Zalenna sualin Mizo nulate

"Zalenna hi kan chhungkua hian kan tuipui reng reng a, khatia Hnam Movement a lo chhuah pawh khan a tir phat atangin kan chhungkua khan kan buaipui a, tichuan ramhnuaiah ka chhuak ve ta a ni mai," tiin zalenna sualtu hmeichhia - Lalthlamuani chuan Zozam Weekly a hrilh.


"Ramhnuaiah chuan kan tangkai ve khawp mai; a tir lamah kha chuan meizial kha kan zial nasa. Awl kha a awm lo a, hmeichhia kha chuan nu chan kan chang a ni ber mai. Kawr tet te kan thui a, rem leh rem lova bungbu kut chunga thui chang te pawh kan nei. A tul tul kan thawk a, inchhungkhura nu dinhmun ang deuh hi kan dinhmun chu a ni mai ti ila kan daw lo ang," a ti bawk.

Zoramin zalenna a sual lai khan hmeichhiate pawhin a theih ang angin tha an thawh ve a, khatih hun laia hmeichhe tleirawl leh nulate kha ramhnuai sipaite hrai puartu ber, ti ila kan sawi sual tampui awm lo e. Nula leh tleirawlte kha, bawng vulh hauh lo pawh, bawng khalh tur ni awm tak tein ramhnuai lamah chawfun nen an inak chhuak a, tichuan, ramhnuaiah Mizo sipaite kha chaw an va pe thin. Mizo sipaite'n khuaah chaw an zawnin anmahni lo hraitu ber pawh hmeichheho an ni. An tangkaina kawng sawi tur tam tak a awm ang, chu'ng zingah chuan an rammut thu hi a bang thei lo ang. Amaherawhchu, zalenna suala Mizo hmeichhiate rammut thu hian hriat a hlawh lo viau thung.

Zalenna suala Mizo nulate rammut thu hian hriat leh chhinchhiah a hlawh lo hle, anmahniho-a tak pawh, thiltithei dinhmunah an ding zui vak lo nen, an inpho langsar lem lo. Hna hrang hrang thawkin an khawsa a, a then phei chu an thi tawh. A la dama te pawh 'Mizo nu' takin mahni awmhmunah an khawsa melh melh a ni ber.

Zoram buai tirh lam, 1966-1968 chhung khan rammu zingah hmeichhia 50-60 bawr an awm nia hriat a ni a, mahse, engemaw zat an kir leh thung. 1969 kumtir, MNF-hovin East Pakistan an thlen thlak hnuah chuan an tlem ta hle, an zinga a chanve vel chauhvin East Pakistan hi an thleng niin a lang. Zozam Weekly-in a hriat theih chinah chuan zalenna suala rammu zingah khan hmeichhia 57 an awm a, mi 19-in East Pakistan an thleng. Pasalte zuia chhungkuaa khawsa an awm nual a, chu'ng chu chhiar tel an ni lo. Mahnia chhuakte chauh chhiar an ni.

Hmeichheho kha nurse, army leh staff assistant-ah te an awm hlawm a, office-a thawk, deputy secretary pakhat a awm bawk. Tin, general duty tia sawi an awm nual bawk. Hna chanpual an nei hlawm a, amaherawhchu, a remchan dan ang zelin hna dang pawh an khawih thin tho. General Duty tih hian an hna kha a fun kim ber awm e, a tul tul an thawk a, an theih ang angin Mizo nuna hmeichhe hna an khawih thin a ni.

Hriat theih chinah nurse kha 9 an awm a, anni hi Durtlang damdawi in atanga nurse hna zirchhuak, Tinsangi'n a ho a ni.

East Pakistan an thlen hnuah Mahmuam khuaah damdawi in an hawng a, hetah hian Tinsangi chuan damdawi in enkawl pahin midang zirtir hna a thawk thin. Midangte chu chuta zirchhuakte chu an ni hlawm. Hmeichhe nurse 8 bakah hian male nurse 3 an awm; Tanpuia, Nghaka leh Unionthanga te.

Heng hun lai chanchin hi sawiin Tinsangi chuan, indonaa hliam bakah hrisel lohna neuh neuh nei an awm nek nek a, an indaih lo thei hle niin a sawi. Doctor tel lova damlo enkawl hna, inzai thlenga thawh chu a hautak thin hle niin a sawi bawk.

"Hliappui kan zuk thlengthla ta a, Hliappui ramah chuan ruh them thi ka va zai a, a damchhuak hlauh mai. Mahmuamah chuan damdawi in kan nei a, damlo an tam si a, kan indaih lo chuan training kan inpe ta a, nitin tlai dar 3-ah chu chu kan nei thin," tiin Zozam Weekly a hrilh.

'Sister' tia vuah, Tinsangi chuan: "Damdawi inah khan thi an awm lo a, ka chhuang ve hle. Pathian hnathawh tak tak a ni," tia sawiin, nurse hna a lo zir te pawh chu "khang atan khan Pathianin min lo duh a ni" a ti bawk.

Ramhnuaia a chhuah hma pawhin ani hian Aizawl velah ramhnuai sipai hliamte enkawl hna a theih ang angin a lo thawk tawh thin a, chu'ng atanga lo hriain MNF hruaitu thenkhatin an sawm a, chu chu a chhang ta a ni.

"A bul takah chuan damdawi lam te ka lo zir ve tawh avangin, an mi tih dan takah chuan, 'damlo enkawl tur an awm dawn avangin kan mamawh che a ni' an ti a, 'a nih tak chu' tiin ka chhuak ta a ni," tiin ramhnuaia a chhuah dawn lai vel chanchin a sawi.

MNF sipai hliam a lo enkawl thin avang khan hektu an awm tih sawiin, chutiang vel boruakah chuan a chhuak ta tih a sawi bawk.

Rammua chhuak hmeichhia, Zozam Weekly-in a biakpawhte chuan zalenna suala an chhuah chhan chu ram leh hnam an hmangaih vang niin an sawi hlawm.

Rebeki, ramhnuaia staff assistant thin chuan: "Sawi leh chuan tur vak pawh a awm lo - ram leh hnam hmangaihna vang a ni mai," tiin ramhnuaia a chhuah chhan a sawi.

An chhungkaw chanchin sawiin Rebeki chuan, a nu chu independent thlahlel ngawih ngawihtu a nih thu a sawi a, chu chuan amahah nghawng a neih thu a sawi bawk.

"MNF chhuah hma pawhin, ka nu hi 'naktuk hi independence day a ni a, Lammualah kal vek tur' tia tlangau an au te hian 'sala kan tan ni a nia' tiin a tap tlaivar thin," tiin a seilenna chhungkaw chanchin a sawi. India Independence Day chu Rebeki nu hian 'sala tan ni'-ah a ngai a ni. Rebeki u-te pahnih chu MNF office-a hmeichhe thawk hmasa ber an ni.

Ramhnuai sorkara deputy secretary thin, C Lalthlamuani pawhin "ram leh hnam ka hmangaih vang" tiin ramhnuaia a chhuah chhan Zozam Weekly a hrilh ve bawk.

Ani hi 1963 November thlaah khan Dibrugarh-ah a zin a, chumi tuma mi ramin hma an sawn nasatzia te a'n hmuh chuan, Mizoram dinhmun la hniam bikzia ngaihtuahin, 'Assam sorkar hnuaia awm theuh theuh' tih ngaihdan a nei tan ta a, Mizoram tana ke pen ve duhna rilru a pu tan ta a ni.

Tichuan, 1966 June thlaah a hnathawh lai, zirtirtu hna bansanin MNF a zawm ve ta a, hemi kum hian Chief Commissioner Office, Run Bung an tih, Northern Area-ah clerk hna a thawk. He hna a thawh chhung hian MNF thil pawimawh tam tak a kutah a awm a, a hna ber chu lehkha chhut leh 'document' pawimawh enkawl te a ni. A kutah hian thuruk tam tak a awm thin.

1967-ah an hotute chuan, ‘lehkhathiam i ni a, hna pawimawh tak kan pe ang che’ tiin Excutive Secretariat-ah deputy secretary-in an dah ta a ni.

Deputy secretary a nih chhung hian rambuai vangin Mizoramah sorkar thuin sikul te khar a ni a, amaherawhchu, sikul hawn lehna thupek chu MNF lam atangin chhuah tura rel a ni thung. Tichuan, deputy secretary chuan 1967 January-ah Sialhawk atangin sikul hawnna thupek a chhuah ta a, hemi tum hian All India Radio chuan ‘Lalthlamuani intiin sikul hawnna thu a rawn chhuah’ tiin a puang nghe nghe.

Sikul hawnna thupek hi a hlawhtlin loh avangin 1968 June ni 1-ah Tuibual Police post atangin chhuah nawn a ni a, chief administrator a awm loh avangin a aiawhin Lalthlamuani hminga chhuah a ni.

C Lalthlamuani hi MNF signatory zinga mi C Vanlalzika nen an rammutna lamah hian an innei a, ramhnuaiah hian fa te pawh an nei a ni. C Lalthlamuani hian April ni 9, 2007-ah khan khawvel a chhuahsan.

Anni ang bawkin defence minister, army chief ni bawk R Zamawia leh rammua chhuak Lalthlamuani te pawh an rammutna lamah hian an innei ve bawk.

Lalthlamuani hian kum 17 a nih laiin hnam sipai a zawm a, hnam sipaite'n Champhai an lak ni - March ni 14, 1966-ah a zawm a ni. Amah hi Champhai nula a ni a, ramhnuaiah hian Eastern Command-ah a awm nghal. Chuta tangin army headquarters-a awm turin a chhuk ta a ni.

A tira tarlan tawh ang khan anni chhung hian Mizo Hnam Movement hi a tuipui hle a, ani pawh hian naupang te mah ni se a tuipui hle. Ram leh hnam tan ramhnuaiah chuan a chhuak ve ta a ni.

"Champhaiah volunteer turho training an pek lai pawhin ka tel ve a, a boruak khan min nuai hneh khawp mai. Hmeichhia kha kan awm ve nual a, silai te pawh kan kap ve. Tin, silai thiah leh hawn te min zirtir a, min remkhawm tir leh a, first aid lam min zirtir bawk a, a rem rem kha min zirtir a ni mai a, sipai rengrut ang hi kan ni mai. Zalenna puan hma khan Champhai damdawi inah MNF ang ni lovin, a rukin kan lo che ve lauh lauh thin bawk. Tiang chuan inbuatsaih sa thlapin kei chuan kan hnam movement kha ka zawm a ni," tiin ramhnuaia a chhuah dan a sawi.

"East Pakistan a tlawm tak hnu khan hmeichheho khan hnawk chan kan chang ta deuh a, Arakan thleng thla kha chu kan tam ta lo," a ti.

Khatia ramhnuaia a chhuak kha a inchhir lo a, mahse, lehkha a zir san loh phah erawh pawi a ti thin. "Inchhirna ka nei lo; zirna kan chhunzawm thei lo erawh hi chu ka ui thin. Amaherawhchu, kan tih theih sang ber ram leh hnam tan kan pe tihnaah ka ngai a," tiin hemi chungchang hi a sawi.

Zalenna sual chhan - 'self determination' chuan vawiin thlengin a lung a la len a, "Hei hi chu kan chanvo, kan hnam chanvo liau liau a ni," a ti.

MNF sipai zinga hmeichhe pakhat, ralthuam lek ve ngat, Hrangzovi pawhin ramhnuaia a chhuah chhan chu ram leh hnam a hmangaih vang a nih thu a sawi ve bawk. Amah kawmtu Hmingthanzuali, research scholar chuan, "Mizoramin hmasawnna tak tak a neih theih nan te ke pen tul a ti a, zalenna neih ngei a tul nia hriain 1966-ah khan MNF-ah a hming a ziak lut a ni," tiin a sawi.

Ramhnuaiah khan hmeichhiate hian enhran an hlawh lo a, mipaho khan anmahni angin an en ve mai nia an hriat thu an sawi hlawm.

"Mipa leh hmeichhia kan inen dan a hrang miah lo. Chaw lo tui lova khawsaho, kan neih ang ang insemtlang thin kan ni a, kan inhmangaih a, vawiin thleng hian kan la inngaina ngawih ngawih a ni," tiin C Lalthlamuani chuan hemi chungchanga Zozam Weekly zawhna a chhang.

Rebeki chuan a tul tul an thawk a, mipate pawhin buh an thlei ve lawp lawp tih sawiin, inthliarna a awm lo niin a sawi a, "hmeichhiate'n ngaih pawimawh kan hlawh loh ka hre lo" a ti ve bawk.

Hrangzovi chuan hna reng reng hmeichhia a nih vanga thawh theih loh neih a tum ngai lova, riahbuk sak a tul chang pawhin mipate'n puih tum thin mah se a duh ngai lo. "Chempui ka nei a, kut leh ke ka nei a, mipain an tih theih chu ka tih ve theih lohna tur ka hre ngai lo. Keimah ngeiin ka ti ve mai thin," a ti.

Hetih lai hian hmeichhe pakhat, a hming tarlan rem lo chuan East Pakistan an thlen thlak hnuah khan hmeichhiate hnawk tihna awma a hriat thu a sawi ve thung. Chu nu chuan Mizoram chhunga an awm lai chuan an inlungrual tlang a, East Pakistan an thlen hnuah erawh hmeichhe ngaitheilo an awm niin a sawi a ni. Eng nge a chhan erawh sawi tur a hre lo. East Pakistan an thlen hnuah khan nupui-pasala innei an awm nual a, chu pawh chu ani ngaihdanah chuan, hmeichhe hnawk tihna a awm avangin hmeichhe tan chuan pasal neih mai kha a him vang a ni.

Ramhnuaia an chhuah vang hian an nih tur ang an nih loh phah hlawm. A thenin an zirlai an kalsan a, an thenin an hna an bansan bawk. Chutih laiin, Zozam Weekly-in a biakpawhte atanga a lan dan chuan, chhungkua atangin he'ng mite hian dodalna emaw an tawk lo thung.

Tinsangi chu sorkar hnuaia nurse hnathawk lai a ni a, a lo haw hnuah re-instate-in thawk leh mah se a hloh hnem hle. Arrear pawh kum hnih emaw chauh a la. Tunah hian pension-in a chhuak tawh a ni. C Lalthlamuani pawh Sihphir Middle School-a zirtirtu a ni a, ani phei chuan a hna a chan hlen. Rebeki chu Republic High School-a pawl 7 a zirlaia chhuak a ni a, "lehkhathiam lovin kan awm phah a nih hi" tiin a sawi nghe nghe. Tin, nula hrisel pangngai tak ni thin, bawrhsawm ta hle an awm nawk bawk. Mahse, tuma'n an inchhir thu an sawi lo, an chhir loh thu an sawi vek zawk.

