Mizorama rawn kal tur Boney M zaitunu Marcia Barrett

¢ Fela Fanai

Boney M hi a hranpaa inhrilhhriat kan ngai hran lo. Thlasik rim a rawn nam a, Krismas boruak a rawn thawh hi chuan an zai ngaihthlak hi loh theih lo ang hial a ni. Mi tam tak phei chuan 1981-a an tihchhuah daih tawh an Krismas album-a hlate hi tun thlengin kan la buaipui a, Boney M tel lo hi chuan Krismas hi a 'masi' tak tak thei lo. Chu band chu tunah hian a huhovin an kal tawh lo a, an kehdarh tawh. Mahse, an vanglaia an zaitunu bera chhal ngam Marcia Barrett chu Aizawlah Mizote Krismas min rawn hmanpui turin a rawn kal dawn a, tunah hian Berlin-ah a inbuatsaih mek.

A hun hmasa lam
Jamaica-ah a piang a, naupang te a nih laiin England-ah an pem a, he hmunah hian a hun hmasa lam chu a hmang. The Beatles te'n hlawhtlinna an chhar chhohna German chu 60's tawp lam khan a pan a, chu hmunah chuan a beisei ang ngeiin hun thar a tawng ta. Hun rei pawh he hmuna a khawsa hma hian band pakhat chu zawmin Karel Gott leh Rex Gildo te nen tour an nei nghal. 1971 khan Metronome te nen inthlunzawmin 'Could Be Love' tih album chu record-in a siam a, he hlang te hi a bik taka Drafi Deutscher siamsak an ni. Heng album hla te hi a tirah chuan hralh a kal lem lo hle a, mahse, tunlaia BOney M fans te chuan he album hi an zawn nasat ber a ni tawh thung. Hetianga record album a tichhuah hnu hian tour nei kualin Europe hmun hrang hrang a fang a, a hla thenkhat, "Son of a Preacher Man", "Oh Happy Day" leh "Big Spender" te chu a larpui hle a, Deutscher-a phuah bawk "Londonderry", phei chu Boney M larchhuahna hla tih hial ngam a ni.

Boney M atangin sawmna
1975 a rawn inherchhuak a, Boney M chuan a sawmin an rawn sawm. Hetih lai hi chuan he group hi model leh lamthiam te intelkhawmna niin discotheque leh TV lamah te an inlan thin a, hetih lai hian producer Frank Farina-a hla 'Baby Do You Wanna Bump' tih hla remin an lam thin. Solo-a kal duh chi a nih avangin tui vak lo chungin a zawm ta tho. He hla an lampui thin hian rei lo teah Germany chu a fanchhuak thuai. 1976 kumtir lamah chuan an zaitunu Claudja Barry chuan an group a chhuahsan tak avangin Marcia chuan amah ang bawk Jamaican mi, Liz Mitchell chu ani aiawh tur hian a rawt a, Mitchell pawh hi zaithiam bawk a lo nih avangin Frank Farian chuan Liz leh Marcia te chu 'Baby Do You Wanna Bump' chu a record that tir leh zui a ni.

He recording hian rah tha tak a chhuah a, 'Daddy Cool' leh Boney M album hmasaber 'Take the Heat Off Me' chu 1976 hian a piang ta a ni. German TV show Musikladen-ah September 1976 khan an inlan a, hemi hnu hi chuan Boney M chuan Europe-a ram hrang hrang chart-ah pakhatna nihna an hauh nghal vek a, an singles leh album te chu thang hnih lian chhung ngawt hlawhtling takin an kal chho zui ta a ni.

Boney M zaitunu Marcia Barrett
Boney M member hi a member zawng chuan pali chu an ni a, amaherawhchu Boney M hlate hi record tura studio-a luhpui a nih chuan Barrett leh Liz Mitchell te 'aw' chiah hi record a ni thin. Barrett-i'n Boney M-a a sawmluh Liz Mitchell hi an hla tam zawkah zai ber a nih avangin lead singer anga ngaih zawk a ni thin a, mahse, Marcia Barrett hi an group hla hit zawng zawng chemiawtu aw nalh danglam tak neih a ni a, an hla hit, "Ma Baker", "Rasputin" leh "Gotta Go Home" ah te a zaitunu ber a ni. Tin, an studio album pahnih, Mizote pawhin kan hriat Christmas Album (1981) leh an album hmasaber Take the Heat Off Me leh "Lovin' or Leavin' ah te khan lead singer zawk a, heng hla te hi Marcia Barrett singles angin 1977 khan tihchhuah a ni.

