BEAUTIFULLY AGED

¢ Debbie Chawngthu

Kum 40 pelh hnua la nalh tak tak an tam ta hle a, hetiang ang kum pelh hnu pawha la nalh tak tak te hi chu naupan deuh lai atanga inenkawl ngun leh intuai hnum peih mi an ni ngei ngei thin. Kum tam hnu pawha la ria nalh thlarh mai hi chu an kum aiin an naupangin an zahawm ru riau thin. Kum a han tam meuh chuan insawiselna neuh neuh leh pum lam thatlohna thlengin a awm tawh thin a, dulkiar lutuk emaw thau lutuk loh nan ei leh in lamah fimkhur reng tur a ni. Thau sa phei chu an upat lamah an ei leh in a fimkhur zual bik a, insum loh chuan upa lam natna te pawh neih a awlsam bik a ni. Taksa thau leh rit lam i nih sa hrim hrim chuan thlum leh thau lampangah insum la, a aiah thei leh thlai hring ei tam la, blood pressure sang lakah i fihlim anih chuan nitin bawnghnute no hnih in thin ang che. Kaw ruah laia tui lum pip pep nitin in pawh hian pumpui lawng tur a veng bakah vunin a ngeih em em a ni.

Kum naupang lamah awm tho mahse a bikin kum upat lam chuan sam tuak te a lo awm a, a theih hram chuan pawt lo ang che. Sam tuak pakhat i pawh khan a letin a lo pung thei a, a thak viau te anih loh chuan a bul teah khan sakawrbakchehin tan la, anih loh vek pawhin dye emaw hair colour hmang ang che.Upa mah la, i sam enkawl la, ther pheng phungin dah lo hram ang che. Sam pheng tak hi chu kum naupang tak tan pawh a nalh lova, kum upa tan phei chuan lan upat lehzualna pakhat a ni. Kum 30-40 han kai tawh chuan vun pawhin a lo tuar ve a, vun pawh a hma aiin a lo ro tawh thin. A hma zawng aiin mawm inchulh ngun la, moisturiser pawh a chak chi hmangin olive oil inchulh ngun hle bawk ang che. Olive oil mai bakah baby oil hi vunin a ngeih hle bawk. I kamsir, mit vun leh nghawng te hi kum upat lan hma na a ni a, mawm hnawih hnem bik ang che. Kum upat hma atang hmai enkawl ang bawkin nghawng hi enkawl uluk tur a ni a, hmai vun mar tha viau mahse nghawng a chuar tlat si chuan lan naupang tur ang aiin a lan tar tlat theih a ni. Tin, kartin vun ro tana siam face mask hmang ziah bawk ang che.

Mahni kum mila inchei thiam hi a pawimawh hle bawk a, kum naupangtein senior zawkte tih anga a inthuam ve ngawt chuan a mawipui lova, chutiang bawkin kum upa lam tan tleirawl thei ang bera lo inthuam ve hi thil mawi ber a ni lemlo thei bawk. I incheinain mahni inrintawkna a pek che a pawimawh bawk a, i inrintawk loh chuan i thuamhnaw inbel kha man to tak tak ni mahse i mawipui ngai lo ang. Tlereuh te pawh hi a mawi tawk a awm a, neih zawng zawng inbel mai te hi kan mawipui hauh lo a nia.
Kum upat tawh lama pawimawh ber pawl chu 'rilru sawizawi' thiam hi a ni a, pasal fanau te hlim taka i enkawl piah lamah nangma duhzawng tih thin theihnghilh miah suh ang che. Chu chuan nasa takin nangmahah thathona a siam che ang a, i hlim bakah i hrisel sawt bawk ang. Hnam fing zawkte chuan kartawp lam te hi an hmang thiam tawh em em a, chhungkhat laina leh thiante nena intihhlimna hun atan hman thiam a tul a ni.

TRAVEL TIPS
Zin dawna hmanhmawh taka insiam hian theihnghilh neih rem rum a awl hle a, i pumpelh theih nan i kentur atana i duh leh mamawh te kha ziak chhuak vek la, i thawmhnaw ken tur thlengin. Chutah han inla khawm la, i mamawh ziahchhuah atang chuan chhui nawn leh ang che. Neuh neuh ho remkhawm hnuah i thawmhnaw ken tur chu a tawp lamah nawt chauh la, a hmasa lama i nawh fel mai chuan a lo chuar leh hman tawh thei a ni. I thawmhnaw ken turah pawh nawh ngai lo tur--jeans, kawrlum leh towel etc. te kha chu a hnuai lamah dah la, kawr zang apiang a chung lamah dah zawk ang che. Kawr chuar hma chi ang hi chu i nawh zawh velah lehkha puanin tuam la, a chuar nasa tur a veng thei ang.

Zinchhuah nikhua chuan hmai leh vun enkawlna hun te a lo tlem tawh thin a, hmai hrukna atan wet tissue hi a tha khawp mai. Face wash leh face scrub pawh a tangkai thei hle a, hemi pahnih te hian i hmai fai takin a vawngthat sak che mai bakah hmai bawl tur lakah a veng bawk ang che. Cream/lotion i ken tur chu i zinchhung daih turin bur te zawkah dah la, a remchang hle bawk. Zin veivahnaah inhliam/intih pem te a awm theih avangin lapua, dettol, bandage ken theihnghilh lo la. I pum i sawisel anih phei chuan pum damdawi bakah nachhawkna pangngai keng ngei bawk ang che.