Hmeichhe rammute
1. Thangthuami D/o Liankhuma
2. Biakliani D/o Khawbuaia
3. Vanrammawii D/o Liandawla
4. Romani D/o Neihliana
5. Lalchhani D/o Chhingpuia
6. Dengziki D/o Turuma
7. Rinpuii D/o Lalbuanga
8. Thanghrangi D/o Saihnuna
9. Hmangaihzuali D/o Khualthangchina
10. Sanghliri D/o Rohluta
11. Thanzami D/o Kapliana
12. Lalawmpuii D/o Liandailova
13. Chawngpari D/o Chawngbuanga
14. Nunengi D/o Lamgina
15. Lalchhungi D/o Paliana
16. L Thansangi
17. Thangmawii
18. Rinthangi D/o Rokhuma
19. Darchhingpuii D/o Dengkunga
20. Chhungi
21. Sapzari D/o Sapkhama
22. Darzikpuii D/o Vanbiala
23. Darnghilhlovi D/o Dengkunga
24. Rebeki
25. Darhmingthangi D/o Khara
26. Ronghaki
27. Lalropuii
28. Parkungi D/o Zamana
29. Lallawmi D/o Hrangkunga
30. Chuhthangi D/o Laltanpuia
31. Biaknungi D/o Hrangliana
32. Lalbiakliani D/o Robert Zodinliana
33. Lalziki
34. Sangpuii
35. Kapzauvi
36. Nelziki
37. Vari
38. Saichhingi
39. Sangthangi
40. Biakthangi
41. Zosangliani
42. Ramliani
43. Rozami
44. Sawiziki
45. Tinsangi
46. Lalthlamuani W/o R Zamawia
47. Chalmawii W/o Kapkima
48. Rami
49. Lalchhawni
50. Lalhlupuii
51. Tangmawii
52. Biaksangi (L)
53. Lalpianmawii
54. Hrangzovi
55. Suakthuami
56. Kapthuami
57. C Lalthlamuani (L)
Heng mite hi Zozam Weekly-in a hriat theih chinte an ni.



Mizo hmeichhia East Pakistan thlengthlate
Hming Hna Address
(i) Tinsangi Nurse Dinthar
(ii) Lalramliani Nurse Missionary-in a chhuak
(iii) Lalchhawni Nurse NE Khawdungsei
(iv) Lalhlupuii Nurse Thenzawl
(v) Thangmawii Nurse Kolasib
(vi) Zahmingliani Nurse Lengpui
(vii) Biaksangi (L) Nurse Aizawl Tlangnuam
(viii) Lalpianthangi Nurse Lunglei
(ix) Lalthlamuani Nurse Tuivamit
(x) Hrangzovi Army Saitual
(xi) Thansangi Army Kanaan
(xii) Biakthangi Army Saitual
(xiii) Chalmawii Army Chawlhhmun
(xiv) Rebeki Staff Assistant Dawrpui Vengthar
(xv) Suak\huami (L) Staff Assistant Champhai
(xvi) Sawizingi (L) Staff Assistant
(xvii) Kap\huami (L) Staff Assistan Kanghmun
(xviii) C Lalthlamuani Dy Secretary Mission Vengthlang
Heng mite hi Zozam Weekly-in a hriat theih chinte an ni.

Long Leave Without Pay

¢ C Lalthlamuani

Zoram tana zalenna suala kan rammut lai te kha ka phak tawk te tein ka thlir kir ve thin a, lunghlui te pawh a leng ve thin. Chu'ng lai huna ka thil tawn thenkhat chu ka thiam ang tawkin ka'n sawi ve teh ang. A then Mizoram chhunga mi a ni a, a then erawh East Pakistan lam a ni thung.


Khatia kan rammut lai khan kan khawsak dan kha a hrehawm leh hrehawm loh lam reng reng kan ngaihtuah chang lo a, a remchan dan ang angin kan khawsa naw naw zel mai a ni a. Vawi khat pawh, 1967 January thlaah khan sipaiin kan camp an rawn hual dawn tih kan hriatin chul ramah chaw ei turin kan inbuatsaih a, kan kil bial laih mai a. Chingit kung hnah no buk lian tak mai hi a laiah an sawh phun laih mai a, chi nen puar takin kan ei ve mai asin!

Tawi tlang puka kan awm min umchhuah tumin kan tlan darh nasa hle mai a. Maite khuain min rawn zawng a, nula pakhat a kim loh thu an sawi ta mai a. Mahse, ka hming an han lam chuan tlangval emaw an tih kha nula ka lo ni reng mai a! Pa ve tak ka ni thin.

Ral laka sahim nan zanah eng chhit a ngamawm loh avangin kan rawksai hnungah thing-thla-var kan thiat mai thin a, tiang chuan kan inzui diah diah thin. Vangvat tam thinzia lah chu sawiin a siak lo. Hmun ralmuanga pheikhawk kan han phelh hi chuan puar fe fe hi an lum hal hal mai thin nia!

Ngawpui karah te hian vaihmite an tam thei hle. Thosilen hian a dang zo lo a, an tam lutuk hi a ngap hian a ngap a, a thak mai a nilo, a satin a sa a ni ber e. Ril a tam tawngkhawng tawh hi chuan samtawk lian chi te hi a thlum sar mai hian kan hre thin nia!

Vawi khat, Capital Headquarters kan luah laia min rawn beih hmain ruahpui vanawn hnuaiah kan arsa chhum hmin sa kan ken, ngawpui hnuaia chi tel lova kan han ei mai chu arsa pawh a arsa thei meuh lo a ni ber e. Kan puanthuah te chu kan sawr tlak tlak mai a, chumi tum chuan kan sipai huaisen, Lalzika Sailo leh a thianpa min kahhlumsak hlauh mai a, kan ralti zual ta. Kar khat zet chaw han nghei hnuah chuan kan kal pai kan kal pai ta mai. ‘Ram tan a ni’ tiin kan tuar chhuak ve zel a.

Tiau lui lian nu but but mai kam awih panga kan han ban tai tai zan te kha aw! Rap pelh vaih ila chu Tiau luia tlak luh a ni mai. Sailulakah vai sipai an awm avangin chaw kan nghei lehnghal a, chawah mautuai kan han ring mai chu kan luhai kan tlu phung hlawm mai zu nia.

Vawi khat leh pawh Tlangpuilian leh Tlangpuite inkara kan camp atangin min luhchhuah a, camp hal eng hmuh phak lek atangin kan thlir a. Kar khat zet chaw kan nghei hnuah Sialhawk khaw mipuiin chaw leh artui leh hmarchapui bawl mi rawn pe tui kan tihzia kha aw! Heta ka awmlai hian sikserhin ka na a, ka tlun hluah hluah mai a. Kan damdawi hmuh chhun APC mum khat lek kan ei a, ka dam phah ve hmiah mai bawk a!

Helai hmunah vek hian kan chawhmeh neih loh avangin thenkhatin khanghu pil an lo thel a, chu chu kan buhchiar a, tui kan ti em em tho. Upaten ‘tam tawk apiang a tui’ an lo tih hi a dik ngawt mai.

December ni 26, 1968-ah Tiau leh khawchhak tuipui te, Aizawl - Lunglei kawngpui kanin East Pakistan kan pan a. January ni 11, 1969-ah Lungtian kan thleng a, Chhippui, Mauhmuam leh Ngawpui-ah te kan khawsak phawt hnuah Rangamati kan thleng thla a. Rangamati-ah hian ralmuang deuhin kan awm ve a; mahse, chutia ralmuang taka kan awm lai chuan an ram a buai ta mai a. March ni 25,1971-ah chuan Bangladesh chuan beihpui an thlak ta thut mai, tichuan keini pawh chu kan buai ve ta rum rum mai a ni.

East Pakistan a lo tlawm tak hnuah phei chuan Rangamati kan chhuahsan a lo ngai ta a. Tatkawng lui chu lawngin kan zawh mup mup mai a, chutih lai chuan Takam (Chakma) helhovin min lo kap vak mai lehnghal. Takam-ho chul awih tlanah tlan chhovin awih pang letliam kan thleng chu kan tlu rawk rawk mai a. Chutah kan sipai huaisen te thin a rim a, Takam-ho camp chu luhchhuah rawk khawpin an han bei mai a, thla an va timuang tak em.

Chumi zan chu thlamuang takin kan mu a, a tuk zing vartianah lawngin kan chhuak leh nghal a. East Pakistan Rifles (EPR) camp rauhsanah chaw kan ei a, hetah hian Mizoram lam kal tur leh Arakan lama kal turte inthen a la ngai ta. Kan ram pana nunauho kan haw tur zet chu mittui a tla zawih zawih mai. Kan ram tana kan inpekna ka ngaihtuah chuan ka lung a chhia a, ka tap ta zawih zawih mai a. Kan hotuten, "Long leave without pay-in in kal ang a, ram leh hnam tan rinawm takin in lo awm dawn nia," tiin min thlah a.

Chutah Mizoram lam pana kan han kal chiah chu vai sipaiin min rawn kap ta chiam mai. Chho zawngin kan tlan a, silai mu lah chuan min thawi thuak thuak reng mai si. Ka puakpuan a phelh palh a, ka fapa, thla riat mi ka puak chu ka thlauh ta mai a. ‘Min rawn kap fuhin kei chu lo thi ta pawh ni ila ka fapa hi chu a him ang a, a pa tan a hlu dawn em mai’ tih rilru puin naute chu ka bawhbet ta ringawt mai a. Ka tlakna bulah chuan kan sipai huaisen pakhat hian position a rawn la ve nghal vat a, zam lo turin min fuih reng bawk a. Chumi lai chuan kan pa chu silai mu leng karah a rawn tlan thla a, min rawn kaithovin min kai a, min tlanpui ta a ni.

Silai mu karah kan pain min rawn hruaichhuak ngam hi a ropui ka ti. A nupui leh a fate tan a nun a thap ngam tlat!

Vanneihthlak takin bahra khur thar tak mai a lo awm hlauh a, tah chuan kan ding ta a. Nau ka paw tha a, tichuan tukhum phe lawp lawpin kan tlan leh ta chiam mai a. Chutih lai chuan kan thlang lawka ka tluknaah khan mortar bomb a puak dur mai a, naute chu a tah pawh a tap ngam lo nia.

Vawiin thlenga ka theihnghilh theih loh pakhat chu, Tiau kam, Dawn rama kan awm lai leh Biate dai vela kan awm laia Pu Malsawma Colney a rawn kal changa, "Muani, thingpui lum rawh le, Pi Thauvi (Pu Malsawma nu) thingpuife ka rawn hawn a ni,’ a tiha thingkhawilu pil sak sen mai ni lo, Pi Thauvi thingpuife ngei mai tui ti taka kan in thin te kha a ni. A hlu thin teh a nia.

Heng bakah pawh hian ziak tur a la tam mai; mahse, kan ziak seng si lo. Khatia chaw lo tui lova kan lo vahvaih rah khan kan ram hi khawvel hriatah a phochhuak ve ni te'n ka hre thin. Kha'ng kan mi huaisen te'na ram leh hnam tana an thawh te kha thangtharte hian rawn chhunzawm zel teh se.

Remna Ni ka pawm lo: L Malsawma Colney

Mizoram chuan June ni 30 hi Remna Ni tiin a serh thin. MNF leh India sorkarin remna an ziak ni a ni a, sorkar pawhin he ni hi chawlhah a puang thin. Chutih laiin Mizo pa lar L Malsawma Colney chuan he ni hi engah mah a ngai ve lo. A ngai ropui lo mai a ni lo, a ngainep a, a thin a tirim hial.


"June ni 30 hi ram hralhna ni a ni," L Malsawma Colney chuan a ti.

"Remna Ni a ni lo. India laka kan ram kan hralhna ni a ni," a ti a, "Hei vang hian kan chhiatna hrang hrang, rukruk te, milem biakna te a lo lut a ni," a ti bawk.

Zalenna sualin ramhnuaiah a chhuak a, ramhnuai sorkarah dinhmun pawimawh tak tak a chelh thin. January ni 25, 1979-ah MNF president atan thlantlin a ni a, he nihna hi a chelh rei ta lo thung. Ramhnuai sorkar hruaitute thu a inhmu ta lo a, March ni 11, 1979 (Pathianni) zanlaiah L Malsawma Colney chu silai hmangin a hote'n beiin, a nihna an hlihsak ta a ni.

Mahse, L Malsawma Colney chuan Zofate zalenna a la tuipui a, India hnuaia awm turin Zoram hi a la phal lo. MNF president-ah thlantlin a ni a, dan lovin, silai hmanga paihthlak a ni a, chu chu a pawm thei lo. Vawiin thlengin MNF president-ah a la inngai. MNF leh India sorkar inremna pawh a pawm ve thei lo a, Remna Ni pawh a tan chuan pawm ngaihna a awm lo.

"Mizote hi India mi kan ni lo," tia sawiin, "Hemi ni-ah hian kan ram chu vaiho lakah kan hralh a, hei hi a sawi ngam kan mamawh. Keini chuan independent kan duh a, chu chu kan sual a ni. Milem nih kan duh tur a ni lo," a ti.

"MNF hian thil tum pathum kan nei a; Mizo hnathlak hrang hrang, ram insi-a awm reng si, ramriin a thendarhte hi insuihkhawma, thuneihna hmun khat-a rorelna sang ber hnuaia awmho hi MNF thil tum pakhatna a ni," tiin a sawi a, Israel fate'n ramtiam an thlir ang khan Malsawma Colney chuan hei hi vawiin thlengin a la thlir reng.

'Map of Zoram' a siam a, chu chu "Mizo Hnam Movement chhunzawmna a ni," a ti. Chu map chuan hmun hrang hranga Zofate chenna hmun a huam; khawthlang lamah Bangladesh-a Chittagong Hills vela Mizo khuate a chuang a, Tripura-a Sakhan tlang dung leh Jampui tlang dung te a huam bawk. Hmar lamah Cachar Hills-a Mizote chenna zawng zawng, khawchhak lamah Burma rama Chin Hills-a Mizote khua leh Manipur-ah Churachanpur leh a chhehvel te a huam a ni. Chu'ng zawng zawng chu insuihkhawma mahnia ro inrela awm chu Malsawma Colney rilru luah tlattu a ni a, chuvangin MNF leh India sorkar inremna pawh a pawm ve lo.

"Pathian hmingin ram leh hnam tan kan inpe a, mahse, Mizo Hnam Movement chu tihbuai a ni a, hmala ve thei lovin kan awm ta a ni," tia sawiin, "Awm mai mai thei kan ni lo; Zofate kan insuihkhawm leh theih nan a theih ang angin hma kan la tur a ni," a ti a, "Kan ram chin hi fel takin siam ila, kan awmna chin hi fel takin ramri siam ila, UN-in 'khawi nge' a tih pawha show tur neih a ngai," tiin Zoram map a siam chhan a sawi a ni.

"Mizoram president atana thlan ka ni a, dik lo takin min paihchhuak a ni," a ti a, Mizo Hnam Movement chu tawp mai turin a phal lo. Chuvang chuan Remna Ni pawh a pawm ve lo.

