Kuthnathawktute tanpuina sem dan mak

Durtlang North VC huam chhungah tun hnaiah kuthnathawktute tanpuina sem a ni a, hei hian sawi a hlawh hle. Lok Sabha MP pawh tanpuina dawngtu zingah hian a tel.

RCC Water Harvesting (tuikhuah) siamna tur leh Countour Trenching (leitha khawlna) siamna atan sorkarin Durtlang North VC huam chhunga chhungkaw 55-te hnenah tanpuina sum a pe a, ram nei lo leh a dawng tawhte'n an dawng nia an hriat avangin khawtlang mipuite'n an sawi duh hle. Tin, MP-in he tanpuina sum a dawng ve chuan sawi a hlawh hle bawk.

Veng chhung YMA chanchinbu - 'YMA AW"-ah June ni 6 chhuakah khan he sum dawngtute hming hi tarlan a ni a, hetia YMA chanchinbu meuha tarlan a ni pawh hi sawi neuh neuh a awm vang nia thu dawn a ni.

June ni 2-ah sum hi District Agriculture Office atanga lakchhuah a ni a, a tuk - June ni 3-ah semchhuah a ni. YMA chanchinbu enkawltute hian VC te hnen atangin sum dawngtute hming hi an dilchhuak niin VC hruaitute chuan Zozam Weekly an hrilh.

RCC Water Harvesting (tuikhuah) siamna atan hian chhungkaw 27-in first installment atan Rs 12,500 theuh an dawng a, Contour Trenching siamna atan chhungkaw 28-in first installment Rs 5,000 theuh an dawng bawk.

Khawtlang hruaitute hnen atanga thu dawn danin RCC Water Harvesting (tuikhuah) siamna tur dawngtute zingah hian chhungkaw 8 chu ram nei lo an ni a, a dawng tawh chhungkaw 6-in an dawng nawn bawk. RCC Water Harvesting (tuikhuah) siamna atan hian Mizoram Lok Sabha MP CL Ruala pawhin tanpuina sum hi a dawng ve. Ani hian Durtlang ramah huan a nei.

Countour Trenching (leitha khawlna) siamna tur sum dawngtu zinga chhungkaw 12-te chu ram nei lo an ni tiin thudawn chuan a sawi.

VC lam chuan he'ng tanpuina sum dawng tur hi an thlang lo niin an sawi a, Congress Unit-in an thlang niin Zozam Weekly an hrilh.

"VC inthlan hma deuhah khan bialtu MLA-in an unit te hnenah a rawn hrilh a, an buaipui zui ta niin kan hria," tiin VC hruaitu pakhat chuan a sawi.

"Unit hian a dawng tur an thlang a, chu chu bialtu MLA hnenah an thehlut," tia sawiin, "VC lamin kan hriatpui lo," a ti bawk.

"A dawng tawh thenkhatin an dawng nawn a, hei hi a awmzia kan hre chiah lo a, an dawn tawh chuan an nei tawh tihna a ni a, dawn nawn a tul lo turah kan ngai," tiin VC hruaitu pakhat chuan Zozam Weekly a hrilh.

"Ram nei hauh lote'n an dawng hi chu a awm lo khawpin ka hria. Helaiah khawtlang kan inhrechiang a, TV lei nana hmang ta daih te pawh an awm a, amaherawhchu, ram an neih miau loh avangin an tan TV lei mai loh chu sum hmanna tur a awm hlei nem ka ti mai a!" a ti bawk.

"Khawtlangah he thil hian sawi a hlawh a, mipui hian mak pawh an ti hlawm khawp mai a. Sawi neuh neuh a tam khawp mai. YMA hruaitu lam hian VC-ah a dawngtu list hi an rawn dil a, chanchinbu lamah khan an chhuah ta a nih kha," tiin VC hruaitu pakhat chuan a sawi.

"Dawng tura inngai, dawng ta si lo an tam a, chutih laiin ram nei lote'n an dawng a, tin, a dawng tawh thenkhatin an dawng leh bawk a, lungawi lo an tam khawp mai. Party chhungkuaah pawh lungawi lo an tam," tiin khawtlang hruaitu pakhat chuan a sawi.

"Term hmasaah kha chuan mimalin department-ah an dil a, department lamin an endik thlap hnuah a dawng tur an thlang thin. Kuminah hi chuan chutianga endik engmah a awm lo," VC hruaitu pakhat chuan a ti.

Rs 12,500 dawngtute hi Congress Unit-in party fund atan Rs 200 an cut sak a, Rs 5,000 dawngtute hi Rs 100 an cut sak bawk nia sawi a ni a, YMA Aw-ah pawh MNF Unit thuchhuah tarlangin, chu thuchhuahah chuan party fund atana cut sak an nih thu hi a lang a ni.

'YMA AW'-in hemi chungchang an chhuah tum hian Durtlang North MNF Unit thuchhuah pawh YMA chanchinbu hian an chhuah.

"DAO Aizawl hnuaiah khuthnathawktute tanpuina tur pawisa chu bialtu MLA thurawn angin Congres party unit hruaitute'n party mi induhsak nan V/C te hriatpuinain Tuikhuah tanpuina leh Leitha khur siamna tur pawisa an sem a, heng dawngtu zingah hian huan/ram nei lo leh mi in luaha awm te, kan MP ni lai CL Ruala te pawh an tel a ni. 'Miretheite kan VIP an ni ang' tia 'NLUP thami kan sem ang' titu party sorkarah hian induhsakna uchuak tak, kalphung thar, 'corruption a zung nen kan phoro ang' titu party te hian unit sum atan, a dawngtu hnen atangin Rs 100-200 an cut sak hi Durtlang North MNF Unit Committee chuan pawi kan tiin kan dem tak zet a, tun hnuah hetiang hi thleng tawh lo se kan duh tak zet a ni," MNF unit thuchhuah chuan a ti.

YMA AW-ah chuan tiang hian an ziak: "District Agriculture Officer, Aizawl District hnuaiah kuthnathawktute tanpuina Durtlang North huam chhunga chhungkaw 55 hnenah sem a ni," tiin. "Durtlang North huam chhunga chhungkaw 55" ti kherin he thu hi an ziak.