A |UL CHUAN MITTUI NEN PAWH RUANG HI KAN ZAWNG ZEL ANG...

August ni 27-a
Kurung lui-a tuitla Vanlalrema 5th IR ruang chu thawhlehni (August 30) chhun dar 11:15 khan a tlakna atanga feet 300 velah hmuh a ni.
Vanlalrema leh a thiante pahnih hian August ni 27 khan Kurung luiah hian len an deng a, sangha Kg 3 vel an man hnu chuan tlai dar 3 velah hawn tumin lui dung an zawh chho a, lungpher atanga lungko danga an lawn kai tur chu chesualin Vanlalrema chu lungpher leh lungpui inkara tui luang chak takah a tla lut ta hlauh mai a, lungpher hnuai puk thuk takah tui khauh tak chuan a len ken lai chawpin a len lut ta a ni. He lui hi a khawkrawkin a chhengchhe em em a, a tlak luhna atanga thlang deuhah tui hi chak takin a luang chhuak leh a, chutah chuan a thiante pahnih chuan engemaw chen an lo chang a, mahse engmah an chan chhuah tak si lohah chuan mi dang an pun ta a ni.
Vanlalrema Kurung luiah a tla tih hriat a nih veleh Sairang, Sairang Dinthar leh Sihhmui atangin tui thiam rualin ruang zawn hna hi an thawk nghal a. Tui a tam avang leh a lui dung hi, lung khawkrawk chet harsa tak mai a nih avangin tui thiam tak tan pawh chetsual hleka thih mai hlauhawm tak a nih avangin Val Upate chuan ruang zawnga lui dung luhchilh tur pawh hian mi na zawng kal an phal lo. Tui thiam leh helai lui dung chinchang hriate thlang chhuakin, group-ah insiamin group tinah hruaitu bik an ruat thlap thlap zel a. Chutianga uluk leh fimkhur taka ruang zawn hna an thawk chung chuan, vanduaithlak takin, ruang zawngtute zinga mi Sairang tlangval Biaknunga kum 22 chu August ni 28 (Chawlhni) khan Kurung luiah hian a chesual ve leh ta hlauh mai a ni.
Biaknunga te group hi group number 3 an ni a, an group-ah hian mi pasarih an awm a, pathumte chuan hma hruaiin an kal hmasa a, pali dangte chu hnung deuhah an rawn kal ve bawk a, sawi tawh angin he lui hi a khawkrawka lungpui leh lung bang sang tak tak hel ngai a tam avangin inzui diah diah reng hleih theih a ni lo fo ang. Biaknunga chesual lai hi a thiante zingah tumah hmu an awm lo. Biaknunga thiante luikam a an kal vel chuan lungpui bul tuia mihring ke lo lang chu an zuk hmu ta mai a, an hmuhna atang hian ruang awmna hi feet 30 vel lek mah nise lui hi a khawkrawk em avangin ruang awmna hi an pawh mai thei lo.
Mihring ke ngei a ni tih erawh an hmu chiang hle a, an mi zawn Pu Vanlalrema, 5th IR ruang ni ngei turah an ngai a, mi dang hrilh turin lamkal an intir nghal a. Chutia an thlir lai chuan ruang chu tuiin a len sawn a, a pil zui leh ta mai bawk si a, an mangang hman hle mai. Lui mawng lamah an tlan khalh a, a thlang lawkah chuan lui lah chu hmun hnihah a inthen phawka a khawi zawkah nge ruang hi a len tak ang! Lamkal an intir then bawk si an indaih lo hle mai. Mahse, mi dang an rawn thleng thuaia ruang an hmuh tanna atanga feet 100 vel, lungpui ti rek ruk hmunah ruang chu bawkkhup zawngin tui luang chuan a len bet leh ta hlauh mai a.