Mizorama Hnam Tenaute Leh Helna

¢ Dr Lalthakima, Asst. Proffessor, Deptt. of Pol. Science, Pachhunga University College

Mizoramin hun harsa tak paltlanga India nena kan inremna ni lawma hun kan hman thin lai hian remna hlutzia leh hmasawnna hnukpui a nihzia chu kan hre theuh awm e. Indona vangin thisen tam tak a luang a, nunna engemaw zat hloh a niin hrehawm sawi hleih theih loh a hre phak te chuan an tuar a. Chumi atanga chhuahna dar khawng ritute kha an fakawm ngawt mai. Hetih lai hian Mizoram chhungah ngei, vai lakah ni lo Mizoram sorkar lakah helna a chhuak a, chumi vang chuan nunna leh sum leh pai bakah hun engemaw zat sen a ni tih hi kan hriat tel a tha awm e.


Mizoram hmar lamah kan unau ‘Hmar’ te'n Autonomous District Council ngiatin hun engemaw chen an rammu a, anni hnu lawkah hian khawthlang lamah ‘Tuikuk’ tia kan hriat lar zawk ‘Bru’ te'n chu dinhmun vek ngiat chuan an nunna thapin tan an lo khawh ve thung a. Tun dinhmunah hian thilhlui te pawh a chang dawn dawn ta a, mahse heng thil lo thleng tawh pahnih atang hian zir tur awm ngeia a lan avangin remna tluantling neihna zel tur a nih beiseiin he thu hi i’n chhiar dawn teh ang.

HMAR: Khawi lam mi nge hmanah heng hi?
'Hmar' tih tawngkam hrim hrim hi a tirah chuan hnam hming niin a lang lo a, British-hovin Old Kuki an tih, Lusei hnam peng chi khat an ni. Tuna Mizoram kan tih hmunah hian a hlawpin an lo pem thla hmasa a, Lusei hnam nawlpui an lo thlen thlak hnuah a lo awm sate chu hmar lamah an tawlhkiang ta a,chuta tang chuan ‘Hmar’ tih hnam hming hi an put ni ta maiin a lang.

Hetia Lusei nawlpuiin Mizoram an thlen thlak avanga a lo awm sate hmar lama an tawlh hian a then chu an thleng ril deuh a, Meghalaya lam lam te pawh an thleng a, Cachar leh North Cachar Hills (Assam) ah te, Tripura, leh Manipur-ah te an awm darh ta hlawm a. Engemaw zat chu Mizoramah an chambang thung a ni. Mizo historian kan neih te'n an chhuinaah reng reng Hmar te hi hnam hrang hlak anga ziah an ni ngai lo a, Rev Liangkhaia "Mizo Chanchin"-ah phei chuan Lusei lo pem thlate hlauh avanga hmar lama inbengbel ta leh an hnam hming ‘Hmar’ tih pawh pu chawp ta niin chiang takin a ziak a ni (See. Liangkhaia, Mizo Chanchin P 180). Hetiang taka Lusei nawlpui nena hnam inunau leh inlungrual ta chu Hmar te hian hnambil rilru an pu har viau a, Kum 1986-a Hmar People’s Convention (HPC) a lo din hma phei kha chuan Mizoramah Hmar hnam behchhan party hi a la ding lo hrim hrim a, hnam bil anga politics an tuipui ve tanna pawh hi Manipur lam hmar-ho vanga an neih chawp ve mai a ni tih a hriat. Manipur-ah khian Hmar hnam nawlpui an cheng a, thisena unau ta chu anni vanga Hmar movement pawh hi lo awm ni hialin a chhut theih.

A chin chhuakin
Hmar hnam te hi an rilru a hran loh em avangin Mizorama political party hmasa ber Mizo Union, April ni 9, 1946-a a lo din khan Manipur lama Hmar hnam awm te pawhin an zawm ve mai a, Mizo Union unit te pawh ding vein, hei bak chu a hranin hnam bil political party an nei lo. Hetia Mizo Union an zawm vakna chhan hi hmun hrang hranga Mizo awmkhawmho zai khata luanna tura ramri thar an kham theih beiseina vang a ni.

Khatih laia Lushai Hills hnuaia awm an duhna khan Manipur premiere PB Singh-a pawh a tibuaiin Mizo Union an bansan chuan Regional Council pek hial a tiam nghe nghe a ni. Mizo Union hruaitute pawhin he thu hi hriain hruaitute zinga mi HK Bawihchhuaka chu Manipur-ah an han tir a, Mizo Union hruaina hnuaia Mizo District Council lo piang tura beiseiah an tel tur thuin a han hmin thlap a. Hmar-ho pawhin Manipur premiere-in a sawihmuh Regional Council chu Manipur thuneihna hnuaia kun tur tho a nih avangin an lo hnawl ta bawk.

April 29, 1954-a “Mizo District” siam a lo nih khan Manipur lama cheng Hmar te chuan an beisei ang ngeia Mizo District chhunga rinluh inbeiseiin an lo nghak a, nimahsela, District Council thar chuan ramri awmsa ‘Lushai Hills Superintendent Area’ ramri chu ihe loin a rawn pawm tak mai avangin Manipur-a Hmar-ho chu an sukna ngaiah an la su leh ta rih a, an hrilh pawh a hai hle.

Hun engemaw ti chen hnu-ah MNF-in zalenna an puan khan ‘Greater Mizoram Policy’ chu Manipur-a Hmar te pawhin thinlung taka zawmin an lo tuipui hle a hun engemaw ti chhung chu helnaah pawh an phusa ve hle. Nimahsela, a hma ang bawkin MNF leh India-in inremna an ziah khan Mizote chenna hmun hrang hrang administrative area khata dah chungchangah chuan India Danpui Article pathumnain hemi chungchang hrilhfiahna a neihsa thu leh sorkarin hemi chungchanga thutlukna hran a siam loh thu a inziak ta mai a, Mizoram area atan pawh North Eastern Areas (Reorganisation) Act, 1971 section 6-na hman leh mai a ni ta a, Manipur Hmar te tan chuan Mizorama inchhunluh chungchang chu ‘Thu a tawp e, lumam’ tih ang vel a ni ta a ni.

Hetianga Hmar hnam nawlpui awmkhawmna Manipur lam te'n lungawi lohna an neih tak foah hian an unau Mizoram Hmar te chu hmin chin an lo nei zel a. Hemi hma pawh hian Assam, Manipur leh Tripura-a Hmar te tan a hrana district nawr na hi chu a awm tho a, hetih chhung zawng hian Mizoram lama Hmar te chu an ngurchuai deuh reng thung. Mizorama Hmar te hi sawi tawh ang khan an rilru a hran loh em avang leh mihrang ang ziazanga enna, a Lusei lam atang pawha a awm bik loh vang a ni pakhat a, an dinhmunah an lungawi tawk viau a ni. Nimahsela, kum 1986-a Sakawrdai-a Hmar mipui inkhawmpui chuan Mizoram Hmar Association an neih sa chu political party-ah letin HPC hi an din a. He party a din atang hi chuan a thil tum leh a kal dan hrim hrim pawh a tur ta ngun mai a, Kum 1987-ah phei chuan khatih laia Mizoram governor Swaraj Kaushal-a hnenah Memorandum thehlut-in Autonomous District Council an duh thu chu an thupui ber a ni ta a, hemi hnu hian vawi duai lo Autonomous District Council an duh thu hi Mizoram leh Central sorkar-a hotulute hnenah an thlen ta bawk.

Hetianga an duhna an thlen fo hnu pawh hian an beisei ang an hmu lo nia inhriain March ni 28, 1989-ah leh April ni 18-29, 1989-ah te khan HPC Demand area chhunga khaw tinah ‘Non-Violence Peaceful Bandh’ tia koh chu huaihawt a ni a, he thil kal zelin a nghawngah hian May ni 16, 1989-ah HPC te leh Mizoram sorkar inkarah silai hmetpuaka innghirnghona a awm tan ta a ni.

Heta tanga intan hian HPC leh Mizoram sorkar te inkarah buaina vawi duai lo a chhuak a, July ni 27, 1994-a remna thu ziah a nih thleng khan HPC lam chu mi 44 thi nia record a ni a, hetia inremna an ziah hnu hian HPC hel lo kir leh te leh buainaa thi chhungte chu Rs. singthum theuh pek an ni a, tin, HPC te duh ber Autonomous District Council neihna kawng atan Sinlung Hills Development Council chu din a ni ta bawk.

Tunhnai thil thleng
Hetia HPC te buaina a reh a, mi 300 chuang te'n nunphung pangngai an rawn zawm leh lai hian kum 1995-ah mai khan he inremnaa lungawi lo pawl Hmar People’s Convention - Democratic (HPC-D) an lo chhuak leh ta. A tir teah chuan he pawl ding thar hian Mizoram hmar lama Hmar te tana Autonomous District Council din a ngiat a, mahse, hun lo kal zelah chu ngawt chu duhtawk tawh lovin Hmar hnam te’n state hran an neih theihna tura hmalak an tum ta zel a ni. An thil phutte hi an ti mai mai lo a ni tih lantir nan nikum (2008) September thla mai pawh khan IR sipai pali nunna chu Saipum bulah lak a nih nghe nghe kha.

Buaina tawpna tur Hmar Autonomous District Council
Kan hmar unaute buaina zawng zawng hi chhan hrang hrang atanga lo irhchhuak angin lang mah se a bul berah chuan anmahnia inrelbawlna hran neiha hmasawn ve tawh duhna vanga lo langchhuak a ni berin a lang. Hemi bakah hian an tiatpui hnam peng dangte'n Mizorama dinhmun an luah ang luah ve pha lo nia an inhriatna hi a chhan dang a ni thei ang.

North- East Area (Reorganisation) Act 1971, tihpuitlin a nih khan Mizoram chu Union Territory-a hlankai a ni a, hemi denchhen hian Mizorama hnam tenau dang - Lakher, Pawi leh Chakma te chu District Council pek an ni ve bawk. Hetih laia an tiatpui deuh rual Hmar hnam te’n engmah an chang ve lo nia ngaihna hian an thinlungah engemaw chenah bu a lo khuar tawh a ni.

He an lungawi lohna hi a lehlamah chuan a puakchhuak har ang reng zawk viau a. Hetia a puah keh a, Mizoram sorkat nena inremna an siam hnu pawh hian Development Council ringawt-ah hi chuan an la hmin zan lo tih a hriat hle a. Hei hi chu inremna an ziah angin rei lo te atana (kum hnih) mamawh phuhrukna tur ang lekah Hmar hnam hruaitute hian ngaiin heng an buaina zawng zawng chinfelna tur chu Autonomous District Council hi a nih thu an auchhuahpui ngun hle. Tunhnai maia HPC hruaitu inthlang leh pawhin he thu bawk hi an la tlangaupui a ni. Heti a nih chuan he an thil duh ber hi pek an nih hma chuan tharum thawha beihna lian tak chhuak lo mah se thinlung damna tak tak an chang dawn lo a ang hle.

BRU buaina
Remna Ni lawmin Mizoramin hun ralmuang tak a hmang tawh emaw tih laiin June ni 30, 1997-ah chuan MAP pasarih ngawt mai Bru hnam hel kutah an thi a, Mizo mipui a barakhaihin a rapthlak ngei mai. HPC te nena inremna thuthlung ziak fela sorkarin thlamuang taka kal a siam lain Mizoram khawthlang lama cheng Bru te’n hetiang thil hi an rawn tan ve leh ta a, anni pawhin an duh ber leh an thil tum nia an sawi chu ‘Autonomous District Council’ bawk a ni.

Bru: Tutenge?
Mizoten Tuikuk tia kan hriat lar zawk Bru te hi Mizoram khawthlang lamah an cheng a, an tobul tak hi hriatchian fak chu a ni lo nain Burma rama Shan state atanga lo pem nia hriat an ni ( T Zawna: Bru te leh Chanchintha).

Tripura-ah awmhmun an bengbel a, Mizorama an lo luh hma hian Tripura-a Maian Tlang an tih maiah hmun an khuar a, Tripura lal hnuaiah sipai commander te pawh an nei ve hial a, Tripura lalin Bru te hi a enkawl that vak loh avangin an mangang chu hmun pilril lamah tawlhlut zelin Tripura dep Mizoram lamah an rawn lut a, an inthlahpung ve ta zel a ni tih hi ziaktute pawm dan a ni. A bikin kum 1942-a Tripura lal Ratan Manikya laka an hel atanga Mizoram an rawn luh hi hluar ta nia sawi a ni bawk. Baptist Today-in kum 2008-a a tarlan danin tunah hian Mizoram khaw 80 chuangah Bru te hi mihring 58, 269 an awm niin a tarlang. Heng zinga mi 41,212 te chu Kristian an ni tia tarlan a ni.

Bru leh Mizoram Politics
Bru te hi a tir tak atanga Mizoram luahtu an nih loh avang leh Mizo hnam peng an nih lem loh vang te pawhin Mizoram politics-ah sulhnu an nei lo khawp mai. Tun thleng hian Assembly-ah pawh Bru hnam thlantlin an la ni ngai lo. Anmahni hi khaw hrang hranga an taidarh avang leh an khawsak a hniam deuh avangin Mizoram politics-ah an daihriat a tlem a, an inhnamnhnawih tam lo hle bawk. Tripura lamah erawh chuan politics-ah pawh sulhnu an nei ve viau zawk a, MLA leh Minsiter te hial pawh an han nei ve phak a ni.

Bru hnam nunphung chawilar tur leh an hmasawnna tur a nih beiseiin Riang Democratic Convention Party (RDCP) chu kum 1990 October thla khan Damparengpui-ah din a ni. Kum 1997-ah Saipuilui-ah (tunah he khuaa hi an rauhsan tawh) khawmpui ko lehin he khawmpui hian Autonomous District Council neih chu an resolution pawimawh tak pakhat a ni a, hei bakah hian Bru hmakhawngaitu MLA sawm tal neih an relthlu tiap mai bawk.

Kil hrang hrang atanga thlira an hnam hnufual dan leh sorkar enkawl sikula zirtirtute inthlahdah thu te, Kohhran din sikul te'n Mizo tawng chauh hmanga an zirtir avanga hmasawnnaah an duhsak tak tak lo nia an hriat thu te chu he khawmpui hian chang fek fawkin a tarlang bawk. Bru hnamin kawng hrang hranga an hnufualna atanga chawikang tur leh lei rem an rah ve theih nana kawng awm chhun chu District Council neih chauh hi nia Bru hnam zinga mi hawiharh deuhten an hriat avangin he Saipuilui Conference hian hetiang hian thu an 'pass' ta niin a lang.

Bru hel an awm
Kum 1997-a Bru te'n District Council an ngiat atanga rei lo teah Khatih laia India ram prime minister IK Gujral-a hnenah District council an ngiatna Memorandum an thehlut a, hemi hria hian Mizoram khawthlang lama Mizo khaw hrang hranga thalaite chu October ni 14, 1997 khan Rengdil-ah intawkkhawmin Bru te thil ngiat an duh loh thu an tlangaupui ta a, hemi zan atang hian Bru te hian hlauin Mizoram an chhuahsan ta a ni.

