin min ti a. 'A him leh tawh' an ti a, kan thawk leh a ni mai a," tiin Goa nula pakhat chuan Zozam Weekly a hrilh.

Mizo nulate zingah police hnen thleng an la awm lo nia hriat a ni a, police lam thawm pawh a reh an nia hriat a ni. Mizoram sorkar hruaitute'n biaa an thlamuan avangin Goa Mizo nulate hi an lawm hle.

"Police te hian a tira mi 29 vel an man bak kha mi an man belh tawh lo niin kan hria a, Goa media lam pawhin tiang chuan an ziak. Mizo tumah an la man lo niin kan hria a, mahse, fimkhur thu-ah kan la awmkhawm reng tho," nula pakhat chuan a ti.

Goa Police te hian July ni 1 atang khan nawhchizuarah puhin an state-a hmarchhak nula henkhat an man a, he state-a hnathawk Mizo nulate pawh an hotute'n an hna thawk rih lo turin an hrilh hlawm. A hen chu an awmkhawmtir bawk.

Goa-ah hian hnathawkin Mizo nula an awm nual a, khaw hran hrana awm an nih avangin an inhre vek lo a, tun umah pawh hian an chunga thil thleng an inhriatpui vek lem lo.

"A tirah khan kan hotute'n police-te man zingah hian Mizo pali an tel niin an sawi a, mahse, an hrechiang bik chuang lo a, tunah pawh kan la hrechiang chuang lo. An tel lo a nih kan ring, tel se chu kan hre tawh ang," nula pakhat chuan a ti.

July ni 5-ah khan parliamentary secretary Lalrinmawia Ralte-in Goa Mizo nula henkhat hi phone-in a bia a, a tul a nih chuan Goa sorkar hotute pawh an biakpawh tur thu te a hrilh a ni.

July ni 7-ah khan chief minister thupekin a staff te'n Goa nulate hi an be leh a, thil awmzia leh an dinhmun an zawh bakah thil duhawm lo a thleng a nih chuan an hnena sawi vat turin an hrilh a, a tul a nih chuan Mizoram sorkarin hma a lak tur thu an hrilh bawk. Goa nulate hian an la him rih thu leh boruak a ha zel nia an hriat thu an lo sawi a ni.

"A hun lai chuan a nuam lo ve khawp mai. Kan hotute sawi hmangin, inrinhlelh vang leh thilsual tih vang ni lo pawisa duh vang emawin hmarchhak nulate kha an man a ni a, kan awm mai mai lai kha duh chuan min rawn man thut thei tihna a ni a. Tunah chuan a ralmuang tawh a, kan hlau tawh lo. Kan hotute chuan pawisa duh vang leh kaisan duh vangin police thenkhatin an zuam zawng hmarchhak nula an man tawp niin an sawi a, a ngaihna kan hre lo khawp mai. Tunah chuan kan ralmuang tawh a, kan him zel kan beisei," tiin nula pakhat chuan Zozam Weekly a hrilh.

Related Posts :