Remna Ni ka pawm lo: L Malsawma Colney

Mizoram chuan June ni 30 hi Remna Ni tiin a serh thin. MNF leh India sorkarin remna an ziak ni a ni a, sorkar pawhin he ni hi chawlhah a puang thin. Chutih laiin Mizo pa lar L Malsawma Colney chuan he ni hi engah mah a ngai ve lo. A ngai ropui lo mai a ni lo, a ngainep a, a thin a tirim hial.


"June ni 30 hi ram hralhna ni a ni," L Malsawma Colney chuan a ti.

"Remna Ni a ni lo. India laka kan ram kan hralhna ni a ni," a ti a, "Hei vang hian kan chhiatna hrang hrang, rukruk te, milem biakna te a lo lut a ni," a ti bawk.

Zalenna sualin ramhnuaiah a chhuak a, ramhnuai sorkarah dinhmun pawimawh tak tak a chelh thin. January ni 25, 1979-ah MNF president atan thlantlin a ni a, he nihna hi a chelh rei ta lo thung. Ramhnuai sorkar hruaitute thu a inhmu ta lo a, March ni 11, 1979 (Pathianni) zanlaiah L Malsawma Colney chu silai hmangin a hote'n beiin, a nihna an hlihsak ta a ni.

Mahse, L Malsawma Colney chuan Zofate zalenna a la tuipui a, India hnuaia awm turin Zoram hi a la phal lo. MNF president-ah thlantlin a ni a, dan lovin, silai hmanga paihthlak a ni a, chu chu a pawm thei lo. Vawiin thlengin MNF president-ah a la inngai. MNF leh India sorkar inremna pawh a pawm ve thei lo a, Remna Ni pawh a tan chuan pawm ngaihna a awm lo.

"Mizote hi India mi kan ni lo," tia sawiin, "Hemi ni-ah hian kan ram chu vaiho lakah kan hralh a, hei hi a sawi ngam kan mamawh. Keini chuan independent kan duh a, chu chu kan sual a ni. Milem nih kan duh tur a ni lo," a ti.

"MNF hian thil tum pathum kan nei a; Mizo hnathlak hrang hrang, ram insi-a awm reng si, ramriin a thendarhte hi insuihkhawma, thuneihna hmun khat-a rorelna sang ber hnuaia awmho hi MNF thil tum pakhatna a ni," tiin a sawi a, Israel fate'n ramtiam an thlir ang khan Malsawma Colney chuan hei hi vawiin thlengin a la thlir reng.

'Map of Zoram' a siam a, chu chu "Mizo Hnam Movement chhunzawmna a ni," a ti. Chu map chuan hmun hrang hranga Zofate chenna hmun a huam; khawthlang lamah Bangladesh-a Chittagong Hills vela Mizo khuate a chuang a, Tripura-a Sakhan tlang dung leh Jampui tlang dung te a huam bawk. Hmar lamah Cachar Hills-a Mizote chenna zawng zawng, khawchhak lamah Burma rama Chin Hills-a Mizote khua leh Manipur-ah Churachanpur leh a chhehvel te a huam a ni. Chu'ng zawng zawng chu insuihkhawma mahnia ro inrela awm chu Malsawma Colney rilru luah tlattu a ni a, chuvangin MNF leh India sorkar inremna pawh a pawm ve lo.

"Pathian hmingin ram leh hnam tan kan inpe a, mahse, Mizo Hnam Movement chu tihbuai a ni a, hmala ve thei lovin kan awm ta a ni," tia sawiin, "Awm mai mai thei kan ni lo; Zofate kan insuihkhawm leh theih nan a theih ang angin hma kan la tur a ni," a ti a, "Kan ram chin hi fel takin siam ila, kan awmna chin hi fel takin ramri siam ila, UN-in 'khawi nge' a tih pawha show tur neih a ngai," tiin Zoram map a siam chhan a sawi a ni.

"Mizoram president atana thlan ka ni a, dik lo takin min paihchhuak a ni," a ti a, Mizo Hnam Movement chu tawp mai turin a phal lo. Chuvang chuan Remna Ni pawh a pawm ve lo.