A tukah pawh an chhunzawm zel a, he thil hi AIR Shillong chuan chi leh chi inkar buaina anga puangin Bru te’n hlauhlawpin Mizoram an chhuahsan niin a rawn puang ta a ni.

October ni 20, 1997-ah chuan Dampa Tiger reserve-a hnathawktu Lalzawmliana chu a hnung lama atangin silaia kah a ni a, a kaptute hi Bru hel pawl Bru National Liberation Front (BNLF) an ni tih hriatchhuah a ni. He pawl hi a tir, 2006 October-a an din lai chuan mi sawmpasarih leh silai tlem nei chauh an ni tih hriat a ni. An hotupa hi Vanlalliana, Tuirum-a mi a ni tih hriat a ni bawk.

He inthahna avanga Mizote'n Bru te laka chet thawha Bru-ho umchhuak vak anga sawi kha a awm thin. Nimahsela, a nihna takah chuan Dampa ngaw-a thil a thlen hmaa Bru-ho pemchhuahna hi intan a ni tawh zawk a ni. Tin, heta an pem hi a hnu leh zelah phei chuan anmahni Bru Students' Union te’n chhuak tura an innawr avang a ni bawk. Heta tang hian Bru te’n tharum thawha an chetna chu a hluar zel a, mi an that a, a then an rubo a, lLirthei hal leh thil chi hrang hrang a thleng zui reng bawk. He buaina hi hel pawl te maiah tawp lovin Bru hnam pum pui deuhthaw an inrawlh a, Mizo te chu National Human Rights Commission te, Asian Indigenous peoples Network lamah te mihring dikna chanvo palzut nasa ah puh an ni ta zel a ni.

Helna pawh ka tan hlawkna?
Mizoram sorkar leh BNLF te chuan April ni 26, 2005-ah inremna thuthlung ziakin BNLF mi leh sa 195 te chu July ni 25, 2005-ah Tuipuibari-ah khua leh tui pangngai ni turin lawmluh leh an ni a, heng hel lo kir te hi Rs. 50,000/- pek theuh tur an niin Rs. 40,000/- chu a hu tawk thil pek tur an la ni cheu a ni.

Bru hel mai bakah raltlan intite tana chhawmdawlna tur Rs Vaibelchhe 28 chu sorkar laipuiin a la puan sak cheu bawk.

Hetia chhawmdawlna duham tham tak changa BNLF te an inpek hnu lawk hian Bru hel dang an lo pung ta tuk tuk a. BNLF (Tuisaraia group), Vanrama group leh Vanlalliana pawl, Bru Liberation Front of Mizoram (BLFM) tih te chu member tlem te neiin an rawn ding leh ta tuam tuam mai. Kum 2005-a BLFM a din tirh khan member 5 vel neia chhut a ni a, nimahsela, kum 2006 October thlaa sorkar kuta an inpek meuh chuan mi 804 lai an lo ni leh tawh a, an pung chak lutuk hi ringhlelin Mizoram sorkar pawh mi 100 chauh chhawmdawlna pe turin a inbuatsaih nghe nghe a ni.

BLFM te hian sorkar nena inbiakna an kalpui lai hian an tum ber chu sorkar tihbuai lam ai mahin BNLF te anga enkawlna leh chhawmdawlna dawn ve an tum ber anih thu an sawi a, ‘Cheng sangli kan pe a, hel pawl member-ah kan inziaklut a, he kan pawisa pek hi chu nakinah chhawmdawlna kan dawn hunah kan la let leh mai dawn” ti pawl te pawh an awm ve nawk a ni.

Bru te helna hi a tirah chuan political demand angin lang mah se a tawp lamah chuan a chiri hle a, pawisa leh chhawmdawlna dang it vanga thil ti kual mai mai anga sawi theih an ni tawh a ni.

A hmawrbawkna
Mizoramah hian a ram pum angin buaina kum 20 chuang kan tuar a, inremna hlawhtling tak neiin India rama ‘state ralmuang ber’ anga kan hotute an inchhal ni pawh kan tawng ta. Hetih lai hian kan ram chhungah ngei hnam tenau zawk te'n an chanvo tur mang mang pawh chang pha lo nia inngaiin tharum thawhin an che ta zauh zauh a, hei hian kan dam kim lohzia a ti chiang hle awm e.

Hetih lai hian kawng hrang hranga chanvo chang pha lo nia inhriatnain politics-ah nghawng neiin politics-a a fawng vuantu nih tumna a thlen a, chu kawng zawh tur chuan hnam bil rilrua thunkhahte'n silai an rawn pu leh mai thin. Hnambil rilrua thil kan thlir tawh phawt chuan awlsam taka a tihdamna zawn a har em em tawh a. Mizo hnam pum pui hi zai khata kan luan hova, hnambil rilru kan paih phawt loh chuan he kan ram zimte hi kan la ti buai nuaih reng lo ang tih hi sawi a har khawp mai.

Hetih lai hian sorkar lam pawhin tih tur a nei ve niin a lang, hmasawnna inkhairual lo lutuk te, hmasawnna hnukpui leh thil tha zawng zawng Aizawla awmtir vek tumna rilru te, hnam tenau zawkte’n an aw an chhuaha beng chhutngawn san te leh ramri leh hmun kilkhawr zawka awmte mamawh phuhruk te hi thil tul tak a ni. Mizorama hnam tenau te helna chhuak tawhte han thlir hian ramri hrulah, ram danga hel pawl awmsate puihnaa kalpui a ni deuh ber a, hei hian ramri hrul venhim leh thuam that a tulzia a tilang chiang hle. Aizawl leh a chhehvela mamawh aia tam sipai inekbeng ngheng mai te ai hi chuan a mamawhtu takte hnen thleng tur zawnga hmun remchang zawn a tha hle ang.

Engpawhnise, sorkar lamin theihtawp an chhuah a zarah Mizoram chhunga state sorkar laka helna pahnih chu hmehmih a ni ta phawt a. Kan chheh vela India hmarchhak state dangte ngaihtuah chuan sorkar hian a titha viauin a hriat. Kan chhevel state te hi helna mei mit hlei thei lo thelh tuma buai an ni deuh vek. Chutih laiin Mizoramah chuan pawi tam zawk an khawih hmain hmehmih a ni thin a, a lawmawm hle. Hetih lai erawh hi chuan hel pawlte lam atanga thinlung inpekna tak tak tel loa therhlo uma inpekna mai mai kan hmu ang tih a hlauhawm hle a, chuvangin helna hi dan leh thupek kenkawh chungchang ringawt a ni lo tih hi sorkarin a hriat chian hle a ngai.

Ei leh bar (economic), hnam nunphung (culture), politics leh vantlang nunphung (social life) hrim hrima midangte tluk lo nia inhriatna hian helna a chawkchhuak thin a ni tih hriata kiltin atanga ven ngai chi a ni. Hmalam pana kal mup mupa kan inhriata ‘remna leh muanna champha’ lawma kan zik mup mup lai hian hnam tenaute'n kan buzawl ngeiah him lova an inhriat tlat si chuan kan duh loh hi kan tawng fo thei tih hriat a tha hle.

Mizo nula, sipai lal

Mizo te'n Sipai lal kan neih tlemte zinga mi, Mizo hmeichhe zinga Sipai Major kai hmasa ber Maj Rebecca Lalzarzovi Chhakchhuak hi Hualzika leh Laltlani, Shillong-a mite fa pahnih zinga naupang zawk a ni.


Sipai sikul - Kendriya Vidhyalaya, Happy Valley Shillong atangin HSLC leh HSSLC a zo a, St Mary’s College, Shillong atangin BA (Geog) chu Ist Class-ah zo lehin NEHU-ah pathumna ni. NEHU hnuaiah vek hian MA (Geog) a zo leh a ni. Hetah pawh hian NEHU-ah pahnihna a ni leh.

Kum 2002-ah Chennai-a Officers Training Academy a zawm a, training a zawh hnuah kum 2005 khan Kargil-ah dah a ni. Kum 2005-08 thleng khan Indian Military Academy, Dehradun-ah Instructor hna a thawk leh. Tunah hian Gorkha Training Centre, Shillong-ah Army Education Corps-ah Education officer hna a thawk mek.

Mizo hmeichhia, sipai officer kan neih mi pathumte zinga mi Rebbeca Chhakchhuak chuan Hmingsanga hnenah heng te hi a sawi:

Sipaia tan hi i tum a ni reng em?
Ka pa hi sipai bang a ni a, sipai nih hi ka chak thin a, mahse ka lut ve thei ang tih ngaina ka hre lo. Awareness hi kan lo tlachham deuh hlek a. Sipai officer-a luh theih dan kawng a awm tih ka hriat rualin a kawng ka zawh a ni nghal mai.

Mizo hmeichhiate tan sipai-a tan hi a tha em?
Hnam dang hmeichhia conservative background lehzual te pawh an tang thei a nih chuan keini Mizo nulate hi kan tan theih lohna tur a awm lo. Eng hna pawh ni rawh se, a te emaw a lian emaw kan tuina lam a nih phawt chuan a tha vek. Mizo hmeichhia, a tam thei ang ber sipai-a lut zel turin ka sawm a, rawn lut zel se ka ti.

Sipai ni turin 'pa' deuh thung nih kher a tul em ?
‘Pa’ chu a ngai ngei alawm. Mahse ‘pa’ han tih hian mipa anga lan emaw, mipa nungchang ang put tur emaw ka tihna chu a ni chuang lo. Ka ngaihdan chuan tumruhna te, a huna rilru huaisenna te, chhelna te leh mahni mawhphurna hrethiam leh hlenchhuak theitu nih a ngai. Chu chu sipai-ah ringawt pawh a ni lo; eng eizawnna kawng pawh zawh ila, rilru paukhauh deuh nih chu a pawimawh khawp mai.

Mi tam tak hian sipai nih vangin mipa anga khawsa leh lang turah min ngai a; Civil dress-a min hmuh hian ‘sipai i van ang lo’ min tih fo thin a, engtia min lo hmuh tum nge an nih ka hrethiam lo.

Mipa sipai te'n an sipai pui hmeichhiate hi engtiangin nge an en?
Army-ah 1992 khan hmeichhia hi an lut tan ve chauh a, chuvangin sipaiin hmeichhia an hmuhna hi a la rei lo em a.

Mipa hlang awmkhawmnaah hmeichhia kan awm ve tan a, a tirah chuan awm dan tur an hrethiam lo pawh a ni mai thei. Kan la tlem em em a, nuai engemaw zat zingah 1000 tling awrh chauh kan awm ve a. Chuvangin hmeichhe officer hmu lo leh thawhpui lo an la awm nual a. Ka hmuh dan chuan min en hranna em em a awm pawh ka hre lo.

Hmeichhia kan nih vangin kan hna a dang chuang lo a. Tin, min ngaihsanna leh ngaihsan lohna chu kan hna hian a hril zawkin ka hria.

In training hi a harsa (tough) em?
Kan training hi mipa nen a danglam chuang lo a, kan course hi a inang a. Amaherawhchu, engemawah chuan standard chu a danglam deuh.
India ramah Mizo hmeichhe officer engzat nge awm?
Tunah hian mizo (pure) lady officer army-ah chuan pathum kan awm.

I hunawl engtin nge i hman thin?
Hunawl hi thiante kawm nan ka hmang a. A chang chuan lehkhabu chhiar nan te leh hmun kal ngai lohna fan vel nan leh pangpar huan siam nan ka hmang deuh ber thin.

Sipai nun hi eng nge nangmaha a fiah dan?
Sipai nun hi Kristianna nen a inang khawp mai, discipline tel lo chuan a nihna a bo a. Sipai nun hi hna mai a ni lo, nun dan phung chi khat a ni (it’s a way of life). Kan rilru chauh ni lovin, keimahni zawng zawng nen inchiah a ngai.
Sipai kan nih hian pawn lam lan dan ringawt ni lovin chhungrilah pawh min siam danglam nasa a. Kan khawvel a zau phahin, khawvel hi a zim phah bawk. Nun awmzia tak tak chiang takin min hmuh tir a. Thil ho te teah pawh hlimna min hmuhtir fo mai.



I hnathawhnaah eng nge pawimawh ber nia i hriat?
Eng hna pawh thawk ila, inpekna a pawimawh berin ka hre thin. Inpekna tel lo chuan hna a thawh tui theih loh a, tui loh miau chuan hna a kal tluang lo a, a kal tluan loh chuan kan hlim lo. Kan hlim loh chuan kan hlawhtling lo. Chuvang chuan inpekna hi a pawimawh khawpin ka hria.

Sipai atang hian midangte tan malsawmna hmanrua nih tum hi ka nunah ka dah pawimawh ve thin khawp mai.

Mizo tlawmngaihna hi sipaiah a hlu em?
Sipai hi khauh deuh a ni a, duty piah lamah tlawmngaih chhuaha thawh ngai pawh tam tak a awm bawk a. Sipai inenkawlna hi khauh deuh a nih rualin a lehlam chiah hian Mizote'n tlawmngaihna kan tih hi a keng tel. Hei tak hi hnam dang chuan a zir a an zir a ngai a, keini Mizo chu kan thisenah tlawmngaihna kan tih hi a bet tel a. Chuti chung chuan tlawmngaihna hi a hun leh a hmun awm, kan dawihna emaw tlin lohna tilangtu ni lovin, thil tha thlentu a nih chuan a hlu lehzual khawp mai.

Hmeichhia ni chunga sipai lal nih hi a danglam em?
Sipai hna hi hnathawhna atana him ber niin ka hre ve thin a, hna dang ka sawiselna ni lovin, hnathawhna hmun atana thlanawm ber pawl niin ka hria a. India ram, hmeichhia ngaihsan vak lohna hmunah phei chuan kan hna avang hian zah te pawh kan kai phah ve viau bawk a. Hei hi a danglamna langsar ber pawl niin ka hria.

YMA Day-ah khan Shillong Branch-ah khuallian i ni a...
Ni ve e. Mahse, sawi pawh a zahthlak deuhin ka hria. YMA Day hi Shillong-ah pawh uar takin hman a ni ve thin a. Kum tin khawtlangin phur takin kan hmang a. Hnam lam intihsiakna te, lengkhawm zaia intihsiakna te leh cultural programme kan hmang ve thin a. YMA Day hi kan urlawk nasa ve thin khawp mai. Kumin khan YMA hruaitute duhsakna changin Guest of honour-ah min rawn sawm a, kan chief guest tur a rawn kal theih leh tak loh vangin chief guest-ah min hmang ve ta zawk a.

Mizo mipuite hnenah eng nge chah duh i neih le?
Kan sipai chawlha rawn haw te i lo duat thiam ang u. Kan ram a him theih nan, hrehawm chitin reng kal tlangin hna an thawk a. Mahni inah leh khuaah nuam taka kan awm laiin kan rilrua kan ngaihtuah ngai loh sipai tam takin ramri-ah leh hmun hrehawm tak takah silaimu len rengna thih leh dam karah an hun tam zawk an hmang a. A kum a kum, vur leh vut karah, kan tan hna an thawk a ni tih a tak a hmutu ka ni ve tawh thin a. An khawngaih thlak a, sipaite hi duat an phu ngawih ngawih a ni tih hi i hre thar ang u.

