Mipa leh Hmeichhia

Kan thupui hi 'Hmeichhia leh Mipa' tih zawk tur a ni em? Ti ta ila, hmeichhe (minu) thenkhat chu an lawm mai thei. Heh! Chutiang a ni lo; hmeichhe lam dah hmasak thinna a awm a, mipa lam dah hmasak thinna a awm bawk. Entirnan- hmasang chanchin sawi nikhuaah 'kan pu leh pi te kha' kan ti ngai lo, 'kan pi leh pu te kha' kan ti thin.

Hmeichhe dinhmun chawisan tuma beitu thenkhat chuan hetiang mai mai thleng hian an khel a, Mizoramah chang a ni lo, sap ramah pawh a ni tho, Wimbledon thlengin hetiang thu leh hla hi an khel tawh.

'Anni leh Keini' tih hi he khawvela kan tehkhawng (criteria) pawimawh a ni; kan hnam leh mi hnam kan khaikhin a, kan veng leh mi veng, kan chhungkua leh mi chhungkua, engemaw zawng chuan a nawm pawh a nuam. Mipa leh hmeichhe karah pawh 'anni leh keini' tiin kan teh thin. Zirnnaah mipa hi pakhatna ni char char se, "Hmeichhiate kan tan a ngai," kan ti ang a, hmeichhia hi pakhatna ni char char se, "Mipate kan tan a ngai," kan ti thung ang. Chutiang vel chu kan ni!

Thil hrang hrangah kawng hrang hrangin chuti zawng chuan kan inteh a, mi thenkhat chuan an teh nasa ta lutuk a, 'Pathian hi mipa a ni bik lo' te an ti ta hial mai!

Kan pian tirh atangin mipa leh hmeichhia chu kan hrang daih; a tluk chu kan intluk, mahse, kan hrang. Chumi theihnghilh chuan mi thenkhat chuan mipa ang nih an tum ta a, an thil tum chu intluktlanna ni lovin mipa ang nih tumna a ni! Mipain thing an ek a, thing ek turin Mizo chhungkuaah hmeichhia kan beisei ngai lo. Mipain thing an eh avang chuan mipa dinhmun a hniam tihna a ni lo. Chutiang bawkin hmeichhiain inchhungkhur an enkawl hian an dinhmun a hniam tihna a ni lo. Kan nihphung a hrang a, kan hlutna leh kan tangkaina pawh a hrang. Mipa vun leh taksa hi naute pawm nawk nawk nan a awhawm lem lo. Hmeichhe taksa nem no tak hi naute pawm nawk nawk nan chuan a duhawmin a tha. Chutiang theihnghilh mi thenkhat chuan mipa leh hmeichhe kar boruak hi ni lo lovin an kher kual a, mipa tana hmeichhe duat phurawm loh hnawk khawp tein thil an kalpui thei.

Chutiang tur a ni lo e; hmeichhiate hi a awm nem zawk, a chak lo zawk an ni a, mipa te hian an hum tur a ni. Chutiang an nih avang chuan hmeichhiain mipa an tluk lo tihna a ni lo. Hmeichhiain mipa an humna tur thil tam tak a awm ve tho.

Engpawhnise, kan zingah hmeichhia him se, mipa pawh him rawh se. Kan ram hi kan vai-a kan himna ni teh se!