Ruang chu a bawkkhup avangin, an thianpa, an group member Biaknunga ruang a ni tih reng reng an la hre chuang lo. Vaukamah hnuh chhuah tuma an bawr lat lat lai te chuan a hma ni a, tuitla ni si a dul leh taksa a la puam lem miah lo te chu mak a ti hle tih an group leader chuan min hrilh nghe nghe. Tichuan, vaukamah an zalha an han enchiang chu leh!..an thianpa an group member Biaknunga a lo ni reng mai si..an hrilh a hai tlang ngei mai! Nichin lawkah an inzui tlang si..a la reilo lulai em mai..thawktir leh hram dan a awm thei ang em le!..a dulah te nemin a taksa a letling zawnga dahin a kawchhunga tui tih chhuah te an han tum a, mahse an thianpa hi chhan theih a ni tawh lo. A hma lawka inzui tlang, an zingah a la awm ve zel tura an ngaih, an thianpa ruang an chhar ta mai chu mak an ti a, a tlak lai hmu leh hria an awm bawk si lo. Biaknunga hmuiah hian hliam a awm a, a hnarah atangin thi a chhuak bawk niin an sawi.
Lungpui sira Biaknunga ke lo lang an hmuh hlim khan an mi ruang zawn Vanlalrema ni turah ngaiin ruang an hmuh thu te pawh an hrilh darh hlawm a, Sairang khuaah pawh vantlang mike-in Vanlalrema ruang hmuh a nih tawh thu an puang hman a, chu thu chuan vahchap kang ang maiin hun rei lo te chhungin Aizawl khawpui pawh a fan zau hman hle. Mahse, tlangval tlawmngai huaisen thian chhan nana a nun hlantu Biaknunga ruang zawk a lo ni..
Sairang khawtlang hi an fakawm thlawt a ni. An thian duhtak ruang an chhar ta mai hian an rilru a ngawng na hle mai. Mahse, an beihpui thlak mekah chuan tlawm an tum lo a, an in sang mar sauh sauh zawk a, "A tul chuan mittui nen pawh ruang zawn hna chu kan chhun zawm ang a, he kan ruang zawn hi chhuah kan tum lo a ni," tiin an Pi Teressa, Sairang YMA President chuan LPS Report-a ka interview-in min hrilh a ni. (Pi Teressa, Sairang YMA President hi kum 64 mi a ni a, Sairang Joint YMA ah President te pawh lo ni thinin, Sairang Branch YMA ah hian kum 2 President hna a chelhna a ni). YMA President-in a lo sawi tawh angin tukin (August 30) khan khawtlang hruaitute ruang zawn zel dan tur chungchangah an inhmu khawma, "Kan khaw tlangval tlawmngai Lalbiaknunga'n a nun a hlanna a nih avang pawhin he ruang hi tuiah emaw, khawmualah emaw kan hmu ngei ngei tur a ni a, kan hmuh hma chuan kan zawng tur a ni" tih chu kalkhawm te tho rolum chu a ni ta bur mai a ni.
August 30 chuan khua a tha tan ta a, ruah tih tham pawh a sur ta lo a, Kurung lui pawh chu a kam chak khawp mai. Tlangval tui thiam rual chu group hrang hrangah inthenin lui dung suartluan turin an thawk chhuak ta. Vawiin (Aug 30) hi Vanlalrema a chetsual ni atanga ni 4 hmel a hmuhna a ni tawh a. Fimkhur takin tumruhna zawng zawng nen tlangval rual chuan ruang zawn hna chu an bei tan leh ta a ni. Tichuan chumi ni chawhma dar 11:15 velah khan a tlakna atanga feet 300 vel a hla, lungpui kehkak karah Vanlalrema ruang chhe tawh tak chu an hmu chhuak ta a ni.
Ruang hi a pilh nasa tawh hle a, thawmhnaw pakhat mah a inbel tawh lo. A puam nasa hle a, a kuang tura an siam pawh hmang ta lovin kuang dang lian zawk an siama tah chuan an zalh ta a ni. Vawiin chhun khan Vanlalrema ruang hi Sairang damdawiinah postmortem a ni a, postmortem tih zawh hnu hian Sairang khawtlang VC leh YMA ten a thlahna hunserh tawi te an hman zawh hnuin an veng, Chite veng lamah lak a ni ta a ni.
He chhiat tawhnaah hian 5th IR bakah Mizoram Police te an thawk tha hle a, Aizawl veng hrang hrang atangin tlawmngaia thawk chhuak an thahnem hle bawk..Mizo nih hi a van nuam tak em!
(A ziaktu hi LPS-a Special Report ti \hintu a ni)

Related Posts :