Mizo hmeichhia, sipai-a tang duhte tan kawng kawhhmuh tur i nei em?
A hmasa berah chuan kan nulate hian sipaia tan hi hreh lo se ka ti. Mizo nulate hian hnam dang ai hian potential kan nei tha a, graduate atanga luh dan leh post graduate atanga luh dan a awm a, exam hi UPSC hnuaiah pek tur a ni. Sipai-a luh theih dan hi SSC website-ah leh UPSC website-ah te kimchang takin a hmuh theih reng ang.

Jojo-i'n album buaipui mek

Josephine, Jojo tia kan hriat lar chuan a album hmasa ber tur a buaipui mek a, July thla hian tlangzarh hman ngei a tum.


Jojo-i hi a vanduai a, a album tur hi recording a tih zawh vek tawh hnuah computer chhiat vangin a bul atangin recording a ti tha leh vek a, tunah hian hla 10 record tha leh tawhin tunkar hian hla dang pahnih record leh a tum, "Tunkarah hian recording hrim hrim chu tih zawh hman vek ka tum a, thla tharah hi chuan tlangzarh ngei ngei ka duh tawh," a ti.

Youth Icon 2007-ah pathumna a ni a, rock music lam a tuipui hle a. Tuna a album hmasa ber turah pawh hian rock music lam a hrut dawn viau niin a track list en hian a rin theih. A album title tur pawh hi Tribal Power hla hlui 'I Belh Pawn' tih a ni a, he hla hi video pawh siam tawhin a hit viau nghe nghe.

'D Chambawihpui', 'Bahhnukte', '|hamam', 'Lianchhiari', 'Zokhaw Tleitir', 'Ana Chuang E', 'Zoram Hmangaihtu', 'Len Ve Ka Nuam', 'A Thlawn Mai Maw', 'Hrinnun Anas' tih leh 'Aw Duhlai' tihte hi Jojo-i album thara hla awm turte chu a ni.

'Hringnun Anas' tih hla hi tunhnaiah Lalropuii Pachuau-in video siamin a rawn vawrh lar viau a, he hla hi Jojo-i pawhin a album-ah telh a lo tum laklawh tawh si a, a ti tlang dawn ta tho. Jojo-i chuan he hla hi RP-i aiin a sa hmasa zawk niin a sawi a, RP-i'n video a rawn siam ta mai pawh hi mak a ti ve deuh ni chuan a lang.

Pensy album peih tep

A album a chhuak dawn hnai viau nia sawi a ni a, a fans te pawh an lawm hman viau. Mahse rin aiin a la hnai leh lo deuh mai thei. Pensy English album album hmasa ber tur ' I'm a Pilgrim' chu tihchuah mai theih turin peih a ni tep. Recording chu peih fel a ni tawh.


Album rual hian music video pali emam vel tal tlangzarh tel nghal a tum avangin album release hun hi nghah leh hret a ngaih dawn hmel.

Nagpur lamah zirna chhunzawmin hun engemaw chen hun a hmang. Kum khat emaw vel zir leh turin Nagpur lamah a liam thla leh dawn. Tunah hian chawlh hmangin Mizoram lamah a hun a hmang mek.

Pensy hian a music video pathumte chu Lunglei lamah siam a tum a, Aizawlah pakhat siam a tum bawk. A album-a mi tur hla pakhat 'Ni tla ngai lo' tih chu tihchhuah a nih hmain a darh a. Hei hi a fans te chuan an kawl deuh vur awm e. He hla hi Mizo leh English chawhpawlha sak a ni a, a dangdai ang reng viau.

Mizo inkhawm leh function hrang hrangah a zai deuh reng a. Heng bakah hian hmarchhak zirlai pawl function-ah pawh a zai bawk. Mizorama a awm lai ngeiin album hi tlangzarh a duh. A vedio khawih tute pawh an tang hle.

Vincy a rawn lang tep a lom

"A rawn lang a lawm hei," kan ti leh thei tep tawh e. Vincy album 'Zu Chhia' tlangzarh hun a hnai ta.


Vincy album thar tur hi dubbing an ti mek a, album cover tur phai lama a thawn pawh an peih fel tep. Hetih lai hian a album thar hi tlangzarh hun hranpa siam a tum lo zet tawh nain, engemaw ti tala boruak neih chu thain a hre ve leh bawk si a, "TV velah live release a tih te ka ngaihtuah leh deuh," a ti.

Vincy album thar tur hian ngaihven a hlawh hle a, he album-ah hian Mizo album-a kan la hriat ngai loh scratching te pawh a bei nual niin Vincy chuan a sawi a, "AR Rahman te pawhin an la tih hleihtheih loh te pawh ka ti ve a, tun tum hi a tha viau ang tih ka sawi ve ngam," a ti.

Heianga a album 'Zu Chhia' tlangzarh tuma hma a lak mek lai hian album neitupa ber hi a 'dry' daih a ni awm e. Vincy chuan, "Rui chunga music khawih ka tum tawh lo" a ti bur mai.

Rui chhunga music a lo khawih thin chu a inchhir. A inchhir thu a sawi hi hriat tur a van ve tehreng nen, he thuah kher kher hi chuan a inchhir thu a sawi ve tlat. "Siamthat theih chu a ni tawh lo nain ka inchhir khawp mai. Ruih lai chuan a mawi riau te hian kan hria a, mahse, harhfim hnua han ngaihthlak leh hian a fuh lo deuh zel," a ti.

Recording studio changtlung tak din tumin hma a la mek a, Mizorama a tha ber nih a tum. Chutiang tur chuan a inbuatsaih a, khawl leh bungraw pawimawh te a dap khawm mek a, hei bakah kum tir la khan Manipur lamah training te pawh a han nei a ni awm e.

Album a buaipi mek lai hian nupui nei turin a inbuatsaih bawk a, a rilru te pawh a hah. "Ngaihtuah tur a lo tam khawp mai, zan pawh ka mu hleithei tawh lo," a ti nghe nghe.

Mathlenga Album Chuak Hleithei Lo

Mizo Idol star Mathlenga album hmasa ber tur pawh a chhuak mai dawn emaw kan tih hnuah rei tak a reh leh ta, tunah hian tlangzarh thuai tumin hma a la mek a, "A rei tawh si a a inthlahrunawm tawh, a rang thei ang bera tlangzarh a ka duh tawh," a ti.


Mathlenga hian hla 7 vel a record tawh a, tun thlaah hi chuan recording zawh fel vek hman a tum a, "A tha emaw tha lo emaw a nih ang anga tlangzarh hrim hrim ka duh tawh, a inup rei tawh lutuk a, tlangzarh dawn tiin kan sawina a rei ve tawh bawk si, zahte pawh a zahthlak tawh zozai e a," a ti.

Hetia hma a lak mek lai hian a album hming tur 'Vanram Tlafual' tih chu mithenkhatin an ei chiah lo niin a hria a, mahse album title atan hman tlang tho a tum , "Ka ti tawh laklawh a, ka ti tlang law law ang," a ti.

Thingphun Enkawl Zui

¢ Tuikhuahthanga

Thing leh mau lo chereu chho zelin khawvel a nghawng chhiat dan chu mithiam apiangin an ngai pawimawh a. Ram changkang apiangin an buaipui nasa a. Thing leh mau chhiat nasat lutuk avanga khawvel lo lum chhoh dante chu mifingte ngaihtuahna tihahtu a ni tak tak ta.

He khawvel hi kan thlah lo la awm turte tan chenna tlak ni chho zel tur chuan boruak siamthat leh a ngai tih chu an thupui pawh a ni bawk. Ram hausa zawkte chuan anmahni ram mai an vei lova, khawvel pum an vei a, ram rethei zawkte hnenah pawh boruak, sik leh sa siamtha leh turin sum tam tham tak tak an vawm liam tawp tawp mai a nih hi.

Hetiang hi khawvel ngaihdan a nih tawh avangin khawvel kilkhawr ber pawl kan tih mai thin Mizoramah pawh he chanchin tha hi nasa taka tlangau pui a ni tawh a. Chutih rualin mi mawl ber tan pawha hai rual lohin kan ram pawh hi kum tel in a lum tial tial a ni. Sipai officer pakhat hun rei tak chhung Mizorama lo awm thin phai rama zuk awm leh vang vanga lo chhuak leh chuan “Mizoram boruak hi a lo va danglam chak em em ve, hmanah kha chuan ceiling fan pawh kan on ngai lo kha a ni a. Tunah zet chuan air condition a lo ngai ve ta hle mai” a ti hial a ni. Kan ngaihtuah loh hlan hian a kum telin kan boruak a chhia a. Tunhma kha chuan kan thenawm state Assam phai leh Manipur phai atanga lo zinte chuan Mizoram an lo thlen hian a nuam huai mai an ti thin. Tunah erawh chuan a ni ta hauh lo mai. Guwahati atanga lokalte chuan Aizawl leh Guwahati chu a lum lam a in ang deuh reng alawm an ti ta ziah mai. Aizawl khawpuiah ngei pawh hian kan officer lian leh mi pawimawh chuan an office ah A/c an vuah ta fur a. Chhun khawlum laia khawlaia motor tlan tam tak pawhin phai ram lum tih danin an inkhar phui a, a/c an tinung ta hlawm bawk.

Kan ram sik leh sa danglam dante hi mi zawng zawng chuan kan vei lem lo a ni mai thei. Mahse, a veiawm a ni tih kan sawrkar, kan NGO hrang hrangte leh mi tam takin an hria a. Sik leh sa siam dik leh turin nasa taka tan la pawl pawh an awm. Sawrkar lam atangin a mawhphur bera ngaih Environment and Forest department pawh he thilah hian mawngvawmba ang sekin an vir hah a. Kum tin thing phun tur a nuai tel an lo buatsaih a. Mipui hnenah an sem a, thingphun pawimawhzia pawh an tlangau pui nasa ngiang mai thin. An hnathawh hian tunah hian Mizoram chu thui takin a chhan mek tawh bawk.

Amaherawhchu kan department lam hnathawh mipuiin kan hlawkpui dan hian duhthu a la sam lo hle niin a lang. Hei hi ngaihtuah zui a, hma lak zui ngai lai chu a ni. Department lamin sum tam tak sengin kum tin an buaipui a. Thingphun hun a lo thleng a, thingphun beihpui kan thlak a. A sawrkar office lam thlengin office chawlh meuh hmangin thing kan phun bawk. A chang leh school naupang kan pun. Mipui lamin kan tuipui a, thingphun tur chu kan la hut hut a. Phun pawh kan phun hnem nangiang tawh mai. Mahse, kan thingphun te hian enkawl zui an hlawh loh avangin a riral leh hi a tam zawk ni hialin a lang a. Thil buaipui hluta theihngilh leh mai thin kan ni kan tih thin ang bawkin kan thingphun pawh kar lovah kan theihnghilh a. Ngaihsak zui hlawh ta lo chu hnim in a lo bawh a, a bawhhlum zui a. Kan thing tiak lak hlutzia kha kan hre tawh lova. Khua a lo thal a, enkawl loh na na na chu hmun ro deuh ami chu a thi zui leh bawk.

Hetiang anih avang hian kan kum tin programme pawimawh Green Mizoram Day pawh a hlawk tur angin kan hlawk pui hlei thei lo a ni ber mai. Mihringte leh ran te hi kan puitlin hma chuan enkawl ngai vek kan ni ang bawk hian thingphun pawh hi enkawl zui ngai tho an ni. Enkawl loh a kan puitling thei lo ang bawk hian thingphun hi enkawl zui a ngai ve bawk. Office chawl meuha thing kan phun hi vawikhat pawh en zui leh miah lo leh a phunna lai pawh theihnghilh zui hmak hi a tam zawk kan ni awm e. Kan thingphun hlutzia ngaihtuah reng chungin, a lo puitlin huna he khawvel boruak siamtha lehtu tur kan siam a ni tih hre reng bawk ila. Kan thingphun hi E&F enkawl zui ngawt tura kan dah hi a dik lova, thahnemngaia kan phun enkawl zui hi chu a phuntu mawh pawh a ni ve tho a ni tih io hria ang u. Kuminah thing engzatnge kan phun a, tun atanga kumnga ah kan thingphun engzatnge puitling tih chhui zui hi hna pakhatah i neih tel a ngai. Thingphun a enkawl zui hi ram hmangaihna rilru dik tak chu a ni.

Mohun Bagan SAIL Football Academy-ah Mizo?

¢ Hmingsanga

Mizo te'n football lamah kan tawng sang chho mek zel a. Kan lo beisei thin leh kan suangtuahna chu a takin a thleng dik mek zel. Eng tikah emaw chuan Mizoramah hian India ram football club thate player zawngin an la rawn 'leng' lut fo dawn. Kum hnih khat kal ta pawh khan Mizo naupangte hi chher tlak an nih tih hriain SAIL Bokaro chuan Mizoramah rawn kalin 'trial' an rawn neih tawh. Chu'ng zinga chuan hlawhtling ta pawh an awm nual. Haryana club Amity United te pawh an lo kal tawh bawk. Tun tumah hian Mohun Bagan SAIL Football Academy-a awm tur zawngin an lo kal leh a ni.

Mizoram Football Association chuan phai lama academy-a trial nei tur hian player a lo thawnchhuak fo tawh thin. Player tan leh FA lam tan pawh sum leh pai tam tak sen ngai te a nih avangin sum lamah harsatna avangin duh angin an inthawn mumal theih lo phah chawk thin a. Chutih lai chuan player te harsatna hre chungin hetiang hian ruahmanna MFA-in a siam hi thil lawmawm tak a ni.

Mohun Bagan SAIL Football Academy thuneitute chahchhuah chhungchangah hian MFA Hony Secretary Pu Lalremtluanga chuan: "Mizoram hmun hrang hrang atangin player tha tak tak kan la hmuhchhuah lohte kan hmuhchhuah belh teuh a, Mohun Bagan SAIL Football Academy hian player pali emaw pawh lo thlang sela, player thar chher tlak kan neih phah teuh tur hi kan lawmna pakhat a ni," a ti.

Mohun Bagan SAIL Football Academy executive member Tapan Bose chuan: "Kumin atang hian player tha chher kawngah nasa taka tanlak kan tum a, Mizo naupang pali emaw vel kan lakte hi kum hnih khat hnu lekah Mohun Bagan senior team-a khel tlak ni turin chherchhuah kan tum dawn a, Mizoram naupangte hi chutiang atana chher tlak nia kan hriat avangin Mizoramah hian kan lo kal a ni," tiin Zozam Weekly a hrilh.

Mizoramah hian sawi fo thin angin football-a talent nei tha tak tak an awm teuh a. He'ng talent neite chher puitlin kawngah hian kan hmunhma te a la that tawk loh avangin kan thlen tur ang kan la thleng tawk lo deuhin niin a lang. Mizo naupang talent hi phochhuah a la nil o mai chuah a ni. Kan hmunhma neih chungchang hi Mohun Bagan SAIL Football Academy hotu pakhat chuan: "Field mam lo leh lung thil tam tak zingah in inkhel a, naupang talent nei tha tak takte hi an talent neih that te hi phochhuah a nih hmain an inhliam mai ang tih ka hlau," tiin a sawi.

