Pumpui laka lungawi loh thu

Vawi khat chu, pa pakhat hian mumang a nei a, a mumangah chuan a taksa peng thenkhat hi pumpui lakah an lo lungawi lo a nih chu!

Chu pa kut leh ke, a ka leh thluakte chu pumpui lakah an thin a rim a, an ankhum tliar tliar hlawm.

"Tangkaina pakhat mah i nei lo," tiin kut chuan pumpui chu a hau a, "Nilengin hna kan thawk a, rit ka chawi thul, lei ka lai thul, hna hram tinreng ka thawk thin. Tlaiah chuan ka hmel pawh a chhe vel zel a, ka ruh chuktuahte hi a kham erh urh thin. Tin, ka bal vek zel bawk. Chutih laiin nang chu i lo awm mai mai a, chaw i lo dawng ve ringawt," a ti tawn tawn mai.

"A dik chiah," ke pawh chuan a lo ti ve bawk.

"Nilengin ka pen a, ni khatah engtia thui nge ka pen thin? Nang chu awmhmunah i lo awm mai mai a, vawkpui riltam ang chauh i ni."

Ka pawhin a lo zawm ve a, "A dik chiah," tiin.

"Chaw i duh em em a, he'ng chaw te hi khawi atanga i neih nge i hria em? Ka thial a, ka thialsawm sa awmhmunah i lo dawng ve tawp zel. A 'fair' lo lutuk," tiin pumpui chu ka chuan a ankhum a ni.

Thluak pawh a ngawi thei bik lo; "Ka dinhmun hi i ngaihtuah ngai em?" tiin pumpui chu a rawn ankhum ve bawk.

"I chaw dawn tur zawng zawng ngaihtuahtu ka nih hi. Mahse, engmah min pelet ngai lo."

Taksa peng dang pawh chuan an rawn zawm ve ta tliar tliar a, pumpui erawh a ngawi reng.

"Tih dan tur ka hria," pumpui chuan a rawn ti a, an lo ngaithla thap mai.

"He pumpui thatchhe lutuk lakah hian i nuar ang u, engmah thawhsak tawh lo ang u."

"Tha lutuk, tha lutuk," an ti a, taksa peng hrang hrangte chu pumpui laka nawrh an tum ta a ni.

"Vawkpui ang maiin i thatchhia a, kan lungawi thei lo. Kan pawimawhna hi kan han hrilh ve hlek ang che," tiin pumpui chu an hau a, an thinrim hlawm ngang mai.

Taksa peng hrang hrangte chuan hna an thawk duh ta lo. Chutia an chawlh tak thup avang chuan pumpui chuan chaw reng reng a dawng ta lo.

Mahse, a mak lutuk, chung taksa peng hrang hrang neitupa chu a chau ta tlat. A kal thei lo a, a kut pawh a lek kang zo ta lo. A ka a ang tha thei hek lo a, a damlo chu a ni ta der mai.

Nitin mai chuan a chau zual a, a chak lo ta hle. "An nuar zel a nih chuan ka chhe vek dawn a nih hi," tiin a ngaihtuah a, a mangang ta hle.

Pumpui laka lungawi lo taksa peng hrang hrangte pawh chu an chak lo ta hle. A tirah kha chuan pumpui laka an nawrh avangin hna an thawk lo kha a ni a, tunah erawh thahrui an neih loh avangin hna an thawk thei ta lo.

Nakinah chuan ke hi a rawn tawngchhuak ta; "Kan tidik lo a ni, pumpui tangkaina hi kan lo hre lo niin ka hria," tiin.

"Kei pawh chu chu dik ka ti. Pumpui hian kan thawhchhuah sa hi a lo dawngkhawm ngei a, mahse, kan vaia hnenah a rawn semdarh leh vek niin ka hria," thluak chuan a lo ti ve bawk.

"Ni e, kan lo tisual a ni. Pumpui hian kut te, ke te, thluak leh ha te, taksa peng hrang hrangte ang bawkin hna tangkai a thawk a ni," ka pawhin a lo ti ve bawk.

"Hawh u, hna i thawk leh theuh ang u," an ti a, chutih lai chuan anmahni neitupa chu a harh ta hlawl mai a ni.

A mumang chu a ngaihtuah a, mumang ropui tak niin a hria. "Zirlai ropui tak ka zir a ni; kan vaia hna kan thawh siau siau loh chuan, kan vai hian thawk thei lo khawpin kan chau mai ang," a ti a. n

('The Rebellion Against the Stomach' tih, "The Book of Virtues" tih bu-a mi lehlin a ni.)