Chhiarpui-a tel duh lote kalkhawm

¢ K Lalrochana

Chhiarpui neih meka inziaklut ve duh lote rilru hneh tumin sorkar chuan beihpui a thlak chhunzawm zel a, chutih laiin chhiarpuia tel duh lote hi an ruh tawlh tawlh emaw tih mai turin an dinna ngaiah an ding reng a, chhiarpuia tel ai chuan tawrh pawh an huam tih an sawi.

June ni 10 (kar hmasa Inrinni) khan Lunglei Electric Venga cheng Lalthangliana chuan vawk talhin, Pathian a chawimawi a, mi engemaw zat an pungkhawm. A thlengtu Lalthangliana chuan chhiarpuia tel lo ngam, Pathian avanga lungina tan huamte an kalkhawm niin a sawi.

Lalthangliana te in hi Assam type building, lian ve thawkhat tak a ni a, in chhung a khah tlat bakah pawnah pawh mi engemaw zat an thu.

An zinga a tam ber hi pawlchhuak inti te an ni a, Baptist Kohhran leh Presbyterian Kohhran member pawh an awm nual. An zinga a tam zawk hi chhiarpuia tel duh lote an ni.

An vai hian 150 chuang an ni a, Aizawl leh Lawngtlai atanga he hun chhim tura kal vang vang pawh an awm.

Nilengin Pathian thu leh hlain an inpawlkhawm a, thusawitute'n thu an sawi reng rengin ngaihnawm ti takin an ngaithla thap a. Thusawituten, "Ka sawi rei lutuk palh ange" an tih pawhin, "La sawi zel rawh, a ngaihnawm alawm" an lo ti thin. An hun hmanah hian hruaitu emaw, hotu emaw, an awm chuang lo tih an sawi a, an hruaitu chu thlarau thianghlim tiin an sawi a ni.

Anni chuan 'Pathian chawimawi' tiin an hun hman hi an sawi mai a, Lunglei lam chanchinbu chhuakte erawh chuan 'chhiarpuia tel duh loten ruai an theh' ti hawi zawngin an ziak hlawm.

A thlengtu Lalthangliana chuan chhiarpuia telte chu sakawlh chibai buk hmasatute tiin a sawi a, Sakawlh chibai buk lo tur, Pathian vanga engkim tuar huamte pualin ruai hi a buatsaih niin a sawi.

Lalthangliana hi kum 80 dawn lai a ni tawh a, mahse chhiarpuia tel ai chuan engkim tawrh a huam tih a tawngkam atangin a hriat.

"Chhiarpuia telte hi sakawlh chibai buk hmasatute an ni, keini chuan sakawlh hi chibai buk kan tum lo," a ti.

"Sorkar hian a changin min thlem a, a changin min vau a..." a ti a, "Chhiarpuia kan tel loh chuan Rs 1000 kan chawi tur thu te min hrilh a, Rs 1000 hi kan chawi thei lo a nih chuan kum thum chhung lung ina kan tan tur thu te an sawi a... Rs 1000 chawi ai chuan lung ina tan pawh kan thlang zawk," a ti bawk.

Chhiarpuia telte chu 'khawvel mite' tia sawiin, "Khawvel mite chuan misual min ti a.... vawiinah hian misual rualin ruai kan theh a nih hi. Pathian avanga kum thum tan huam thah kan ni," a ti.

Lunglei District chhunga chhiarpuia tel duh lote hi chhiarpuia an tel theihnan sorkar lam chuan hma a la reng a, Lunglei DC Office atanga thudawn danin, chhiarpuia tel duh lo Thingfal khuaa mi 7-te chu chhiarpuiah hian a inziak lut tawh a, khaw dang report pawh ngaihchan mek a ni.

Lunglei khawpui chhung bikah chuan chhiarpuia tel duh lote hi sorkar lamin an biak ngial pawhin an la tel duh chuang lo. Addl DC T Lalduhawma chuan chhiarpuia tel duh lote hi July ni 15 thleng an la ngaichang dawn tih sawiin, hemi hnuah pawh an la inziaklut duh chuang lo a nih chuan anmahni duhthu ngeia inziaklut duh lo an nih thu hi ziakin an dah ve a ngai dawn tih a sawi.

'Chhiarpuia tel duh lote lakah hremna lekkawh a ni dawn em?' tia Zozam Weekly zawhna chu T Lalduhawma chuan, "Keini hrem theih a ni ngawt lo a. Aizawl lamah report kan pe ang a, hmalak dan tur chu Aizawl lam rel tur a ni tawh ang chu," tiin a chhang.

Lunglei DC Office record-a a lan dan chuan Lunglei District chhungah hian chhiarpuia tel duh lo chhungkaw 73 an awm a, puitling 247 an awm a ni.

Lunglei District chhunga chhiarpuia tel duh lote hi sakawlh hlau an ni vek kher lo nia hriat a ni. Lunglei Luangmuala chhiarpuia tel duh lo pa pakhat chuan hming ziaka number neih hrim hrim chu chhiarpuia a tel duh loh chhan niin a sawi a, he venga cheng nu pakhat pawhin "Pathian ka rawn a, tel loh a lang," tiin, chhiarpuia a tel loh chhan hi a sawi.

Related Posts :