Kan ground neih chungchang hi sawi belhin, "Hetiang hmun a inkhel chung hian junior level-ah India rama a tha pawl in ni hi a mak kan ti a, Mizoram hian hmabak eng tak a nei a ni," tiin Zozam Weekly a hrilh bawk.

MFA lam chuan Mizoram Football tihmasawnna turin theihtawp chhuah chhunzawm zel tumin hma an la mek. Tun atanga rei loteah hian English coach, UEFA coaching license nei chahchhuah tumin hma an la mek a ni. MFA Hony Secretary chuan: "Mizo nuapangte training pe turin English coach chahchhuah kan tum a, tuna Mohun Bagan SAIL Football Academy-a awm tur trial-a tling lo mi 30 chuangte hi training dawng tur hian thlan nghal kan tum," a ti.

India rama football club hlun leh lian berte zinga mi Mohun Bagan chuan Football Academy changtlung tak, Durgapur (W.Bengal)-ah an din a. Anni hi India club zingah football academy nei hmasa ber an ni. SAIL (Durgapur) te nena thawk tlângin India ram chhunga thalai football-a talent nei thate tuaihriamna leh chherchuahna ‘pum’ tha tak nih ngei tumin Mohun Bagan te hian an bei a ni.

Durgapur Steel Plant lam hian infrastucture leh facilities lam an tum ang a, Mohun Bagan lam hian coach te hlawh bakah ei leh in lam an tum bakah an facilities neih, enkawl leh tuaihnûm lam an tum ang. An inremsiamna hi kum ruk chhung atan a ni phawt ang a, chumi hnuah pawh sei leh theih tura ruahman a ni. Mohun Bagan hruaitu pakhat chuan, “Tata Football Academy te chu sumdawng hausa te'n an din mai a ni. Keini academy hi chu India ramah chuan football club academy kalphung fel tak neia din hmasak ber kan ni ang,” a ti.

He academy-a awm tur thlangtute chu football chinchang hria an ni a. Naupang an thlanchhuahte chu thla hnih chhung enchhin an ni phawt thin a. Chumi hnuah chher tlâk leh hmasawn tura an beiseite chu kum 4 chhung awm turin an la thin a ni. He academy-ah hian tunlai thiamna changkang berte hmangin naupang enkawl an ni a, damdawi lam thiamten an ven bakah, naupangte nungphung leh khawsak dan zawng zawngte zir chiang turin mi thiam bik rawih an ni bawk. Swimming Pool leh Gym te nena thuam thlap a ni a, coach leh asst. coach ten a hmunah awm chilhin foreign coach te pawh coaching pe turin sawm an ni thin bawk. Tunah hian Mohun Bagan SAIL Football Academy-ah hian Mizo naupang junior batch-a awm an awm nual a. Heng mite pawh hi hmabak eng tak nei an ni hlawm.

Mohun Bagan Academy atang hian Lalhlimthara chuan JCT a zawm tawh a, Zotea chu he academy-ah hian hian a awm tawh a, ani hi tunhnai a I-League khel tur Lajong zawm tawhtu a ni a. F.Lalrozama chuan Mohun Bagan Academy-ah bul a tan hnuin Pune FC a zawm tawh bawk. Tetea Tlau chuan senior team-ah rei lote a khel zawk a, Malsawmzuala pawh senior team-ah rei lote a khel tawh bawk.

Mohun Bagan SAIL Academy naupangte hi Dugapur I Div League-ah an khel thin a. Durgapur-ah kher hi chuan khawi club mahin an hneh ngai lo ti ila a dik awm e. India ram hmun hrang hrangah tournament khelin an kal chhuak ve deuh reng a. An Academy thupui pakhat chu kum 2014-ah India hian World Cup a khelh theihna tura hma lak a ni a. Hemi ti hlawhtling tur hian naupang talent nei tha chher hriam tlak leh enkawl tlak an tih te chher chu an hna pui ber pakhat a ni.

Ram Hmasawnna Atana Pawimawh Land Reform

¢ Lalthlamuana Ralte

Ram hmasawnna a taka a lo thlen hun tur nghakhlel takin kan thlir mek a, mi nawlpui dinhmun chawikan a nih a, kuthnathawktu mi retheihte lei rem rapa an dinchhuah theihna tur kan buaipui mek lai hian ram hmasawnna bulthut leh a innghahchhan pawimawh tak Land Reform hi kan ngaihthah palh ang tih a hlauhawm hle a ni.

Eizawnna tinreng innghahna bulpui ber chu ram/lei (land) hi a ni. A pawimawhzia sawi dawn chuan sawi tur a tam viau ang. Mihring lo pung zel leh kawng hrang hranga hmasawnna lo sang zel vang hian ram hlutna hi a pung tial tial a, ro hlu ber pawl a tling ta reng mai.

Mizoramah hian Land Laws tha tak kan neih loh vangin ram neih dan phung a mumal lo hle. Kan dan hman lai te hi a hlui tawh hlawm a, a hun lai mil tawka siam a nih avangin ennawn leh siamthat ngai a tam hle tawh a ni. Dan kan neih that loh chu thu hran ni se, kan neih chhun pawh kan hmang tangkai tawk lo khawp mai. Hei vang hian mi retheite'n ram an chan zel a, hausa leh thiltitheite an invalh zau tial tial a, ram tha lai zawng zawng an chang deuh vek tawh a ni. Hetia kan kal zel chuan he ram hi mi hausate ram a la ni mai ang tih pawh hlauhawm tak a ni ta.

Ram hmasawnna hmingpu thil chi hrang hrangin min chim tan mek a, rel kawng sial te, look east policy te, tuikhuah te, tuialhthei laihchhuah te an sawi tan ta. Heng bakah hian thil chi hrang hrang lo la thleng zel tur te hi kan ram tha lai hi min chhuhsak vek thei a ni. Ngun taka kan ngaihtuah a ngai a, kan ram a him loh chuan kan hnam hi kan chavai thei a ni.

NLUP kan buaipui mek pawh hian ram leilung sem zai a kawk a. Hmana NLUP hmasa avang khan ram tha lai tam tak a chereu tawh a, mimal kutah zau tak a lut tawh a ni. A nihna takah chuan NLUP leh hmasawnna beihpui thlak reng reng hi Land reform hian hmakhalh se a felfai zawk ngei ang. Tunah hian ram theh tur pawh hi a awm meuh tawh lo maithei a ni.

Land Reform hi ram hmasawnna tobul pakhat a nih thu hi history-ah hmuh tur a awm teuh. Dik tak chuan ram neih dan phung siamthat hi ram tam tak chuan thupui berah an lo nei tawh thin a, a hlawkna pawh an tel nasa hle reng a ni. A tlangpuia sawi dawn chuan Industrial Revolution zawh hnu atang khan khawvel hmun hrang hrangah Land Reform hi an kalpui a, Mexican Revolution (1917) te, Communist China (1952) te pawh khan thupui ber pakhatah an neih a ni. Kum zabi 20-na chawhnu lama Latin America-a Kohhran hruaitute'n Pathian thu tan chhana ram siamthat hna an thawhnaah pawh khan Land Reform hi ngaih pawimawh ber pakhatah an neih a ni. Africa khawmualpuia ram hrang hrangte'n zalenna an sual lai pawh khan an auhla ber pakhat chu Land Reform hi a ni.

Land Reform hlawhtlinpui ram tam tak zingah India hi a langsar pawl tak a ni. Tunhma atangin mi hausate'n ram zau tak tak an nei a, loneitute'n ram an nei lo. Chuvangin Independent hnu lawk atang khan state thenkhat chuan ram neih dan phung siamthat (Land Reform) hi chak takin an kalpui a ni.

An state legislative assembly-ah dan an siam a, chumi hmang chuan mi hausate ram an chhuhsak a, loneitute hnenah an pe ta thung a. Lo neituten anmahni ram ngei an enkawl thei ta a ni.

Land Reform tih awmzia hi, a mawlmang thei ang bera sawi chuan, dan hmanga ram neih dan phung siamthat tihna a ni. Sorkarin dan tlawhchhan tur a siam phawt a, chumi hmang chuan ram awl zau tak tak an sem a, mi hausate ram an enkawl sen loh an chhuhsak a, loneitu ram nei lote an pe thin a ni.

India danpui hian Land Reform hi chu state sorkar hmalakna tura a dah avangin mahni thu thuin state te'n an hma an la thin. Hmarchhak state-ah chuan Assam leh Tripura hian nasa takin hma an lo la tawh a ni.

Mizoramah pawh hian Land Reform hmasa ber nia chhal ngam chu lal ban kha a ni awm e. Kum 1954 khan The Assam-Lushai Hills District (Acquisition of Chief's Rights Act), 1954 siam a ni. He dan hmang hian lal thuneihna tihtawp a ni a, an lal ram chhunga an thuneihna pawh chhusak an ni ta.

District Council hunlaia ram neih/hralhna dan kan neih ho kha tun thlengin kan la hmang a. A hunlaia tha tak ni mah se tihdanglam/siamthat ngai a tam tawh hle. Chu'ng dante chu - The Lushai Hills District (House Sites) Act, 1953 te, The Mizo District (Land & Revenue) Act, 1956 te, The Mizo District (Agricultural Land) Act, 1963 te leh The Mizo District (Transfer of Land) Act te a ni.

VC te'n an khaw chhungah inhmun an pe thei a. Pass erawh Land Revenue & Settlement department-in an pe thung. VC te hi politician an nih avangin ven an ngai viau thin. An thuneihna hmang hian ram an lo invalh duh viau a, an lamhnai leh chhungkhat emaw MLA/Minister te ram pek mai mai pawh an ching khawp mai.

Ram dang ang bawkin lo/huan hmun tha lai apiang mi hausate kutah a lut zel a. Kawngpui dunga teak, serthlum leh thei dang huan tha ber berte hi mi hausate ram a ni vek tawh a. An thuhnuaiah mi rethei an kun tna mek a ni.

Leilet leh sangha dil tha tak takte pawh mi hausaten an nei zel a, a enkawltu atan kut hnathawkte an ruai nasa hle a ni. Chhiah pek tur a tam tham avang te, pawisa mamawh vang tein mi retheite ui ngawih ngawih chungin an ram tha tak tak man tlawm te tein an hralh mek a. Hetiang zela kan kal chuan Mizoram hi mi hausate ram a la ni thuai mai dawn a ni.

Khawpui chhungah pawh mi hausaten hmun an ngah em em. District Council thuneitute khan Land Ceiling ang ve deuh hi an siam a. Town area-ah mimal pakhatin Bigha khat (1337.87 Sq.m) aia zau neih theih loh a ni. Chutiang bawkin agricultural land ah 30 bighas (4 Hectares) aia zau Patta siam theih loh bawk a ni. Mahse, Land Ceiling Act a awm loh avangin duh duhin duh anga zau leh duh zat zat ram an nei mai a ni.

Dan-ah chuan Village Council ten anmahni huam chhungah thuneihna sang tak an nei a; in hmun, lo, ram an an pe thei a, lo neihna tur ram an theh thei bawk. Mahse, pass (LSC) erawh an pe thei lo, Land Revenue & Settlement department lam chan a ni. Tuna kan kal danah hi chuan ram awl zau deuh hmu fuh chuan an hauh tawp a, VC hriatpuina in an humhalh a. A neitu anga inngai a ram chu an sawngbawl tawh hnuah Revenue department ah pass an dil ta thin a ni.

Ram hi a thang thei lo a, a pung thei lo a, a zauh belh thei hek loh. Chutih laiin mihring kan pung zel a, ram mamawhna a tam tial tial a, a hlu tial tial bawk. Mi thenkhat chuan bank-a sum dah aiin ram neih hi a hlawk zawk tih hriain an lei belh zel a, rei lo teah a man letin an hralh leh thin. Chhiah chawi tur a tam vang leh enkawl/sawngbawl a hautak avangin mi rethei tan ram neih awmzia a awm vak lo a, man man taka dehral mai a thlannahawm zawk a ni.

Ram neih dan phung (Land system) felfai lo hian hnam harsatna a thlen thin. Tunhma atangin indona pawh a lo chhuah phah tawh a, chhungkua intuithlar phah pawh sawi tur tam tak an awm. Retheite retheih belhchhahna hmanraw lian tak a ni bawk. Revolution lian lo chhuak thinte pawh kha ram neih dan phung siamthat loh vang a ni a, a nghawng lian tak pawh Land Reform a ni thin.

Tunhma deuh atang khan mi hausate'n ram an nei tam lutuk leh mi rethei ram mamawh ngawih ngawih an pung zel hi vei tak tak an awm thin a. YMA pawh hian Land Ceiling chungchangah hma a lo la tawh a ni. Mizoram Synod pawhin Land Reform chungchang hi a vei viau a, kum 2004 Synod Khawmpuiah hemi atana hmalak hi an rel a. Chumi hnuah kum 2006 khan Synod Social Front hmalaknain seminar pawh an lo buatsaih tawh.

Kan rama ram neih dan phung fel lo tak hi siamthat thuai loh chuan harsatna namen lovin min tlakbuak thei tih a chiang. Ama'rawhchu, hmala tak tak tur chuan sorkar huaisen tak, mi hausa leh thiltitheite pawh nek ngam kan neih a ngai. Ram neih dan phung kan neih mekin a zir miau loh avangin sorkarin hmalakna lian tham a neih dawn apiangin compensation tam tak pek a ngai zel a, mi hausa leh thiltitheite'n an hlawkpui leh lawih zel a nih hi. Kan mamawh em em Land Ceiling Act (ram neih zat tur bitukna dan) te phei hi chu nei ngat ila chuan mi retheite tan thawven huaina tur a ni ngei ang le.

Sorkar thar tlawmna hmasa - ZU?

April ni 30-ah khan Mizoram chief minister Lal Thanhawla chuan tun term-a a vawi khatna atan thuthar lakhawmtute a kawm a, chumi tum chuan sorkar hmalakna tur hrang hrang sawiin, zu khapna dan ennawn an tum niin a sawi a nih kha. Ennawn an tum thu sawi tluangtlam lovin, ram tana tha turah chuan huaisen takin an kal dawn niin a sawi a, chu mawlh chuan khel zui a hlawh ta a nih hi.

"MLTP Act hman mek hi a hlawhtling lo. Congress sorkar hun hmasaa kan tih tan dawn pawhin a hlawhtlin ring lo chungin, Kohhran nawrna avangin kalpui a ni. Kohhran leh pawl dangte nen inrawnkhawm a la ngai dawn a, kan ram tana tha turah chuan huaisen takin kan kal ang. Tuna kan kal dan hi chu, Mizoram mi dik tak ni lote eizawnna siamsakna mai a ni a, michhiate'n an tuar a, mithate'n an tuar thlawt lo," tiin chumi tum chuan thuthar lakhawmtute zawhna a chhang a ni.

