Tanhril mipui rilru a dam lo

Tanhril VC vice president, JAC chairman ni bawk, VL Rawna chuan an veng VC member Lalpiangliana thih chungchangah an veng mipui rilru a la dam lo tih a sawi a, sorkarin dik taka a chhuichhuah ngei an beisei thu a sawi.

"Kan rilru hi a la na khawp mai a, kan veng mipui hi kan rilru a la na vawng vawng a ni ber mai," tiin Zozam Weekly a hrilh a ni.

"Kan sorkarin hetia thil awmzia chhuichhuak tura hma a la hi kan lawm a, a chhuitute'n tha tak leh dik taka an chhuichhuah ngei kan beisei. Chu chu kan nghak tawp mai a ni," a ti.

"Kan rilru hi a na a, kan thalaite phei chuan na an ti ngawih ngawih a, kan inkhap hram hram a ni. Hei kan la inkhap dai thei rih zel a, a lawmawm khawp mai," a ti bawk.

Mipui duh loh zawngin thu a tlu ang tih a hlauh thu a sawi a, "Thudik hailan kan duh a, thil a zuzi mai mai ang tih kan hlau a ni. Kan rilru hi na hle mah se tih theih kan nei tak tak lo a, sorkar ngaihchan hi kan tih theih ber chu a ni mai a. Kan sorkar pawhin chak taka hma a lak kan beisei. Mipui rilru hi a na em a, mipui duh loh zawnga thil a kal a nih chuan thil duhawm lo a thleng ang tih a hlauhawm," a ti.

Tanhril VC member Lalpiangliana thihnaa inhnamhnawih nia puh police mi leh sa 7 ten anticipatory bail an dilna chu Court-in ngun taka a ngaihtuah hnuin July ni 12 tlai dar 3-ah Additional Dist & Sessions Judge Saingura Sailo chuan Judgement tichhuakin police-te anticipatory bail dilna hi a hnawl. Tanhril khawtlang hruaitute chuan hetia bail an dilna hnawl a ni hi lawmawm an tih thu an sawi.

Police 7 te hi Lalpiangliana thihnaah Vaivakawn Police Station Case No. 150/10 U/S 304 IPC awrhtir an ni a, suspend mek an ni.

Police pasarih te anticipatory bail dilna ngaihtuah a nih laiin, Tanhril Khawtlang Joint Action Committee chuan Tanhril huam chhunga Nepali te chu nimin July ni 12 zing dar 5 atanga pawn chhuak lo turin an ti a, Court thuchhuak azirin hma lak chhunzawm zel an tum tih an puang bawk.

Hemi chungchangah hian Home Commissioner leh Aizawl DC chuan Tanhril khawtlang hruaitute hi July ni 11 zanah an kawm a, Nepali-te pawnchhuak lo tura an tih chu sut leh turin an ngen a ni. Tanhril JAC lam chuan sorkar lamin an thil phut a tihhlawhtlinsak theih dawn tak avangin Nepali pawnchhuah khap chu an sut leh ta a ni.

Tanhril khawtlang leh sorkar aiawhte inremna angin Lalpiangliana'n amah kutthlaktute nia a sawi hming, a mobile handset voice recorder-a a lo record civil mi palite chu man an ni a, chief judicial magistrate R Vanlalchami court-ah July ni 12-ah hruai an ni.

Police lamin an ngen angin heng mi palite hi darkar 72 chhung hren phalna chu magistrate hian a pe a ni.

Heng civil mi pali an mante hi a hma pawha an lo man tawh, Vaivakawn PS C/No. 150/2010 dt 1.7.2010 U/S 304/34 IPC thubuai awrh mek an ni a; chungte chu- 1. Babu Lal Rai (30) s/o MB Rai; 2. Sibulal Rai (25) s/o MB Rai; 3. Santosh Rai (34) s/o MB Rai; 4. Sibu Rasbongsi (25) s/o Binu Rasbongsi, an vaiin Lawipu Veng, Aizawl vek an ni.

Tanhril khawtlang hruaitute chuan sorkar hmalaknaah lawmthu an sawi a, Lalpiangliana thihna chhuina kawngah chak taka sorkarin hma a lakna tanpui turin englai pawhin puih an inhuam reng tih an sawi.

Related Posts :