Boney M album pahnihna Love For Sale-a Marcia hla 'Belfast' chu German-ah Number 1 nin European Top 10-ah a lang a, he album-a a hla, amah ngeiin a sak 'Silent Lover' tih chu American disco group El Coco te chuan a hnuah an sa ve leh nghe nghe.

Nightingale to Venus tih-ah khan Marcia hian "King of the Road" leh "Never Change Lovers in the Middle of the Night" tih te chu a sa leh a, hei hi an group-a an awmho chhung kha chuan mipui hmaah an sa hnem hle. A hnuhnung zawk phei hi chu American zaithiam Millie Jackson chuan rawn sa ve lehin R&B huanga hla chuai thei lo zingah chhiar tel hial a ni.

Boney M Krismas hla hit tak tak, "Mary's Boy Child/Oh My Lord", leh "Ribbons of Blue" phei hi chu Marcia zai liau liau tih ngam a ni. 1979-1 tihchhuah Oceans of Fantasy album-a 'No Time to Lose' pawh kha midang tan ka sak han tih ngam rual a ni lo.

Boney M hun tawp lam
1982 leh 83 chho atang khan Marcia leh an producer inkar chu a tha lo chho tan a, hemi hnu hi chuan recording mumal pawh an nei chho lo rei hle a, a lungawilo tih a hriat hnu hian Farian chuan a vau ve reng bawk a, Boney M chhuahsan theih a nih loh thu a hrilh chamchi.

Hun engemaw chan thawm nei lova an awm hnuah 'Ten Thousand Lightyear' chu an tichhuak leh a, an producer nen an inkar a that loh avangin a 'aw' pawh a thawh tlem hle a, Greatest Hits of All Times - Remix '88-ah pawh chutiang tho chu a ni. Hetianga an producer ber chet dan avang hian Boney M-a a sawmluh Liz Mitchell chuan 1989-a group tour an neih laiin a ban thu a puang a, a aiah hian Madeleine davis chu lakluh a ni. Hetiang te nuaih an nih takah hian Farian chuan hla thar an record lo tur a sawi a, anni ho lungawi lo chuan producer Barry Blue hovin France lamah "Everybody Wants to Dance Like Josephine Baker" chu record an tum a, hetah hian Marcia chu zaitunu berah a tang leh a, mahse, hetah hian Farian chuan rawn inrawlh lehin Boney M hming an hman vang chuan tibuaina a zawng a, court hial trhlengin 1990 khan Boney M chuan a hrana kal zai an rel ta a ni.

Boney M hnu lam khawvel
Khatia an inthendarh takah khan Marcia hian rock lam hla recording chu Munich lamah a chhunzawm a, hetia a buai chho lai hian a chi kawngah cancer a vei tih a hre chhuak a, kum 6 zet chu hna mumal a thawk thei lo. 1997 a lo inherchhuah meuh chuan ama ke ngeiin a rawn dingchhuak a, producer Scott Christina nen dance track lam a buaipui chho leh a, hetih rual hian a mimal album pawh a buaipui chho a, 1999 khan 'Survival' album chu a tichhuak. Hemi hnu hian singles pahnih, 'Rivers of Babylon leh 'Season' tih chu Dutch radio tihchhuah leh a ni a, mipui ngaihthlak theih chuan a release leh ta lo thung. 2003 khan US sipai ten Iraq an run duh loh entirnan EP pakhat No War! Peace and Love tih chu Indona avanga hnuchham nuapang te pualin a tichhuak leh a ni.

Tun hnaia Marcia chetna langsar
October ni 13, 2007 khan Marcia Barrett hian Georgia atanga indan tum South Ossetia-ah concert danglam tak mai a nei a, concert a neihna hmun hi Georgian ho awpbeh Tamarasheni khua-ah a ni a, he concert-ah hian South Ossetia president Eduard Kokoity chu an ram chhuahsan turin a ti nghe nghe. December 28, 2008 khan Mracia hian Russia-ah Premier Vladimir Putin puala buatsaih concert-ah a inlan leh a, 2008 New Year khan Lithunia-ah mipui 16,000 hmaah a inlan leh bawk. 37th International Film Festival of India (IFFI),November 23, 2006-a Panaji, Goa-a neih a ni tum pawh khan Marcia hi zaia zawm a ni. March 8, 2008 khan Marcia hian Palace grounds, Bangalore-ah ama pualin concert hlawhtling tak a buatsaih a, hemi tum hian mipui 30,000 chuan an kal nghe nghe a ni.