A office-a thuthar lakhawmtute a kawm tum hian chief minister chuan huaisen taka an kal thu hi a sawi uar hle a, "Ram leh hnam tana tha tur chu huaisen takin kan ti zel ang. Tlak phah a ngai a nih chuan thla khur chawr chawrin kan tla mai tur a ni," ti hialin a sawi.

Mizoramah The Mizoram Liquor Total Prohibition Act, 1995 hmangin 1997 atangin zu khap a ni a, hemi chungchang hi he ramah hian titi a tling kumkhua a ni ber e. Chief minister-in thuthar lakhawmtute hmaa he dan chungchang a sawi atang phei hi chuan a vung zual hle a, media lam pawh a nghawng nasa malh malh hle.

Chief minister-in zu khapna dan chungchang a sawi lai hian minister H Liansailova bakah parliamentary secretary pathum - R Selthuama, Lal Thanzara leh Lalrinmawia te an awm ve a, anni hian eng kiin nge chief minister hian MLTP Act chungchang hi a sawi tih chu an hre chiang ang.

Chief minister-in MLTP Act chungchang a sawi hnu hian mipuite chuan an sawi zui luih luih a, chutiang boruak karah chuan sorkar thar din Law Commission lamin MLTP Act siamthatna tur chungchangah Kohhran leh tlawmngai pawlte a rawn ve leh bawk. Chu mai a ni lo, mi thahnemngaite'n zu khapna dan chungchang sawihona leh debate te an han buatsaih zui a, chu'ngah chuan mi thenkhat chuan MLTP Act chungchanga sorkar thar rilru sukthlek chu chiangah an ngai ta.

Chutianga ngaih loh theih pawh a ni lo; entirnan, pawl pakhatin debate an buatsaih tum chuan minister te meuhin zu khapna dan hlih a tul tia tang turte chu sawi tur an lo rawlruk a, zu khap a nih vangin drugs a hluar tia sawi tur tein an hrilh a nih kha.

Law Commission hian The Mizoram Liquor Total Prohibition Act, 1995 siamthat hi rawtin Kohhran, YMA, MHIP leh MUP te a rawn a, MLTP Act-in Beer huam lo se tiin an rawt a, inhremna pawh thil tihsual len leh tet a zir tea inhrem ni se tiin, he dan bawhchhiat vawi khatnaah chuan jail-a intantir kher lova inhrem dan awm se tiin an rawt a ni.

"Tuna a nih angah hi chuan dan nunrawng tak a ni a, state dangte'n rawn hria se chu 'Draconian Law' an ti hialin a rinawm. Ngaihdamna leh hriatthiamna kan tih ang chi kha a awm lo reng reng," tiin Mizoram Law Commission chairman R Lalrinawma chuan an thil rawt chungchang hi a sawi.

"MLTP Act hian grape wine a huam lo a, grape wine ai chuan beer hian 'alcohol' a pai tlem zawk daih a, chutiang a nih chuan beer hi huamtir loh tur ni awm takah kan ngai," a ti bawk.

Mahse, Law Commission rawtna chu an rawn-a te chuan an pawm hlawm lo. Mizoram Kohhran Hruaitute Committee (MKHC) chuan Law Commission rawtna hi zirin June ni 5-ah khan an ngaihtuah a, MLTP Act siamthat rawtna hi an pawm lo a nih kha. CYMA pawhin June ni 5-ah vek khan an ngaihtuah a, Law Commission rawtna hi an pawm bik lo. June ni 5-ah vek khan MHIP lam pawhin an ngaihtuah a, June ni 10 thleng executive member te'n mahni ngaihdan thawh ni se an ti a, chutianga ngaihdan an thawhkhawm hnuah chuan he rawtna hi an pawm ta lo a ni.

Chutiang chhung chuan MLTP Act chungchang chuan sawi a hlawh hle a, media lamah pawh a lang zing malh malh hle. Sorkar thar chu he dan hi hlip ngei turah mi engemaw zatin an ngai a, mahse, June ni 18-ah khan he dan hi hlih tum a ni lo tiin sorkar hruaitute chuan thu an puang ta.

Chief minister Lal Thanhawla chuan Mizoram mipuite leh Kohhrante rawn lo leh an remtihna lo chuan Mizoram sorkar leh party hian zu khapna dan hi tihdanglam a tum lo tih ka puang, a ti.

Chief minister thusawi hi June ni 18-ah khan, MP CL Ruala'n Aizawl Press club-a press conference a neihnaah home minister R Lalzirliana'n a chhiarchhuak a ni.

April ni 30-ah chief minister-in MLTP Act ennawn an tum nia sawiin, ram tana tha turah chuan huai takin an kal dawn niin a sawi a, chu chu mi tam takin MLTP Act hlih tum thu-ah an ngai a nih kha. Chumi hnuah Law Commission-in Kohhran leh tlawmngai pawlte a'n rawn leh a, MLTP Act-in beer huam lo se tiin an rawt a, mahse, home minister chuan, "Beer zuar leh dawn tih thawm keimahni atanga lo chhuak ni awm takin chanchinbuah te kan lo chhiar a, sawifiah a ngai tiin CM chuan a zin hmain press statement hi a siam ta a ni," home minister chuan a ti ta daih mai!

Home minister chuan, "|ul lovah Fakselna tih angah te kan bei nasa lutuk a, a buaithlak ang reng a. Thil tul zawk dang a tam ka ring a; chuvangin hei hi chu, sorkarin Kohhran kan rawn lo a, engpawhnise, an lo ngaihtuah ve a, an lo ti a nih chuan, an duh loh dan kan hria a. Lo rawn ta ni ila, Kohhran nena in-confront tur kha kan ni nghal mai a, chuvangin sorkar thuneihna a ni a, midang tam tak hi zu rawn zu rawn pawh a ngai hranpa lem lo a, kan ti dawn a nih chuan. Amaherawhchu, kan chief minister, kan party president-in hei hi tuna a thupuan a nih avangin, he lamah hi chuan buai teh chiam a ngai lovah kan ngai a ni," a ti.

Chief minister-in MLTP Act ennawn an tum niin a sawi a, Law Commission lamin siamthat dan tur chungchangah Kohhran leh tlawmngai pawlte an rawn bawk. Mahse, home minister thusawi leh chief minister thupuan nen chuan chu'ng chu a inang ta lo hle.

Congress worker-te pawhin zu khapna chungchangah hian mi rilru sukthlek an thlir uluk hle a, sorkarin zu khapna dan hi hlih a tum nia ngaih theihna tur khawp thil sawi tur a awm nual mai. Chu'ng chu chief minister leh a minister te hian an hai hauh lo. Mahse, titi a tam viau hnuah sorkar hotute chuan he dan hi hlih emaw siamthat emaw an tum lo a, Kohhran an rawn hek lo niin an sawi ta daih si! Chu chu zu khap chungchang ai chuan mipuiin an tuipui zui ta zawk niin a lang.

Chief minister thupuan (statement) leh home minister thu leh hlate hi mi tam takin MLTP Act chungchanga Mizoram sorkar ngaihdan nia an hriat nen chuan a inang lo hle a, chief minister-in April ni 30-a a sawi dan leh Law Commission lam hmalak dan nen a inang lo hle bawk.

MLTP Act chungchanga tunlai titi leh sorkar hruaitute thusawi atang hian "Mizoramah Congress thli a tleh em?" tih chungchang pawh a ngaihtuah theih viau awm e. MLA 32 nei, VC thlan leh MP thlanah tea hnehna an chan vangin Mizoramah Congress thli a tleh tia sawi a ni. Mahse, Congress thli tleh se MLTP Act chungchangah tiang hian thil a kal lo ang tiin a duh tan chuan a sawi theih ang. Congress thli a tleh a nih chuan mipuiin an zui hut hut ang a, an thil tum leh ruahmannate chu mipuiin an thlawp hle ang. Amaherawhchu, "MLTP Act hlin an tum a, mahse, mipui mar an han dek a, a duh lo an tam avangin sorkar chuan a ngam ta lo," tiin a duh tan chuan he thil hi a sawi theih tlat. A awih loh tan a hnial theih viau bawk ang a.

Kuthnathawktute tanpuina sem dan mak

Durtlang North VC huam chhungah tun hnaiah kuthnathawktute tanpuina sem a ni a, hei hian sawi a hlawh hle. Lok Sabha MP pawh tanpuina dawngtu zingah hian a tel.

RCC Water Harvesting (tuikhuah) siamna tur leh Countour Trenching (leitha khawlna) siamna atan sorkarin Durtlang North VC huam chhunga chhungkaw 55-te hnenah tanpuina sum a pe a, ram nei lo leh a dawng tawhte'n an dawng nia an hriat avangin khawtlang mipuite'n an sawi duh hle. Tin, MP-in he tanpuina sum a dawng ve chuan sawi a hlawh hle bawk.

Veng chhung YMA chanchinbu - 'YMA AW"-ah June ni 6 chhuakah khan he sum dawngtute hming hi tarlan a ni a, hetia YMA chanchinbu meuha tarlan a ni pawh hi sawi neuh neuh a awm vang nia thu dawn a ni.

June ni 2-ah sum hi District Agriculture Office atanga lakchhuah a ni a, a tuk - June ni 3-ah semchhuah a ni. YMA chanchinbu enkawltute hian VC te hnen atangin sum dawngtute hming hi an dilchhuak niin VC hruaitute chuan Zozam Weekly an hrilh.

RCC Water Harvesting (tuikhuah) siamna atan hian chhungkaw 27-in first installment atan Rs 12,500 theuh an dawng a, Contour Trenching siamna atan chhungkaw 28-in first installment Rs 5,000 theuh an dawng bawk.

Khawtlang hruaitute hnen atanga thu dawn danin RCC Water Harvesting (tuikhuah) siamna tur dawngtute zingah hian chhungkaw 8 chu ram nei lo an ni a, a dawng tawh chhungkaw 6-in an dawng nawn bawk. RCC Water Harvesting (tuikhuah) siamna atan hian Mizoram Lok Sabha MP CL Ruala pawhin tanpuina sum hi a dawng ve. Ani hian Durtlang ramah huan a nei.

Countour Trenching (leitha khawlna) siamna tur sum dawngtu zinga chhungkaw 12-te chu ram nei lo an ni tiin thudawn chuan a sawi.

VC lam chuan he'ng tanpuina sum dawng tur hi an thlang lo niin an sawi a, Congress Unit-in an thlang niin Zozam Weekly an hrilh.

"VC inthlan hma deuhah khan bialtu MLA-in an unit te hnenah a rawn hrilh a, an buaipui zui ta niin kan hria," tiin VC hruaitu pakhat chuan a sawi.

"Unit hian a dawng tur an thlang a, chu chu bialtu MLA hnenah an thehlut," tia sawiin, "VC lamin kan hriatpui lo," a ti bawk.

"A dawng tawh thenkhatin an dawng nawn a, hei hi a awmzia kan hre chiah lo a, an dawn tawh chuan an nei tawh tihna a ni a, dawn nawn a tul lo turah kan ngai," tiin VC hruaitu pakhat chuan Zozam Weekly a hrilh.

"Ram nei hauh lote'n an dawng hi chu a awm lo khawpin ka hria. Helaiah khawtlang kan inhrechiang a, TV lei nana hmang ta daih te pawh an awm a, amaherawhchu, ram an neih miau loh avangin an tan TV lei mai loh chu sum hmanna tur a awm hlei nem ka ti mai a!" a ti bawk.

"Khawtlangah he thil hian sawi a hlawh a, mipui hian mak pawh an ti hlawm khawp mai a. Sawi neuh neuh a tam khawp mai. YMA hruaitu lam hian VC-ah a dawngtu list hi an rawn dil a, chanchinbu lamah khan an chhuah ta a nih kha," tiin VC hruaitu pakhat chuan a sawi.

"Dawng tura inngai, dawng ta si lo an tam a, chutih laiin ram nei lote'n an dawng a, tin, a dawng tawh thenkhatin an dawng leh bawk a, lungawi lo an tam khawp mai. Party chhungkuaah pawh lungawi lo an tam," tiin khawtlang hruaitu pakhat chuan a sawi.

"Term hmasaah kha chuan mimalin department-ah an dil a, department lamin an endik thlap hnuah a dawng tur an thlang thin. Kuminah hi chuan chutianga endik engmah a awm lo," VC hruaitu pakhat chuan a ti.

Rs 12,500 dawngtute hi Congress Unit-in party fund atan Rs 200 an cut sak a, Rs 5,000 dawngtute hi Rs 100 an cut sak bawk nia sawi a ni a, YMA Aw-ah pawh MNF Unit thuchhuah tarlangin, chu thuchhuahah chuan party fund atana cut sak an nih thu hi a lang a ni.

'YMA AW'-in hemi chungchang an chhuah tum hian Durtlang North MNF Unit thuchhuah pawh YMA chanchinbu hian an chhuah.

"DAO Aizawl hnuaiah khuthnathawktute tanpuina tur pawisa chu bialtu MLA thurawn angin Congres party unit hruaitute'n party mi induhsak nan V/C te hriatpuinain Tuikhuah tanpuina leh Leitha khur siamna tur pawisa an sem a, heng dawngtu zingah hian huan/ram nei lo leh mi in luaha awm te, kan MP ni lai CL Ruala te pawh an tel a ni. 'Miretheite kan VIP an ni ang' tia 'NLUP thami kan sem ang' titu party sorkarah hian induhsakna uchuak tak, kalphung thar, 'corruption a zung nen kan phoro ang' titu party te hian unit sum atan, a dawngtu hnen atangin Rs 100-200 an cut sak hi Durtlang North MNF Unit Committee chuan pawi kan tiin kan dem tak zet a, tun hnuah hetiang hi thleng tawh lo se kan duh tak zet a ni," MNF unit thuchhuah chuan a ti.

YMA AW-ah chuan tiang hian an ziak: "District Agriculture Officer, Aizawl District hnuaiah kuthnathawktute tanpuina Durtlang North huam chhunga chhungkaw 55 hnenah sem a ni," tiin. "Durtlang North huam chhunga chhungkaw 55" ti kherin he thu hi an ziak.

MPC Party-in Rel Kal Tir Duh Lo

Mizoram People’s Conferene Party chuan nimin chhun dar 12 khan Aizawl Press Club-ah chanchinthar lakhawmtute kawmin Mizoram lailia rel kawng luh an duh loh chhan an sawi a.

MPC party thpuangtu Dr. Kenneth Chawngliana chuan rel kawng luh an uh loh chhan chu sawifiahin inchimral an hlauh thu leh khawvel ram hrang hrangah ram neitu te chu chimral an nih thin thu a sawi.

MPC in Sairang thlenga rail kal tir an duh loh chhan an sawite chu -

MFC Party Politiks innghahna
MFC Party hian Politiks-a innghahna bul lungphum pathum kan nei a, chungte chu-
Kan RAM a him tur a ni
Kan HNAM a him tur a ni
Kan SAKHUA a him tur a ni.

