October ni 22, 2006, Pathianni zan dar 8:15 vel a ni a, Mission Veng YMA (Rokunga & Liangkhaia Section) duty tura ruat a nih angin Zosanglura chu a duty turin a chhuak a. New Street atanga Sikulpuikawn chhohna kawngsir veilama a kal lai chu Thakthing lam atanga Karizma chak taka rawn tlan chho chuan vanduaithlak takin a rawn su ta chawrh mai! Nikhaw hre lovin a awm ta nghal a.
A bul hnaia lo awmten bawihsawmin Aizawl Civil Hospital an panpui nghal. Doctor-te an han che nghal a, CT Scan an lakna result-ah chuan a thluak dinglamah thisen a awm tih a lang.
October ni 23, 2006-ah Care Hospital-ah an sawn a, ziaawm lam a pan loh avangin CT Scan chu tih nawn leh niin, a thluakah thi a tlin belh tih hmuh a ni. Hei vang hian a thluak chu nasa takin a vung a, doctor-te'n phai lama kalpui a that zawk tur thu a chhungte an lo hrilh avangin a rang lamin an buatsaih ta a ni.
A tukah thlawhna lian a awm loh avangin October ni 26-ah Kolkata an panpui a, zan dar 6-ah CMRI Hospital thlenpui a ni. Tih tur tihfel hnuah dar 8-ah Emergency-a zai nghalin a thluak-a thisen tling chu paih a ni. Zai zawh veleh hian Intensive Care Unit-ah khawl (ventilator) hmanga enkawl nghal a ni. |hat lam pan tura ngaih a nih lain ni 3 hnuah chuan a tlahniam deuha hriat a nih avangin CT Scan neih leh a ni a, thi a lo tling leh teuh tih hmuh a ni.
October ni 30, 2006-ah chuan a lu chu an hawng leh a, thi tling te paihin, a nawr tawttu (pressure) sang lutuk chhawk nan a luruh dinglam chu lakchhuah a ni. A ka-a khawl (ventilator) vuah atang chuan natna hrik kai chhawn a hlauhawm avangin a awm chu November ni 7, 2006-ah verhin (tracheostomy), ventilator chu a awmah vuah a ni ta zawk a ni.
Doctor-te'n an tih theih tawk an tih hnu-ah, February ni 26, 2007-ah Aizawl lamah an haw pui ta a, a khawvel chu khumah a hmang ta a ni ber. Bike tlan chak vanga tuartu chu.
Khawlaiah chak tak takin bike an tlan thin a, khawpui a tiralmuang lo hle. Mi tam takin kawngpui dungah zanah chuan lirthei an khal tha ngam lo a, mi tam chu ke pawhin an kal tha ngam lo.
October ni 19, 2007 zanah khan Aizawl khawpuiah thalaite chu an bike lachhuakin an 'ride' a, chu chu an thil thlakhlelh ber pakhat a ni. Chu chu engemaw lai atanga Aizawla 'hobby' rawn thleng thar a ni a, 'status symbol' a ni bawk.
Chu zana thalai tlanchhuakte chuan hlim takin an hun an hmang a, mahse, engemaw zat chuan damdawi in an bel zui thung. Hemi zana camera nena tlankual, journalist pakhat Joseph Lalrintluanga chuan, "A mak tak tak, two wheeler chesual a tam a nia aw... Casualty lam pawh an buai khawp mai," tiin he zan chungchang hi a sawi.
Treasury Square-ah te, Khatlaah te, Chanmari-ah te leh Chaltlangah te bike insu leh tlusual a hmu a, bike pahnih an insut pawhin an tlanpui - an thiante nen an innawk buai a, an tlu ta nuaih thin niin Joseph-a chuan a sawi. "Casualty pawh a lun khawp mai. A khat tawkin accident vanga inhliam an lut deuh reng a, damlo dang an lo awm bawk nen, an indaih lo khawp mai. Chinchang han zawh pawhin min chhang hman meuh lo," a ti bawk.
Chak tak taka bike-a tlan thinte an hlauh vanga kawngpui dunga lirthei khalh ngam lo pawh an awm; tlangval pakhat chuan Millinium Centre bulah te, Tuikhuahtlangah te, Temple leh Vaivakawn inkar kawngah te kawngpui dung hi a hel hram hram thin tih sawiin, "Mahni'n khalh chak loin fimkhur mah ila, chak deuh deuhin an rawn tlan fua fua a, min tawk zawnga rawn tlante nen te hian kawng kawiah kan insu ang tih a hlauhawm a, fimkhur tluk a awm lo," a ti. Kea kalte tan pawh zan lamah chuan bike intlansiak hi a hlauhawm tho; journalist pakhat chuan, "Zanah hi chuan pavement-ah ka kal hram hram thin. Hma lam atanga rawn tlan hi chu thuhran a nia, hnung lam atanga rawn tlanho hi an hlauhawm," tiin a sawi.
Two wheeler chetsualna hi kawngkawiah a thleng nasa nia sawiin traffic police pakhat chuan, "A tam tak hi chuan lehlam atanga lo kal tur an ngaihtuah lo a, kawngkawiah pawh chak deuh deuhin an tlan a, an fimkhur lo deuh a ni," a ti. Bike chesualah hian hmeichhiate pawh an tel nual nia sawiin, hmeichhe thenkhat phei chu a phurh ni lo, a khalhtu zawk te niin a sawi.
Traffic Police te chuan chak tak taka bike khalh thinte avanga khawpui ralmuan lohna hi a theih ang angin an hmachhawn reng a, tun hnaiah pawh hetianga bike khalh thinte hi zan lamah an umin an veh tawh. Mi engemaw zat an man nghe nghe. Hetianga tih zel hi an tum a, a hun sawi lawk lovin an ti thut thin dawn tih thu dawn a ni.
No comments:
Post a Comment