Thinchhia

Mipa naupang pakhat thinchhe deuh mai hi a awm a. A chhungte pawhin an buaipui a, amah pawhin a thinchhiatzia chu a inhria a, insiamthat pawh a duh viau thin a, mahse a thei si lo a. A pa tihngaihna hre lo chuan ipte a chhunga perek thahnem tak awm hi a pe a, "I thin a lo rima i insum zawh dawn loh veleh kan in hungna palah hian perek pakhat hi i kilh zel dawn nia," a ti ta ngawt mai a.

A ni khatnaah chuan chu naupang chuan perek 37 lai a kilh a. Ni tin a kilh belh zel a, mahse, a inthunun ve thei ta hret hret a. Kar khat a lo vei meuh chuan a thinchhe lutuk pawh chu a ziaawm ta viau a, perek pawh a kilh bet tlem tial tial a.

Chumi hnua kar engemaw zat a liam leh chuan a zia tawh viau a, perek chhut luh ai chuan thinrim insum chu a awlsam daih zawk tih te pawh a hmuchhuak ta hial a ni.

A tawpah chuan naupang chu a thinrim tur pawh a insum hmak thei ta. Tichuan, a pa hnenah chuan a thinrim tawh ngai loh thu leh a thinchhiat a sim tawh thu chu a hrilh a.

A pa chu pa fing tak mai a ni a, a fapa hnenah chuan an in hungna pala perek a kilh luh tak zawng zawng chu ni tin pakhat zel phawi leh turin a hrilh leh a. Hun a liam zel a, a tawpah chuan a phawi kim ta a, a pa hnenah chuan perek kim vek tawh thu chu hlim takin a hrilh nghal a.

A pa'n a ngaihthlak zawh chuan a fapa chu a kai lawk a, an in hunga pal lamah chuan a hruai kual a, an pahnih chuan an en kual dun ta a. A fapa hnenah chuan, "Mama, i ti tha hle mai. Mahse perek i kilhna lai kua hi ngun takin han en vang vang teh. Palte hi engti kawng mahin a hma ang kha an ni thei tawh dawn lo tih i hmu ang. Hetiang chiah hian i thinrim laia i thusawi leh i thil tih thinte
khan mi dangte hnenah perek kilhna kua anga langsar, ser a hnutchhiah zel a ni. I mi huat zawng tak chu chemte-in i vit hrawih thei reng a, a hnuah pawh i inchhir leh thei. Mahse, hei hi hre reng la, a hnua 'Ka tihpalh' i tih lawm lawm pawhin i thil tih chu a nih tur ang a lo ni fel vek tawh ang. Chutiang thoin, thu sawi vanga mi rilru hliam hian an taksa tihnat dan a inang reng a ni," tiin a sawi ta a.

('Bad Temper' tih lehlin, a tul anga siam danglam a ni.
- Lalthlamuana Ralte)