Heng kan hnam lungphum pathumte humhim tur hian he party hian din a nih tirh kuml975, April ni 16 atanga tun thlengin, sawrkar-na kan chelh lai leh Opposition-a kan awm lai pawhin, theihpatawpin, kum 34 lai kan lo bei tawh thin a ni.

Mizote chimrala awm kan hlau
MIZORAM hi ram zim te, Square Kilometer 21,081 chauha zau, Sikkim tih lohah chuan India ram state 31 zinga mihring tlemna her, mihring 8,91,058 chauh awmna a ni a. Chua chhapah kan ram hi a tet teh reng nen, ramdang pahnih Myanmar leh Bangladesh karcheha awmin, anni nen hian ramri Km 722 laia sei kan nei a.India ram state pathum Assam, Tripura leh Manipur te nen ramri Km 284 kan nei bawk a.

Heng kan chhehvel ram hrang hrang atanga hnamdang lo lut turte khuahkhirhna dan tha tak INNER LINE PERMIT (ILP) System kan nei reng chung hian, Mizoram chhungah ramdang leh hnamdangmi phalna nei lova lo lut an tam sawt em em a.Tunah chuan heng ramdangmi leh ram pawn atanga phalna nei lova lo lutte hian kan eizawnnaahte min nek chepin, kan hnam nunphung pawh min tichhe nasa ta hle mai a.

Hetianga rampawnlam atanga min chim leh minpawlhsawp lutuk tur lo dang tur hian fing tak leh thiam taka Mizote hi kan tanrual loh chuan rei lo teah keimahni ram ngeiah hian mikhual chan kan chang thei mai dawn a ni.

Chimrala awm tawh hnamte atangin zirlai i zir ang u
Khawvelah hian hnam tam tak, an hruaitute an fimkhur tawk lohna avanga hnam boral ni ta, anmahni ram ni thina mikhual ang maia awm ta an tarn mai a. Chung zinga tlem te chu lo tarlang ila

1 . Tripura - Tripura ram hi tunhma chuan Deb Burman-hote lalram a ni thin a.
Amaherawhchu an lalte chuan an hnam bik humhalhna chang hre lova, nawmsip bawl leh sum leh paia intuak ngahna lam hawi zawng ngawta ram an kalpui avangin zawi zawiin an thenawma hnam lian zawk Bengali-te chuan an chimpil zo ta a.Tunah chuan anmahni ramah hnam tlem zawk leh zehral niin, mikhual nihna dinhmun an chang ta a ni.

2. Cachari-ho- Kan ram thenawm mai Assam state-a Cachari-hote pawh khu tunhmaa East Pakistan ni thin, tuna Bangladesh lo ni ta atanga Bengali-Mosolman lo pemlutten zawi zawia nekchepin tunah chuan nghet takin an thut hnan hmiah tawh a. North Cachar Hill-a Haflong tlangram bul thut velah an thamral zota.

3. Red Indians- America ram luahlumtu hmasa Red Indians-te chu Europe atanga pemlut Saphoten an ramte luahlanin an chimral der tawh a. An hnam an mang loh nan a bika khungkhawmna hmun bik (Reservation)' ahte chauh hmuh tur an awm tawh a. USA-a State 50 awm zingah khuan an hming chawia vuah/ state pakhat hming pawh a awm lo hial a ni.

4. Maoti-ho leh Aborigines-ho: Australia ram lo luahtu hmasa mihanghote chu tunah chuan Mingohoten an chimpil zo tawh a. An ram hmun kilkhawr leh chhengchhe laiahte rethei takin tleme te chauh hmuh tur an awm tawh a. An ram chhunga mipui 100-a paklhat pawh an tling tawh lo.

Inchimralna hmanruate
Hnam inchimralna hi vawi leh khata thil thleng thut a ni lova, zawi zawia kum engemaw zat hnua lo thleng thin a ni. Inchimralna hmanraw lian deuh deuhte chu -

1. Mihring hmanga Inchimralna- Population Assimilation : Hnam tam zawkte leh hnam tlem zawkte ram insi renga an awm a, hnam tam zawkten hnam tlem zawkte chu an tam zawkna hmangin an chimral ta thin a ni.

2. Nundanphunga Inchimralna -Cultural Assimilation : Hnam fing leh changkang tawh zawkten hnam hnufual leh la changkang lo zawkte an hnam nundan phung, chindan leh sakhuana thlengapawlhdal vek khawpa an chimral an awm leh a.

3. Changkan zawkin changkang lote an chimralna - Economic Assimilation : Khawsakna leh sum leh paia lo changkang tawh zawk hnamten, la changkang lo zawkte chu an changkang loh leh an hniam zawknate denchhena an hnuaia kun khawpa an awpna avangin inchimralna a awm leh a.

4. Indonaa Inhnehna avanga Inchimralna -Political Assimilation - Indonaah a hnehtu zawkin an hnehate chu che chhuak thei tawh lo tur khawpa an awp zuia, an thuhnuaia kun tura an awp hlenna avanga inchimralna a awm leh bawk a.

Heng inchimralna hmanruate hi a rualin an thawk vek kher lova, mahse a pakhat chauh pawh hi an hlauhawm em em vek a. A chhan chu, vawikhat chimrala awm tawh chuan dam chhuah lehna kawng zawn chu thil harsa tak a nih thin vang a ni.

Kan kan pi leh pute leh tunhnaiah thangthar Mizo hnam pasalthaten theihpatawp chhuaha thisen leh nunna tam tak senga Mizoram hi chhan an lo tum tawh hnuah, hneh lotu zawka kan tan chhoh tak zel avangin, khawvel insiksawi danglam karah nawrluh (historical compulsion) tela awmin, tal chhuak thei tawh lovin, Mizote chu Political Assimilation hmangin tuk daih kan ni tawh a.

A chunga pathum dangte hmang hian Mizote chu chimral mai theih dinhmunah kan awm mek bawk a. Hengte erawh hi chu kan duhthlannaah a innghat thung a ni.

Kan chhehvela Hnam dangte inchimralna hlauvin an buai
Kan chhehvela state dang Assam, Manipur leh Nagaland te chu an state chhunga ramdangmi lo lut rute lo dan leh khuahkhirh kawngah an ram hruaitu Politician-te an fimkhur tawk loh avang leh an thanharh tlai avangin buaina nasa tak an tawng mek a,Ram leilungfa lungawi lo tihngaihna dang hre tawh lo tam takte chuan hel pawl chi hrang hrang te dinin, ralthuam chelekin, an ram chhungah inthahna leh buaina rapthlak tak tak an thlentir reng a.
North-East-a State lian ber Assam rama Bangladesh ram hrul, ramdangmi lo lut rute awm tam zuaina bik hmunahte phei cnuan, ramdangmiten ram leilung hmun tam takah an hneh tawh a. Heng mite hian Party hran Assam United Democratic Front (AUDF) dinin, Assam state inthlan 2006-a neiah pawh khan MLA 10 lai an nei thei tawh a. Kumina MP thlannaah pawh khan an hoptupa ber Ajmal Barrauddin phei chu Lok Sabha MP-ah thlantlin a ni nghe nghe a ni.

North-East-a kan khawpui lian ber, khawvel kawtchhuah bera kan neih ve Guwahati khawpuiah ngawt pawh khuan ramdangmi 2,00.000 aia tam daih an awm tawh a. Imphal khawpuiah khian ram pawn mi 90,000 lai an awm a Shillong khawpui, Scotland of the East ah pawh khuan sumdawnna 80% chu hnamdang kutah a awm tawh a. An hnam chimrala an awm mek avangin an tihngaihna hre tawh lovin hel pawlte hial pawh an din ve ta a ni.

Inchimralna kawnga Mizote kan vanneihna
Inchimralna kawnga Mizote kan vanneihna em em chu tlangram hmun, hnamdangte tan pawha tlawh pawh harsa tak mai hmuna kan awm hi a ni.

Kan pi leh pute khan Burma phaizawl ram thate kalpelin, Tripura leh Assam phaizawl ram tha zawkte pawh duh lovin, tuna kan chenna Mizoram ngei mai hi an tuchhuan lo piang zel turte thlenga him taka kan inbelbel theihna tur hmun awm chhun nia ngaiin, ngaihtuahna fing tak hmangin he ram hi minlo humhalh sak a.

Burma phaizawlahte khian hnamdang lian zawkte karah lo inzep vein emaw Cachar leh Tripura phaizawlahte khuan hnamdang karah lo inzep ve ta emaw ni selang chuan, hnam hlawm lian tak MIZO tia vuah tur te, ram bik neia MIZORAM tia vuah tur te, sakhua atan pawh KRISTiAN nih lungrual taka thlang vek thei hnam hi he khawvelah hian a lo ding chhuak miah lovang. Heimi kawngah hian tunlai thangtharte hian kan pi leh pute chungah lawmthu sawi kan ba nasa hle a ni

Kan vanneihna dang pakhat leh chu mahnia inrorelna Independence kan sual chhuah theih tak loh rau rau si ah chuan, khawvela sawrkar tha leh ngilnei ber mai, kan hnam bik inhumhalh theihna dan pawh tha tak min petu, sakhaw tinte zalen taka awm tlan theihna. Democracy ram dik tak INDIA SAWRKAR kan bel hi a ni.

Khawvel pumati India thawm a na
India ram hi ram ropui leh chak tak, kum sang tam tak kal tawh atanga hnam fig leh changkang hmasa an ni a. Mihring tam lamah pawh khawvela pahnihna mi 1,147,995.898 lai awmna a ni a. Sumdawnna lamah lah an changkangin khawvel hmun tinah an insem darh nasa em em a, lei vang an dap a ni ngawt mai a.

Fiji ramah chuan mipui 100-a 49 chu India mi an ni a. Sawkar lu ber President leh Prime Minister nihna pawh he ramah hian an chang thei hial tawh a ni.

Qatar ramah 21%, Malayasia ramah 9%, Kuwait-ah 9%. Singapore-ah 7%, Burma-ah 5% an awm a.

Khawvela ram changkang ber US A-ah ngawt pawh khuan India-mi (NRI) 2,000.000 lai awmin, Governor, Senator leh MP ah te hial pawh an awm hial a. Economics lamah pawh USA-a India mi awmte chu sawrkar innghahna bulpui ber pakhat an tling pha a ni

Khawvela ram changkang dang Canada, Australia, England, South Africa leh Russia ramte thlengin India mite chu an inzatpharh nasa em em a. Australia-ah ngawt pawh India mi (NRI) 2,00,000 leh lehkha zir 90,000 lai an awm a. Australia mipuiten hnawk an tih khawpa tam an awm a ni.

Khawvela mi hausa ber pawh India mi niin, khawvel pum huapa hausa tawntaw thlan
chhuah zingah pawh India mi Mittal, Ambani. Bkla, Tata, Prernji etc.,te chu a sang ber ber nihna hauh pha an ni.

India sawrkar hian Diplomacy athiamin, khawvel sawrkar chak leh thiltithei Nuclear Power pawh nei ram, Sawrkar ngialnghet tak nei reng, Economic lamah lah ram thang chak berte zinga mi, khawvel ramdang tam tak Economics lama an tlakhniam mek lai pawha hmalam pana chak taka kal chho thei a ni.

India ram leh India hnam hi ropui tak, tuifinriat ral hla takah pawh an dip na em em an ni a. lndia nen hian inngheng maia awm pawh ni lovin, a chhunga awm kan ni tih hrereng ila. Chuvangin keimahni leh keimahni kan inven thiam hle loh chuan, zawi zawiin HNAM RAL - CHIMRAL HNAM kan ni mai ang tih a hlauhawm em em a, fimkhur taka kan awm a ngai a ni.

Sairang thleng Rel kal tir MFC Party-in kan duh lohna chhan
MFC party-in Mizoram hmasawnna tura hrnalakna hmasa tur paruk kan thlanchhuah (Six Basic Needs tia kan vuah) te zingah, 'Ram chhung inkalpawhna lamlian, tui kawng, rel kawng, thlawhtheihna tumhmun te ngaihpawimawh' tih kan telh a.

Mizoram pawh tura Rel kawng siam chungchangah phei chuan Brig.Thenphunga Sailo Ministry khan theih tawpin hma a la a. Kum 1981 khan Central Railway Minister Kedar Pande chuan Lala Ghat - Bairabi Rel kawng siam tanna turin lung a phum a, kum 1982 atangin hna thawh tan a ni a. Kum 1982 khan Central Railway Minister Shri Chani Khan Choudhry khan Lala Ghat - Vairengte Rel kawng siam remtihna a pe bawk a.

Amaherawhchu PC Party chuan, Assam nena kan inrina bul khaw pawimawh tak pahnih Bairabi leh Vairengte thleng Rel kawnga pawh tir tura theih tawp chhuaha a beih laiin, Mizoram ram chhung laili pawh tura Rel kawng sial erawh chu englai mahin tha a ti ngai lova, a duh ngai bawk hek lo. A chhan chu :

1. Mizoram hi kawng tam takah kan la changkan tawk loh avangin, tun ang dinhmunah hi chuan kan hnam hi humhalhfe a la ngai a. Ram laili thlenga Rel a lo luh chuan Ram pawn lam atanga hnamdangte zalen taka an rawn luh theihna kawng haihawn sakna lian takpakhat a nih theih dawn avangin tha kan ti lo a ni.

2. Mizorama hnamdang lo lu turte khuahkhirhna dan - Inner Line Permit System (1LP) tha tak kan neih mek kenkawhna kawngah harsatna a thlen thei dawna kan hriat avangin.

3. Lala Ghat - Bairabi Rel kawng awmsa Rel kawng lian Meter Gauge-a tihlen leh Lala Ghat - Vairengte Rel kawng siam a nih bawk chuan, phai lam atanga Mizoram laili-a bungraw phurh luhna kawng atan chuan lamlian kawng pangngai hi tha tawkah kan ngai.

4. Mizorama hmun hrang hrangte pawh turin Road Network tha tak buatsaihfel vek a ni tawh a. Hengte hi National Highway leh State Highway thuneituten chak taka an bawh zui phawt chuan rei lo teah kawng tha tak tak kan nei dawn a. Hengte hmanga Motor Transport tihchangtlun hi tuna kan dinhmunah chuan la tha tawk hle turah kan ngai.

5. Bairabi Hydel Project hi paw is a a awm veleha khuah theih mai tura Clearance zawng zawng lakfel vek tawh awm chhun a ni a. Tuna Sairang thlenga Rel kawng lo siam chu Tuikhuah neihna daltu a nih theih dawn avangin tha kan ti lo bawk.

6. Hmasawnna ngawr ngawr aia Ram leh Hnam humhalh hi thiil pawimawh hmasa zawk tur nia kan ngaih avangin.

Mizoram hi India ram State-te zinga pachhe ber leh hmasawnna kawng hrang hranga bul tan ve chauh kan ni a. Kan ram leh hnamin kan la zawh rih loh tur, kan tana thatna aia chhiatna thlen theitu tur a nih dawn phawt chuan hmasawnna tawktarha kan rama thil thar lakluh tur engpawh huaisen takin i hnawl ngam zawk ang u.